Minepa Hitonko Okhala ni Okumi nari Okhwa Veelaponi Yavathi

Minepa sookhalawo! Mu elapo yoohooneya ya minepa, wookhalawo minepa saphaama ni minepa soonanara. Mano yaawo ti achu yaakhanle ni okumi veelaponi yavathi evinyaka ekhwa?

Hooye, tahiyaawo. Vaavaa muchu akhwa, nari mulopwana akhweya muthiyana, hanaya o elapo ya minepa ntoko achu ancipale anuupuwelaaya. Mano hiyo nnasuwela mwawiihayi yeeyo? Nthowa nawi Piipiliya tonaloca hiihaa. Piipiliya, ti liivuru eeparipari onarweela wa Muluku mmoharu eeparipari, orino nsina nawi Yehova. Yehova taapatunxe achu; Owo oosuwela phaameenexa tiheeni eneereya ni achu ookhwa.—Masaalimu 83:18; 2 Timoteo 3:16.

Piipiliya onaloca wi Muluku aamuupa Aatamu, mulopwana oopacerya, “ni nchupi na echaya.” (Mapacereryo [Genesis] 2:7) Muluku aamukuha yoowo mparadaiso, emaca ya Eeteni. Waakhanle wi Aatamu ahiiwelela nlamulo na Yehova, hakaakhwile; owo aahaala okhala mukumi ophiyerya olelo veelaponi yavathi. Nyenya vaavaa Aatamu ahiweleenleiye mwayini nlamulo na Muluku, Muluku aahimuleela yoowo: “[Onamuchikela] vachayani, ntakhara mwa echaya wuupiwaa. Evelevelo weyo wa nchupi, nave onarwa okookela okhala nchupi.”—Mapacereryo 3:19.

Mano eyo enathaphulela eheeni? Phaameene, Aatamu aari woowi Yehova ahaakunve ompatuxa owo mwa nchupi? Haari onipuro nikina. Haari munepa mmoha wirimu, awehereryaka oyariwe veelaponi yavathi. Owo haakhanlewo chiri. Nyenya vaavaa Yehova aalonceiye wi Aatamu “onarwa okookela okhala nchupi,” Yehova aachuna oloca wi Aatamu ahaala okhwa. Owo havinre ayaaka o elapo yoohooneya ya minepa. Va okhwa, Aatamu ahikookela ohikhala ni okumi wanawiili, ohikhalaworu chiri. Okhwa ti ohikhalano okumi.

Mano hinka achu akina akhwile? Awo akookenle tho ohikhalawo chiri? Piipiliya, onnaakhula:

“Oothene [nari achu awo ntoko axinama] yaarweenle onchupini nave oothene anakookela onchupini.”—Eklesiasti 3:20.

“Achu ookhwa . . . hanasuwela echu eri yoothene.”—Eklesiasti 9:5.

“Osivela waya, omwiicani aya, ni ehache aya soorimela.”—Eklesiasti 9:6.

“Hiwaawo muteko, nari wuupuwelela nari osuwela, nari miruku o Seol [omahiye], o nipuro onayaawewo.”—Eklesiasti 9:10.

“[Mulopwanoowo] [o]nakookela onchupini, nihiku nene nenlo miteko sawe uupuweleleiye sinnamala.”—Masaalimu 146:4.

Mano munoona okhala yoovila ororomela makupa yaala a Piipiliya? Wakhala wi tihiihaa, nkaanyiheryani ela: Mu ichoko sincipale, mulopwana tonakhalano ikorowa wi akhaviheryeno emusi vaate vawe. Vaavaa mulopwanoowo akhwa, echoko eyo ennakhalano makachamiho. Ikwaha ikina mwaariye owo ni anamwanaawe, hanakalano sookhwaanela wi yiithumele soolya. Akhweya annakhala ohooxiwa ni amwiicani a mulopwanoowo. Vano nyuwano mwiikohe mekhiinyu: ‘Wakhala wi mulopwanoowo mukumi mu elapo ya minepa, nthowa taani hanapwahiherya waavyavya ichu wi akhaviheryeno echokwaawe? Mano ntakhara heeni hanaakiha echokwaawe wa achu oonanara?’ Ti nthowa nawi Piipiliya ori evelevelo. Mulopwanoowo haano okumi, hanawerya weera echu eri yoothene.—Masaalimu 115:17.

Mano yeela enataphulela wi achu ookhwa heerwa ekhalano tho okumi? Hooye, tahi hiihaa. Voohilekela nnahaala oloca sa ovinya wa achu ookhwa. Nyenya, ela enataphulela wi achu ookhwa hanasuwela yeeyo hiyo nneerahu. Achu ookhwa hanawerya onoona, hanawerya oniiwa nari oloca ni hiyano. Honachuneya owoova yaawo. Achu ookhwa hanawerya onikhaviherya nari oniporeya hiyo.—Eklesiasti 9:4; Yesaya 26:14.

[Eruku va epaaxina 4]

Aatamu aarweenle onchupini, nave okookenle okala nchupi

[Iruku va epaaxina 5]

Achu akumi pahiru tanawerya weera ichu iha

[Iruku va epaaxina 6]

Achu ookhwa hanawerya waakhaviherya achu oovoliwa etala, nari mano owiikhicha yaawo anahooxiwa