Michaka ya Omwene No. 38 Inahaala okaiwa mu Novempuru!
1. Makoho taani achu aryaayano vooloca sa okhwa,nave ti mwawiihai anahaalaaya waakhuliwa mu Novempuru?
1 Okhwa ti mwiicani a achu oothene, moohipwacha soororomela saya. (1 Akor. 15:26) Ancipale annatikiniheya, ti woowi alipa ookhwa aryaayawo nave anamukookela okhala akumi wanaawiili. Mwawihiihaa, miloko orukurerya elapo yoothene inahaala omaliha mweeri mmoha ikawaka Michaka ya Omwene No. 38, orino muru Alipa Ookhwa Anamukookela Okhala Akumi Chiryene? Ekampaanya ela ya vameekhaaya enahaala opacerya 1 a Novempuru. Yamala ekampaanya, Michaka ya Omwene No. 38 onahaala ophariheliwa muteko ntoko etratado.
2. Michaka ya Omwene No. 38 epakiwe hai?
2 Epakiwe Hai: Michaka ya Omwene No. 38 epakiwe wi ekhuniweke wi enooniherya ohoolo muru wootikiniha orino masu “Mwaahaala wi . . . aayi? hooye? akhweya?” Vaavaa mulipa awaalakhanya onahuleiye Michaka ya Omwene, owo onahaala woona yeeyo Piipiliya onaloceiye aakhulaka nikoho nri muru,nave tiheeni sooloherya sa Piipiliya inataphulelaaya wa owo. Owo tho onahaala woona ntakhara heeni poti omuroromela Piipiliya. Oculi wa Michaka ya Omwene nookhalawo nikoho nooreera wi owo uupuwele vooloca sa yeeyo, nave nnanwopa owo wi ahuserye sincipale.
3. Michaka ya Omwene No. 38, enahaala okaiwa hai?
3 Enahaala Okaiwa Hai: Ekampaanya ela enahaala ophwanaphwana ni ya okawa nwopelo wa Mukonelo ni wa kongreso. Mansiau anahaala ohoolela ti mwawiihai ekulucu enahaalaaya omalihiwa mwawiiwanana ni ekaarata awo aakhenlaaya erino edata 1 a Apirili, 2013. Miloko irino ikulucu vakhaani, poti wiivaha wi ikhaviherye miloko sawaacamela irino ikulucu sawaaca. Vaavaa munakusaanyu Michaka ya Omwene No. 38, muupuwele wi munaphwanela okuxa seiyo munahaalaanyu okawa va esumana emoha. Variyari va ekampaanya, Michaka ya Omwene poti okaiwa mu onamoona wa vanlakani yamala ekulucu ya empa ni empa. Wakhala wi Michaka ya Omwene soomala nave mweeri homanle, soolaleeryiwa sa mweeri inaphwanela ovahiwa. Nawoorowa oopacerya, hiyaano nnahaala ohela vahoolo ekampaanya ya vameekhaaya ohiya opaceryiha soohuserya sa Piipiliya. Omakuchuwelo wa esumana, hiyaano tho nnaphwanela okawa irevista wakhala woophwanelela. Munnapaka marehereryo wi mukhaleno wuuka wawaaca mu ekampaanya yeela ya vameekhaaya?