Nwopelo Wavameekhaaya
1. Mukipici wa nwopelo wa mithukumano sa 2014 onahaala opacerya liini?
1 Waakhala wi nyuwaano munarehererya yoolya yavameekhaaya wa asinthamwene naari amusi, yoolya eyo enachuneya wiilipixerya ni ikhorowa sincipale wi murehererye, nto mwahaala okhala oohakalala vaavaa munaawopaanyu. Moolikana, woopakiwa muteko mutokweene mu orehererya efesta yoomunepani yeeyo enahaala operekhiwa mmithukumano sahu sa miceche ni sa ilapo soohiyana sa 2014. Isumana raru muthukumano ahu wa muceche ohaakumve, hiyaano nnahaala okhalano ekari ya waawopa akina wi eyewo. Tiheeni enahaala onikhaviherya ovaha nwopelo ni ohakalala?
2. Tiheeni enahaala oneeriha wuuka phaama mukipici?
2 Wakhala wi nohuupuwelela moothamalela mphurelo nnaphwanyaahu mukhatihu moorweela wa efesta yoomunepani yeeyo Yehova onavaheiye mmithukumano sahu sa muceche enahaala oneeriha wuuka phaama mukipici owo. (Yes. 65:13, 14) Nnaphwanela wuupuwela tho wi, mukipici ahu wa vayaakhani onnakhalano sookhumelela. Achu akina a yaawo nnaawopahu anahaala okhala va muthukumano wa muceche vamoha ni hiyaano. Moohipwacha waakhulela wa ancipale, owetha wahu variyari va mukipici onahaala omuhakalaliha Yehova ni wooniherya mahala awe.—Sal. 145:3, 7; Yaw. 22:17.
3. Miwopelo inahaala okaiwa hai?
3 Khata nikhuuru na asitokweene nnahaala olakelela moota wa okawa miwopelo, ophitaanyerya ti liini onaphwanelaaya ohiya vaate ohikhaliwevo naari okawa mu onamoona wa vanlakani mu ekulucu. Omakuchuwelo wa isumana irevista poti ovahiwa vamoha ni nwopelo wakhala woophwanelela. Wakhala wi Nawoorowa oopacerya a mweeri nihiku na mukipici, onaphwanela othokororyiwa okawa miwopelo opwaha opaceryiha soohuserya sa Piipiliya. Mukipici wamala, nnahaala ohakalala osuwela wi nookhaviherya moohakalala nave wi nohaawopa achu ancipale anaweryeya wi yuuke ni hiyo mu efesta yeeyo Yehova ovanheiye!
[Ekaaxa va epaaxina 9]
Munahaala Oloca Hai?
Mwamala olocela, nyuwaano poti oloca: “Hiyaano nnakhaviherya mukipici veelaponi yoothene wa waawopa achu wi eye o yaweereya yoochuneyaxa. Nihiku, elukuluku, ni nipuro soorempwa va nwopelo yoola.”