Nwopelo Wawooneya
1. Mukipici wa okawa nwopelo wa muthukumano wa muceche onaya opacerya liini?
1 Wakhala wi nyuwaano munachuna orehererya yoolya ntakhara amusi naari asinthamwene, onahaala ochuneya wiilipixerya ni ovaha sookhalano sanyu wi mwiirehererye, nave munaphwanela ovaha nwopelo owo moohakalala. Moolikana, muteko mutokweene onnaphariwa wi ereheryiwe yoolya yoomunepani yeeyo enahaala operekhiwa mmuthukumano wa muceche onoorwa. Ihalaka isumana raru wa nihiku na muthukumano, Yehova onnanivaha ekari ya waawopa akina wi nthukumane vamoha. Tiheeni enahaala onikhaviherya okawa nwopelo ola moohakalala?
2. Tiheeni enahaala oneeriha wiilipixerya opaka makupa mmukipici yoola?
2 Nnahaala wiilipixerya opaka makupa mu okawa nwopelo wakhala wi ninnuupuwelela ni othamalela mukhalelo nnaphuraahu mahusiheryo mavyaani yaawo Yehova onavaheiye mmithukumano sa muceche. (Yes. 65:13, 14) Nnaphwanela wuupuwela tho wi, mukipici yoola wa vayaakhani onnaruuha sookhumelela. (Moone ekaaxa “Ela ennaruuha sookhumelela.”) Akina nnahaalaahu waawopa anahaala ophiya omuthukumano nave akina hooye. Moohipwacha mukhalelo achu anaakhulelaaya, wiilipixerya wahu variyari va mukipici onahaala oruuha ncicimiho wa Yehova ni othamalela mahala awe.—Sal. 145:3,7; Yaw. 22:17.
3. Nwopelo onii okaiwke hai?
3 Nikhuuru nri noothene na atokweene nnaphwanela olakelela ti mwawiihai nwopelo onahaalaya okaiwa, ophitaanyerya waakhanle wi onnaphwanela ohiya nwopelo vaate ohikhaliwevo naari okawa variyari va onamoona wa vanlakani. Omakuchuwelo wa esumana irevista inaphwanela ovahiwa vamoha ni nwopelo wakhala wooweryeya. Mukipici waaphiya omakuchuwelo, nnahaala ohakalala vancipale osuwela wi noopaka makupa mmuteko woohakalaliha wa waawopa achu ancipale wi nthukumane vamoha mu yoolya yoomunepani yeeyo Yehova onanivaheiye!
[Ekaaxa va epaaxina 4]
Tiheeni Munahaalaanyu Oloca?
Mmanle olocela, muloce: “Nnapaka makupa a mukipici oneererya mu elapo yoothene ya okawa nwopelo ola ntakhara muthukumano woochuneya. Nihiku, elukuluku ni nipuro noorempwa va nwopelo yoola.”
[Ekaaxa va epaaxina 4]
Ela Ennaruuha Sookhumelela
• Iyaakha sivinre vaavaa murokora akaweiye nwopelo, owo aanakhwa minikwa wakhala wi wiilipixerya wawe waakhalano mphurelo. Owo aanikoha, ‘Apwanne achu anahaala weemererya othukumana ni hiyaano?’ Nihiku nawoorowa wooxixelo aamoona mulopwana aakiranthe vakhiviru vawe, nave aalakelela omulociha. Eyo yaahooneya vanlakani wi owo aarimuwompwa oya omuthukumano. Owo aakhalano makoho mancipale yaawo murokora aakhunleiye. Nave aaloca mukhalelo aaphunreiye muthukumano owo nave aatikhiniheya ni mukhalelo wahooleliwaaya. Voocharela nihiku nimohamoha, murokora aahipacerya ochekula ni mutheli aakiranthe vakhiviru vawe. Awo tho yaakhenle nwopelo nave erwa ni ekaaro. Awo yaasiveliwa ni muthukumano nave yaalakelela tho othukumana vamoha Namurunku. Vano murokora ahoona ochuneya wa mukipici yoola wa vayaakhani.
• Mmuthukumano wahiihaanoru, mulopwana ni mwaariye yaawo aari mapiyoneero a elukuluku yoothene yaamulociha mutheli awuuluvala. Mutheli aaloca wi yaari ekwaha yoopacerya ophiya o muthukumano. Mapiyoneero yaamukoha: “Taani owompeni?” Awo yaahaakhula: “Niphwannye nwopelo owaani, vathi va nsele nahu.” Awo yaahaalakhanya nwopelo nave yaalakelela oyawo naamwi yaari ooceecheya. Muhooleli mukina a muthukumano aahuuka yoolya awe ni mutheli mmoha. Awo yaasiveliwa vancipale ni muthukumano nave tho yaalakelela okooka nihiku noocharela. Marehereryo yaapakiwa wi exekuriwe nave nchuno naya naanaya vahoolo.