Ekampaanya Enaruuha Mphurelo

Isumana chaaru ahaakumve opacerya kongreso aya, miloko inahaala opaka ekampaanya wi yaawope achu anachuna va ekulucu aya wi eyewo. Nookhalavo nthowa naphaama wa ekampaanya yeela ya vayaakhani. Yaale aneemererya nwopelo nave anarwa va kongreso wiiliwiili annakhala ootikiniheya ni miyaha sa Piipiliya, idepartamentu sooreheryeya phaama inakhaviheryiwa ni alipa awiivelela, ni meecelo aphaama ni wiiwanana nnooniheryaahu. (Sal. 110:3; 133:1; Yes. 65:13, 14) Naamwi hiiha, ekampaanya ahu ennaruuha mphurelo, xaxaxa mu mapuro yaawo alipa oochuna aneecaaya mikwaha soorakama wi ephiye va kongreso?

Avinre kongreso edistritu a 2011, efiliyale emoha yaahaakhela ekaarata yoorweela wa muthiyana aaphwannye nwopelo va nsele nawe. Owo wiiliwiili aaniipitha vaavaa Anamoona a Yehova yaamanaaya nsele. Owo aarepa: “Miyaano kaakhalano empa yaphaama, iyaka ootikiniha, nave kuupuwela wi kaakhalano ichu soothene saahaala okeriha okhala oohakalala. Moothananiha, nlelo nkaari oohakalala, nave okumi aka chiryene hiwaarino yoolakelela. Mwawiihiiha kaahilakelela weeciha ekaaro ikilomeeturu 320 wi kawiriyane eprograma ya Nawoorowa.” Owo aahoona oreera vancipale ophiyerya waaleela aiyawe alocaka ni telefone wi aahaala okona weiwo nave wi awiriyane tho Namurunku. “Miyaano kaahiwiriyana miyaha soothene, kaahiwoona Anamoona a Yehova ancipale, nave kaahilakelela wi nkaachuna wi eyo emale.” Amanle okookela owaani, owo aahipacerya ohuserya nave imanle miyeeri mixexe aahikhala mulaleeryi oohipatisiwa. “Kiri oohakalala vancipale va ophwanya nwopelo va nsele naka ntakhara wi mweeparipari vano okumi aka wookhalano yoolakelela!”

Akina yaawo anaakhela nwopelo anahaala oyawo. Mwawiihiiha, mukhaviherye mwamvai ekampaanya ela yookhweleya. Muruuhe miwopelo ihanle o muceche wa kongreso, nave mpharihele iho weerela onamoona wa vanlakani.

[Eruku va epaaxina 5]

Nnahaala Ovaha Hai Nwopelo?

Wi nakhwaniherye ekulucu ahu, nnaphwanela okhala awaakuveya. Nnaphwanela oloca echu ntoko ela: “Mooni. Hiyaano nnakhaviherya wiilipixerya oneeriwano veelaponi yoothene wa okawa nwopelo ola. Ola ti wanyu. Munahaala ophwanya sooleliherya ikina va nwopelo.” Mukhale oohakalala. Vaavaa nnakhaviheryaahu ekampaanya omakuchuwelo wa esumana, nnaphwanela tho ovaha irevista wakhala woochuneya.