Elukuluku ya Wuupuxerya Okhwa wa Yesu, Munahaala Otakiherya Mvai wa Yehova ni Yesu?
1. Mu elukuluku ya wuupuxerya okhwa wa Yesu tiheeni Anamoona a Yehova aniilipixeryaaya weera?
1 Yehova onnakhwaniherya yoochuna awe ni mvai. Alocaka sa mareeliho a Omwene wa Muluku Yesaya 9:6, Bibiliya Nsu na Muluku onii: “Soothene seiha ini sereye ni okhwela w’Apwiya a owerya wothene.” Moolikana, variyari va orummwa wawe veelaponi yavathi, Mwaana a Muluku aahooniherya mvai mmalapelo eeparipari. (Yohane 2:13-17; 4:34) Eyaakha eri yoothene, elukuluku ya wuupuxerya okhwa wa Yesu, macikhwi a alaleeryi orukurerya elapo anniilipixerya wi etakiherye mvai wa Yehova ni Yesu moorweela wa waaceererya muteko aya mu orummwa. Nyuwaano munahaala okhala mmoha a yaawo?
2. Tiheeni enahaala onceenyerya opaceryiha mukipici nihiku na 7 a Marsu?
2 Mukipici wa Yawuupuxerya: Eyaakha yeela mukipici wa waawopa achu onahaala opacerya nihiku na 7 a Marsu. Mpake marehereryo hiihaano wi mulaleerye mwa mvai. Miloko sinahaala okhala soolipiheya vaavaa sinaweethaaya wi yaawope achu ancipale mu ekulucu. Mwiilipixerye wi mwaawope ohuserya anyu a Piipiliya, yaale munaaxekuryaanyu, asinthamwene anyu oomutekoni, amusi, asinthamwene ooxikola moorweela wa waavaha mwopelo naari ompharihela jw.org.
3. Nnii naaceererye hai orummwa wahu variyari va Marsu ni Apirili?
3 Opiyoneero Wookhaviherya: Mvai tho onahaala onceenyerya wunnuwiha orummwa wahu. Moohikhwa minikwa, ancipale anahaala wiivaha wi erumeele ntoko alaleeryi ookhaviherya variyari va Marso ni Apirili, woona wi nnahaala okhalano yoothanla ya oveleela iwora 30. Variyari va malapelo anyu a echoko,naari yoohuserya ya muchu mukhateiye muthokororye ni mavekelo mukhalelo munahaalaanyu okhwaaniherya. (Masiposipo 15:22) Ohakalalela wanyu mukipici yoola onahaala waaceenyerya akina okhala a mvai mmiteko saphaama. Wakhala wi moopaka marehereryo wi mwaaceererye orummwa wanyu, munahaala otakiheryaka mvai wa Yesu.—Marko 6:31-34.
4. Phatamari taani onarweela mu otakiherya mvai wa Yehova ni Yesu?
4 Otakiherya wahu mvai wa Yehova ni Yesu variyari va elukuluku ya wuupuxerya okhwa wa Yesu, onahaala oruuhela phatamari mutokweene. Ancipale mu ekulucu anahaala wiiwa michaka yaphaama. Nnahaala ophwanya murecele ni ohakalala onarweela mu omurumeela Yehova ni wiivaha ntakhara akina. (Saweriwa Tarummwa 20:35) Opwaha soothene, nnahaala omucicimiha Muluku ahu amvai vamoha ni mwanawe.