Nivuwihe Eparipari Vooloca sa Yesu Mwa Mvai

Mvai ahu onnaacereryeya vaavaa nnasuwelaahu mukhalelo wa wuuka eparipari vooloca sa Yesu ni akina. Yesu nluku na mathipelo a nroromelo neeparipari. (Aef. 2:20) Ahikhanlevo yoowo, hiyaano hinaahaala okhalano ewehereryo ya okumi. (Saw. 4:12) Mwa yeela, ti yoochuneya wi oothene nsuwele makupa a Yesu mu yoochuna ya Muluku. Ancipale annawokiwa ni miyaha sihiniiwanana ni Piipiliya. Moohiciha, awo annapacerya oyeleela yoolaiherya enaphwanyeya Mmasu a Muluku wa yaale anamuroromela Yesu. Mvai ahu wa olaleerya eparipari onahaala oneeriha waakhaviherya yaale awiiyeviha wi ephwanye masuwelelo eeparipari vooloca sa Yesu, onthamwene awe ni Muluku, ni murici wa Yesu mu yookhwela ya Muluku. Elukuluku ya wuupuxerya okhwa wa Yesu, nyuwaano munahaala olaleerya eparipari vooloca sa Yesu ni mvai?