Edén—¿Yemelak ompa onenkej kachtopa tlaltikpakchanejkej?
XNEMILI ika tinemi ipan se kualtsin jardín kampa melak tlaxoxojkan tlen uejka onka itech ciudad. Xtlaj mitsajmana, xkanaj timokokoua niman nochi tlen ompa onka kichiua ika kuajli xmomachili.
Melak kualtsin kenon tonaltsintli kuajli tlauiloua, niman kenon kualtsin nesij xochimej. Noijki noolinia ixiujyo kojtin ijkuak ayaui, kualtsin nokuikatiaj totomej niman kakisti kenon patlanij yolkatsitsintin. Noijki onka atentli tlen kipiya atl tlen melak chipauak. ¿Xmelak ika tikuelitaskia ompa tinemis?
Miyekej kijtouaj ika ijkon katka kampa chantiyaj kachtopa tlaltikpakchanejkej. Desde yeuejkaui judíos, musulmanes niman akin kichiuaj ken Cristo kineltokaj ika akin kachtopa onenkej chantiyaj ipan jardín de Edén. Biblia kijtoua ika melak yolpakiyaj, kuajli nemiyaj niman yolkamej xtlaj kinchiuiliayaj. Noijki, kuajli nouikayaj iuan toTajtsin akin kinekiya nochipa machantikan ipan yejon kualtsin jardín (Génesis 2:15-24).
Noijki hindúes kineltokaj ika yeuejkaui onkatka se xochitlalpan. Miyekej budistas, kineltokaj ika budas onenkej ijkuak nochi kuajli onkatka niman kampa melak tlakualtsinkan. Noijki, ne África miyekej religiones temachtiaj ika yeuejkaui tlakualtsinkan katka ijkon ken kampa nemiyaj Adán iuan Eva.
Melak miyekej religiones niman miyekej tlaltikpakchanejkej kineltokaj ika yeuejkaui onkatka se xochitlalpan. Se ixtlamatki akin itoka Jean Delumeau, kijtoua ika “miyekej kineltokayaj ika yeuejkaui onkatka xochitlalpan kampa akin ompa chantiyaj nemiyaj ika inyojlo, yolpakiyaj, xkipiayaj tlauejli niman xtlaj kinpolouaya. Ika yejon, miyekej xkilkauaj yejon xochitlalpan niman kuelitaskiaj oksejpa maonia niman ompa chantiskej”.
¿Tleka miyekej kineltokaj ika onkatka se xochitlalpan? ¿Kanaj yejon xochitlalpan katka jardín de Edén, kampa chantiyaj Adán iuan Eva niman tinochimej ompa otiualeujkej?
Ipan yejuin tonajli miyekej xkineltokaj yejuin, niman kinemiliaj ika yejon san se cuento. Miyekej akin temachtiaj ipan religiones, kijtouaj ika jardín de Edén xmelauak onkatka niman ika san noteneua ipan Biblia para itlaj techmachtis.
Biblia kiteneua miyek tlemach para itlaj temachtis. Miyekej kimixmatij historias tlen ika Jesús okinmachti inomachtijkauan. San ika, Biblia kijtoua ika jardín de Edén melauak onkatka. Tla yejon xmelauak yeskia, ¿kenon ueliskia tikneltokaskiaj okseki tlen Biblia kijtoua? Matikitakan tleka sekimej xmás kineltokaj yejuin. Sakin, tikitaskej tleka melak noneki matikmatikan ika melauak onkatka jardín de Edén.