MATINEMIKAN KEN CRISTO

Tla tichipaujkanemi niman titetlakaita, uelis titeyoltilanas

Se siuatl akin kichiua ken Cristo, uelis kichiuas ika iueuentsin noijki matlaneltoka tla kuajli tlen kichiua. San ika, yejuin kanaj uelis nochiuas ijkuak yopanok miyek xiuitl ika kitlaueltokaj (1Pe 2:21-23; 3:1, 2). Tla tejua mitstlajyouiltijtokej, xtlani tlen xkuajli ika tlen kuajli (Ro 12:21). Tla tikchiua tlen kuajli uelis kipaleuis manopatla, itlaj tlen motlajtoluan kanaj xuelis kichiuaskej.

Xyejyeko xkasikamati tlen kimachilia moixnamik (Flp 2:3, 4). Xkasikamati niman xkikneli, noijki xyejyeko kuajli xchiua motekiyo. Kuajli xkaki moixnamik (Snt 1:19). Xyolseujki niman xkititi ika tiktlasojtla. Maski nesis ika moixnamik xkita nochi tlen tikchiua, xkilnamiki ika Jehová kipatiojkaita ken tikueyichiua (1Pe 2:19, 20).

XKITAKAN VIDEO JEHOVÁ TECHYOLCHIKAUA ITECH NOCHI TLEN TIKIXNAMIKIJ, SAKIN XNANKILIKAN YEJUIN:

¿Kenon nemiya Grace Li ijkuak kemach ononamiktijka?
¿Tlenon okiyoltilan ipan ikalpan toTajtsin?
¿Tlenon okipaleui tokniuj Li makixiko tlen okixnamik sakin ika onoapolakti?
¿Tlenon tokniuj Li okitlajtlanili Jehová makichiua ipampa iueuentsin?
¿Katlejua tlateochiualistin yokinseli tokniuj Li pampa otetlakaitak niman ochipaujkanen?

Ipan tlaixkopinajli: Tlen kisa ipan video “Jehová techyolchikaua itech nochi tlen tikixnamikij” kiteititia kenon Grace Li ueyixtiuj itlaneltok. 1. Grace Li iselti chokatika. 2. Se tokniuj nomachtijtika iuan Grace. 3. Grace niman ikoneuan yajtokej tlanechikojli. 4. Grace iuan chiknaui ichanejkauan nemij ipan Kajli kampa tosentlaliaj. — ¡Miyek ueli kichiua ijkuak se tetlakaita niman chipaujkanemi!