TLAMACHTIJLI 57
¿Tlenon panos tla tikchiua se ueyi tlajtlakojli?
Maski tejua melak tiktlasojtla Jehová niman timokojtilia xtikchiuas itlaj tlen uelis kiyolkokos, kemantika kanaj timopopolos niman tikchiuas itlaj tlen xkuajli. San ika, onka seki tlajtlakoltin tlen más uejueyimej (1 Corintios 6:9, 10). Tla tejua kemantika tikchiua se ueyi tlajtlakojli, maka xnemili ika Jehová xok mitstlasojtlas, yejua kineki mitstlapopoluis niman mitspaleuis.
1. ¿Tlenon noneki tikchiuaskej niman ijkon Jehová matechtlapopolui?
Ijkuak yakaj akin melak kitlasojtla Jehová kasikamati ika yokichiuj se ueyi tlajtlakojli, melak noyolkokoua. San ika, Jehová kiyolchikaua ika yejuin tlajtoltin tlen okijli ikalpan: “Maski nemotlajtlakoluan [...] ken itlaj yestli chichiltik, nejua nikchipauas istak ken itlaj nieve” (Isaías 1:18). Jehová techtlapopoluiya niman kilkaua nochi tlen xkuajli otikchiujkej tla tejuamej toyolkuepaj ika nochi toyojlo. Niman tikteititiaj ika melauak yotoyolkuepkej ijkuak tikteititiaj ika melauak techajmana tlen xkuajli otikchiujkej, ijkuak xok tikchiuaj tlen xkuajli otikchiujkej niman ijkuak tiktlajtlaniliaj Jehová matechtlapopolui. Niman xsan yejon, noijki tokojtiliaj xok tiknemiliskej nion xok tikchiuaskej tlen okichiuj matitlajtlakokan, aman más tokojtiliaj tikintlakamatiskej itlanauatiluan toTajtsin (xkita Isaías 55:6, 7).
2. ¿Kenijki techpaleuiya Jehová intechkopa tlayekankej ijkuak tikchiuaj se ueyi tlajtlakojli?
Akin kichiuaj se ueyi tlajtlakojli Jehová kimijlia ika noneki kinnotsaskej tlayekankej (xkita Santiago 5:14, 15). Yejuin tlakamej akin yokintlapejpenijkej ika espíritu santo melak kitlasojtlaj Jehová niman kintlasojtlaj tokniuan, yejuamej uelis techpaleuiskej oksejpa kuajli matouikakan iuan toTajtsin (Gálatas 6:1).
¿Kenijki techpaleuiskej tlayekankej tla kemantika tikchiuaj se ueyi tlajtlakojli? Omemej noso yeyimej tlayekankej touan nosentlaliskej niman ijkon techijliskej tlenon kijtoua Biblia itech tlajtlakojli niman techasikamachiltiskej tleka xkuajli tlen otikchiujkej. Noijki techijliskej tlenon uelis tikchiuaskej niman ijkon maka oksejpa tikchiuaskej yejon tlajtlakojli. Tla yakaj kichiua se ueyi tlajtlakojli niman xnoyolkuepa, tlayekankej nonekis kikixtiskej itech tlanechikojli niman ijkon kintlajpiyaskej nochimej tokniuan.
OKSEKI XKASIKAMATI
Kuajli xkasikamati niman xpatiojkaita tlen Jehová kichiua niman ijkon techpaleuis ijkuak tikchiuaj se ueyi tlajtlakojli.
3. Oksejpa uelis touikaskej iuan Jehová tla tikteijliaj tlen xkuajli otikchiujkej
Nochipa ijkuak tikchiuaj se tlajtlakojli tikyolkokouaj Jehová, ika yejon, noneki itech toyolkuitiskej. Xkitakan Salmo 32:1-5 niman xtlajtokan itech yejuin:
¿Tleka melak kuajli tla tikijliaj Jehová totlajtlakol niman xtlaj tikiyaniliaj?
Tla tikijliaj Jehová matechtlapopolui niman tikintlajtlaniliaj tlayekankej matechpaleuikan, melak kuajli tomachiliskej. Xkitakan VIDEO niman xtlajtokan itech yejuin:
¿Kenijki tlayekankej okipaleuijkej tokniuj akin otikitakej ipan video niman ijkon oksejpa manokuepa itech Jehová?
Ijkuak tikimijliskej tlayekankej ika otikchiujkej se ueyi tlajtlakojli, melak noneki nochi matikimijlikan pampa yejuamej kinektokej techpaleuiskej. Xkitakan Santiago 5:16 niman xtlajtokan itech yejuin:
¿Tiknemilia ika tla xtlaj tikimiyaniliaj tlayekankej más uelis techpaleuiskej? ¿Tleka ijkon tiknemilia?
Xteijli tlen xkuajli otikchiuj, maka itlaj xkimiyanili tlayekankej niman xseli ken Jehová mitsmelajkatlalis.
4. Jehová kimiknelia akin yotlajtlakojkej
Tla yakaj kichiua se ueyi tlajtlakojli niman xkineki kintlakamatis itlanauatiluan Jehová, kikixtiaj itech tlanechikojli niman xok iuan tosentlaliaj. Xkitakan 1 Corintios 5:6, 11, niman xtlajtokan itech yejuin:
Ipan yejuin texto kijtoua ika “san achijtsin tlaxokolilistli kajkokui nochi on tixtli de harina”. Kuakon, tla tejuamej touikaj iuan yakaj akin okichiuj se ueyi tlajtlakojli niman xnoyolkuepa, ¿tiknemilia ika uelis techijtlakos akin tinemij ipan tlanechikojli? ¿Tleka?
Pampa tlayekankej teikneliaj ijkon ken Jehová, kintejtemouaj niman kinpaleuiyaj akin yokiskej itech tlanechikojli. Miyekej akin yokiskaj itech tlanechikojli oksejpa youajnokuepkej. ¿Tleka? Pampa maski ijkuak okinmelajkatlalijkej melak okinyolkoko, yejon okinpaleui makasikamatikan ika nonekiya nopatlaskej (Salmo 141:5).
¿Kenijki kiteititia Jehová ika teajsikamati, teiknelia niman tetlasojtla ijkuak kuajli kinselia akin yotlajtlakojkej?
5. Jehová techtlapopoluiya tla toyolkuepaj
Jesús okijto itlaj tlen techpaleuiya matikasikamatikan kenijki nomachilia Jehová ijkuak yakaj noyolkuepa. Xkitakan Lucas 15:1-7 niman xtlajtokan itech yejuin:
¿Tlenon techmachtia itech Jehová yejuin tlen okiteneuj Jesús?
Xkitakan Ezequiel 33:11 (TNM), niman xtlajtokan itech yejuin:
¿Tlenon noneki tikchiuaskej niman ijkon tikteititiskej ika melauak yotoyolkuepkej?
Jehová ken se tlajpixketl niman kineki ika nochimej iborreguitos kuajli manemikan.
SEKIMEJ KIJTOUAJ: “Xnikneki nikimijlis tlayekankej tlen onikchiuj pampa, tla nikimijlia, nechkixtiskej itech tlanechikojli”.
Tla yakaj ijkon mitsijlia, ¿tlenon tikijliskia?
TLEN OTIUEL
Tla tikchiuaj se ueyi tlajtlakojli, san ika, toyolkuepaj niman tokojtiliaj xok tikchiuaskej tlen xkuajli otikchiujkej, Jehová techtlapopoluis.
¿Kenon titlanankiliskia?
¿Tleka melak kuajli tla tikijliaj Jehová tlen xkuajli otikchiujkej?
¿Tlenon noneki tikchiuaskej tla tiknekij matechtlapopolui Jehová?
Tla tikchiuaj se ueyi tlajtlakojli, ¿tleka noneki tikimijliskej tlayekankej matechpaleuikan?
OKSEKI XKITA
Xkita kenijki Jehová okititi se tlakatl ika yejua melak teiknelia ijkon ken kijtoua Isaías 1:18.
¿Tlenon kichiuaj tlayekankej para kinpaleuiskej akin yokichijkej se ueyi tlajtlakojli?
Xkita kenijki uelis tikijlis yakaj akin xiteixpantijkauj Jehová tleka sekimej kinkixtiaj itech tlanechikojli.
“Kenon kinpaleuiyaj akin yokiskej itech tlanechikojli” (Amatl Tekakistilijketl, agosto de 2024)
Xkita tlamachtijli “Nonekiya ninokuepas itech Jehová”. Ompa tikasikamatis kenijki se tlakatl okitak ika Jehová kinekiya oksejpa itech manokuepa.
“Biblia okichiuj manopatlakan” (Amatl Tekakistilijketl, 1 de abril de 2012)