¿Tleka melak nokualanilo ipampa política? | ¿Tlenon kijtoua Biblia?

Ipan nochi tlaltikpaktli miyekej tlaltikpakchanejkej nokualaniaj ipampa política. Centro de investigación Pew Research Center okichiuj se encuesta ipan 2022. Okintlajtolti tlaltikpakchanejkej itech 19 países niman yejuamej okijtokej ika 65% itech akin okintlajtoltijkej okijtokej ika ipan inpaís melak notlauelitalo pampa kinpaleuiyaj sesejneka partidos político.

Kampa tejua tichanti, ¿noijki xexeliujtokej tlaltikpakchanejkej ipampa política? ¿Tleka ijkon panoua? ¿Uelis yektlaliuis yejon? Xkita tlenon kijtoua Biblia.

Tlen kichiua maxexeliujtokan tlaltikpakchanejkej

Biblia yokijtokaj ika ipan itlamiyan tonaltin miyekej kichiuaskiaj tlen xkuajli, ika yejon, miyekej xnouikaskiaj.

• “[Ipan itlamiyan tonaltin] nochiuas tlen sanoyej xkuajli. On tlakamej ijkin nouikaskej: sanoyej notlajsojtlaskej sano yejuamej, [...] xitlaj kuelitaskej tlen kuajli” (2 Timoteo 3:1-3).

Maski miyekej tlaltikpakchanejkej nokojtiliaj kichiuaskej tlen kuajli, gobiernos xuelij kuajli tlayekanaj. Pampa sesejneka ken tlanemiliaj, xuelij san sekan tekitij niman ijkon kiyektlaliskej tlen xkuajli panotika. Nochi tlen panotika kiteititia ika nochi tlen okijtojka Biblia inochiujtika.

• “Sen tlakatl kipiya poder para ika nauiltia niman kichiuilia tlen xkuajli okse tlakatl” (Eclesiastés 8:9).

San ika, Biblia techijlia kenon uelis noyektlalis nochi tlen xkuajli panotika: san uelis tlayektlalis se gobierno kampa tlayekana yakaj akin uelis kipopolos nochi tlen techtlajyouiltia.

Se kuajli tlayekanketl akin melak techtlasojtla

Biblia tlajtoua itech yakaj akin melak kuajli tlayekana niman akin kipiya kojtilistli para uelis tlayektlalis. Itoka Jesucristo. Yejua kipiya kojtilistli, tlanauatijkayotl niman kineki ika tinochimej matiyolseujtokan niman nochimej kuajli matouikakan.

• “¡Ma onya yolseuilistli niman yolmelajkilistli nochi on tiempo ijkuak yejua tlamandaros!” (Salmo 72:7).

• “¡Nochimej on naciones ma kitekipanokan!” (Salmo 72:11).

San Jesús melak kuajli tlayekana, pampa yejua melak techtlasojtla niman kineki techpaleuis, niman más kineki kinpaleuis akin tlajyouiyaj pampa kinchiuiliaj tlen xkinamiki.

• “Kimanauis on mayanki yejuan kitlajtlanilis ma kipaleui, niman kimanauis on yejuan tlajyouiya, yejuan xkipiya akinon kipaleuis. Yejua kinmiknelis on yejuan yolyemankej niman kinmanauilis innemilis on mayankej. Yejua kinmanauis on yejuan kintlajyouiltiaj niman kimpiya ikan tlauelîjlotl” (Salmo 72:12-14).

Okseki xmati itech gobierno tlen onka iluikak kampa tlayekana Jesús, iTekiuajyo toTajtsin, niman xkita kenon yejon gobierno uelis techpaleuis niman kenon tejua uelis tikpaleuis yejuin gobierno.

• Xkita video ¿Tlenon kijtosneki iTekiuajyo toTajtsin?

• Xkita tlamachtijli “El Reino de Dios: un gobierno sin corrupción”.