TLAMACHTIJLI 11

Xteititi ika tikuelita tlen tikteneua

Romanos 12:11

TLEN TIUELIS: Xchiua ika tlen tikijtos makinyolmapeua akin mitskakiskej.

Xyektlali moyojlo. Ijkuak timoyektlalis, xtlanemili itech kenon melak ueyi kijtosneki motlamachtil. Kuajli xyektlali tlen ika titemachtis niman ijkon ijkuak tikteijlis, tikteititis ika tikneltoka tlen tikijtoua.
Xtlanemili itech akin mitskakiskej. Xnemili kenon kinpaleuis oksekimej tlen tikimijlis noso tlen tikinamapouilis. Xnemili kenon tikpanoltis motlamachtil niman ijkon akin mitskakiskej kuajli makasikamatikan niman makipatiojkaitakan.
Xchiua ika makimachilikan tlen tikteijlia. Xteititi ika tikuelita tlen tikteneua. Manesi ipan moxayak tlen yemelak tikmachilia itech tlen tikijtoua niman xkimolini momauan ken kinamiki.

Xkita ika maka nochipa san noijki xkolini moxayak niman momauan, pampa tla ijkon tikchiua san yejon kitstoskej akin mitskaktokej. Xchiua ika tlen tikijtos makinamiki itech ken tikolinia moxayak niman momauan. Xteititi ika tikuelita tlen tikijtotika ijkuak tiktetomilis tlen ueyi kijtosneki noso ijkuak tikinyolmapeuas itlaj makichiuakan akin mitskaktokej. Tla nochipa titlajtotika ika miyek pakilistli, uelis tikinsiauitis akin mitskaktokej.