Ko e matutakiaga kua matuuta tumau a koe mo e fanau haau
MA E TAU MATUA
5 Matutakiaga
KO E KAKANO
Ko e matutakiaga mooli ka fetutalaaki a koe mo e fanau haau hagaao ke he tau manatu mo e tau logonaaga.
KAKANO NE AOGA
Liga uka pauaki ke tutala mo e tau fuata mui. Mogo ne ikiiki e fanau haau ne tala atu e lautolu e tau mena oti ki a koe. Ka ko e mogonei he fuata mui kua tote hifo e tutala ha lautolu ki a koe, ti nakai iloa e koe e tau manatu mo e tau logonaaga ha lautolu. Tuga kua igatia mo e tutū he tau faahi kehekehe he vailele lahi. Pete he tuga kua nakai manako e fanau haau ke tutala, ko e magaaho tonu anei kua lata ke matutaki mo e tau fanau!
MENA KE TAUTE E KOE
Hiki ke he magaaho kua felauaki mo e tama haau. Fakatutala foki pete ka hoko ke he tuloto pō.
“Liga fia pehē a koe, ‘Manako a koe ke tutala mogonei? Leva pihia e nonofo a taua he aho katoa!’ Ka e gūgū he ha ka manako e tau fanau ke tutala mo tautolu? Ai kia ko e mena ia ne amanaki e tau matua oti ki ai?”—Lisa.
“Pete ne fia mohe au, ko e falu he tau fakatutalaaga uho mo e fanau fuata mui haaku he mole e tuloto pō.”—Herbert.
MATAPATU FAKAAKOAGA HE TOHI TAPU: “Aua neke kumi e taha e mitaki hana ni, ka kia takitokotaha mo e kumi e mitaki he falu.”—1 Korinito 10:24.
Ua fakatauhele. Talahau he taha matua taane: “Falu mogo ne lavelave au he manamanatu ke he falu mena foki ka e tutala e fanau haaku ki a au. Ti maeke e fanau haaku ke kitia kua fai mena au ne manamanatu ki ai ka e nakai fanogonogo ki a lautolu!”
Ka maama ia koe e talahauaga ia, tamate e TV mo e tuku hifo e tau matini hila tuga e selafoni. Hagaaki ke he tala he tama haau ha kua uho ke fanogonogo ki a ia, pete he tuga ko e mena tote.
“Lata a tautolu ke fakamafana e fanau kua aoga e tau logonaaga ha lautolu ki a tautolu. Ka nakai mafanatia a lautolu, to nakai talahau e tau logonaaga ha lautolu po ke kumi lagomatai he taha mena kehe foki.”—Maranda.
“Ua hogohogo manava, pete ka kehe mamao e manamanatuaga he tama haau.”—Anthony.
MATAPATU FAKAAKOAGA HE TOHI TAPU: “Fefe ha mutolu a fanogonogo.”—Luka 8:18.
Fakaaoga fakamitaki e tau magaaho atā. Falu mogo kua mukamuka e fanau ke tutala ka nakai nonofo fehagaaoaki mo e matua.
“Fakaaoga fakamitaki e maua e tau magaaho ka ō he motokā. Ha kua nofo he tapa ka e nakai fehagaaoaki kua maeke ke tutala fakamitaki.”—Nicole.
Atāina foki e tau magaaho kai ke tala noa.
“He magaaho kai ne igatia a mautolu mo e talahau e mena ne mua e kelea mo e mua e mitaki ne tupu he aho ia. He puhala nei kua pipi fakalataha a mautolu mo e iloa kua nakai fehagai takitokotaha a mautolu ke he tau lekua.”—Robin.
MATAPATU FAKAAKOAGA HE TOHI TAPU: “Kia . . . alumaki ke fanogonogo, kia fakatuai ke vagahau atu.”—Iakopo 1:19.