Taha Ni Kia e ‘Lotu Moli’?
“TUGA ni he taha e Keriso, ti taha ni e tino he Keriso, ko e taha e Kitofaitane he Keriso: ‘ko e taha e Lotu Katolika mo e fakaaposetolo.’”—Dominus Iesus.
Ti ko e puhala haia he pope Katolika Roma, ko Joseph Ratzinger, ne fakatu hana fakaakoaga he lotu ko e mena maeke ke taha ni e lotu moli. Ko e lotu ia, he talahau e ia, ko e “Lotu taha he Keriso, ne hagaaki mau ke he Lotu Katolika.”
“Nakai ko e Tau Lotu kua Kakano Katoatoa”
Pete ni e peehi he Pope ko John Paul II ko e fakamoliaga Dominus Iesus ne toka ai e “nakai pule lahi ki ai, po ke nakai fakalilifu ke he falu lotu,” ko e tau takitaki lotu Porotesano ne tali malolo lahi ki ai. Ma e fakatai, he Presbyterian General Assembly i Belfast, Ailani Tokelau, ia Iuni 2001, taha e akoako ne pehe ko e fakamoliaga ko e gahua he “matakau malolo he Lotu Katolika Roma . . . ne matakutaku goagoa ha ko e aga ataina ne fakatu he Vatican II.”
Ko Robin Eames, he Church of Ireland Primate, ne pehe to “ita lahi mahaki” a ia kaeke ko e fakamoliaga “ko e liutua ke he Vatican II fakamua.” He fai kupu ke he talahauaga ha Vatican ko e tau lotu ne tiaki falu fakaakoaga Katolika “ne nakai ko e tau Lotu kua kakano katoatoa,” he talahau e Eames: “Kia au e mena ia ko e amuamu.”
Ko e heigoa ne fakaohooho a Dominus Iesus? Kua tuga ke tupetupe e Roman Catholic Curia ha ko e mena ne fakahigoa ko e hikihikiaga fakalotu. Hagaao ke he The Irish Times, “ko e mafiti he loga e fakaakoaga fakalotu—nukua talahau ai kua mitaki e tau lotu oti . . . he peehi ki mua e tupetupe ha Cardinal Ratzinger.” Kua tuga ke fakavela he manatu nei hana tau talahauaga hagaao ke he taha e lotu moli.
Aoga Kia ko e Lotu Fe ne Fano a Koe ki Ai?
Moli, ke he falu, “ko e hikihiki fakalotu” po ke “loga e fakaakoaga fakalotu” kua mahomo atu e mitaki mo e futiakiaga mai he ha manatu na maeke ke taha ni e lotu moli. Kia lautolu, ko e lotu kua lata tonu ni ko e manatu pule ni he tagata. ‘Fakahiku ai,’ ne pehe a lautolu, ‘nakai ko e mena kelea ko e lotu fe kua fano a koe ki ai.’
Tuga ko e onoonoaga fakaaoga lahi a ia—pete ni kua taha e lauiaaga ko e vevehe fano he lotu ke he loga e tau fakatokatokaaga kehekehe. ‘Ko e kehekehe he tau lotu,’ he talahau he tokologa, ‘ko e kitekiteaga malolo he tokanoaaga he tagata.’ Hagaao ke he tagata tohia ko Steve Bruce mogoia, ko e “fakauka fakalotu” pihia kua moli ni ko e “fekehekeheaki fakalotu.”—A House Divided: Protestantism, Schism, and Secularization.
Ti, ko e heigoa e onoonoaga hako? Na taha ni kia e lotu moli? Na hagaaki ni kia ke he Lotu Katolika Roma? Kua talia pihia foki kia he Atua e falu lotu? Ha kua putoia e tau huhu nei ke he ha tautolu a fakafetuiaga mo e Tufuga ha tautolu, kua aoga moli ke moua e tau onoonoaga hana ke he manatu. Taute fefe e tautolu e mena ia? He ono ke he Kupu mai he agaga he Atua, ko e Tohi Tapu.—Gahua 17:11; 2 Timoteo 3:16, 17.