Lagomatai e Tau Fanau Ikiiki ke Iloa e Fakatokatokaaga ha Iehova

MANAKO e fanau ke fakaako. Manamanatu la ke he tau hūhū ne liga talahau he fanau Isaraela i Aikupito he pō he Paseka fakamua: ‘Ko e ha ne tamate e punua mamoe?’ ‘Ko e ha ne tuku he Matua Taane e toto he gutuhala?’ ‘O a tautolu ki fe?’ Na fiafia a Iehova ke he tau hūhū pihia tuga ne fakakite mai he mena ne poaki e ia ke he tau matua taane Isaraela. Ne tala age a Iehova ki a lautolu hagaao ke he tau fakamanatuaga he Paseka he vahā i mua: “Ka pehe mai e fanau ha mutolu kia mutolu, Ko e heigoa kia e kakano he fekafekauaga nai kia mutolu? Ti pehe atu ai a mutolu, Ko e poa he paseka hanai kia Iehova, ko ia ne fano leva he tau fale he fanau a Isaraela i Aikupito, he keli e ia a Aikupito, ka e fakahao ha tautolu a tau fale.” (Esoto 12:24-27) Fakamui, ne fakamanatu e Iehova ke he tau matua Isaraela e aoga he tali e tau hūhū he fanau ha lautolu ke he “tau fakatufono, mo e tau fakafiliaga” ne poaki e Iehova.—Teu. 6:20-25.

Maaliali ai, kua manako a Iehova ke moua he fanau e tau tali mauokafua ke he tau hūhū ha lautolu hagaao ke he tapuakiaga mooli—tau tali ka fakalagalaga a lautolu ke fakaalofa ki a Iehova ko e Atua mo e Fakamoui ha lautolu. He vahā nei, kua tatai agaia e manako ha Iehova ma e fanau ikiiki ha tautolu. Taha puhala ka fakaako he tau matua e fanau ha lautolu ke fakaalofa fakamooli ki a Iehova mo e tau tagata haana, ko e lagomatai a lautolu ke iloa lahi e fakatokatokaaga ha Iehova mo e maama e puhala ka aoga mai a lautolu he tau fakaholoaga i ai. Ti fakatutala a tautolu ke he falu puhala ka lagomatai e tau fanau ikiiki ke fakaako fakalahi hagaao ke he fakatokatokaaga ha Iehova.

Ko e Fakapotopotoaga he Matakavi

Lata he tau fanau ikiiki ke lali ke iloa e fakapotopotoaga ne fakalataha e magafaoa haau ki ai. Ke taute pihia, kua manako a mutolu ko e tau matua ke uta foki e fanau ha mutolu ke he tau feleveiaaga Kerisiano oti. He puhala ia, kua muitua a mutolu ke he fifitakiaga ne fakatoka e Iehova ma e tau Isaraela, he poaki ki ai: “Kia fakapotopoto ai e koe e motu, ko e tau tane, mo e tau fifine, mo e tau tama ikiiki, . . . kia fanogonogo ai a lautolu, mo e ako ai e lautolu, mo e matakutaku ai a lautolu kia Iehova ha mutolu a Atua, mo e taofi e lautolu ke eke ai e tau kupu oti ni he fakatufono nai. Ko e ha lautolu a fanau foki, kua nakaila iloa, kia fanogonogo ai a lautolu, mo e ako ai e lautolu ke matakutaku kia Iehova ha mutolu a Atua.”—Teu. 31:12, 13.

Mai he vahā tote, maeke he fanau ke kamata ke fakaako e Kupu ha Iehova. Ne pehē e aposetolo ko Paulo hagaao ki a Timoteo: “Mai foki he vaha tote kua iloa e koe e tau Tohi Tapu.” (2 Timo. 3:15) He tau feleveiaaga he Fale he Kautu, kua maeke he tau fanau ikiiki lalahi ke maama e tau vala tala kua talahau mo e iloa e tau lologo he Kautu. Kua fakaako e lautolu i ai ke fakaaoga mo e fakalilifu e Tohi Tapu mo e tau tohi fakavē ke he Tohi Tapu. Mua atu, he tau feleveiaaga ha tautolu to mailoga e lautolu e mahani ne kitia ai e tau tutaki mooli he Keriso—ko e fakaalofa mooli. Ne pehē a Iesu: “Ko e poaki fou ke tuku atu e au kia mutolu, kia feofanaki a mutolu; tuga he fakaalofa atu au kia mutolu, kia feofanaki foki a mutolu. Ko e mena ia ke iloa ai he tau tagata oti kana, ko e haku a tau tutaki a mutolu, ka feofanaki a mutolu.” (Ioane 13:34, 35) Ko e fakaalofa mafanatia mo e haohao mitaki kua kitia i loto he Fale he Kautu ka futiaki e fanau ti lagomatai a lautolu ke taute e ō ke he tau feleveiaaga Kerisiano mo vala tumau he tau momoui ha lautolu.

Ka fakamahani a mutolu ke hoko atu tuai ke he Fale he Kautu ti nonofo ke fai magaaho ka hili e feleveiaaga, to maeke he fanau ha mutolu ke moua e tau kapitiga. He nakai toka a lautolu ke lafi hokoia mo e falu tama, ko e hā he fakafeleveia a lautolu ke he tau matakainaga ne kehekehe e tau tau momoui? Ka iloa e lautolu e tau matakainaga lalahi, to moua he fanau ikiiki haau e tau tala ke he tau mena tutupu mo e pulotu ne atihake lahi. Tuga a Sakaria i tuai, “ko e tagata pulotu ke he fakakiteaga mai he Atua,” ne fakaohooho mitaki ke he patuiki fuata ha Iuta ko Usia, ti ko lautolu he vahā nei ne leva tuai e fekafekau tua fakamooli ki a Iehova kua eketaha mo fakaohooho mitaki foki ke he tau fanau ikiiki. (2 Nofo. 26:1, 4, 5) He ha ha he Fale he Kautu, maeke foki ia mutolu ke fakamaama ke he fanau ha mutolu e fakagahuaaga he poko toka tohi, he lapa fakailoa, mo e falu mena.

Ko e Fakatokatokaaga he Lalolagi Katoa

Lata he fanau ke maama ko e fakapotopotoaga he matakavi ko e vala he fakatokatokaaga he lalolagi katoa ne molea e 100,000 he tau fakapotopotoaga. Fakamaama e tau vala he fakatokatokaaga nei, puhala ne fakagahua ai, mo e matagahua he fanau ke lalago e fakaholoaga ia. Fakakite ki a lautolu e kakano ne amaamanaki a mutolu ke he tau toloaga takaiaga, tau fonoaga he faahimotu, mo e tau ahiahi he leveki takaiaga.—Kikite e puha “Tau Matakupu ke Fakatutala he Tapuakiaga he Magafaoa,” he lau 28.

Ka moua e mutolu e magaaho, uiina e tau leveki faifano, tau misionare, lautolu he magafaoa Peteli, mo e falu fekafekau gahua mau ke he kaina ha mutolu ke kai auloa. Ua manatu kua nakai fai magaaho a lautolu ma e tau fanau ikiiki. Ko e tau fekafekau mau nei kua eketaha ke fifitaki a Iesu, ne fakafeleveia tumau e tau fanau ti tutala ki a lautolu. (Mare. 10:13-16) He fanogonogo ke he tau fekafekau ia ha Iehova he talahau e tau mena tutupu mo e kitia e fiafia ha lautolu he fekafekauaga tapu, to liga taute foki he fanau ha mutolu e fekafekau mau mo foliaga ha lautolu.

Ko e heigoa foki ka taute e mutolu ko e magafaoa ke lagomatai e fanau ha mutolu ke iloa lahi e fakatokatokaaga ha Iehova? Hanei falu manatu: Eke mo feua he magafaoa ke fakatutala ke he tohi Jehovah’s Witnesses—Proclaimers of God’s Kingdom. Peehi e aga tukulele katoa, mahani fakatokolalo, mo e fakamooli ne fakakite he tau fekafekau ha Iehova. Fakakite e puhala ne fakaaoga e Iehova a lautolu ke folafola e tala mitaki ke he lalolagi katoa. Fakaaoga e tau vitiō ne taute he fakatokatokaaga ha Iehova ke fakaako e tau fakaakoaga aoga mai he vahā kua mole mo e mogonei. Ka maeke ia mutolu, aahi atu ke he la ofisa mo e kaina Peteli he motu ha mutolu po ke he falu motu foki. Ko e tau ahiahi pihia ka peehi ke he fanau ha mutolu e puhala ne taute he vala he fakatokatokaaga ha Iehova he lalolagi i lalo he takitakiaga he vahega fekafekau fakamooli, ke foaki e tau mena kai fakaagaaga mo e takitakiaga ke he tau matakainaga he lalolagi katoa, tuga ne taute he senetenari fakamua V.N.—Mata. 24:45-47; Gahua 15:22-31.

Hikihiki e Tau Vala Tala ma e Tau Tama Takitokotaha

He fakaako e fanau haau, kia tokaloto e puhala ne fakaako e Iesu e tau aposetolo haana. Ne lagataha e pehē a ia ki a lautolu: “Loga gaia e tau mena ia au ke tala atu e au kia mutolu, ka kua nakai maeke ke talia e mutolu ke he vaha nai.” (Ioane 16:12) Ne nakai tapoohi e Iesu e tau tutaki haana aki e tau vala tala loga. Ka e fakaako fakatekiteki e ia ki a lautolu e tau kupu mooli aoga ke maeke ia lautolu ke maama mitaki ai. He puhala taha ia, kia nakai tapoohi foki e fanau ha mutolu. He fagai fakatote ka e fakatumau a lautolu ke he tau vala tala hagaao ke he fakatokatokaaga, to fakalagalaga e mutolu e fiafia ha lautolu ti eke e fakaakoaga hagaao ke he fakapotopotoaga Kerisiano ke olioli ai. He hiki e tau manako he fanau ha mutolu, maeke ia koe ke fatiaki mo e fakalaulahi ke he tau mena kua fitā he iloa e lautolu.

Ko e fakapotopotoaga Kerisiano ko e punaaga he malolō fakaagaaga, ti ko e fanau ikiiki ne fakamakutu ke he tau matagahua i ai kua mautali mitaki ke totoko e fakaohoohoaga he lalolagi ha Satani. (Roma 12:2) Mauokafua a mautolu to moua e mutolu e olioli lahi he lagomatai e tau fanau ha mutolu ke iloa e fakatokatokaaga ha Iehova. Mo e fakamonuina haana, kia tumau a lautolu ke pipiki fakamooli ki ai mo e ke he Atua fakaalofa ne fekafekau a tautolu ki ai.

[Puha/Fakatino he lau 28]

Tau Matakupu ke Fakatutala he Tapuakiaga he Magafaoa

Hanei falu matakupu ne matutaki ke he fakatokatokaaga ka fakatutala e mutolu he Tapuakiaga he Magafaoa he afiafi.

▪ Tutala ke he tupu maiaga he fakapotopotoaga ha mutolu. I ne fe mo e puhala fe ne fakatū ai? Ha e fe e tau Fale he Kautu ne fa fakaaoga he fakapotopotoaga? Ma e fakatutalaaga nei, ko e ha he uiina e matakainaga nukua leva e nofo he fakapotopotoaga ke he kaina ha mutolu ke tali e tau hūhū he fanau ha mutolu?

▪ Fakamaama e kakano he tau feleveiaaga he fakapotopotoaga mo e tau fakalatahaaga lalahi kehekehe mo e puhala ka aoga e fanau mai i ai.

▪ Fakatutala e kakano he tau aoga kehekehe ne fakatū he fakatokatokaaga ha Iehova. Tutala ke he tau mena iloa ne fakakite e tau fua mitaki ne fakatupu e lautolu ne fakaako he tau aoga nei.

▪ Lagomatai e fanau ikiiki ke kitia e aoga he eke mo tau tagata fakailoa tumau he tala mitaki. Fakakite ki a lautolu e puhala ka maeke ia lautolu ke fakalataha ke he hokotaki he lalolagi katoa ne tohi he Yearbook of Jehovah’s Witnesses.

▪ Fakatutala ke he tau puhala kehekehe he fekafekauaga mau kua fakaatā ke he tau fanau ikiiki he fakatokatokaaga ha Iehova. Ko e punaaga mitaki e tau vala tala he veveheaga 10 he tohi Organized to Do Jehovah’s Will.

▪ Lagomatai e tau fanau ikiiki ke maama e kakano ne muitua ke he tau fakaholoaga pauaki he fakapotopotoaga. Fakamaama e kakano kua nakai lata ia lautolu ke tūtū kehe mai he fakatokatokaaga ha Iehova pihia foki ke he tau puhala ikiiki. Fakakite ki a lautolu e puhala kua maeke ia lautolu ke lafi ke he maopoopo mitaki he fakapotopotoaga he muitua ke he takitakiaga he tau motua.

[Fakatino]

To aoga mai e fanau haau he fakatū kapitiga mo e tau fekafekau kua leva

[Tau Fakatino he lau 26]

Tuga a Isaraela i tuai, ne eketaha e tau matua he vahā nei ke foaki e tau tali mauokafua ka hūhū ki ai hagaao ke he fakatokatokaaga ha Iehova