Fai Vala Nakai a Koe he Taute e Tau Feleveiaaga Kerisiano ke Mafanatia?

“Ka fakapotopoto mai a mutolu, . . . kia eke e tau mena oti kia tupu ai e fakamafanaaga.”—1 KORI. 14:26.

1. Hagaao ke he 1 Korinito veveheaga 14, ko e heigoa e foliaga aoga he tau feleveiaaga Kerisiano?

‘KO E mafanatia ha ia he feleveiaaga ia!’ Kua nava pihia nakai a koe he mole e finatu ke he feleveiaaga he Fale he Kautu? Nakai fakauaua kua pihia a koe! Ko e tau feleveiaaga he fakapotopotoaga ko e punaaga mooli he fakamalolōaga, ka e nakai ko e mena ia ke ofo ai. Ha kua tuga e vahā he tau Kerisiano fakamua atu, ko e foliaga aoga he tau feleveiaaga ha tautolu he vahā nei ke atihake fakaagaaga a lautolu oti kua fakalataha mai. Mailoga e puhala ne peehi he aposetolo ko Paulo e foliaga pauaki ia he tau feleveiaaga Kerisiano he tohi fakamua haana ke he tau Korinito. He veveheaga 14 katoa, ne talahau lagaloga e ia ko e tau vala takitaha ne taute he tau feleveiaaga he fakapotopotoaga kua lata ke tatai e foliaga—“kia fakamafanatia ai e ekalesia [po ke, fakapotopotoaga].”—Totou 1 Korinito 14:3, 12, 26.a

2. (a) Fua mai he heigoa e tau feleveiaaga mafanatia? (e) Ko e heigoa e hūhū ka fakatutala a tautolu ki ai?

² Kua mailoga e tautolu ko e tau feleveiaaga mafanatia, po ke atihake, ko e fua mai ha kua fakamatapatu he omoomoiaga he agaaga he Atua. Ati kamata e tautolu e tau feleveiaaga takitaha he fakapotopotoaga aki e liogi fakamooli ki a Iehova, he ole ke he Matua ha tautolu he lagi ke fakamonuina e fakalatahaaga ha tautolu puhala he agaaga tapu haana. Pete ia, na iloa e tautolu kua maeke e tau matakainaga oti he fakapotopotoaga ke fai vala he taute e tau fakaholoaga he feleveiaaga ke moua e mafanatia lahi. Ko e heigoa mogoia falu lakaaga kua lata ia tautolu takitokotaha ke taute ke eke e tau feleveiaaga fakafaahi tapu ne taute he Fale he Kautu mo punaaga tumau he hauhau mo e mafanatia fakaagaaga?

3. Aoga fēfē e tau feleveiaaga Kerisiano?

³ Ke tali, to kumikumi e tautolu falu vala he tau feleveiaaga ha tautolu kua lata ke mauloto e lautolu ne taute ai. To fakatutala foki a tautolu ke he puhala ka fai vala e fakapotopotoaga katoa ke taute e tau feleveiaaga mo tau magaaho atihake ma lautolu oti ne fakalataha mai. Kua aoga lahi e matakupu nei ki a tautolu ha ko e tau feleveiaaga ha tautolu ko e tau fakalatahaaga fakatapu. Mooli, he o atu mo e fakalataha ke he tau feleveiaaga ko e tau vala aoga he tapuakiaga ha tautolu ki a Iehova.—Sala. 26:12; 111:1; Isaia 66:22, 23.

Ko e Feleveiaaga ne Talaga ke Fakaako e Tohi Tapu

4, 5. Ko e heigoa e foliaga he Fakaakoaga Kolo Toko?

⁴ Manako a tautolu oti ke aoga katoatoa mai he ha tautolu a Fakaakoaga Kolo Toko fakafaahi tapu. Ti, ke maama mitaki e matapatu foliaga he feleveiaaga ia, kia tutala a tautolu ke he falu hikiaga he mekasini Ko e Kolo Toko mo e tau vala tala fakaako.

⁵ Kamata mo e fufuta fakaako fakamua he Ko e Kolo Toko ia Ianuari 15, 2008, ne ha ha ai e vala aoga lahi ne lafi ke he kili i mua. Mailoga nakai e koe? Onoono fakamitaki ke he kili he mekasini hane totō e koe. Haia i lalo he kolo, to kitia e koe e Tohi Tapu kua mahafagi. Ko e vala ia ne lafi kua peehi e kakano ne taute e tautolu e Fakaakoaga Kolo Toko. Kakano ke fakaako e Tohi Tapu he lagomatai he mekasini nei. E, he ha tautolu a Fakaakoaga Kolo Toko fakafaahi tapu, ko e Kupu he Atua kua “fakakite [po ke, fakamaama],” ti tuga he magaaho ha Nehemia i tuai kua ‘tuku atu ai e alito.’—Nehe. 8:8; Isaia 54:13.

6. (a) Ko e heigoa e hikiaga ne taute ke he Fakaakoaga Kolo Toko? (e) Ko e heigoa kua lata ke tokaloto hagaao ke he tau kupu tohi “totou”?

⁶ Ha ko e Tohi Tapu e matapatu tohi ha tautolu, kua taute ai e hikiaga ke he Fakaakoaga Kolo Toko. Loga e tau kupu tohi ne tutū he tau vala tala fakaako ne fakamailoga “totou.” Kua fakamalolō ki a tautolu oti ke muitua ka totou e tau kupu tohi nei he feleveiaaga, he fakaaoga ni ha tautolu a lagaki he Tohi Tapu. (Gahua 17:11) Ko e ha? He kitia e tautolu e fakatonuaga he Atua i loto he Tohi Tapu ha tautolu, kua hokulo lahi e kakano ki a tautolu. (Hepe. 4:12) Ko e mena ia, ato totou fakaleolahi e tau kupu tohi ia, kua lata ia ia ne taute e feleveiaaga ke toka taha magaaho ma lautolu oti ne fakalataha mai ke kumi e tau kupu tohi nei mo e ke muitua he totou ai e tau kupu.

Lahi e Magaaho ke Fakakite e Tua ha Tautolu

7. Ko e heigoa e magaaho kua ha ha ia tautolu he Fakaakoaga Kolo Toko?

⁷ Taha hikiaga foki ke he tau vala tala fakaako he Ko e Kolo Toko ko e loloa he tau paratafa. He tau tau foou nei, kua fakakūkū tuai. Ti, he Fakaakoaga Kolo Toko kua fakatote hifo e magaaho ke totou e tau paratafa ka e lahi e magaaho ma e tau tali. Tokologa he fakapotopotoaga mogonei kua moua e magaaho ke fakakite e tua ha lautolu he tali e hūhū ne tohi, talahau e fakaaogaaga he kupu tohi, talahau fakakū e mena iloa ne fakakite e pulotu he muitua ke he tau matapatu fakaakoaga he Tohi Tapu, po ke falu puhala foki. Lata ke fai magaaho ke fakaaoga ke fakatutala ke he tau fakatino.—Totou Salamo 22:22; 35:18; 40:9.

8, 9. Ko e heigoa e matagahua haana ne takitaki e Fakaakoaga Kolo Toko?

⁸ Pete ia, kua moua ni e magaaho lahi ke foaki e tau tali loga ka tali fakakū e tau matakainaga mo e ka mataofi a ia ne taute e feleveiaaga mai he tutala tumau he Fakaakoaga Kolo Toko. Ti ko e heigoa ka lagomatai a ia ne takitaki ke moua e lagotatai mitaki he tau talahauaga haana mo e tau tali he fakapotopotoaga ke maeke e feleveiaaga ke fakamafana ke he tau tagata oti?

⁹ Ke tali, kikite e fakataiaga. Ko e Fakaakoaga Kolo Toko ne taute fakamitaki kua tatai mo e keu he tau fiti ne fulufuluola ke onoono ki ai. Tuga e keu lahi ne fakatū aki e tau fiti loga kehekehe, ko e Fakaakoaga Kolo Toko mogoia kua ha ha ai loga e tali kehekehe. Ti tuga ne tau fiti takitaha he keu kua kehekehe e tau lalahi mo e tau lanu, ko e tau tali ne foaki he feleveiaaga kua kehekehe e tau loloa mo e puhala ne talahau aki. Ti lauia fēfē e matagahua haana ne takitaki? Ko e haana tau talahauaga he falu magaaho kua tuga e falu lau akau ne lafi fakamitaki ke he keu. Nakai loga lahi e tau lau akau nei; ka kua tuku ai ke moua e talagaaga ti felauaki mo e tau fiti. Pihia foki, ko ia ne takitaki kua lata ke tokaloto e matagahua haana, nakai ke tala tumau, ka ke nava ke he tau talahauaga fakaheke ne foaki he fakapotopotoaga. E, he tukutuku fakamitaki e tau tali loga kehekehe ne foaki he fakapotopotoaga mo e tau talahauaga gahoa he magaaho tonu haana ne takitaki, kua fakatū ai e keu fulufuluola he tau kupu ka fakafiafia e tau tagata oti ne fakalataha mai.

“Kia Uta Mau e Tautolu e Poa Fakaheke ke he Atua”

10. Onoono fēfē e tau Kerisiano fakamua atu ke he tau feleveiaaga he fakapotopotoaga?

¹⁰ Ko e fakamaamaaga ha Paulo hagaao ke he tau feleveiaaga Kerisiano he 1 Korinito 14:26-33 kua fakakite ki a tautolu e puhala ne takitaki e tau fakapotopotoaga ia he senetenari fakamua. He talahau hagaao ke he tau kupu nei, ne tohi he taha pulotu Tohi Tapu: “Ko e mena ne mailoga mooli hagaao ke he tapuakiaga he Tapu fakamua atu, kua teitei logona hifo he tau tagata oti ne fakalataha mai e lilifu mo e latatonu ke fai mena ke foaki ki ai. Ti nakai hau e tagata mo e manamanatu ke fanogonogo hokoia; ne hau a ia nakai ni ke moua ka e ke foaki atu.” Mooli, ne onoono e tau Kerisiano fakamua atu ke he tau feleveiaaga he fakapotopotoaga ko e tau magaaho ke fakakite e tua ha lautolu.—Roma 10:10.

11. (a) Ko e heigoa ne lafi fakalahi ke fakamafanatia e tau feleveiaaga, ti ko e ha? (e) He fakagahua e tau manatu fe ka fakaholo ki mua e tau tali ha tautolu he tau feleveiaaga? (Kikite matahui tala.)

¹¹ He fakakite e tua ha tautolu he tau feleveiaaga kua lafi fakalahi ke he ‘fakamafanatia he fakapotopotoaga.’ To talitonu a koe pete ne loga e tau tau ne o atu a tautolu ke he tau feleveiaaga, kua fiafia mooli agaia ke fanogonogo ke he tau tali he tau matakainaga ha tautolu. Kua aamotia a tautolu he tali loto katoa he taha matakainaga motua lahi ne tua fakamooli; kua logona hifo e tautolu e atihake ha ko e talahauaga lotomatala he motua fakaalofa; mo e mamali a tautolu he amanaki e tama ti talahau e tali ne fakakite e fakaalofa mooli ma Iehova. Maaliali ai, he foaki e tau tali, kua fakalataha a tautolu oti ke fai vala he taute e tau feleveiaaga Kerisiano ke mafanatia.b

12. (a) Ko e heigoa ka ako mai he tau fakafifitakiaga ha Mose mo Ieremia? (e) Ko e heigoa e matagahua he liogi hagaao ke he foaki e tau tali?

¹² Ka ko lautolu ne mā, kua uka mooli ke foaki e tau tali. Kaeke kua pihia a koe, liga kua lagomatai ke manatu na nakai kehe e tuaga haau. Ne fakakite foki he tau fekafekau tua fakamooli he Atua tuga a Mose mo Ieremia e nakai mauokafua ha laua ke vagahau ke he tau tagata. (Esoto 4:10; Iere. 1:6) Ti tuga ne lagomatai e Iehova e tau fekafekau ia i tuai ke fakaheke atu a Ia ke he falu, to lagomatai he Atua a koe ke foaki e tau poa fakaheke. (Totou Heperu 13:15.) Moua fēfē e koe e lagomatai ha Iehova ke kautū ke he matakutaku haau ke foaki e tau tali? Fakamua, tauteute fakamitaki ma e feleveiaaga. Ato finatu ke he Fale he Kautu, liogi ki a Iehova mo e ole fakatonu ki a ia ke atu ki a koe e malolō ke foaki e tali. (Filipi 4:6) Kua ole a koe ke he taha mena “ke lata mo e hana finagalo,” ti maeke ia koe ke mauokafua to tali e Iehova e liogi haau.—1 Ioa. 5:14; Fakatai 15:29.

Tau Feleveiaaga ne Foli ke ‘Fakamafana, Lagomatai, mo e Tomatoma’

13. (a) Lata ke lauia fēfē a lautolu ne fakalataha mai ke he tau feleveiaaga ha tautolu? (e) Ko e heigoa e hūhū ne aoga pauaki ke he tau motua?

¹³ Ne talahau e Paulo ko e kakano aoga he tau feleveiaaga he fakapotopotoaga ke ‘fakamafana, lagomatai, mo e tomatoma’ a lautolu ne ha ha ai.c (1 Kori. 14:3.) Maeke fefe he tau motua Kerisiano he vahā nei ke iloa mooli ko e ha lautolu a tau vala he feleveiaaga kua atihake mo e tomatoma ai ke he tau matakainaga ha lautolu? Ke tali, kia fakatutala a tautolu ke he feleveiaaga ne takitaki e Iesu he mole fakatote e liu tu mai haana.

14. (a) Ko e heigoa e tau mena tutupu to hoko e feleveiaaga ne fakatoka e Iesu? (e) Ko e ha ne fakatotoka e tau aposetolo he “fina age a Iesu, kua vagahau kia lautolu”?

¹⁴ Fakamua, mailoga e tau mena tutupu to hoko e feleveiaaga ia. Ato tamate a Iesu, ne “tiaki [he tau aposetolo] a ia, ka e fehola,” ti tuga ne talahau tuai, ne “mavehevehe ai a [la]utolu ke takitaha mo e fano ke he hana faoa.” (Mare. 14:50; Ioane 16:32) Ti, he mole e liu tu mai a ia, ne uiina e Iesu e tau aposetolo loto lolelole haana ke o atu ke he feleveiaaga uho.d He talia, ne “o atu e tau tutaki tokohogofulu ma taha ki Kalilaia, ke he mouga ne poaki atu ai a Iesu kia lautolu.” He hohoko atu a lautolu, “ti fina age a Iesu, kua vagahau kia lautolu.” (Mata. 28:10, 16, 18) Manamanatu la ke he fakatotoka mooli he tau aposetolo he taute pihia e Iesu! Ko e heigoa ha Iesu ne fakatutala ki ai?

15. (a) Ko e heigoa e tau matakupu ne fakatutala a Iesu ki ai, ka ko e heigoa ne nakai talahau e ia? (e) Lauia fēfē e tau aposetolo he feleveiaaga ia?

¹⁵ Ne kamata ai e Iesu he taute e fakapuloaaga: “Kua tuku mai kia au e pule oti kana.” Ti age e ia ki a lautolu e kotofaaga: “Hanei, kia o atu a a mutolu ke eke e tau motu oti kana mo tutaki.” Fakahiku ne foaki e ia ki a lautolu e fakamooliaga mafanatia: “To fakalataha au mo mutolu ke he tau aho oti.” (Mata. 28:18-20) Ka e mailoga nakai e koe e mena ne nakai taute e Iesu? Nakai akonaki e ia e tau aposetolo haana; nakai fakaaoga foki e ia e feleveiaaga ia ke hūhū toko e tau fatuakiloto ha lautolu po ke peehi fakalahi ke he tau logonaaga agahala ha lautolu he hagaao ke he falu magaaho ne lolelole e tua ha lautolu. Ka e fakamalolō e Iesu a lautolu ke he fakaalofa haana mo e haana Matua he foaki ki a lautolu e kotofaaga uho. Lauia fefe e tau aposetolo he fina age a Iesu? Ne lahi e fakamafana, lagomatai, mo e tomatoma ha lautolu ti fai magaaho he mole e feleveiaaga ia, ne liliu “fakaako atu e lautolu, mo e fakamatala atu . . . e tala mitaki.”—Gahua 5:42.

16. Muitua fēfē e tau motua Kerisiano he vahā nei ke he fakafifitakiaga ha Iesu he taute e tau feleveiaaga kua eke mo punaaga he atihake?

¹⁶ He fifitaki ki a Iesu, ko e tau motua he vahā nei kua mailoga e tau feleveiaaga ko e tau magaaho ke atihake e tau matakainaga ke he fakaalofa mauokafua ha Iehova ma e tau tagata haana. (Roma 8:38, 39) He ha lautolu a tau vala he feleveiaaga kua hagaaki e tau motua ke he malolō, nakai ke he tau lolelole he tau matakainaga ha lautolu. Ne nakai hūhū toko e lautolu e tau fatuakiloto he tau matakainaga ha lautolu. Ka kua fakakite he tau talahauaga ha lautolu mena mailoga e lautolu ko e tau matakainaga ko e tau tagata takitokotaha ne fakaalofa ki a Iehova mo e manako ke taute e mena kua hako. (1 Tesa. 4:1, 9-12) Mooli, lata he tau motua he falu magaaho ke fakatonu e fakapotopotoaga katoa, ka e kaeke kua gahoa ni ne lata ke fakahako, kua liga mitaki ke foaki e fakatonuaga ki a lautolu hokoia ne putoia. (Kala. 6:1; 2 Timo. 2:24-26) Ka tutala ke he fakapotopotoaga katoa, kua foli e tau motua ke foaki e tau kupu nava ka lata. (Isaia 32:2) Kua eketaha a lautolu ke vagahau ke he puhala ka atihake mo e fakamalolō ki a lautolu oti ne fakalataha mai ka fakaoti e feleveiaaga.—Mata. 11:28; Gahua 15:32.

Ko e Huaga Haohao Mitaki

17. (a) Ko e ha kua mua atu e aoga ke eke e tau feleveiaaga ha tautolu mo huaga haohao mitaki? (e) Ko e heigoa haau ka taute ke fakamafana e tau feleveiaaga? (Kikite e puha “Hogofulu e Puhala ke Taute e Tau Feleveiaaga ke Fakamafanatia ma Haau mo e Falu.”)

¹⁷ He mua atu e favale he lalolagi ha Satani, lata ia tautolu ke taute mooli e tau fakalatahaaga Kerisiano ha tautolu mo huaga haohao mitaki—ko e punaaga mafanatia ma e tau tagata oti. (1 Tesa. 5:11) Ko e matakainaga fifine mo e taane haana ne fahia ke he tau kamatamata vihi lahi he fai tau kua mole, ne liu manatu: “He haia he Fale he Kautu, tuga kua totō e Iehova he tau lima leveki haana a mautolu. He tau tulā ne ha ha ai a mautolu, ne agaagai ai e tau matakainaga Kerisiano, ti logona hifo e mautolu kua maeke ke tuku atu e tau kavega ha mautolu ki a Iehova, ati logona hifo e mautolu e fakatotoka he tau loto.” (Sala. 55:22) Ko e tau tagata oti ne o mai ke he tau feleveiaaga ha tautolu kua lata ke logona hifo pihia foki e lagomatai mo e tomatomaaga. Ke iloa mooli to pihia e mena nei, kia taute tumau ha tautolu a vala ke fakamafanatia e tau feleveiaaga Kerisiano.

[Tau Matahui Tala]

To Tali Fēfē e Koe?

• Aoga fēfē e tau feleveiaaga Kerisiano?

• Ko e ha e tau tali he tau feleveiaaga kua lafi ke he ‘fakamafanatia he fakapotopotoaga’?

• Ko e heigoa ka ako mai he feleveiaaga ne takitaki e Iesu mo e tau tutaki haana?

[Puha/Tau Fakatino he lau 22, 23]

HOGOFULU E PUHALA KE TAUTE E TAU FELEVEIAAGA KE FAKAMAFANATIA MA HAAU MO E FALU

Tauteute tuai. Ka fakaako tuai e koe e tau vala tala ka fakatutala he Fale he Kautu, to fiafia lahi a koe ke he tau feleveiaaga mo e peehi lahi ke he loto haau.

O atu tumau. Ha kua lahi e atihake he tokologa e tagata kua fakalataha mai, ti mitaki lahi he fai koe i ai.

Hoko atu tuai. Ka nofo a koe to kamata e fakaholoaga, maeke ia koe ke fakalataha ke he lologo mo e liogi hafagi, ko e vala he tapuakiaga ha tautolu ki a Iehova.

Hau mautauteute. Tamai haau a Tohi Tapu mo e tau tohi ka fakaaoga he feleveiaaga ke maeke ia koe ke muitua mo e maama mitaki e mena ne fakatutala ki ai.

Kalo mai he tau fakatauhele. Ma e fakatai, totou ni e tau fekau he selafoni ka oti e tau feleveiaaga. He puhala ia kua nakai fakaatā e koe e tau mena fakatagata ke fakatauhele.

Fai vala. He tokologa ka tali, to tokologa foki ka lagomatai mo e mafanatia ha ko e tau talahauaga kehekehe he tua.

Kia fakakū e tau tali haau. Foaki he mena nei ke he tokologa atu foki e magaaho ke tali.

Fakamooli e tau kotofaaga. Ko e tau tagata lauga he Aoga Fekafekau Fakateokarasi po ke fai vala he Feleveiaaga Fekafekau, kia tauteute fakamitaki, fakamahani tuai, ti lali fakalahi ke nakai fakatō noa e tau kotofaaga haau.

Nava ki a ia ne fai vala. Tala age ki a lautolu ne fai vala he feleveiaaga po ko hai ni ne tali, kua loto fakaaue lahi ke he tau laliaga ha lautolu.

Fakalataha. Ko e tau fakafeleveiaaga totonu mo e tau fakatutala mafanatia ato kamata mo e ka oti e tau feleveiaaga, kua lahi e mena ne lafi ke he fiafia mo e aoga mai he haia i ai.