Puha Huhu
◼ Ko e heigoa ne maeke ia tautolu ke taute ke holo ki mua e aoga he tau feleveiaaga ha tautolu?
Falu ne fa fakahihiga e manamanatuaga ko e tau motua hokoia ni mo e tau fekafekau lagomatai kua lata ke fua e monuina he tau feleveiaaga he fakapotopotoaga ha kua takitaki mo e taute tumau e lautolu e tau lauga. Pete ia, kua maeke kia tautolu oti ke foaki fakatagata ke he tau feleveiaaga fulufuluola mo e aoga. Maeke ia tautolu ke lagomatai he tau feleveiaaga ke aoga lahi ke he tau puhala hogofulu na kua fakatoka atu:
Tauteute fakamua. He tauteute fakamitaki a tautolu, kua tapaki he tau feleveiaaga e fiafia ha tautolu. Ka taute pihia e tautolu oti, to alaala mo e ati hake lahi e tau feleveiaaga. Fakalataha tumau. Kua mafanatia ka tokologa ne fakalataha ki a lautolu ne ha ha i ai, kua fakamalolo ai e fakaaue ma e aoga he fakalatahaaga. Hohoko he magaaho fafati. Kaeke kua nonofo hifo ato kamata e fakaholoaga, kua maeke ia tautolu ke lologo mo e liogi auloa he kamataaga ti moua mai e aoga katoa he feleveiaaga. Omai mautauteute. He ta mai ha tautolu a Tohi Tapu mo e (tau) tohi ne fa fakaaoga ke he feleveiaaga, kua maeke a tautolu ke muitua mo e maama mitaki ke he tau mena ne fakatutala ki ai. Kalo he tau fakatauhele. To fanogonogo mitaki a tautolu ka nonofo atu ki mua. Ke taufanafana po ke o tumau ke he fale tote kua fakalavelave ke he falu mo tautolu foki ni. Amanaki ke talia. Ka tokologa ia tautolu ka tuku hake e tau lima mo e tali, kua tokologa ne mafanatia mo e ati hake ha ko e tau talahauaga he tua. Tali fakaku. Kua fakaata he mena nei e tokologa ke tali. Lata ke fifili fakalata e tautolu e tau tali fakaku ke he vala ni kua fakaako ki ai. Fakahoko e tau kotofaaga. He tau tagata fakako he Aoga Fekafekau Fakateokarasi po ko lautolu ne fakalataha he Feleveiaaga Fekafekau, kia tauteute fakamitaki, ako tuai fakamua, mo e lali ke aua fakato ai. Fakaaue ki a lautolu ne fakalataha. Fakaaue atu ke he falu he ha lautolu a tau laliaga. Kua ati hake he mena nei a lautolu mo e omoomoi a lautolu ke mahomo atu anoiha. Fefakamafanaaki. Ko e tau feleveiaaga totonu mo e tau fakatutalaaga ati hake ato kamata mo e fakaoti e feleveiaaga ka lafi ke he fiafia mo e aoga kua moua mai e tautolu he fakalataha ai ke he tau feleveiaaga.