Etena—Ko e Kaina Fakamua Kia he Tagata?
MANAMANATU ko koe he katene. Nakai fakatauhele, nakai fai leo miha he moui lavelave he taone ne taogo mai he falu kaupā tata. Lahi e katene nei ti nakai fai mena ke tauhele e mafola. Mua atu, kua atāina e manamanatuaga haau he tau tupetupe, ti nakai lekua e tino haau he gagao, tau allergy, po ke mamahi. Kua atāina e tau logonaaga haau ke olioli e tau takatakaiaga.
Kua fagai mua e koe e tau mata haau ke he tau lanu kehekehe he tau fiti, ke he kikila he vailele, mo e ke he tau lanu laukou loga he tau lau akau mo e motietie he laā mo e ata malu. Logona e koe e matagi hahau ke he kili haau mo e honogi e tau manogi mahofi i ai. Logona e koe e gaolo he tau lau akau, papihi e vai he tau patuō, ko e kiokio mo e lologo he tau manu lele, ko e gū he tau moko hane gahua. He manamanatu a koe ke he fakatino, nakai kia manako a koe ke ha ha he matakavi pihia?
Talitonu e tau tagata he lalolagi katoa kua kamata e tau tagata he matakavi pihia. He totou tau tuai, ko e tau tagata faka-Iutaia, Kerisitenitome, mo e Isilama, ne fakaako hagaao ke he kaina ko Etena, ne tuku he Atua a Atamu mo Eva ke nonofo ai. Hagaao ke he Tohi Tapu, kua ha ha ia laua e moui mafola mo e fiafia. Ne mafola a laua ki a laua, mo e tau manu, mo e Atua, ne foaki totonu ki a laua e amaamanakiaga he moui tukulagi ke he takatakaiaga fulufuluola.—Kenese 2:15-24.
Ha ha he tau Hinitū foki e manatu pauaki hagaao ke he parataiso he tau vahā i tuai. Kua talitonu e tau Puta ke he tau takitaki fakaagaaga ne mua, po ko Buddhas, ne tupu ke he vahā mitaki lahi mahaki ka tuga e parataiso e lalolagi. Mo e loga e lotu ha Aferika ne fakaako e tau tala ne ofoofogia e tataiaga tuga ki a Atamu mo Eva.
Ti ko e manatu ke he parataiso fakamua kua holofa ke he tau lotu mo e tau aga tuai he tagata. Talahau he taha tagata tohia: “Loga e kaufakalatahaaga ne talitonu ke he parataiso fakamua ne kitia ha ko e mitaki katoatoa, atāina, mafola, fiafia, monuina, mo e nakai fai pehiaaga, feitaaki, mo e taufetoko. . . . Ko e taofiaga nei kua fakatupu e manamanatuaga fakalataha he loto lahi ke he parataiso ne galo ka e nakai nimo, mo e manako malolō ke liu moua ai.”
Liga kamata oti kia e tau tala mo e tau aga tuai ia he punaaga mahani mau? Maeke kia he “manamanatuaga fakalataha” he tau tagata ke fakaohooho mo e manatu ke he mena mooli? Fai kaina ko Etena kia he vahā kua mole ti fai Atamu mo Eva kia?
Kua vaiga he tau tagata tuahā e manatu. He vahā fakasaiene nei, tokologa ne tali manatu ko e tau tala pihia ko e tau tala tū fakaholo mo e tau tala tuai. Ofo ai, nakai ko e tau tagata fakaako oti he lalolagi e tau tagata tuahā. Loga e takitaki lotu ne fakatupu e nakai talitonu ke he kaina ko Etena. Pehē a lautolu mena nakai fai matakavi pihia. Pehē a lautolu ko e tala ko e mena fakataitai noa, ko e tala tuai, ko e tala fakatū, po ke fakatai.
Mooli, na haia he Tohi Tapu e tau fakatai. Ne talahau e Iesu e tala ne talahaua lahi he tau fakatai ia. Ka e, fakakite he Tohi Tapu e tala hagaao ki a Etena, nakai ko e fakatai, ka ko e fakamauaga tala tuai kua moolioli mo e mukamuka. Kaeke mogoia ke nakai tutupu e tau mena ia ne fakamaama mai, ti maeke fēfē he vala ne toe he Tohi Tapu ke falanaki ki ai? Kia kumikumi la tautolu ke he kakano he falu talahauaga tuahā hagaao ke he kaina ko Etena mo e kitia kua tonu kia e tau manatu ha lautolu. To fakatutala a tautolu ke he kakano kua lata e tala ke aoga ki a tautolu takitokotaha.