Manamanatu ke he Tau Mena ne Taute e Iehova ma Haau
KUA nakai leva he mole e liu tu mai ha Iesu, tokoua e tutaki haana ne liliu mai i Ierusalema ki Emau. “Kua vagavagahau a laua, mo e fekumihaki,” he talahau he tala he Evagelia ha Luka, “ti fakatata mai ai a Iesu, kua o fakalataha mo laua. Ka kua ufia ha laua a tau mata, kia nakai iloa ai e laua a ia.” Ti pehē a Iesu ki a laua: “Ko [e] heigoa e tau kupu ia kua vagavagahau [taufetoko] ai fakahaga a mua, mo e fakatutuku ai a mua?” Ko e ha ne fakatutuku a laua? Ne taofi he tau tutaki e manatu ko e magaaho ia ka laveaki e Iesu a Isaraela mai he pule he Motu Kehe, ka e nakaila fakahoko e laveakiaga ia. Ka kua tamate tuai a Iesu. Ti fakatutuku a laua.—Luka 24:15-21; Gahua 1:6.
Ne kamata a Iesu ke fai fakamaamaaga ke he tau tutaki. “Ati fakamatala ai e ia kia laua e tau mena ne tohi kia ia ke he tau Tohi oti, kua kamata mai ia Mose, mo e tau perofeta oti.” Mooli, kua loga e tau mena tutupu ne aoga mo e fakamalolō e tua ne hoko he magaaho he fekafekauaga ha Iesu! He fanogonogo e tau tutaki ke he fakamaamaaga ha Iesu, ne hiki e mahani ha laua mai he fakatutuku ke he fiafia. He taha magaaho he afiafi ia, ne pehē a laua: “Nakai kia velagia ha taua a tau loto ki loto ia taua he vagavagahau a ia mo taua ke he puhala, he fakamatala mai foki e ia e tau Tohi kia taua?” (Luka 24:27, 32) Ko e heigoa e fakaakoaga ha tautolu ne iloa mai he tali he tau tutaki ha Iesu?
Lauia Fēfē a Tautolu ka Nakai Fakamooli e Tau Amaamanakiaga?
Ne fakatutuku e tau tutaki tokoua he puhala ki Emau ha ko e tau mena tutupu ne amanaki a laua ki ai kua nakaila fakamooli ia. Ne iloa e laua e mena ne fakamaama he Tau Fakatai 13:12: “Kua mule e amaamanaki ti mamahi ai e loto.” Pihia foki, ko e falu ia tautolu ne leva lahi e fekafekau fakamooli ki a Iehova ne manatu kua fitā e “matematekelea lahi” he hoko mai ti mole he mogonei. (Mata. 24:21; Fakakite. 7:14) Maama ai he magaaho nei, ko e amaamanakiaga pihia kua nakai fakamooli ka fakatupu e fakatutuku.
Ka e manatu, ne liu e tau tutaki tokoua ia moua e fiafia ha laua he mole e lagomatai e Iesu a laua ke hagaaki ke he fakamooliaga he tau perofetaaga ne fitā e fakamooli—hane fakamooli ai he magahala ha laua. Maeke ia tautolu ke fakatumau e loto fiafia ha tautolu mo e fahia ke he tau logonaaga fakahogohogo manava ke he puhala pihia. Ko e motua Kerisiano lotomatala ne higoa ko Michael, ne pehē: “Ua hagaaki ke he tau mena ne nakaila taute ia e Iehova. Ka kia manamanatu ke he tau mena kua fitā he taute e ia.” Ko e fakatonuaga mitaki mooli!
Tau Mena ne Taute e Iehova
Manamanatu la ke he falu mena ofoofogia kua fitā he taute e Iehova. Ne pehē a Iesu: “Ko ia ne [fakagahua e] tua mai kia au, to eke e ia ni e tau gahua ne eke e au; to eke foki e ia e tau mena ke mua ke he tau mena nai.” (Ioane 14:12) He vahā nei, kua taute he tau fekafekau he Atua e gahua lahi mahaki faka-Kerisiano. Molea e fitu e miliona ia lautolu kua amaamanaki ke hao he matematekelea lahi. Manamanatu la, kua mua atu e tokologa he tau fekafekau fakamooli ha Iehova hane gahua malolō ke he tau motu loga he lalolagi katoa! Kua fakamooli e Iehova e tau kupu fakaperofeta ha Iesu ke “eke . . . e tau mena ke mua ke he tau mena nai.”
Ko e heigoa foki e tau mena kua taute e Iehova ma tautolu? Taute e ia ke maeke he tau tagata loto fakamooli ke o mai kehe he lalolagi kelea, ke he vagahau fakatai, mo e huhū atu ke he parataiso fakaagaaga ne taute e ia. (2 Kori. 12:1-4) Fakaaoga e magaaho ke manamanatu ke he falu vala he parataiso ia nukua ha ha ai a tautolu. Tuga anei, ono atu ke he fata tohi haau po ke he Fale he Kautu. Veveu e Watch Tower Publications Index, po ke kitekite ke he Watchtower Library. Fanogonogo ke he tapakiaga he taute tala faka-Tohi Tapu. Liu manamanatu ke he tau leo mo e tau mena ne kitia e koe he fonoaga kua mole laia. Lafi ki ai, manamanatu ke he lafiaga atihake ne olioli e tautolu mo e tau matakainaga Kerisiano ha tautolu. Kua fakamokoi mooli a Iehova he foaki ki a tautolu e tau mena kai fakaagaaga loga ue atu mo e tau matakainaga fakaalofa—ko e parataiso fakaagaaga mooli!
Ne talahau he salamo ko Tavita: “Iehova na e, haku Atua, kua loga e tau mena kua eke e koe, ko e hau a tau mana mo e hau a tau manatu kia mautolu.” (Sala. 40:5) E, he manamanatu ke he tau mena homo ue atu ne fitā a Iehova he taute ma tautolu mo e he manamanatu ke he tau manatu fakaalofa haana ki a tautolu, to moua e tautolu e malolō foou ke fakauka fakamooli he fekafekau loto katoa a tautolu ke he ha tautolu a Matua he lagi, ko Iehova.—Mata. 24:13.
[Fakatino he lau 31]
Lagomatai e Iesu e tau tutaki haana ke manamanatu ke he tau mena ne fitā a Iehova he taute ma lautolu
[Tau Fakatino he lau 32]
Liu manamanatu ke he tau leo mo e tau mena ne kitia e koe he fonoaga kua mole laia