Fai Tagata Kia i Tua he Tau Kelea Muitui Oti Kana?

“NE TALOFA lima au mo e tiapolo.” Pihia he ui he takitaki kau he tau kautau he Tau Faahi Kaufakalataha i Rwanda, he fakakite e kaumahala ha lautolu ke taofi e kelipopoaga he motu ia he 1994. He talahau e puhala favale ofoofogia he magahala ia, fai tagata kitekite foki ne pehē: “Ka fai tagata agaia ne fakaleua ke fakatikai a Satani, feleveia mo au ke he luo tanu tagata lahi mahaki i Rwanda.” Ko e tau keliaga pihia kia ko e tau gahua mooli he Tiapolo?

Laulahi he tau tagata ne nakai onoono ke he favaleaga mo e ekefakakelea teao ko e tau gahua he mena moui fakaagaaga kelea ne nakai kitia. Tokologa ne manamanatu ko e tau mena pihia ko e fua he tupuaga kelea muitui he aga he tagata ti ko e matapatu he tupuaga he kelea muitui ko e tau logonaaga pouliuli i loto ha tautolu. Ko e fakaakoaga he falu ko e matakau monuina mo e malolō lahi, falu mena tuga e matakau taha ne fakagalogalo kua fakavaia e tau tagata ke he loga e tau hogofulu tau ke maeke ke pule ke he lalolagi. Ti mooli, ha ha i ai a lautolu kua tukupau e tau fakatufono mo e tau pule he motu ha ko e nakai fakafili tonu mo e matematekelea oti kana ne kitia e lautolu.

Ko e heigoa haau ne talitonu? Ko e ha ko e kelea muitui, favaleaga, tau kelipopoaga, mo e matematekelea kua tupu lahi ke he lalolagi oti he vahā nei pete ne tau laliaga ke taofi ai? Ko e ha kua liga gutu atu e tau tagata ke he puhala ke moumou ne ia a ia he fakateligatuli ke he tau hatakiaga ne fatiaki tumau? Fai tagata kia i tua he tau mena oti ia? Ko hai mooli kua pule ke he lalolagi? Ko e tali kua liga fakaofo a koe.