Foaki Fēfē e Koe e Fakatonuaga?

Kua lagataha nakai e ole ki a koe ke fakatonu ke he falu? Ma e fakatai, kua hūhū nakai ki a koe e tau hūhū tuga: ‘Ko e heigoa haaku kua lata ke taute? Lata nakai au ke fano ke he fiafiaaga nei? tutuli e feua nei? lafi mo e tagata nei mo e onoonoaga ke mau?’

Ko e tau tagata ne manako mooli kua liga ole ki a koe ma e lagomatai ke taute e tau fifiliaga—tau fifiliaga ka lauia e tau fakafetuiaga ha lautolu mo e tau kapitiga, magafaoa, po ko Iehova foki. Ko e heigoa ka fakavē e koe e tali haau ki ai? Ko e heigoa e puhala haau ne fa mahani ke foaki e fakatonuaga ke he falu? He tote po ke mamafa e matakupu, “kua manamanatu e loto he tagata tututonu, kia tali atu a ia,” he talahau he Tau Fakatai 15:28. Manamanatu ke he lima e matapatu fakaakoaga he Tohi Tapu ne mui mai ka lagomatai ke foaki e fakatonuaga.

1 Iloa e Tuaga Mooli.

“Ko ia kua tali atu ke he kupu, ka e nakaila fanogonogo a ia ki ai, kua eke ia mo goagoa hana, mo mena foki ke mā ai a ia.”—FAKATAI 18:13.

Ke maeke ke foaki e fakatonuaga mitaki, kua latatonu ia tautolu ke maama e tau tuaga mo e onoonoaga he tagata kua kumi lagomatai. Ke fakatai: Ka hea mai taha tagata ki a koe ke hūhū ko e hala fe ne hagahaga mitaki ke fano ke he kaina haau, ko e heigoa haau kua lata ke iloa ke maeke ke lagomatai? Maeke nakai ia koe ke tala age ki a ia e hala mitaki lahi ke fano ai ka e nakai iloa ko ia he matakavi fe? Nakai maeke! Pihia foki, ko e talahau e takitakiaga mitaki kua lata ke iloa e “matakavi”—ko e tau tuaga mo e onoonoaga—he tagata kua kumi takitakiaga. Fai tuaga fakalolelole nakai ne liga lauia he tali haau? Ka nakai iloa mitaki e tuaga, liga foaki e tautolu e fakatonuaga ne taute e tagata ke au atu e fakagogoa.—Luka 6:39.

Fifili kua Lahi Fēfē e Kumikumiaga Haana kua Taute. Liga pulotu foki ke hūhū ke he tagata kua kumi fakatonu ke he tau hūhū tuga: “Ko e heigoa e tau matapatu fakaakoaga he Tohi Tapu he manatu e koe kua felauaki?” “Ko e heigoa e tau mena mitaki mo e kelea kua kitia maaliali he tau puhala kua manamanatu a koe ki ai?” “Ko e heigoa e tau kumikumiaga haau kua fitā he taute?” “Ko e heigoa e tau lagomatai he falu, tuga e tau motua he fakapotopotoaga, tau matua haau, po ke tagata fakaako Tohi Tapu haau, kua fita he tala atu ki a koe?”

Liga lagomatai he tau tali ia a tautolu ke iloa kua lahi fēfē e laliaga he tagata kua fitā e taute ke kumi aki e tali. Ko e fakatonuaga foki ha tautolu kua lata ke putoia e tau manatu kua fitā he talahau he falu. Liga lata foki a tautolu ke iloa kua kumi kia he tagata e tagata fakatonu ke ‘magiho e tau teliga haana’ aki e tau fakatonuaga kua manako a ia ke logona.—2 Timo. 4:3.

2 Kalo Kehe he Tau Tali Fakatepetepe.

“Kia takitokotaha e tau tagata mo e alumaki ke fanogonogo, kia fakatuai ke vagahau atu.”—IAKO. 1:19.

Mo e fatuakiloto mitaki, liga tali atu mafiti a tautolu. Ka kua fa pulotu kia e mena ia, mua atu ka fakatutala a tautolu ke he matakupu ne nakaila kumikumi fakahokulo e tautolu? Pehē e Fakatai 29:20: “Kua kitia kia e koe e tagata kua fakatepetepe ai ke he hana tau kupu? kua fai amaamanaki ke he tagata goagoa, ka e nakai pihia kia ia.”

Fakaaoga taha magaaho ke fakaako a koe ke iloa mooli kua felauaki katoatoa e puhala haau mo e pulotu faka-Atua. Hūhū hifo ki a koe, ‘Kua gahua fakahaga kia e puhala manamanatu mo e “agaga he lalolagi” ki loto he manamanatuaga haaku?’ (1 Kori. 2:12, 13) Manatu ko e tau fatuakiloto mitaki kua nakai kuenaia. Mogo ne iloa he aposetolo ko Peteru e kotofaaga uka ha Iesu, ne fakatonu ki a Iesu: “Ko e Iki na e, kia mamao ia koe e mena ia; nakai ni hoko e mena ia kia koe.” Ko e heigoa ha tautolu ka ako mai he tali ha Peteru? Ka nakai fakaeneene, to maeke foki e tagata loto mitaki ke fakakite ‘nakai ko e tau mena he Atua kua manamanatu ki ai, ka ko e tau mena he tau tagata.’ (Mata. 16:21-23) Kua aoga mooli ke manamanatu to vagahau a tautolu! Ka mole ia, ko e tau mena ne iloa e tautolu kua nakai kia tote maka ka fakatatai ke he pulotu he Atua?—Iopu 38:1-4; Fakatai 11:2.

3 Fakagahua Fakatokolalo e Kupu he Atua.

“Nakai eke noa foki e au ha mena, ha ko e mena tuga ne fakaako mai he haku a Matua kia au, ko e tau mena ia ne tala atu ai e au.”—IOANE 8:28.

To pehē nakai a koe, Kaeke ko au a koe, to . . . e au? Pete ka liga maaliali e tali ke he hūhū, kua mitaki ma haau ke fakaako mai he puhala mahani fakatokolalo mo e mahani fakalatalata ne fakatoka e Iesu. Ne lahi ue atu e pulotu mo e lotomatala haana ke he ha tagata; ka kua pehē a ia: “Ha ko e mena nakai vagahau noa au, hoko au; ka ko e Matua . . . ko ia ni ne tuku mai kia au e poaki ke he tau mena ke tala atu ai e au, mo e tau mena ke vagahau ai e au.” (Ioane 12:49, 50) Ko e tau fakaakoaga mo e fakatonuaga ha Iesu kua fakavē tumau ke he finagalo he haana Matua.

Ma e fakatai, totou e tautolu ia Luka 22:49 ne hūhū e tau tutaki ha Iesu ma e takitakiaga, kua lata nakai a lautolu ke tau ka amanaki ke tapaki a ia. Ne fakaaoga he taha tutaki e pelu. Mailoga e tala pihia he Mataio 26:52-54 ti pete kua haia foki he tau tuaga ia, ne fakaaoga e Iesu taha magaaho ke fakamaama ke he tau tutaki haana e finagalo ha Iehova. He mailoga e tau matapatu fakaakoaga ia Kenese 9:6 mo e tau perofetaaga he Salamo 22 mo e Isaia 53, ne maeke a Iesu ke foaki e takitakiaga ne fakahao mooli e tau momoui mo e fakafiafia a Iehova.

4 Fakaaoga e Fata Tohi Fakateokarasi Haau.

“Ko hai foki e fekafekau fakamoli mo e loto matala, kua kotofa he hana iki ke pule ke he hana tau fekafekau mo e age kia lautolu e tau mena kai ke he tau magaaho [tonu]?”—MATA. 24:45.

Ne kotofa e Iesu e vahega fekafekau fakamooli kua fakatoka mai e tau mena kai fakaagaaga uho lahi. Ka foaki e koe e fakatonuaga mo e takitakiaga hagaao ke he tau mena kua aoga, kua fai magaaho nakai ne fakaaoga e koe ke kumikumi fakahokulo ke he tau tohi ne fakavē ke he Tohi Tapu?

Ko e Watch Tower Publications Index mo e Watchtower Librarya ne foaki mai e lahi mo e maama e tau vala tala ke fakaaoga e tautolu. Ko e hepe ha ia ke nakai fakaaoga e tau vala tala loga lahi nei! Totou afe e tau matakupu i ai, ti loga e vala tala ke lagomatai aki e tagata kua kumi fakatonuaga. Lahi fēfē e lotomatala haau ke lagomatai e falu ke kumikumi e tau matapatu fakaakoaga he Tohi Tapu mo e fakakakano mai he Tohi Tapu? Tuga ni kua maeke e GPS (Global Positioning System) ke lagomatai e tagata ke kitia e matakavi kua ha ha i ai a ia mo e takitaki atu a ia ke he matakavi haana, kua maeke foki he tau koloa kumikumi ke lagomatai a ia ke kitia e hala kua fano a ia mo e iloa ke fakatumau he hala ke he moui.

Tokologa e tau motua kua fakamahani e tau tagata fakailoa ke kumi e tau vala tala he fakaaoga e Index po ke Watchtower Library, ti kua lagomatai e tau matakainaga ke fakakakano e tau kupu Tohi Tapu. Ko e tau lagomatai pihia kua maeke he tau tagata fakailoa ke fehagai ke he tau mena ne tupetupe lahi a lautolu ki ai ti feaki foki e aga ke kumikumi mo e falanaki ke he tau foakiaga fakaagaaga ha Iehova. He puhala nei, “ko lautolu kua mahani he ako mua ai ke mailoga e tau mena mitaki mo e tau mena kelea.”—Hepe. 5:14.

5 Kalo Kehe he Lali ke Taute e Tau Fifiliaga ma e Falu.

“To igatia e tagata ke fua ne ia hana kavega.”—KALA. 6:5.

He fakahikuaga, to igatia ni e tagata mo e lata ke fifili ma haana ni ko e fakatonuaga mo e tomatomaaga fe ke muitua. Kua tuku mai e Iehova ki a tautolu oti e atāina ke fifili ko e tapiki nakai a tautolu ke he tau matapatu fakaakoaga haana po ke nakai. (Teu. 30:19, 20) Ke he falu tuaga kua loga e matapatu fakaakoaga ne putoia ai, ti mua atu, ko e tagata ni kua kumi fakatonuaga ka taute e ia e fifiliaga ma haana. Uta ni ke he matakupu po ke tau tau moui he tagata kua kumi tomatomaaga, liga lata foki ia tautolu ke hūhū hifo, ‘Kua ha ha mooli nakai ia au e pule ke tali e hūhū nei?’ Ko e falu matakupu kua lata ni ke taatu ke he tau motua he fakapotopotoaga po ke kaeke ko e tama a ia, fekau atu ke he tau matua haana.

[Matahui Tala]

[Puha/Fakatino he lau 8]

Matagahua he Tapuakiaga Magafaoa

Ma e matagahua kumikumi, he ha he kumikumi ke moua e tau tali ke he tau hūhū ne nakaila leva ia e hūhū atu ki a koe? Ko e heigoa e tau vala tala mo e tau matapatu fakaakoaga Tohi Tapu kua maeke ia koe ke lagomatai e tagata ka hūhū e tau hūhū pihia? Tuga anei, liga hūhū e matakainaga taane po ke fifine ki a koe hagaao ke he fakamahani kapitiga mo e onoonoaga ke mau. Ka fakaaoga e Index po ke Watchtower Library, kumi fakamua ke he matakupu ne lauia tonu ai. Ma e fakatai, i loto he Index liga kumi e koe ke he “Dating” po ke “Marriage.” Ti kumi hifo ke he tau vala matakupu ma e tau vala tala kua lata. Ka onoono ke he matapatu mataulu, mailoga kua ha ha i ai e tau vala tala ke “Kikite foki” kua liga fakakite atu e mataulu ne felauaki tonu mo e matakupu haau hane kumikumi.

[Puha he lau 9]

Fakaaue ke he tau foakiaga ha Iehova ne puhala mai he fakatokatokaaga haana, kua maeke ia tautolu ke foaki mo e moua e tau fakatonuaga kua mua e mitaki. Pehē e Fakamatalaaga 12:11: “Ko e tau kupu he tau tagata iloilo kua tuga ne tau huki ia ne ta hoka aki e tau povi, po ke tau fao kua fakamau ai e tau patu he tau fakapotopotoaga [“ke eketaha ke he tau kupu,” NW] kua kotofa ia he leveki mamoe ne tokotaha.” Tuga ne tau “huki”—ko e tau akau mata matila ke takitaki aki e tau manu ne toho e arote—ko e fakatonuaga fakaalofa mo e kakano lahi kua takitaki a lautolu kua loto mooli ke he puhala hako. Ko e “tau fao kua fakamau ai” kua taute e fale ke mauokafua. Pihia foki, kua maeke e tau fakatonuaga mitaki ke moua e tau fua mauokafua. Ko e tau tagata iloilo kua “eketaha,” he fakatutala ke he “tau kupu” ne kua fakakite e pulotu he ha lautolu a “leveki mamoe ne tokotaha” ko Iehova.

Fifitaki e Leveki Mamoe ka foaki e fakatonuaga. Ko e lilifu ke foaki e teliga ke fanogonogo fakalataha mo e fakatonuaga lagomatai ka maeke ia tautolu! Ka fakavē mooli ke he tau matapatu fakaakoaga he Tohi Tapu, ko e tomatomaaga ha tautolu to aoga mo e liga lafi ke he mitaki tukulagi he tagata fanogonogo.