Ko Peteru mo Anania ne Pikopiko​​—Ko e Heigoa ne Fakaako Mai ki a Tautolu?

Fa mahani ai, ko e pikopiko ko e mena ne talahau e koe ne iloa e koe kua nakai mooli. Kua pikopiko nakai a koe?​​—a Na pikopiko foki e falu tagata lalahi ne fakaalofa ke he Atua. Liga iloa e koe e tagata he Tohi Tapu ne pikopiko. Ko e higoa haana ko Peteru, taha he tau aposetolo 12 ha Iesu. Kia fanogonogo la ke he tala hagaao ke he kakano ne pikopiko a ia.

He mole e tapaki ha Iesu, ne uta a ia ke he kaina he ekepoa ne mua. Kua tuloto tuai e po. Ne fina atu a Peteru ke he loto pa he fale he ekepoa ka e nakai fai tagata ne mailoga a ia. He maama he afi, ne mailoga he fekafekau tama fifine ne fakaatā a Peteru ke hu atu ki loto. “Ko koe foki, ne fakalataha a mua mo Iesu,” he ui e ia. Ne matakutaku a Peteru ti talahau nakai ko ia.

Pehē e Tohi Tapu nakai leva “ti kitia he taha tama fifine a ia.” Ne pehē a ia: “Ko e tagata na foki ne fakalataha a laua mo Iesu.” Ne liu foki a Peteru fakatikai ai. Kua levaleva ai ti o atu foki falu ki a Peteru mo e pehē: “Ko e moli ni, ko koe taha ia lautolu.”

Ne matakutaku a Peteru. Ti ko e lagatolu aki, ne pikopiko a ia, he pehē: “Nakai kitia e au e tagata ia.” Ti kō e moa. Ne ono a Iesu ki a Peteru, ti manatu e Peteru he tau tulā gahoa fakamua, ne tala age a Iesu ki a ia: “Nakai kō e tau moa, ato fakatikai lagatolu mai a koe kia au.” Kua momoko a Peteru, ti tagi a ia. Ne tokihala lahi a ia!

To tupu nakai e mena ia ki a koe?​​— Liga ko koe he aoga ti logona e tau tama aoga kua tutala hagaao ke he Tau Fakamoli a Iehova. “Nakai saluti e lautolu e matini,” he ui he taha. “Nakai tau a lautolu ma e motu ha lautolu,” he ui he taha. Ka e talahau agaia e taha, “Nakai ko e tau Kerisiano mooli a lautolu, ha kua nakai fakamanatu e lautolu e Kirisimasi.” Ti fai ne fuluhi atu ki a koe mo e hūhū, “Ai kia ko e taha he Tau Fakamoli a Iehova a koe?” Ko e heigoa haau ka talahau?​​—

To tupu e mena ia, kua lata a koe ke mautauteute ke foaki e tali mitaki. Nakai mautauteute a Peteru. He peehi ki a ia, ne pikopiko a ia! Ka e tokihala lahi a ia ke he mena ne taute e ia, ti fakamagalo he Atua a ia.

Ko Anania ko e taha tutaki fakamua foki ha Iesu ne pikopiko. Ka e nakai fakamagalo he Atua a ia po ke haana hoana ko Safaira. Ne talia a ia mo e taane haana ke pikopiko. O mai la ke kitia e kakano ne nakai fakamagalo he Atua a Anania mo Safaira.

Hogofulu e aho he mole e toka e Iesu e tau aposetolo mo e liu ke he Atua he lagi, kavi ke he 3,000 tagata ne papatiso i Ierusalema. Tokologa ne o mai he tau motu mamao ke fakamanatu e Galue he Penetekoso, ti mole he eke mo tau tutaki ha Iesu, ne manako a lautolu ke nonofo levaleva ke fakaako fakalahi ke he tua foou ha lautolu. Ti falu he tau tutaki ha Iesu ne fakaaoga e tupe ni ha lautolu ke leveki aki a lautolu.

Ne fakafua e Anania mo e hoana haana e falu fonua ke moua e tupe ke lagomatai a lautolu ne papatiso foou. He mogo ne tamai e Anania e tupe ke he tau aposetolo, ne pehē a ia ko e tupe katoa a ia ne moua mai he tau mena ne fakafua. Ka e nakai mooli! Na toka ni e ia falu tupe ma haana! Ne tala age he Atua e mena nei ki a Peteru, ti tala age e Peteru ki a Anania: “Nakai pikopiko a koe ke he tau tagata, ka ko e Atua.” Ati veli ai a Anania ki lalo, ti mate! Kavi ke he tolu e tulā he mogo fakamui, ne hu mai e hoana haana. He nakai iloa e mena ne tupu ke he taane haana, ne pikopiko foki a ia ti veli hifo mo e mate ai.

Ko e fakaakoaga malolō lahi anei: Ko e talahau he mena mooli kua aoga lahi! E, kua lata ia tautolu oti ke fakaako e fakatonuaga nei! Ka e, to hehē oti a tautolu, mua atu ka ikiiki a tautolu. Nakai kia fiafia a koe ha kua fakaalofa a Iehova ki a koe mo e to fakamagalo a koe tuga ne fakamagalo e ia a Peteru?​​— Ka e manatu, kua lata ia tautolu ke talahau e mena mooli. Ti ka taute e tautolu e hehē makimaki he pikopiko, kua lata ia tautolu ke olelalo fakamakamaka ke he Atua ke fakamagalo a tautolu. Liga ko e mena ia ne taute e Peteru, ti fakamagalo ki a ia. Ka eketaha a tautolu ke nakai liu pikopiko, to fakamagalo foki he Atua a tautolu!