Tau Motua​​—To Fakahauhau Nakai e Mutolu e “Tagata Kua Nakai Fahia”?

Ko Angela ko e matakainaga fifine nofo tokotaha he tau atu tau 30.a Ko e tau motua kua o mai ke ahiahi ki a ia ti kua tupetupe fakatote a ia. Ne manamanatu a ia, ‘Ko e heigoa la he tau motua ka talahau ki a au? Iloa e au kua fai feleveiaaga au ne nakai fakalataha ki ai, ka e he oti e gahua he aho katoa he leveki he tau tagata momotua, kua mategūgū lahi au ka hoko ki kaina.’ Nakai ni ko e mena ia, ka kua tupetupe foki a Angela ha kua gagao e matua fifine haana.

Kaeke ko koe e taha he tau motua ka ahiahi ki a Angela, to fakamafana fēfē e koe a ia? Fakamua, ko e heigoa haau ka taute ke mautali ato fina atu ke he “tagata kua nakai fahia”?​​—Iere. 31:25.

MANAMANATU KE HE TUAGA HE MATAKAINAGA HAAU

Falu magaaho kua mategūgū a tautolu oti ha ko e gahua tupe po ke tau matagahua ha tautolu he fekafekauaga ke he Atua. Ma e fakatai, ne “nakai fahia” e perofeta ko Tanielu he mogo ne moua e ia e fakakiteaga ne nakai maeke a ia ke maama. (Tani. 8:27) Ti fakafano he Atua e agelu ko Kaperielu ke fakamaama e tau mena ki a Tanielu mo e tala age ki a ia kua logona e Iehova e tau liogi haana. Ne tala age foki e agelu ki a ia kua “ofania lahi” agaia a ia ki a Iehova. (Tani. 9:21-23) He magaaho fakamui, ne fina atu foki taha agelu ki a Tanielu mo e fakamalolō a ia ke he tau kupu pihia foki.​​—Tani. 10:19.

Maeke ia koe ke taute taha mena pihia foki ka ahiahi atu ke he taha tagata he fakapotopotoaga ne mategūgū po ke lolelole. Ato fina atu a koe ke he matakainaga haau, fakaaoga taha magaaho ke manamanatu ke he tuaga haana. Ko e heigoa e tau lekua haana? Puhala fe ne liga fakalolelole he tau lekua nei a ia? Ko e heigoa e tau aga mitaki ne fakakite e ia? Ko Richard, kua molea e 20 e tau he motua ai, ne pehē na lali a ia ke manamanatu ke he tau aga mitaki he matakainaga ato ahiahi atu a ia. Manamanatu fakalahi foki a ia ke he tuaga he matakainaga. Fakamukamuka he mena nei a ia ke foaki e fakamafanaaga ne kua lata mo ia. Kaeke kua taute a koe mo e taha motua ke ahiahi ke he taha, liga mitaki ki a mua ke fakatutala hagaao ke he tuaga he matakainaga ato ahiahi atu ai.

KIA FAKATOTOKA E TAU MATAKAINAGA HA MUTOLU

Ko e mena fuafua kelea ke he matakainaga taane ke talahau e tau logonaaga haana ke he motua. Lagomatai fēfē e koe mogoia e matakainaga haau ke moua e fakatotoka? Liga lagomatai ka mamali mafanatia mo e talahau falu kupu atihake he kamataaga he ahiahi. Ko Michael ne kua 40 e tau he motua, ne fa kamata e tau ahiahi haana he talahau taha mena pehē: “Iloa e koe, ko e taha kotofaaga mitaki lahi mahaki he motua ko e ahiahi e tau matakainaga he tau kaina ha lautolu mo e ke iloa mitaki a lautolu. Ti kua amanaki lahi au ke feleveia a tautolu he aho nei.”

He kamataaga he ahiahi, maeke ia koe ke liogi mo e matakainaga. He liogi, maeke a koe ke talahau e tau aga mitaki he matakainaga, tuga e tua, fakaalofa, po ke fakauka haana. Pihia e mena ne taute he aposetolo ko Paulo he mogo ne liogi a ia ma e tau matakainaga haana. (1 Tesa. 1:2, 3) Ka liogi pihia a koe mo e matakainaga haau, kua lagomatai ai ki a mua tokoua ke moua e aga kua latatonu ma e ahiahi. Ko e fua, to atihake e fakatutalaaga haau. Maeke foki e liogi haau ke fakatotoka e matakainaga. Ko e motua lotomatala ne higoa ko Ray ne pehē kua nimo e tautolu oti he falu mogo e tau mena mitaki ha tautolu ne taute he fekafekauaga ke he Atua ti fiafia a tautolu ka fakamanatu mai he taha tagata e tau mena ia ki a tautolu.

FAKAAOGA E TOHI TAPU KE ATIHAKE

Taha puhala ka foaki e koe e “mena fakaalofa” ke he matakainaga haau, po ke atihake a ia, ko e fakaaoga e Tohi Tapu ke lagomatai a ia, pete ni ka taha e kupu tohi ka fakaaoga e koe. (Roma 1:11) Ma e fakatai, liga logona hifo he matakainaga ne fakaatukehe kua nakai fai aoga a ia. Liga totou e koe mo ia hagaao ke he salamo ne logona hifo kua tuga e “lupo kili manu ke he ahua afi” ne kua memege. Pete he pihia e logonaaga, ne pehē e salamo: “Nakai nimo ia au hāu a tau fakatufono.” (Sala. 119:83, 176) Ka oti he fakamaama fakakū e koe e kupu tohi, liga tala age e koe ke he matakainaga kua mailoga mooli e koe kua “nakai nimo” foki e ia e tau poakiaga he Atua.

Fakaaoga fēfē e koe e Tohi Tapu ke fakamafana e matakainaga fifine kua lolelole fakaagaaga po ke galo e fakamakutu haana ma e fekafekauaga ki a Iehova? Liga atihake a ia ke he fakataiaga hagaao ke he tupe ne galo. (Luka 15:8-10) Liga ko e tupe ia ko e taha vala he kahoa uho ne taute aki e tau tupe ario loga. He fakatutala a koe mo e matakainaga fifine ke he fakataiaga nei, liga lagomatai e koe a ia ke mailoga kua uho a ia ke he fakapotopotoaga Kerisiano. Ti liga lagomatai e koe a ia ke kitia ko ia taha he tau mamoe ikiiki ha Iehova ti leveki fakalahi e Iehova a ia.

Na fiafia e tau matakainaga ha tautolu ke tutala ke he tau kupu tohi ne totou e lautolu. Ti ua tutala tumau! Ka oti e totou he kupu tohi mo e matakainaga, maeke ia koe ke fifili taha e kupu po ke alaga kupu mai he kupu tohi ti ole ki a ia ke talahau haana a manatu. Ma e fakatai, he oti e totou e 2 Korinito 4:16, maeke ia koe ke hūhū, “Maeke nakai a koe ke manamanatu ke he tau puhala ne kua ‘fakafou’ e Iehova a koe, po ke foaki ki a koe e malolō?” Maeke he hūhū nei ke omoomoi a mua ke tutala ti atihake tokoua.​​—Roma 1:12.

Liga fakamafana foki e koe e matakainaga haau he fakatutala ke he taha tagata he Tohi Tapu ne pihia foki e tuaga. Liga tatai e logonaaga he tagata ne fakaatukehe mo e ha Hana po ko Epaferoti. Ne fai magaaho ne fakaatukehe a laua ka kua uho agaia ke he Atua. (1 Samu. 1:9-11, 20; Filipi 2:25-30) Loga atu foki e tau fakafifitakiaga mitaki he Tohi Tapu kua maeke ia koe ke fakaaoga.

MATUTAKI KE FAKAKITE E FIAFIA

He mole e ahiahi atu, matutaki ke fakakite e fiafia ke he matakainaga haau. (Gahua 15:36) Ma e fakatai, he oti e ahiahi, liga maeke ia koe ke fakatokatoka mo ia ke gahua fakamatala tokoua. He feleveia a Bernard ko e motua lotomatala mo e matakainaga ne ahiahi atu foou ki ai, liga hūhū fakailoilo a ia hagaao ke he fakatonuaga ne tala age e ia he pehē, “Tala mai la, kua gahuahua mitaki nakai?” He fakakite e fiafia ke he tau puhala nei, to maeke ia koe ke iloa kaeke kua lata ke fai mena foki ke taute ke lagomatai e matakainaga.

Mua atu, kua lata e tau matakainaga ha tautolu ke logona hifo kua leveki, maama, mo e fakaalofa a koe ki a lautolu. (1 Tesa. 5:11) Ato ahiahi atu, manamanatu ke he tuaga he matakainaga haau. Liogi hagaao ke he ahiahi. Fifili fakamitaki e tau kupu tohi haau ka fakaaoga. To moua e koe e tau kupu kua latatonu ke fakamafana e “tagata kua nakai fahia”!