Maeke Nakai ia Koe ke Falanaki ke he Lotu Hagaao ke he Tupe?

Ko Estellea ne fano tumau a ia he tapu mo e falu fanau. “Ne tala age au ke he akoako haaku kua manako au ke fakaako ke he Tohi Tapu,” he talahau e ia. Ka e nakai makai e akoako ke fakaako a ia. Fakahiku, ne oti e fano tapu haana. Matutaki e ia: “Ne tohi mai e tau takitaki he lotu mo e pehē ka nakai maeke au ke hoko atu, ti fakafano age ni he tupe. Manatu au, ‘Nakai manamanatu a lautolu ki a au ka fano he tapu; ko e manako ni a lautolu ke he tupe haaku.’”

Ko Angelina, ko e fifine ne malolō ke he lotu, ne pehē: “He lotu haaku, ne lagatolu e uta viko e kato he tau magaaho he tapuakiaga, ti amanaki ke fai tupe a mautolu ka tuku he tau magaaho oti ia. Kua ole tupe tumau a lautolu. Ne manatu au, ‘Nakai ha ha e agaaga he Atua ia lautolu.’”

Fakaohooho fakahako po ke fakahihiga nakai e tau lotu he matakavi haau e tau tagata ke foaki e tau tupe? Felauaki nakai e mena ia mo e Tohi Tapu?

KO E HEIGOA NE FAKAAKO HE TOHI TAPU?

Ko Iesu, ko ia ne fakatū e faka-Kerisiano, ne pehē: “Kua moua noa e mutolu, kia foaki noa atu e mutolu.” (Mataio 10:8) Kua uho lahi mahaki e fekau he Tohi Tapu ti kua lata ke moua he ha tagata kua manako ki ai.

Totogi fēfē he tau Kerisiano fakamua atu e tau mena fakatupe he fakapotopotoaga?

Igatia e tagata mo e foaki “tuga e fifili ke he hana loto; aua neke foaki mo e momoko, po ke foaki he ole fakafi; ha kua fakaalofa e Atua kia ia kua foaki mo e fakamakai.” (2 Korinito 9:7) Pehē e aposetolo ko Paulo: “He gahua ai a mautolu ke he po katoa mo e aho neke fakamamafa kia taha ia mutolu, ne fakamatala atu ai e mautolu kia mutolu e vagahau mitaki.” (1 Tesalonia 2:9) Ne taute fale ie a Paulo ke leveki a ia he fekafekauaga haana.​—Gahua 18:2, 3.

FĒFĒ E TUAGA HE TAU FAKAMOLI A IEHOVA?

Ko e Tau Fakamoli a Iehova kua fa mahani ke feleveia he tau fale lilifu ne fakahigoa ko e tau Fale he Kautu. Totogi fēfē e tau mena fakatupe? Ne nakai uta viko e lautolu e tau kapiniu oko tupe, po ke fakafano atu e tau faga tohi ke ole tupe lagomatai. Ka ko lautolu kua loto fakaaue ke he fakaholoaga fakaagaaga kua maeke ke tuku fakailoilo e tupe lagomatai he puha mena fakaalofa he Fale he Kautu.

Maaliali ai, ko e mekasini nei kua fai tupe ne fakaaoga ke lolomi mo e fakahū ai. Ka kua nakai kitia e koe ha fakaohooho ke ole tupe. Kua hagaaki ni ke foaki he kupu mooli he Tohi Tapu.

Fēfē e manatu haau: Kua lautatai nakai e aga he tau puhala nei mo e tau kupu ha Iesu, mo e fakafifitakiaga he tau Kerisiano fakamua atu?