Maeke Nakai ia Koe ke Falanaki ke he Lotu Hagaao ke he Tau Mahani?

“Ne fano au he aoga mo e tokologa ia lautolu ne totoku ke fai lotu,” he talahau e Sylvia, na gahua a ia he faahi gahua leveki malolō tino. “Ka kua kaiha a lautolu he tau kamatamata mo e fakaaoga e tau tulaki kona ne pa he fakatufono. Ne nakai fai lauiaaga e lotu ke he tau momoui ha lautolu.”

Ko e tagata ne higoa ko Lionel ne pehē: “Ne fakavai e tau kapitiga gahua haaku ti hea mai kua gagao a lautolu ka e nakai gagao mooli. Ko e lotu e taha mena ne moua e lautolu ka e nakai fakaaoga​—tuga e koloa he fale ne toka mo fakaaliali.”

Kua nakai malolō e fakaohoohoaga he lotu ke he tau mahani he laulahi he tau tagata. Kua tokologa he vahā nei kua “ha i ai ia lautolu e . . . mahani Atua” ka kua “tiaki e lautolu e malolo ne toka ai.” (2 Timoteo 3:5) Kua nakai fakatoka he ha lautolu a tau takitaki lotu e fakafifitakiaga hako, mo e nakai foaki foki he tau akoako ke he tau fuifui ha lautolu e tau tomatomaaga faka-Tohi Tapu ma e puhala ke mahani mitaki. Ko e mena ia ni ati tokologa ne talitonu kua fakateaga e Atua ke he puhala moui ha lautolu.

KO E HEIGOA NE FAKAAKO HE TOHI TAPU?

Fakakite he Tohi Tapu na fai logonaaga e Atua ti aoga lahi e tau mahani ha tautolu ki a ia. He mogo ne totoko e tau Isaraela i tuai ke he Atua, “ti fakahukia a ia.” (Salamo 78:40) Pete ia, “ha he lagi e fiafia” lahi ka hiki mooli he tagata e mahani hepe haana. (Luka 15:7) Ka mailoga he tagata e tau aga mitaki lahi he ha tautolu a Matua he lagi, to tupu e fakaalofa haana ma e Atua ti fakaohooho a ia ke fiafia ke he tau mena ne fiafia e Atua ki ai mo e vihiatia e tau mena ne vihiatia he Atua.​—Amosa 5:15.

FĒFĒ E TUAGA HE TAU FAKAMOLI A IEHOVA?

Ko e Tau Fakamoli a Iehova kua “fakaohooho e tau pipiaga malolō he magafaoa mo e feaki e tau tagata gahua malolō mo e fakamooli,” he talahau he The Deseret News he Salt Lake City, Utah, U.S.A. Ne lafi he nusipepa: “Kua talitonu a lautolu ke he tau matapatu fakaakoaga malolō ke he mahani. Ne talitonu a lautolu ko e ula tapaka, inu lahi, fakaaoga fakahehē he tau tulaki, pelē tupe, fakalialia ke he mahani feuaki mo e faka-Sotoma kua moumou ai e tuaga fakaagaaga.”

Lagomatai fēfē e Tau Fakamoli he iloa e tau aga he Atua? “Ko e fakavai ko e mena tupu tumau he faahi gahua leveki malolō tino,” he talahau e Sylvia, ne totoku he kamataaga. “Na mukamuka ke muitua ki ai. Ka ko e maama e logonaaga ha Iehovaa hagaao ki ai kua lagomatai au ke taute e mena hako. Kua fiafia au mo e fakatotoka e loto.” Ne mauokafua a Sylvia ko e moui fakatatau ke he tau taofiaga fakalotu haana ati mitaki ai e moui haana.