TAU VALA TALA I MUA | KO HAI E TAU FAKAMOLI A IEHOVA?
Ko e Tau Tagata Fēfē e Tau Fakamoli a Iehova?
Ko mautolu ko e fakatokatokaaga he lalolagi katoa ne nakai matutaki mo e ha matakau lotu. Pete kua haia e matapatu ofisa ha mautolu he lalolagi katoa i Amerika, tokologa foki e Tau Fakamoli a Iehova ne nonofo he falu motu. Kavi ke valu e miliona ia mautolu kua fakaako e tau tagata ke he Tohi Tapu he molea 230 e motu. Ne taute pihia e mautolu he omaoma ke he tau kupu ha Iesu: “To fakamatala atu foki e tala mitaki nai he kautu ke he lalolagi oti, ke eke mo talahau ke he tau atu motu oti.”—Mataio 24:14.
Ko e matakavi ni kua nonofo ai a mautolu, kua omaoma a mautolu ke he fakatufono. Ka e eketaha a mautolu ke fakatumau ke tutū uho ke he tau mena fakapolitika. Kakano ai, ha kua omaoma a mautolu ke he poakiaga ha Iesu ma e tau Kerisiano ke “nakai ko e tau tagata he lalolagi.” Ti nakai fai vala a mautolu ke he tau matakupu mo e tau gahua fakapolitika po ke lalago atu ke he tau felakutaki. (Ioane 15:19; 17:16) He Felakutaki II he Lalolagi, ne tuku e Tau Fakamoli a Iehova he tau fale puipui, fakamatematekelea, mo e tamate foki ha kua nakai fakahui e tuaga tū uho ha lautolu. Ne tohia he pisopo Sihamani he vahā fakamua: “Ko lautolu ni kua tonuhia ke fakahigoa ko e tau tagata ne nakai ō ke tau, ha ko e tau loto manamanatu he magahala ia he Third Reich.”
“Ko e [Tau Fakamoli a Iehova] kua mua atu e mahani mitaki. Maeke a tautolu ke fakaaoga e tau tagata pihia ne nakai lotokai he tau tuaga politika ne mua e tokoluga—ka e to nakai talia ai e lautolu. . . . Mailoga e lautolu e tau pule he fakatufono, ka e talitonu ko e Kautu he Atua ni kua maeke ke fakamafola e tau lekua oti kana he tagata.”—Nusipepa Nová Svoboda, Czech Republic.
Ka e nakai nonofo kehe a mautolu. Ne liogi a Iesu ke he Atua ma e haana tau tutaki: “Nakai liogi au kia uta kehe e koe a lautolu he lalolagi.” (Ioane 17:15) Ko e mena ia, liga kitia e koe a mautolu he gahua, he fale koloa, mo e ō he aoga he tau matakavi ne nonofo ai a mautolu.