Leveki e Tau Koloa he Iki

¹ He tau vaha Tohi Tapu ko e mau kotofa he fekafekau kua falanaki lahi. Ne age e Aperahamo ke he fekafekau hana e gahua ke kumi e hoana ma e tama tane hana, ko Isaako. (Kene. 24:1-4) Lauia ai, kua lago ke he fekafekau ke iloa mitaki e fakatumauaga he mataohi a Aperahamo. Ko e matagahua lahi ha ia! Ko e mena ia ni ne pehe e aposetolo ko Paulo: “Kua lata mo e tau fekafekau kua toka ki ai e tau mena, kia takitokotaha mo e fakamoli”!​—1 Kori. 4:2.

Tuaga Fekafekau Kerisiano

² Kua fakamaama mai he Tohi Tapu falu puhala he fekafekauaga Kerisiano ko e tau tuaga fekafekau. Ma e fakatai, ne tutala e aposetolo ko Paulo ke he tau Efeso he “tauteaga he fakaalofa noa he Atua kua foaki mai kia au ma mutolu.” (Efeso 3:2; Kolo. 1:25) Ne onoono a ia ko e fekau hana ke uta e tala mitaki ke he tau motu ko e tuaga fekafekau ne kua lata ia ia ke taute fakamoli. (Gahua 9:15; 22:21) Ne tohi he aposetolo ko Peteru ke he tau matakainaga fakauku hana: “Kia ta age e tau mena fakaalofa ke he tau fenoga ko e taha ke he taha mo e nakai loma. Kia takitokotaha a mutolu mo e fekafekau ko e taha ke he taha ke he mena ia ni, ke fakalata ke he mena fakaalofa kua moua e ia, tuga ne tau fekafekau pule mitaki ke he tau mena fakaalofa kehekehe he Atua.” (1 Pete. 4:9, 10; Hepe. 13:16) Ko e heigoa ni e tau mena ne moua he tau Kerisiano ia he senetenari fakamua ke he puhala fakatino ne fua mai he fakaalofa totonu a Iehova. Ko e mena haia, ko e tau fekafekau he tau mena ia mo e manako ke fakaaoga ai ke he puhala Kerisiano.

³ He vaha nei, pihia foki e onoonoaga he Tau Fakamoli a Iehova ki ai. Ne tukulele e lautolu a lautolu ki a Iehova ko e Atua mo e tau mena ne ha ha ia lautolu​—ko e tau momoui ha lautolu, ko e tau malolo ha lautolu, tau koloa fakatino ha lautolu​—ko e tau fua he “tau mena fakaalofa kehekehe he Atua.” Ko e tau fekafekau mitaki, kua logona e lautolu e fakalagoaga ki a Iehova ko e Atua ma e puhala kua fakaaoga e lautolu e tau mena nei. Lafi ki ai, kua foaki ki a lautolu e iloilo he tala mitaki. Ko e falanakiaga foki anei kua manako a lautolu ke fakaaoga ai ke he puhala kua mua ue atu: ke fakaheke e higoa a Iehova mo e ke lagomatai falu ke iloa e iloilo he kupu moli.​—Mata. 28:19, 20; 1 Timo. 2:3, 4; 2 Timo. 1:13, 14.

⁴ Kitia fefe e Tau Fakamoli a Iehova kua fakahoko ha lautolu a tau matagahua ko e tau fekafekau? Kua fakakite mai he hokotakiaga he tau kua mole hokoia, he lalolagi katoa ne foaki e lautolu molea e taha piliona tula he fakamatala e “tala mitaki he kautu” mo e fakahoko 4,500,000 he tau fakaakoaga Tohi Tapu he kaina mo e tau tagata fiafia. (Mata. 24:14) Ko e mahani fakamoli ha lautolu ko e tau fekafekau a Iehova ne fakakite foki ha ko e tau foakiaga fakamokoi ha lautolu ke he gahua he lalolagi katoa mo e lagomatai e tau Fale he Kautu he matakavi, ke he ha lautolu a lima fakaolo ke he tau leveki takaiaga mo e falu, mo e totonu mua ue atu ha lautolu ke he falu ne kua lata ki ai​—tuga e tau tagata kua lauia he tau felakutaki. Ko e matakau, ko e tau Kerisiano moli kua leveki fakamitaki ke he tau koloa he Iki.

“Fekafekau Pule, kua Fakamoli a Ia, mo e Loto Matala”

⁵ Nakai ni kitia e tuaga fekafekau mai he tagata tokotaha ka e pihia foki ke he tuaga fakatokatokaaga. Ne fakahigoa e Iesu e fakapotopotoaga Kerisiano fakauku he lalolagi ko e “fekafekau pule, kua fakamoli a ia, mo e loto matala.” (Luka 12:42) Ko e matagahua he “fekafekau pule, kua fakamoli” nei ke foaki e “tau mena kai” mo e takitaki e fakamatala he tala mitaki ke he lalolagi katoa. (Fakakite. 12:17) Fakatatai ke he mena nei, ko e vahega fekafekau fakamoli, ne hukui he Kau Fakatufono, kua foaki ki ai e matagahua he Atua ke fakagahua fakamitaki hana a tau mena mo e ‘tau taleni’ fakaagaga. (Mata. 25:15) Ke lagotatai mo e fakafifitakiaga he ‘tau fekafekau fakamoli,’ kua takitokotaha e tau la fakatuaga gahua lalahi ke eketaha ke fakaaoga e tau tupe fakaalofa ke he puhala ne kua lata, ke fakatolomaki e tau gahua he Kautu. Ko e tau foakiaga pihia ne taute mo e fakamoli, ti ko e “fekafekau pule, kua fakamoli a ia, mo e loto matala” kua fakalago ke iloa moli kua fakaaoga mo e kakano ne amanaki ki ai mo e kua taute fakapulotu ai, fakatupe, mo e kua fakaaoga fakamitaki.

⁶ Ko e fakafifitakiaga he fakaaoga pulotu e tau tupe foaki ne kitia ke he tupuaga he gahua lolomi he Tau Fakamoli a Iehova he senetenari ke 20 aki. Ko e foakiaga he tau Tohi Tapu ti pihia mo e tau tohi faka-Tohi Tapu​—ko e tau mekasini, tau tohi, tau porosua, tau tohi ikiiki, tau tuleke, mo e Tau Tala he Kautu​—kua taute ai e matagahua lahi he fakapuloa e “vagahau mitaki” ke he “tau aho fakamui” nei. (Mare. 13:10; 2 Timo. 3:1) Ti ko e mekasini Kolo Toko ko e kanavaakau lahi he foaki e “tau mena kai ke he tau magaaho tonu” ke he “faoa foki he Atua” mo e tau kapitiga ha lautolu, ko e “moto tagata tokologa he “mamoe kehe.”​—Mata. 24:45; Efeso 2:19; Fakakite. 7:9; Ioane 10:16.

⁷ He kamataaga, ko e tau tohi oti he Tau Fakamoli a Iehova ne taute he tau matini lolomi he lalolagi. Ka e he atu tau 1920, ne fifili ai to mua atu e mitaki mo e aoga fakaagaga kaeke ke taute he tau fekafekau a Iehova ha lautolu ni a lolomiaga. Kamata ai ke he puhala tote he 1920, ko e gahua lolomi kua tupu fakahaga i Brooklyn, New York, ato lahi mahaki ai. He 1967 ko e tau fale lomi ne katoa ai ke fa e poloka. Ko e lolomiaga ne taute foki he falu motu, ka e laulahi ai, ne fakalavelave he Felakutaki II he Lalolagi.

⁸ Pete ia ne tupu lahi e gahua lolomi he Tau Fahi Kaufakalataha, ne nakai lahi mahaki e foakiaga ke katoatoa ai e lalolagi katoa. Ko e mena ia, ke he tau tau hake he mole e felakutaki, ne fakatu e tau fahi lolomiaga po ke hane gahua ki ai he falu motu, lauia a Aferika Toga, Heleni, Igilani, Kanata, Sihamani Toga, Suisalani, mo Tenemaka. He kamataaga he atu tau 1970, ne lafi ki ai a Ausetalia, Filipaina, Finilani, Kana, Nigeria, Parasili, mo Sapani. Ne taute he falu motu nei e tau tohi pega. Pihia foki he kamataaga he atu tau 1970, ne fakamahani e tau misionare i Kiliata ke he tau pulotu lolomi mo e fakafano ke he falu he tau motu nei ke lagomatai e tau matakainaga he motu ke he gahua lolomi.

⁹ Ke he atu tau 1980, ko e numera he tau motu ke he tau mekasini ne lolomi ne hokotia ke he tapunu ko e 51.a Ko e fua mitaki ha anei he fakaaogaaga e tau koloa he Iki! Ko e fakamoliaga malolo ha ia he tupuaga he gahua he Kautu! Ko e fakakiteaga malolo lahi ha ia ke he lagomataiaga fakamokoi he tau miliona he Tau Fakamoli a Iehova ne ‘fakalilifu atu ki a Iehova mo e ha lautolu a tau koloa’! (Fakatai 3:9) Ti, fakamoli a lautolu ke eke mo tau fekafekau mitaki ha kua fakamonuina e Iehova a lautolu ke he tau puhala kehekehe.

Kua Hiki e Onoonoaga

¹⁰ Ke he atu tau 1970, mo e kamataaga he 1980, ko e tau tolomakiaga lalahi ne taute ke he puhala fakasaiene he lolomiaga, ti fakaaoga ai he Tau Fakamoli a Iehova e tau puhala lolomi fou lahi. Fakamua, ne fakaaoga e lautolu e tau puhala lolomi tuai. Ne hiki fakahaga e mena nei he kamata a lautolu ke fakaaoga e tau puhala matini fou. Ti ko e fua, ne moua mai ai e tau tohi kua kehekehe e lanu he tau fakatino, nakai ua e vahega lanu he tau fakatino (uli lafi ki ai taha lanu) ne kua maeke he matini lomi tuai. Lafi atu, ko e puhala fakasaiene komopiuta ne hiki e fakatokatokaaga he matini katoa (tauteuteaga ma e lolomiaga). Ne fakatu he Tau Fakamoli a Iehova e Multilanguage Electronic Phototypesetting System (MEPS), ko e fakatokaaga fakakomopiuta ne kua lagomatai e lolomiaga he magaaho nei ke molea e 370 he tau vagahau kehekehe. Nakai fai fakaholoaga he lalolagi kua tatai ke he MEPS he malolo ke gahuahua ke he tau vagahau loga.

¹¹ Fakaaue ke he puhala fakasaiene MEPS mo e fakaaoga he falu puhala fou tuga e uta meli fakakomopiuta, taha puhala mua atu e aoga ne taute ke foaki e tau mena kai ke he magaaho tonu. Fakamua, ne fakaaoga e puhala fakasaiene tuai lahi, ko e tau mekasini nakai faka-Peritania ne moua la ke he tau mahina po ke taha e tau he mole e lagaki faka-Peritania. Mogonei, kua kitia ai ko e Kolo Toko kua moua lagaua he mahina ke he tau vagahau kehekehe ne 115, mo e Awake! ke he 62. Kua kakano e mena nei he lalolagi katoa kua mahomo hake 95 e pasene ia lautolu kua fakalataha ke he Fakaakoaga Kolo Toko fakafahitapu he fakaaoga he Tau Fakamoli a Iehova e tohi taha ke he magaaho taha ia. Ko e fakamonuinaaga ha anei! Moli ai ko e fakaaoga fakamitaki he tau koloa he Iki ke tanaki ke he tau puhala fakasaiene fou ia!

Kehekehe e Tau Manako he Fakatokatokaaga

¹² Kua hikihiki he tau fakatokaaga fou nei e tau manako he fakatokatokaaga he tau gahua lolomi he lalolagi katoa he Tau Fakamoli a Iehova. Ko e tau matini lolomi kua mafiti lahi ke he tau matini lomi matatohi, ka e lahi foki e tau uka. Ko e tau fakatokaaga komopiuta kua lagomatai e tau gahua pihia, tuga e tohi, fakaliliu, ta fakatino, mo e tau puhala tohi matatohi, ne kua lahi e aoga mai ke he tau fakatokaaga tuai, kua tau uka lahi foki. Nakai leva kua tau uka ai ke lolomi e tau mekasini ke he 51 e tau motu kehekehe. Ti, ke he atu tau 1990, ko e “fekafekau pule, kua fakamoli” ne liu fai kitekiteaga ki ai. Ko e heigoa e fakahikuaga?

¹³ Ko e tau fakaakoaga ne fakakite mai e “tau koloa” ne foaki he Tau Fakamoli a Iehova mo e tau kapitiga ha lautolu to fakaaoga fakamitaki kaeke ke tuku fakalataha e gahua lolomi. Ti ko e numera he tau la lolomi ne fakatote hifo fakahaga. Kua taute e Sihamani e lolomiaga he tau mekasini mo e tau tohi ke he loga he tau motu he Fahi Uta mo Lalo i Europa, lafi ki ai e falu ne taute ni e lautolu ha lautolu a lolomiaga. Kua foaki e Italia e tau mekasini mo e tau tohi ke he falu vala a Aferika mo e fahi Toga ki uta a Europa, lafi ki ai a Heleni mo Alapania. I Aferika, ne kaupa ni e lolomiaga ki Nigeria mo Aferika Toga. Ko e tuku fakalataha pihia ne tupu viko ai he lalolagi.

Fuafua e Tau Fahi Kehekehe

¹⁴ Ia Iulai 1998, ko e lolomiaga he tau mekasini to fakaoti ai ke he tau motu nai a Europa ko Auseturia, Falani, Heleni, Netelani, Suisalani, mo Tenemaka. Ko e lahi he gahua i Europa to fua ai e Italia, Finilani, Peritania, Sepania, Sihamani, mo Suitene. He puhala nei, to nakai fakaaoga fakahanoa e tau mena totogi ti kua maeke ai e tau mena fakaalofa ke fakaaoga fakamitaki ke he puhala kua lata ma e gahua he lalolagi katoa. Fifili fefe mogoia e tau motu ka fakatumau mo tau matakavi ke lolomi mo e nakai lolomi ai? He muitua ai ke he takitakiaga ke leveki fakamitaki e tau koloa he Iki, ko e “fekafekau pule, kua fakamoli” kua fatifati fakamakutu e aoga he lolomiaga he tau la takitaha.

¹⁵ Ko e kakano mua ue atu ne nakai matutaki e lolomiaga ke he falu motu mo e fakalatahaaga ke he falu atu foki kua lata tonu. Ke taha e motu ke lolomi e tau tohi ma e falu motu kua lata lahi mo e fakaaoga mitaki ai e tau matini tau uka. Ko e lolomiaga he magaaho nei kua taute ai he tau matakavi kua tau tote, loga e tau koloa, mo e mitaki e puhala fakahu. Ti, ko e tau koloa he Iki hane fakaaoga fakamitaki ai. Moli, ko e nakai lolomi ke he motu kua nakai kakano to oti e gahua fakamatala. To ha ha ai agaia loga e tau foakiaga ke lolomi, mo e totou teau afe e Tau Fakamoli a Iehova ke he tau motu ia ka fakatumau ke fakamakai he talahau ke he tau katofia ha lautolu e “vagahau mitaki he mafola.” (Efeso 2:17) Mua atu ki ai, ko e liu fakatokatoka nei ne fua ai ke he falu lagomataiaga.

¹⁶ Ke talahau taha aoga, ko e loga he tau matini fou mai i Heleni, Netelani, Tenemaka, mo Suisalani ne fakafano ki Nigeria mo Filipaina. Ko e tau matakainaga lotomatala he tau matini mai he tau motu i Europa ne talia e uiina ke o atu mo e tau matini mo e fakamahani e tau matakainaga he matakavi ke fakaaoga ai. Ti, he mogonei ko e tau motu ia kua tatai e tuaga tokoluga he tau mekasini mo e tau motu ne fita he taute pihia.

¹⁷ Kikite la ke he taha aoga: Ko e totogi mogonei he tau mekasini ne lolomi kua fakatu ai ke he tau motu gahoa ne kua maeke ai e lolomiaga ke matutaki. Ko e fua, ke he tau motu kua fakaoti e lolomiaga, ko e tau koloa he mogonei kua fakaata ma e falu a fakaaogaaga, tuga e talagaaga he Tau Fale he Kautu mo e lagomatai ke leveki e tau manako he tau matakainaga ha tautolu he tau motu mativa. Ti, ko e fakaaoga fakamitaki he tau koloa he Iki kua kakano ko e tau kupu a Paulo ke he tau Korinito kua fakaaoga fakamitaki ai ke he fakatokatokaaga he lalolagi katoa: “Ha kua nakai manatu au ke okioki falu, ka e tukumate e mutolu. Ka e eke fakatatai, kia lagomatai he muhumena ha mutolu he vaha nai ke he ha lautolu a nonofogati . . . kia fakatatai ai.”​—2 Kori. 8:13, 14.

¹⁸ Ko e fua he kaufakalatahaaga, ko e Tau Fakamoli a Iehova he lalolagi katoa ne fakamatutaki lahi ai nakai la pihia ia tali mai. Nakai fai mena vihi ke he Tau Fakamoli i Tenemaka ke lolomi e tau mekasini ha lautolu i Sihamani, pete ni na lolomi ni e lautolu ha lautolu fakamua. Kua fakaaue a lautolu ke he gahua he tau matakainaga ha lautolu i Sihamani. Kua fakaheu kia he Tau Fakamoli a Iehova i Tihamani e moli ko e tau foakiaga ha lautolu ne fakaaoga ke taute e tau tohi faka-Tohi Tapu ma Tenemaka​—po ko Rusia, Ukaraine, mo e falu motu? Nakai pihia! Kua fiafia a lautolu ke iloa ko e tau foakiaga ha lautolu ke he tau matakainaga he falu motu kua taute mogonei ke aoga ke he falu a mena kua lata.

Leveki e Tau Koloa

¹⁹ He tau Fale he Kautu takitaha he Tau Fakamoli a Iehova he lalolagi katoa, ha ha i ai e puha foaki mena fakaalofa ne fakamailoga “Tau Mena Fakaalofa ma e Gahua he Sosaiete​—Mataio 24:14.” Ko e tau mena fakaalofa noa ne tuku he tau puha ia kua fakaata ke fakaaoga ke he ha mena ni kua lata ki ai. Ko e puhala ke fakaaoga aki e tau mena fakaalofa na fifili ai he “fekafekau pule, kua fakamoli.” Kua fakaaoga e tau mena fakaalofa ke foaki ma e lagomataiaga tupu fakaofo he tau matakainaga talitonu kua matematekelea he tau mena tuga e tau afa, tau tiotio, tau mafuike, mo e tau felakutaki. Ti ko e tau foakiaga fakaalofa pihia ne kua fakaaoga he falu motu ke lagomatai aki e tau misionare ke he tau motu ne molea e 200.

²⁰ He tau fakapotopotoaga he Tau Fakamoli a Iehova, ko e fakatokaaga, ko e tau fakatupeaga kua talahau ke he tau mahina takitaha​—mo e ke he magaaho ku. Nakai fai kapiniu tuku tupe kua uta viko he tau Fale he Kautu po ke ke he tau toloaga. Nakai fakafano e ole tupe ke he tau tagata. Nakai fai atiaga tupe ka taute. Mahani ai, taha e vala tala he Ko e Kolo Toko he tau kua fakamaama e puhala ha lautolu kua manako ke foaki e tau mena fakaalofa ke he Watch Tower Bible and Tract Society ke maeke ke lagomatai aki e gahua he lalolagi katoa. Nakai fai talahauaga tumau he tau fatifatiaga tupe he Sosaiete he Awake! Ti, maeke fefe mogoia he levekiaga ke he gahua he fakamatala e tala mitaki he lalolagi katoa, talagaaga he tau Fale he Kautu ne kua lata, mo e foaki lagomatai ke he tau Kerisiano kua manako ke fakatu ai? Ne kua fakamonuina e Iehova hana tau tagata he puhala homo ue atu ke he agaga fakamokoi. (2 Kori. 8:2) Kua foaki e mautolu e magaaho nei ke fakaaue ki a mutolu oti ne fai vala he ‘fakalilifu atu kia Iehova mo e ha lautolu a tau koloa.’ Kua moli a lautolu ko e “fekafekau pule, kua fakamoli” to fakatumau ke leveki e tau koloa he Iki. Ti liogi a tautolu to fakatumau a Iehova ke fakamonuina e tau fakatokatokaaga oti ne taute ma e fakalaulahiaga he gahua he lalolagi katoa.

[Matahui Tala]