Ati Viko e Moui Hau he Fekafekauaga a Iehova
1 Ne fakatatai e Iesu hana tau tagata fanogonogo ke he ua e tagata talaga. Taha ne ati e ia e puhala moui hana ke he mena patu he omaoma ke he Keriso ti maeke ke hao mai he tau totokoaga mo e tau matematekelea lalahi. Ka e taha ne ati i luga he oneone he liuliu lotokai ti nakai kautu mai he tau pehiaaga. (Mata. 7:24-27) He momoui he fakaotiaga he tau mena nei, kua feleveia a tautolu mo e loga he tau matematekelea lalahi. He kitiaaga ke he tau mena matakutakuina he matematekelea lahi kua mafiti e tupu fetui. To fakauka nakai a tautolu ke he fakaotiaga mo e tumau e tua ha tautolu? (Mata. 24:3, 13, 21) Falanaki lahi ni ke he puhala kua ati e tautolu e tau momoui ha tautolu mogonei. Ti, kua mataala lahi ke huhu hifo ki a tautolu ni, ‘Kua ati viko fakahokulo nakai e au e moui Kerisiano haku he fekafekau omaoma ke he Atua?’
2 Ko e heigoa e kakano ke ati viko e tau momoui ha tautolu he fekafekauaga a Iehova? Kakano ke taute a Iehova ko e uho tonu he tau momoui ha tautolu. Kua putoia ai e hagaaki ke he Kautu ko e matapatu gahua ha tautolu. Kua lauia ai e omaoma ke he Atua he tau gahua oti he tau momoui ha tautolu he tau aho takitaha. Kua lata ke loto katoa a tautolu ke he ha tautolu a fakaakoaga ke he Tohi Tapu fakatagata, magafaoa mo e fakapotopotoaga mo e fekafekauga he fonua, ko e tau mena mua anei ha tautolu. (Fakama. 12:13; Mata. 6:33) Ko e puhala omaoma pihia, kua fua mai e tua kua fakave ke he mena patu, he nakai malona ka fehagai mo e tau matematekelea lalahi.
3 Ko e fiafia ha ia ke kitia e tau tagata miliona kua mauokafua he ati viko e tau momoui ha lautolu mo e tau amaamanakiaga ma e vaha i mua he fekafekauaga ke he Atua, tuga ni ne taute e Iesu. (Ioane 4:34) Kua pipiki mau a lautolu ke he setulu fakatumau he tau gahua fakateokarasi ti ko e fua kua fiafia e lautolu e tau monuina loga. Taha e matua fifine ne fakamaama e kautuaga he feaki e ia mo e tane hana e tau tama tane tokoua ha laua ke fekafekau ki a Iehova: “Ne fakapuke e mautolu e tau momoui ha mautolu aki e kupu moli—he o ke he tau fonoaga oti, tauteute ai mo e o ke he tau feleveiaga, mo e taute e gahua ke he fonua mo vala mau he tau momoui ha mautolu.” Ne lafi he tane hana: “Nakai ko e vala he tau momoui ha mautolu e kupu moli, ko e moui ha mautolu. Viko takai e tau mena oti i ai.” Kua fakatoka pihia nakai e koe e gahua a Iehova ko e mena mua he magafaoa hau?
4 Fakatokatoka e Setulu Gahuahua Fakafahitapu: Kua lagomatai he fakatokatokaaga a Iehova a tautolu ke muitua ke he fakatokaaga fakaagaga mitaki he fakatoka e tau feleveiaaga ne lima he fahitapu. Ko e tau Kerisiano hane ati viko e tau momoui ha lautolu he tapuakiaga a Iehova kua fakatoka e tau gahua mo e tau mena fakamagafaoa ha lautolu ke he puhala ke maeke ke fakalataha atu ke he tau feleveiaaga oti nei. Ne nakai fakaata e lautolu e tau mena ne nakai lahi e aoga ke fakalavelave aki e fakalataha tumau ha lautolu.—Filipi 1:10; Hepe. 10:25.
5 Kua mailoga he tau Kerisiano kua motua e aoga he kai tumau ke he tau magaaho fafati he aho, ti kua aoga ke taute e setulu mau tumau ma e fakaakoaga fakatagata mo e magafaoa, fakalataha mo e tauteuteaga ma e tau feleveiaaga. (Mata. 4:4) Maeke nakai ia koe ke fakatoka ke 15 po ke 20 e minuti he tau aho takitaha ke taute e tau fakaakoaga fakatagata? Ko e kei ke nakai fakaata ha mena ke fakatauhele aki e magaaho kua fakatoka pauaki ma e fakaakoaga. Eke ai mo aga kua aoga lahi. Kua lata e mena nei ke uhu ala a koe he tau magaaho pogipogi takitaha. Ko e tau tagata 17,000 he magafaoa Peteli he lalolagi katoa kua ala tuai he magaaho pogipogi ke fakatutala ke he kupu he aho. Moli, ke uhu ala kua lata ke fano ke mohe he magaaho kua mitaki he po ke maeke ke kamata e aho hake he malolo mo e okioki mitaki.
6 Kaeke ko e ulu a koe he magafaoa, kia fakalotomatala he pulega mo e fakatokatoka e setulu he magafaoa hau he gahua fakateokarasi. Kua totou auloa he falu magafaoa e Tohi Tapu, ko e Yearbook, po ke taha tohi he okioki a lautolu he oti e kai afiafi. Tokologa e tau mamatua ne kitia ha lautolu a tau fanau kua tutupu hake mo tau Kerisiano malolo fakaagaga kua talahau ko e taha mena ia ne lafi ke he kautuaga ha lautolu ko e aga he magafaoa ke tuku kehe e magaaho afiafi pouli he tau fahi tapu takitaha ke fiafia auloa ke he tau puhala ati hake fakaagaga. Taha e matua tane pihia ne talahau: “Logona e au ko e tupuaga fakaagaga he fanau ha maua kua fakalago lahi ni ke he fakaakoaga fakamagafaoa ha mautolu he tau po Lotu, ne kamata ai ke he 30 e tau kua mole.” Ne papatiso oti e fanau tokotolu hana he ikiiki agaia, ti huhu oti he magaaho fakamui ke he fekafekauaga tumau. He lafi ke he fakaakoaga magafaoa, ko e fakataitaiaga he gahua he fonua po ke tau vala he feleveiaaga ke fakaako ai, mo e falu a gahua ati hake ne fiafia auloa ki ai.
7 He setulu fakafahitapu hau, kua ‘fakaaoga nakai e magaaho’ hau ma e fakamatala he Kautu? (Kolo. 4:5) Tokologa ia tautolu ne lavelave e tau momoui, fai matagahua fakamagafaoa mo e fakapotopotoaga ke leveki ki ai. Ka nakai taute e tautolu e tau fakatokatokaaga tumau ke fakalataha ke he gahua fakamatala mo e fakaako he tau fahi tapu takitaha, to mukamuka lahi he falu mena ke fakaapiapi aki e gahua aoga nei. Ko e tagata ne pule ke he faama manu lahi ne pehe: “Kavi he 1944 ne mailoga e au ko e puhala ni ke fano au he fekafekauaga ko e setulu e aho pauaki ke lata ai. Hoko mai mogonei fakaata agaia e au e aho ia he fahi tapu ma e fekafekauaga.” Taha e motua Kerisiano ne moua ko e setulu tumau ma e fakamatala kua lagomatai a ia ke moua e evalesi 15 e tula he mahina ke he gahua fakamatala. Ka fai matagahua a ia he Aho Faiumu, ne taute e ia ka oti e fekafekauaga hana he fonua ke he magaaho pogipogi. Maeke nakai ia koe mo e magafaoa hau ke setulu ke taha e aho he tau fahi tapu oti ma e fekafekauaga he fonua, he taute e mena nei ko e vala he moui fakaagaga he moui hau?—Filipi 3:16.
8 Kumikumi e Puhala he Moui Hau: Fai mena ne totoko ke he atihakeaga he tau momoui ha tautolu ke he fekafekauaga a Iehova. Ha ha i ai e tau mena tutupu fakaofo kua fakalavelave e setulu fakatoka mitaki ha tautolu he fakaakoaga, tau feleveiaga, mo e fekafekauaga. Ko e Fi ha tautolu, ko Satani, ka taute ha mena kua maeke ia ia ke ‘fakalekua a tautolu’ mo e fakakelea e tau pulega ha tautolu. (1 Tesa. 2:18; Efeso 6:12, 13) Nakai fakaata e tau mena fakalavelave nei ke fakalolelole a koe, ke maeke ia koe ke mahala. Taute e tau hikihikiaga kua lata ke fakagahua e setulu gahua fakateokarasi hau. Ko e fakamaloloaga mo e fakatumauaga kua lata ke fakakatoatoa e mena kua aoga lahi moli.
9 Kua nakai lata ia tautolu ke fakaata e tau fakaohoohoaga fakalalolagi mo e tau matematekelea he tau tino nakai mitaki katoatoa ha tautolu ke hokotia ke he tau matagahua nakai fakaagaga ne kua kamata ke moumou fakalahi ha tautolu a tau magaaho mo e onoonoaga. Kua lata e kumikumiaga fakatagata, he fakaaoga e tau huhu tuga: ‘Kua lolelole fakahaga kia e puhala moui haku ke nakai lagotatai po ke kua apiapi ai? Kua kamata kia au ke ati viko e moui haku he tau mena he lalolagi nei ka mole atu? (1 Ioa. 2:15-17) Lahi fefe e magaaho kua fakaaoga e au ke he tau mena ni haku, fenoga evaeva, tau feua sipoti, po ke falu fakafiafiaaga—lauia ai e kitekite televisoni po ke onoono ke he Internet—he fakatatai ke he magaaho ne fakaaoga e au ke he tau mena fakaagaga?’
10 Ka mailoga e koe kua apiapi lahi e moui hau ke he tau gahua nakai aoga, ko e heigoa e mena ka taute? Tuga ni he liogi e Paulo to “fakakatoatoa,” po ke “lagotatai fakamitaki” hana tau matakainaga, he ha he ole ki a Iehova ma e lagomatai ke liu ai hagaaki e matapatu ke he fekafekauaga hana? (2 Kori. 13:9, 11, matahui tala) Ti fifili mogoia ke moui lagotatai ke he fifiliaga hau mo e taute e tau hikihikiaga kua lata. (1 Kori. 9:26, 27) To lagomatai e Iehova a koe ke fakamamao mai he fano ke he fahi matau po ke fahi hema he fekafekau omaoma ki a ia.—Fakatatai Isaia 30:20, 21.
11 Lavelave Mau ke he Fekafekauaga Olioli he Atua: Totou miliona ne manako lahi ke kumi e fiafia lahi ka e moua ni kua hoko tuai e moui ke he fakaotiaga, ko e tau koloa ne fakatoka fakamakai a lautolu ke moua ne nakai ta mai ai e fiafia tukulagi ki a lautolu. Ko e “kai he matagi.” (Fakama. 2:11) He taha fahi, ka tumau e tau momoui ha tautolu ke matapatu ki a Iehova, he ‘tuku a ia ki mua nakai noa,’ ti moua e tautolu e makona hokulo. (Sala. 16:8, 11) Pihia e mena nei ha ko Iehova e kakano lahi he tau momoui ha tautolu. (Fakakite. 4:11) Ka nakai fai ia, ko e Fakatupu Lilifu Lahi, to nakai fai kakano e moui. Ko e fekafekau ki a Iehova kua fakapuke e tau momoui ha tautolu aki e gahua fai aoga mo e fai kakano kua aoga ki a tautolu ti pihia foki mo e falu ke he puhala tukulagi, e, ko e puhala tukulagi.
12 Kua aoga ke nakai kapeletu mo e galo vave e manatu ha tautolu ke he moumouaga mafiti he lalolagi a Satani. Ko e tau momoui ha tautolu he tau aho takitaha ne fakaohooho ha ko e ha tautolu ni a onoonoaga ke he vaha anoiha. Ko e tau tagata he vaha a Noa, ne nakai talia to fakapuke e lalolagi katoa, ne “nakai iloa,” kua matapatu e tau momoui ha lautolu he tau aho takitaha ke he tau mena fakatino—kai, inu, mo e fai tane—ato fakapuke ai “mo e uta kehe a lautolu oti.” (Mata. 24:37-39) He vaha nei, ko lautolu ne matapatu e tau momoui ha lautolu ke he lalolagi nei to kitia ke malipilipi ha lautolu a tau amaamanakiaga ma e vaha anoiha ke he moumouaga lahi mahaki ne nakai la kitia he tagata, ko e “aho he Atua.”—2 Pete. 3:10-12.
13 Fakatumau ai mogoia ke ati viko e moui hau he Atua moui ko Iehova, mo e taute e finagalo hana. Nakai fai totogi foki ka moua mai e koe he moui nei ne kua ha ha i ai e Lagomatai falanaki lahi tuga a Iehova. Nakai pikopiko a ia—to fakamoli oti e ia e tau maveheaga hana. (Tito 1:2) Nakai mate a ia—nakai fai mena ne tanaki hake ki a Iehova kua galo. (Hapa. 1:12; 2 Timo. 1:12) Ko e moui he omaoma mo e tua kua ati e tautolu mogonei ko e kamataaga haia he moui ka tumau tukulagi ke he fekafekauga olioli he Atua fiafia ha tautolu!—1 Timo. 1:11; 6:19.
[Blurb he lau 3]
“Nakai ko e vala he tau momoui ha mautolu e kupu moli, ko e moui ha mautolu. Viko takai e tau mena oti i ai.”