Fakauka Nakai a Koe?
1 “Nakai fai fiafia au ke mua ke he mena nai, . . . kua mahani e fanau haku kua lata mo e kupu moli.” (3 Ioane 4) Ko e fakauka he fanau fakaagaga ha Ioane kua ta mai ki a ia e olioli lahi. Ko e fakafiafia ha ia mogoia ke he Matua ha tautolu he lagi ke kitia e tau miliona he hana tau fanau a mui he “mahani . . . kua lata mo e kupu moli”!—Fakatai 23:15, 16; 27:11.
2 Hane ukufakina e tau tagata he Atua he fakamalolo ke he gahua Kerisiano, kua lolelole hifo fakahaga e falu. Pete kua hakahakau lahi a lautolu nei he magaaho ne iloa fakamua e lautolu e kupu moli, he tau tau kua mole, kua fakave a lautolu ke he puhala tote po ke nakai fakalataha tumau ke he gahua taute tutaki.
3 Maama ai, kua lolelole hifo e falu ha ko e lolelole he tino mo e tau lauiaaga he fuakau fakahaga. Pete ia, kua lata ke fakamalolo a lautolu ha ko e fakauka ha lautolu. Kua taute e lautolu e mena kua maeke ia lautolu. Ka e igatia e tau tagata ne kua tukulele hana moui ke he Atua ke huhu ki a ia ni: ‘Kua fakaata kia e au a au ke hagaaki fakalahi ke he tau tutuliaga fakatagata mo e tote e vala he moui haku ke he tau mena he Kautu? Kua eke kia au ke “mafana,” po ke “eketaha” fakamalolo agaia ni au?’ (Fakakite. 3:15, 16; Luka 13:24) Kia igatia a tautolu oti mo e fakaata he liogi ke he tau mena hane taute e tautolu mo e taute e tau tolomakiaga kua lata, he tokaloto ko e tau maveheaga a Iehova ka foaki e “fakahekeaga, mo e lilifu, mo e monuina kia lautolu oti kua eke e mahani mitaki.”—Roma 2:10.
4 Puhala ke Fakauka: Ko e heigoa ne lagomatai a Iesu ke fakauka? Ne fakamaama e Paulo: “Ko e fiafia kua toka ki mua hana, kua nofo foki a ia ke he fahi matau he nofoaiki he Atua.” (Hepe. 12:1-3) Ko e olioli ne fakatoka i mua a Iesu kua mua ke he tau kamatamata ku ne kua fehagai e ia. He tokaloto e olioli kua fakatoka i mua ha tautolu ka lagomatai a tautolu ke fakauka foki. (Fakakite. 21:4, 7; 22:12) Ka hahaga atu a tautolu ki a Iehova ke foaki ki a tautolu e malolo he puhala mai he fakaakoaga fakatagata, fakalataha tumau ke he feleveiaaga, mo e fakatumau ke he liogi, to maeke ia tautolu ke fakauka ke he gahua kua foaki mai ki a tautolu ke taute.
5 Kua fiafia a Iehova ke he fakauka he hana a tau tagata fakamoli. Ti o mai a, ke fakatupu ki mua hana olioli he fakatumau ke “mahani . . . kua lata mo e kupu moli.”