“Tau ke he Tau Mitaki kua Lata mo e Tua”
1 Kua fakamafana he aposetolo ko Paulo a Timoteo ke “tau ke he tau mitaki kua lata mo e tua.” (1 Timo. 6:12) Ne tumau ni a Paulo ke he tau kupu ia. He fakahikuhiku he hana moui, ne vagahau mo e mauokafua a ia nukua tau a ia ke he tau mitaki. (2 Timo. 4:6-8) He tau puhala oti, ne tutuli e ia e fekafekauaga mo e malolo, toa, mo e fakauka. He muitua ke he hana fakafifitakiaga, to moua e tautolu e mauokafua pihia he loto kua taute e tautolu e mena kua fahia a tautolu ke maeke ke tau ma e tua Kerisiano.
2 Fakaaoga e Laliaga kua Lata: Ne gahua fakamalolo a Paulo he fekafekauaga. (1 Kori. 15:10) Ti pihia foki a tautolu he kumi ke moua oti a lautolu kua lata he matakavi ha tautolu. (Mata. 10:11) Ke hokotia ke he falu ia lautolu, kua liga kakano ke uhu mamatike ke fakamatala ki a lautolu kua feleveia mo tautolu he puhala tu. Po ke kakano ke gahua loa he magaaho afiafi po ke afiafi pouli ke feleveia mo e tau tagata he mole e liliu atu ha lautolu ke he ha lautolu a tau kaina.
3 Kua lata ke fakatumau ki ai mo e setulu fakamitaki ke fina atu tumau ka feleveia ke he matakau fakaakoaga tohi ma e fekafekauaga he fonua. Ma e fakatai, ko e falu he tau tagata he magafaoa Peteli kua fenoga ai ke 30 e minuti he o atu mo e liliu, ke fakalataha ke he fekafekauaga mo e tau fakapotopotoaga kua kotofa ke gahua he tau matahiku vahatapu. Pihia foki, kua nava a tautolu ke he falu he tau tagata fakailoa mo e tau magafaoa he fakapotopotoaga ha tautolu kua mamao e hala ka e hohoko atu tuai. Ko e tau fakafifitakiaga pihia he makai mo e fakatokatokaaga fakatagata kua latatonu he muitua.
4 Kua lata ke omoomoi a tautolu ke liu ahi atu ki a lautolu kua fiafia ne moua e tautolu. Pete ka foaki e tau tohi he puhala tu po ke he ha magaaho noa, kua lata ia tautolu ke lali ke moua e kaina po ke numera telefoni he tagata ia. Ti ahi atu a tautolu ki a ia ke fakalaulahi atu e fiafia mo e makai ke kamata e fakaakoaga Tohi Tapu.
5 Fakalataha Tumau ke he Fekafekauaga: Kua tumau a Paulo mo e fakamakutu he fakamatala. (Roma 15:19) Ka e kua a koe? Fakalataha tumau nakai a koe ke he fekafekauaga? Kua fakalataha nakai a koe ke he gahua he fonua he mahina nei? Kua fiafia e tau tagata ne taki e Fakaakoaga Tohi he Fakapotopotoaga he kitia ko e tau tagata oti he matakau hana he fakalataha ke he fekafekauaga ia Aokuso. To lagomatai e lautolu a koe ke taute pihia.
6 He muitua e fakafifitakiaga ha Paulo he lagaki katoatoa e tala mitaki, to fakatumau a tautolu ke “tau ke he tau mitaki kua lata mo e tua.”