Matakutaku ki a Iehova he Tau Magaaho Oti
1 “Ko e matakutaku kia Iehova, ko e kamataaga ia he iloilo.” (Sala. 111:10) Kua fakalagalaga a tautolu ke taute e tau gahua mitaki mo e lagomatai a tautolu ke liliu kehe mai he mena kua kelea. (Fakatai 16:6) Ko e matakutaku nei ko e fakalilifu lahi ma e Tufuga ha tautolu, he omoi a tautolu ke tiaki e nakai fakafiafia mo e liuliu ki a ia. Ko e taha mena kua lata ia tautolu ke feaki mo e fakakite he tau aho oti.—Fakatai 8:13.
2 He tau aho oti, ko e agaga he lalolagi ha Satani kua eketaha fakalahi he peehi a tautolu ke fakalautatai ke he hana tau puhala kelea. (Efeso 6:11, 12) Ko e tau tino nakai mitaki katoatoa ha tautolu kua hala mo e hagaaki pauaki ke he mena kua kelea. (Kala. 5:17) Ti, ko e omaoma ke he tau poakiaga ha Iehova, ke fiafia, mo e moua e moui, kia matakutaku a tautolu ki a ia he tau aho oti.—Teu. 10:12, 13.
3 Ia Heperu 10:24, 25, kua fakamafana ki a tautolu ke fakapotopoto auloa ke fakamalolo e falu, “au atu ai” ke he tau magaaho nei ne kua nonofo ai a tautolu. Ko e fakalataha tumau ke he feleveiaaga kua aoga kaeke ke manako a tautolu ke hao he tau aho fakahiku nei. Ko e matakutaku ha tautolu ke nakai fakafiafia e Atua ka omoi a tautolu ke fakalataha ke he tau feleveiaaga mo e tokiofa e tau kakano tokoluga ha lautolu. Ko lautolu ne matakutaku ke he Atua kua onoono ke he fai vala he tau feleveiaaga Kerisiano ko e kotofaaga tapu.
4 Ko e omaoma e poakiaga ke fakamatala e tala mitaki he Kautu ko e taha puhala ke fakakite e tautolu e matakutaku ha tautolu ke he Atua. (Mata. 28:19, 20; Gahua 10:42) Ko e matapatu foliaga he gahua fakamatala ha tautolu ke lagomatai e falu ke feaki e matakutaku ki a Iehova mo e fakalagotatai ke he hana finagalo. Fakakatoatoa e tautolu e mena nei he taute e tau liu ahi atu, fakamakai ke kamata e tau fakaakoaga Tohi Tapu, ti fakaako ke he falu e tau poakiaga oti he Atua. Ko e mena ia kia fakatata e tautolu e matakutaku ki a Iehova mo e fakaalofa ha tautolu ke he katofia.—Mata. 22:37-39.
5 Ko lautolu ne nakai matakutaku ke he Atua kua kaumahala ke feaki e aga fakaaue ke he tau mena fakaagaga, ti mokulu a lautolu ke he matagi mate he lalolagi, po ke aga kelea. (Efeso 2:2) Kia eke e fifiliaga mauokafua ha tautolu ke “fekafekau ai a tautolu ke he Atua mo e fakafiafia kia ia, mo e maimaina, mo e matakutaku.” (Hepe. 12:28) To helehele e tautolu e tau monuina ha lautolu kua matakutaku ki a Iehova he tau aho oti.