Kia Feaki e Manako Omoomoi he Tau Tala Kautu Nu. 36
1 Kua oti nakai e tufatufaaga hau ke he hau a fafatiaga he Tau Tala Kautu Nu. 36? Ne huhu ai e huhu lautonu ma e tau tagata oti ke manamanatu: “Ko e Meleniamu Fou—Ko e Heigoa ka Ta Mai ma Hau Anoiha?” Ato hohoko atu ke he tau 2000, ko e tau amaamanakiaga ke he tau mena ka ta mai he meleniamu fou kua kehekehe lahi. Kua talahau he Tau Tala Kautu Nu. 36 e falu amaamanakiaga ia mo e fakamanatu mai ki a tautolu to nakai foaki mai he tau tutuaga he lalolagi e fakaveaga ke he amaamanakiaga mitaki. Ko e meleniamu ni ka ta mai e mafola mo e haohao mitaki ne kumi he tau tagata tokologa ko e Pule Afe Tau a Iesu Keriso. Ko e loto malolo ha tautolu ke he fakamoliaga he hana a Kautu ne fakaohooho a tautolu ke tufatufa e Tau Tala Kautu Nu. 36 ke he tau tagata oti kua maeke ia tautolu.
2 Tau Tali ke he Tau Tala Kautu: Ko e tau tufatufaaga he tau magaaho fakamua kua eke mo fakaohooho mitaki ke he gahua ha tautolu. Hagaao ke he Tau Tala Kautu Nu. 35, ne tohia e la i Canada: “Ne taute mo e fiafia he tau tagata fakamatala mo e tau paionia e matagahua pauaki nei he fonua, ti loga e tau talahauaga fuluola ne moua.” Liga ni foki kua fakakite e koe e makaukau he tufatufa e Tau Tala Kautu Nu. 36.
3 Kua setulu e matagahua nei he Tau Tala Kautu ke fakaoti ia Novema 17, 2000. Kua katoatoa nakai e tau matakavi he fakapotopotoaga hau ne fafati? Kaeke nakai, ti maeke he tau motua ke tutaki atu e matagahua ke he fakahikuaga ia Novema.
4 Kua talia fefe e tufatufaaga he Tau Tala Kautu Nu. 36 ke he matakavi hau he magaaho nei? Ko e falu tagata ka fakapuke e kupono mo e ole atu ma e taha lagaki he porosua Manako mo e/po ke fakaakoaga Tohi Tapu he kaina. Pete ia, tokologa ia lautolu ne manako fakapa ke he tala he meleniamu ka nakai taute ha mena ato liu atu la e taha Fakamoli a Iehova. Liliu aahi atu ki a lautolu oti ne kitia kua manako. Ko e magaaho fe kua mitaki ke taute e mena nei? Kua lata ke liu fakavave ke fakakia.
5 Mailoga la e tau talahauaga nei ne fua mai he liliu aahi atu ke he tau foakiaga he Tau Tala Kautu Nu. 35. Ne toka hifo e taha paionia i Ailani e Tau Tala Kautu mo e tagata pule fale kai. Ne nava he fifine e fekau ti uiina atu e matakainaga fifine ke liu atu. Ne liu atu e matakainaga fifine he ua e aho he mole, ti kamata e fakaakoaga Tohi Tapu. I Tenemaka, ne toka hifo e lagaki he Tau Tala Kautu he fale ne nakai ha i ai ha tagata. He aho taha ia ne fakafano he fifine he hana fale e kupono ke he la ofisa, ati kua fakaholo age ke he fakapotopotoaga he matakavi hana. Nakala fakahiku ai e fahitapu, ka e tokoua e matakainaga fifine ne oatu, ne fakatoka e fakaakoaga, ti finatu e fifine ke he feleveiaaga fakapa hana he Fale he Kautu!
6 Heigoa ke Talahau ka Liu Aahi Atu a Koe: Kua mukamuka lahi ke liliu aahi atu ha ko e tau foakiaga he Tau Tala Kautu mo e ko e vala anei he fekafekauaga ha tautolu ne fa fiafia lahi. He magaaho ia, kua aoga lahi ke uta e koe e lagaki he Tau Tala Kautu Nu. 36, neke nakai ha ha ia ia he fale e lagaki hana. Kia fakaaoga la e tau puhala nei.
7 Kia liu fakamanatu ke he tagata he fale e higoa hau, ati pehe atu a koe:
◼ “Ne toka e au e lautohi ne fakahigoa ‘Ko e Meleniamu Fou—Ko e Heigoa ka Ta Mai ma Hau Anoiha?’ Nakai kia mafanatia he totou to nakai leva ti kamata e Pule Afe Tau a Iesu Keriso, ke ta mai e tuaga Parataiso ke he lalolagi? [Fakakite e tau fakatino he Parataiso he Tau Tala Kautu Nu. 36.] He lau i tua, kua uiina atu a koe ke ole atu e taha lagaki he porosua Ko e Heigoa e Manako he Atua ma Tautolu?” Ti fakakite e porosua, fuluhi ke he fakaakoaga 5, ti totou e huhu fakamua mo e paratafa 1 mo e 2, ti tala age ke talahau mai e manatu hana. Totou mo e fakatutala taha po ke ua e kupu Tohi. Ka maeke, kia kikite taha huhu foki mo e paratafa, ti pulega ke liu atu ke liu matutaki e tutalaaga.
8 Ko e tohi ke matutaki ki ai ia Novema ko e porosua “Manako” po ke tohi “Iloilo,” ati pehe atu a koe:
◼ “He magaaho fakapa ne feleveia a taua, ne toka e au e lagaki ‘Ko e Meleniamu Fou—Ko e Heigoa ka Ta Mai ma Hau Anoiha?’ Ne foaki noa mai i ai e fakaakoaga he Tohi Tapu he kaina. Ne liu mai au ke fakatata e lagomataiaga ne fakaaoga e mautolu. [Fakakite e porosua Manako, ti fuluhi ke he kili i tua; po ke fakakite e tohi Iloilo, mo e fuluhi ke he lau 188-9.] Ko e Meleniamu ne totoku he Tohi Tapu ka ta mai e tuaga tuga ne kitia e koe he fakatino nei. Ke moua e moui he Parataiso, kua lata ia tautolu ke iloa tonuhia e Atua. Fakata mai la, fakamolemole, ke fakatata fakaku e puhala ne fakaaoga e mautolu ke ako e Tohi Tapu.”
9 Kua omoomoi he tufatufaaga he Tau Tala Kautu Nu. 36 a tautolu ke fakalahi e fakalatahaaga ha tautolu he fekafekauaga, ti fua mai e fakamoliaga katoatoa. Liga moli ni kua omoomoi he mena nei e manako he tau tagata tokologa he fonua. Ko e laliaga fakalataha ha tautolu ke feaki e manako nei, mo e lagomatai e Iehova, ka fua mai ki a tautolu e olioli ke kumi fakalahi atu a lautolu ne tuga e tau mamoe.—Mata. 10:11; Gahua 13:48, 49, 52.