Ō Tuga e Tau Tagata Iloilo
1 He magaaho ne ole a Iesu ke he tau tagata takafaga ika ke eke mo tau tutaki haana, ne nakai fakatolomaki e lautolu e fifiliaga ia ka kua “toka ai agataha . . . ka e mumui atu kia ia.” (Mata. 4:18-22) He magaaho ne liliuina a Saulo i Taso mo e liu e tau mata haana maama, ne nakai fakamule a ia ka e ‘fakamatala agataha a ia ke he tau sunako hagaao ki a Iesu.’ (Gahua 9:20) Na holo ki mua tumau e tau magaaho; ti ka mole atu, kua galo tukulagi ai. Ko e kakano haia ne aoga ma tautolu ke ‘ō tuga e tau tagata iloilo’ ke he puhala ke fakaaoga aki e tau magaaho ha tautolu.—Efeso 5:15, 16.
2 Tau Mena ke Tutupu Ai: Ko e tau magaaho ha tautolu he fekafekau ki a Iehova to liga mole a pogipogi. (Iako. 4:14) Nakai hao ha tagata mai he ‘tau mena ke tutupu ai.’ (Fakama. 9:11) Lafi ki ai, hane fuakau fakahaga a tautolu oti, ti hohoko mai ki a tautolu e “tau vaha kelea” ne matutaki mo e fuakau kua fakakaupā e tau mena ha tautolu ka taute he fekafekauga a Iehova he fakatokaaga nei. (Fakama. 12:1) Ko e mena ia, nakai pulotu ke fakatolomaki e tukuleleaga ke he Atua po ke fakatali ke he tau tutūaga kua lata ato gahua fakalahi ke he fekafekauga ha tautolu. (Luka 9:59-62) Ne moua e Aperahamo e mafola mo e haohao mitaki he tau tau fakahiku haana he moui, he mate ‘ka kua motua mo e fiafia’ ha kua fakaaoga fakapulotu e ia e moui haana he foaki katoatoa ai ki a Iehova.—Kene. 25:8.
3 Kua Gahoa e Tau Aho: Kua manako foki a tautolu ke fakaaoga fakapulotu e magaaho ha tautolu ha kua “gahoa e tau aho.” (1 Kori. 7:29-31) Nakai leva mogonei to fakaotioti e fakatokaaga tuai nei. Ko e tau magaaho ke taute e gahua fakapotopoto lahi ia lautolu ne tuga e tau mamoe he magahala ‘helehele he lalolagi’ to fakaoti ai. (Fakakite. 14:15) Kua lata a tautolu ke fakaeneene ke nakai fakaatā e tau fakaatukehe mo e tau fakatauhele he moui ke fōfō e tau magaaho ha tautolu nukua lata ke fakaaoga he fekafekauaga. (Luka 21:34, 35) Ko e fiafia ha ia ke liu ono ki tua he iloa kua fakalataha katoatoa a tautolu ke he heleheleaga!
4 Kua lata ia tautolu ke mataala tumau ke nakai tō noa e tau kotofaaga fiafia he matafekau kua liga hafagi mai ki a tautolu. Kia fifili a tautolu ke taute e tau mena oti kua maeke ia tautolu ke fekafekau ki a Iehova he “talahaua agaia ko e aho nai.” (Hepe. 3:13) He taute pihia, to fakakite e tautolu a tautolu ke pulotu mooli ha ko e “tagata kua eke e finagalo he Atua to tumau a ia tukulagi.”—1 Ioa. 2:17.