Talahau Atu ha Tautolu a Amaamanakiaga he Kautu
1 He tau aho fakamui nai, tokologa he lalolagi kua nakai fai amaamanakiaga. (Efeso 2:12) Kua nakai pulotu e falu he falanaki ke he tau monuina he tau koloa, tau tui ne mua, saiene he vahā foou, mo e falu atu foki. Ko e fiafia ha ia ha tautolu ke moua e amaamanakiaga mooli ma e vahā anoiha, ko e amaamanakiaga ke he “taula he agaga, kua nakai matoho mo e mauokafua”!—Hepe. 6:19.
2 I lalo he pule he Kautu he Atua, to fakafoou e lalolagi ke he parataiso. Ko lautolu ne ofania kua mamate to liliu tutū mai. (Gahua 24:15) To nakai fai mativa, nakai fakafili tonu, gagao, fuakau, mo e mate. (Sala. 9:18; Mata. 12:20, 21; Fakakite. 21:3, 4) Ko e falu mena anei he tau maveheaga a Iehova ka nakai leva ti fakamooli. Vala fe he amaamanakiaga ha tautolu kua onoono lahi atu a koe ki ai?
3 Fakapuloa e Tala Mitaki: Kua nakai lata ke toka ni ki a tautolu e amaamanakiaga he Kautu. Ko e fakaalofa ke he Atua mo e katofia kua fakalagalaga a tautolu ke fifitaki a Iesu mo e ke “fakamatala e vagahau mitaki kia lautolu kua nonofogati . . . ke fakamatala ai e tokonoaaga ke he kaumahala, kia ala ai foki e tau matapouli, ke toka noa ai a lautolu ne matematekelea.” (Luka 4:18) Kua talahau he aposetolo ko Paulo e tala mitaki he malē mo e tau matakavi ne moua e tau tagata i ai. Ne gahua fakamakamaka a ia he fekafekauaga. (Gahua 18:5) He muitua ke he fakafifitakiaga haana he fakalataha fakamakutu ke he fekafekauaga ka taofi e “fakaatukehe ke he tau mena he lalolagi nai, mo e fakavai he koloa” neke fakapulefu e amaamanakiaga faka-Kerisiano ha tautolu.—Mare. 4:19.
4 Nakai galo ha tautolu a amaamanakiaga he Kautu ka feleveia mo e tau tagata kua fakakite e nakai fiafia, ko lautolu ne uta fakateaga e ogo he Kautu, po ke totoko teao mai ki a tautolu. “Kia taofi mau e tautolu ha tautolu a amaamanaki kua talahau atu e tautolu mo e nakai hikihikifano.” (Hepe. 10:23) “Kua nakai ma [a tautolu] ke he tala mitaki.” (Roma 1:16) Kua liga kitia e mauokafua mo e fakamanavalahi ha tautolu to fakahiku e falu ke fanogonogo.
5 Pete he latatonu a tautolu ke mataala ke he tau tuaga kelea he lalolagi ne fakamooli e perofetaaga he Tohi Tapu, nakai ko e tau tagata fakamatala a tautolu he malaia. Ka e, kua hagaaki a tautolu ke he fekafekauaga he ha tautolu a amaamanakiaga he Kautu—ko e tala mitaki he Kautu he Atua. Kia fakamatala e tautolu e tala mitaki mo e fakamalolō mo e makutu “kia mauokafua ai e amaamanaki ato hohoko ke he fakahikuaga.”—Hepe. 6:11.