‘To Fakamatala e Tala Mitaki Nai’!
1. Iloa fēfē e tautolu kua nakai fai mena ke taofi e gahua fakamatala?
1 Nakai fai mena taha ke taofi a Iehova mai he fakamooli e finagalo haana. (Isaia 14:24) Pete he tuga kua kaumahala e Fakafili ko Kiteona mo e tau tagata taane haana ne 300 ke he matakautau Mitiana ne 135,000, ne tala age a Iehova ki a ia: “To laveaki mai e koe a Isaraela he lima a Mitiana, nakai kia fakafano atu e au a koe?” (Fakafili 6:14) Ko e heigoa e gahua ne lalago e Iehova he magaaho nei? Ne pehē a Iesu: “To fakamatala atu foki e tala mitaki nai he kautu ke he lalolagi oti.” (Mata. 24:14) Nakai fai tagata ke taofi e fakamooliaga he gahua nei!
2. Ko e ha kua amanaki a tautolu ki a Iehova ke lagomatai a tautolu takitokotaha he gahua he fonua?
2 Lagomatai e Iehova a Tautolu Takitokotaha: He mauokafua a tautolu to taute e Iehova e Tau Fakamoli haana ke kautū fakamatakau, maeke nakai ia tautolu ke amanaki ki a Iehova ke lagomatai a tautolu takitokotaha? He manako lagomatai, ne logona he aposetolo ko Paulo e lalagoaga ha Iehova ki a ia he puhala he haana Tama ko Iesu. (2 Timo. 4:17) Maeke ia tautolu ke mauokafua to fakamonuina pihia e Iehova e tau laliaga takitokotaha ha tautolu ke fakamooli e finagalo haana.—1 Ioa. 5:14.
3. He tau tuaga fe kua lagomatai e Iehova a tautolu?
3 Kua fakalolelole kia he tau fakaatukehe he moui he tau aho takitaha ti nakai lahi e malolō haau ma e gahua he fonua? “To foaki atu e ia e malolo kia lautolu kua lolelole.” (Isaia 40:29-31) Kua fehagai kia a koe mo e favaleaga po ke totokoaga? “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe.” (Sala. 55:22) Kua tote kia e mauokafua haau he falu magaaho? “Fano a koe; ko au foki to fakalataha au mo e gutu hau.” (Esoto 4:11, 12) Ha ha ia koe kia e tau lekua he malolō tino ti fakakaupā haau a gahua he fonua? Kua aoga lahi mo e to fakaaoga e Iehova e tau laliaga loto katoa haau, pete ni he tote.—1 Kori. 3:6, 9.
4. To maeke fēfē he mauokafua ia Iehova ke lauia a tautolu?
4 Ko e lima ha Iehova “kua fakaolo atu ko hai kia ke liuaki ai?” (Isaia 14:27) He mauokafua ke he monuina a Iehova ke he ha tautolu a gahua he fonua ka fakatumau a tautolu ke ‘vagahau fakamalolo atu ha ko e kupu ha Iehova.’—Gahua 14:3.