Tau Fakamoli a Iehova—Gahuahua e Tua, Vala 2: Kia Kikila Mai e Maama
He mole e fakatoka mai he Matakainaga ko Rutherford mo e tau hoa haana he fale puipui he 1919, ko e gahua makimaki ne fakatoka mai i mua he Tau Tagata Fakaako Tohi Tapu. He fakakite he vitiō Jehovah’s Witnesses—Faith in Action, Part 2: Let the Light Shine, liga loga e tagata totoko he Tau Tagata Fakaako Tohi Tapu, ko e maamaaga ha lautolu he tau Tohiaga Tapu to matutaki ke tupu, mo e to hakahaka e tua ha lautolu. (Fakatai 4:18; Mala. 3:1-3; Ioane 15:20) He oti e kitekite he vitiō, maeke nakai a koe ke tali e tau hūhū nei?
(1) Ko e heigoa e tau puhala ne fakaaoga he Tau Tagata Fakaako Tohi Tapu ke folafola aki e tala mitaki? (2) Ko e heigoa ne tupu he tau fonoaga talahaua he 1931 mo e 1935? (3) Ko e heigoa kua uho lahi hagaao ke he fufuta he Ko e Kolo Toko ia Novema 1, 1939? (4) Fakamaama e mena ne tupu he Madison Square Garden he mogo ne taute he Matakainaga ko Rutherford e lauga “Fakatufono mo e Mafola.” (5) Ko e heigoa kua aoga lahi hagaao ke he lauga he Matakainaga ko Knorr, “Mafola—To Tumau Nakai?” (6) He 1942, ko e heigoa e tau fakatokaaga ne taute he Tau Fakamoli a Iehova ke fakalaulahi e gahua fakamatala ha lautolu? (7) Fakamaama falu taufetului matafakatufono he tau Faahi Kaufakalataha, Kanatā, mo Heleni. (8) Ko e heigoa e omoomoiaga ha Kiliata ke he tupuaga he gahua fakamatala? (9) Ko e heigoa e gahua uho ne kamata he 1946, ti ko e ha? (10) Ko e heigoa e tau lakaaga ne taute he Tau Fakamoli a Iehova ke kitia mitaki ko e tau mahani ha lautolu kua tatai mo e tau tuaga ne fakatoka he Tohi Tapu? (11) Fakamaama falu hikihikiaga ne taute he atu tau 1970 ke fakatatai fakalataha e fakatokatokaaga mo e puhala he Tohi Tapu. (12) Fakahokulo fēfē he kitekite he vitiō nei e loto fakaaue haau ko Iehova kua pule katoatoa ti ko e fakatokatokaaga haana anei? (13) Maeke fēfē he vitiō nei ke fakamalolō haau a fifiliaga ke tumau e fakamatala fakamakutu pete ni e tau mena uka? (14) Fakaaoga fēfē e tautolu e vitiō nei ke lagomatai ha tautolu a tau magafaoa, tau tagata fakaako Tohi Tapu, mo e falu?
He mole e tau aho takitaha kua lafi atu e vala tala foou ke he fakamauaga tala he Tau Fakamoli a Iehova. Ko e heigoa la ka talahau he fakamauaga hagaao ke he tau laliaga ha tautolu ke he gahua he fonua? Ke tuga e mena ne taute he tau matakainaga ha tautolu he vahā kua mole, kia eketaha a tautolu ke “kikila mai e maama”!—2 Kori. 4:6.