To Moua Kia e Koe e Magaaho?
Fakamanatuaga i Mua, Fakakite e Loto Fakaaue
1. Ko e heigoa e magaaho pauaki kua foaki mai he Fakamanatuaga?
1 Ko e Fakamanatuaga ia Aperila 14 kua foaki mai e magaaho mitaki pauaki ke feaki mo e fakatātā e loto fakaaue ma e mahani mitaki ha Iehova. Ko e fakamauaga ia Luka 17:11-18 kua fakakite mai e tau logonaaga ha Iehova mo Iesu ke he loto fakaaue. Momoko ai, taha ni mai he tokohogofulu e lepela ne moua e magaaho ke fakakite e fakaaue. He vahā anoiha, ko e mena fakaalofa ko e poa lukutoto to fakamaulu katoatoa e tau gagao oti, ati fakamooli ai e moui tukulagi! Nakai fakauaua, to fakaaue a tautolu he mogoia ki a Iehova he tau aho takitaha ma e tau monuina pihia. Ka e maeke fēfē a tautolu ke fakakite e loto fakaaue he magahala he tau faahi tapu i mua?
2. Maeke fēfē ia tautolu ke feaki e loto fakaaue ke he poa lukutoto?
2 Feaki e Loto Fakaaue: Ko e tau logonaaga he fakaaue ne kua tupu mai he tau manatu. Ke lagomatai a tautolu ke feaki e loto fakaaue ke he poa lukutoto, ha i ai e setulu ma e totouaga pauaki he Tohi Tapu ma e Fakamanatuaga ke he loga e tohi, tuga e apenetiki B12 i loto he New World Translation foou, kalena, mo e Kumikumi e Tau Tohiaga Tapu he Tau Aho Takitaha. To fakahū foki e mena ia ke he jw.org to hoko e Fakamanatuaga. Ko e ha ne nakai kitekite ai e magafaoa ke he vala tala nei? Ka taute pihia, to holo ki mua e loto fakaaue ha tautolu ma e poa lukutoto. Ko e mena nei to lauia mitaki ai e tau mahani ha tautolu.—2 Kori. 5:14, 15; 1 Ioane 4:11.
3. Tau puhala fe kua maeke ia tautolu ke fakatātā e loto fakaaue he magahala he Fakamanatuaga?
3 Fakatātā e Loto Fakaaue: Ko e loto fakaaue kua fakakite he tau gahua. (Kolo. 3:15) Ko e lepela loto fakaaue ne makai a ia ke kumi a Iesu mo e fakaaue ki a ia. Mooli ai, ne tutala foki a ia mo e fiafia ke he falu hagaao ke he puhala ne fakamaulu fakamana a ia. (Luka 6:45) To omoomoi kia a tautolu he loto fakaaue ke he poa lukutoto ke fakapuloa fakamakutu e matagahua ke fakailoa e Fakamanatuaga? Ko e taha puhala mitaki foki ke fakakite e loto fakaaue ha tautolu ko e paionia fakakū po ke fakatolomaki e fekafekauaga he magahala he Fakamanatuaga. He mogo afiafi he Fakamanatuaga, ko e loto fakaaue to omoomoi a tautolu ke fakafeleveia e tau tagata ahiahi mo e fakamakaukau ke tali e tau hūhū ha lautolu.
4. Maeke fēfē ia tautolu ke taute e Fakamanatuaga nei mo mena ke nakai tokihala ki ai?
4 Ko e Fakamanatuaga fakahiku kia a nei ha tautolu? (1 Kori. 11:26) Nakai iloa e tautolu. Ka e iloa e tautolu ka oti e mena ia, to galo foki e magaaho pauaki ke fakakite e loto fakaaue. To moua kia e koe e magaaho? Kia fakaaoga e tautolu e tau kupu he loto fakaaue he tau gutu mo e tau fatuakiloto ha tautolu ke fakafiafia a Iehova, ko e Foaki fakamakai he poa lukutoto.—Sala. 19:14.