Taute e Tau Fakaako Tohi Tapu Lauia Mitaki
1. Ko e heigoa e matagahua kua moua he tau tagata fakailoa ne taute e tau fakaako Tohi Tapu?
1 Nakai maeke ha tagata ke fekafekau ke he Atua ato “futia mai” e Iehova a ia. (Ioane 6:44) Pete ia, ko e tau tagata fakailoa ne taute e tau fakaako Tohi Tapu kua lata ke taute e vala ha lautolu he lagomatai e tau tagata ke fakatata atu ke he ha lautolu a Matua he lagi. (Iako. 4:8) Lata mogoia ke mautauteute. He totou e tau paratafa takitaha ti talahau e tau hūhū he tohi kua nakai lahi ke lagomatai e tau tagata fakaako ha tautolu ke maama e fekau mo e holo ki mua.
2. Ko e heigoa ka taute he fakaako Tohi Tapu lauia mitaki?
2 Ke taute e tau fakaako lauia mitaki, kua lata he tau tagata fakailoa ke lagomatai e tau tagata fakaako ha lautolu ke (1) maama e mena ne fakaako he Tohi Tapu, (2) talia e mena ne fakaako he Tohi Tapu, mo e (3) fakagahua e mena ne fakaako he Tohi Tapu. (Ioane 3:16; 17:3; Iako. 2:26) To fai mahina ke takitaki e tagata fakaako ke he tau lakaaga nei. Ka e, igatia e lakaaga mo e tupu e fakafetuiaga haana mo Iehova mo e taute e tukuleleaga ki a Ia.
3. Ko e ha e tau faiaoga lauia mitaki kua fakaaoga e tau hūhū fakalagalaga manatu?
3 Ko e Heigoa he Tagata Fakaako Tohi Tapu ne Manamanatu?: Ke iloa kua maama he tagata fakaako Tohi Tapu ha tautolu mo e talia e mena kua fakaako e ia, ua tutala tumau ka e fakamafana e tagata fakaako ke talahau e manatu haana. (Iako. 1:19) Maama nakai e ia e mena ne talahau he Tohi Tapu ke he matakupu kua tutala ki ai? Maeke nakai a ia ke fakamaama e matakupu he tau kupu ni haana? Fēfē e logonaaga haana ke he mena kua fakaako e ia? Talitonu nakai a ia kua hako e mena ne fakaako he Tohi Tapu? (1 Tesa. 2:13) Maama nakai e ia ko e mena ne fakaako e ia kua lata ke aoga lahi ke he puhala ne moui ai a ia? (Kolo. 3:10) Ke maeke ke moua e tau tali ke he tau hūhū ia, lata ia tautolu ke hūhū e tau hūhū fakalagalaga manatu ti fanogonogo.—Mata. 16:13-16.
4. Ko e heigoa kua lata ke taute kaeke ke uka e tagata fakaako ke maama po ke fakagahua e mena ne fakaako e ia mai he Tohi Tapu?
4 Ko e tau aga mo e tau puhala manamanatu kua fa uka ke uulu ti fai magaaho ke tiaki e tau manatu ia. (2 Kori. 10:5) Ka e kua ka nakai talia he tagata fakaako ha tautolu po ke fakagahua e tau mena ne fakaako e ia? Lata ke fakaatā e fakauka ke lahi e magaaho ma e Kupu he Atua mo e agaaga tapu ke gahuahua ke he loto he tagata fakaako. (1 Kori. 3:6, 7; Hepe. 4:12) He nakai fakaohooho a ia, kua fa mitaki ke holo atu ke he taha matakupu kaeke kua uka e tagata fakaako ke maama po ke fakagahua e fakaakoaga he Tohi Tapu. He matutaki a tautolu ke fakaako fakamanavalahi mo e fakaalofa a ia mai he Tohi Tapu, nakai leva to holo atu a ia ke taute e tau hikihikiaga kua lata.