Puhala ke Fakamalolō he Tohi Tapu

1. Ko e heigoa e tau kamatamata kua liga fehagai mo e tau tagata ha Iehova?

KUA matematekelea kia a koe he kamatamata uka? Liga fai he fakapotopotoaga kua fakahukia a koe. (Iako. 3:2) Po ke liga vaiga he tau kapitiga gahua po ke tau kapitiga aoga a koe he fekafekau ki a Iehova. (1 Pete. 4:3, 4) Po ke lali e tau tagata he magafaoa ke taofi a koe he fano ke he tau feleveiaaga po ke tutala ke he falu hagaao ke he tua haau. (Mata. 10:35, 36) Ka mamahi lahi e kamatamata, liga logona hifo e koe e manako ke fakaoti e fekafekauaga. Ka e maeke a koe ke mauokafua pete ne paleko kua feleveia mo koe, to foaki atu e Iehova e iloilo ke fehagai ki ai mo e malolō ke fakauka.

2. Ia Roma 15:4, ko e heigoa ka tupu ka totou e tautolu e Kupu he Atua?

² He Tohi Tapu, tuku foki e Iehova e tau vala tala matafeiga ke he puhala ne fehagai e tau tagata nakai mitaki katoatoa ke he tau kamatamata. Ko e ha? Ke maeke a tautolu ke fakaako mai he tau mena ia. Ko e mena ia ne omoomoi e Iehova e aposetolo ko Paulo ke tohi. (Totou Roma 15:4.) He totou e tau vala tala nei ka moua e tautolu e mafanatia mo e amaamanaki. Ka ke aoga ai, lata a tautolu ke fai mena atu foki ka taute he nakai totou ni he Tohi Tapu. Lata ke fakaatā e Tohi Tapu ke hiki e puhala manamanatu ha tautolu mo e ke hokotia ke he tau loto. Ko e heigoa ha tautolu ka taute ka kumi e takitakiaga ke he puhala ke fehagai mo e paleko pauaki? Maeke a tautolu ke fakaaoga e tau lakaaga fā nei: (1) Liogi, (2) Manamanatu ke he tuaga, (3) Manamanatu fakahokulo, mo e (4) Fakagahua. Kia fakatutala ke he mena kua putoia he tau lakaaga takitaha ia.b To fakaaoga e tautolu e puhala kumikumi nei ke fakaako mai he tau mena tutupu ke he moui he Patuiki ko Tavita mo e aposetolo ko Paulo.

3. Ato kamata a koe ke totou e Tohi Tapu, ko e heigoa kua lata a koe ke taute, mo e ko e ha?

³ (1) Liogi. Ato kamata a koe ke totou e Tohi Tapu, ole ki a Iehova ke lagomatai ke kitia e aoga he tau mena haau ne totou. Ma e fakatai, ka kumi a koe he fakatonuaga ke fehagai mo e lekua, ole ki a Iehova ke lagomatai ke moua e tau matapatu fakaakoaga he Kupu haana ka takitaki a koe.​—Filipi 4:6, 7; Iako. 1:5.

4. Ko e heigoa ka lagomatai a koe ke maama e tala he Tohi Tapu?

⁴ (2) Manamanatu ke he tuaga. Foaki mai e Iehova ki a tautolu e lotomatala ke manamanatu ke he tuaga. Ke lagomatai a koe ke maama e tala he Tohi Tapu, lali ke manamanatu ke he tuaga mo e kitia e koe a koe he tuaga haana. Lali ke kitia e tau mena ne kitia e ia mo e logona hifo e tau logonaaga haana.

5. Ko e heigoa e manamanatu fakahokulo, ti taute fēfē e koe?

⁵ (3) Manamanatu fakahokulo. Ko e kakano ke manamanatu fakahokulo ko e manamanatu fakalahi ke he mena ne totou e koe mo e puhala ka fakagahua e koe e vala tala. Lagomatai ai ki a koe ke matutaki e tau manatu mo e moua e maamaaga hokulo ke he matakupu. He totou e Tohi Tapu ka e nakai manamanatu fakahokulo kua tuga e onoono ke he tau vala he jigsaw puzzle he laulau ka e nakai tuku fakalataha. Ko e manamanatu fakahokulo kua tuga e tukutuku fakalataha he tau vala takitaha ia ke kitia e fakatino katoa. Ke lagomatai a koe ke manamanatu fakahokulo, maeke ke hūhū mo e tali e tau hūhū tuga anei: ‘Ko e heigoa ne taute he tagata he tala ke lagomatai aki a ia? Lagomatai fēfē e Iehova a ia? Fakaaoga fēfē e au e tau mena kua fakaako ke lagomatai au ke fakauka ke he tau kamatamata?’

6. Ko e ha kua lata a tautolu ke fakagahua e mena kua fakaako?

⁶ (4) Fakagahua. Pehē a Iesu ka nakai fakagahua e tautolu e tau mena kua fakaako, kua tuga e tagata ne tā haana a fale i luga he oneone. Lahi e gahua haana ne taute ka e nakai fai aoga ki a ia. Ko e ha? Ka tō e afā mo e puke lahi e vai, ti malolo e fale haana. (Mata. 7:24-27) Pihia foki, kaeke ke liogi, manamanatu ke he tuaga, mo e manamanatu fakahokulo ka e nakai fakagahua e tautolu e tau mena ne fakaako, to nakai fai aoga e tau laliaga ha tautolu. Ka lauia e tua ha tautolu he tau kamatamata po ke favale, to nakai mauokafua ai. He taha faahi, ka kumikumi mo e fakagahua e tautolu e tau mena kua fakaako, to taute e tautolu e tau fifiliaga mitaki, lahi e mafola, mo e malolō lahi e tua. (Isaia 48:17, 18) He fakaaoga e tau fakaakoaga fā ne fakatutala a tautolu ki ai, kitekite a tautolu ke he fakaakoaga mai he mena ne tupu ke he moui he Patuiki ko Tavita.

KO E HEIGOA HAAU KA FAKAAKO MAI HE PATUIKI KO TAVITA?

7. Ko e heigoa e tala he Tohi Tapu ka fakatutala a tautolu mogonei?

⁷ Kua fakamamahi kia he kapitiga po ke tagata he magafaoa a koe? Ka pihia, to aoga ki a koe he liu manamanatu ke he tala ki a Apisaloma ko e tama he Patuiki ko Tavita, ne fakamamahi e matua taane haana mo e lali ke fofō e kautu mai ia ia.​—2 Samu. 15:5-14, 31; 18:6-14.

8. Ko e heigoa ka taute e koe ke moua e lagomatai ha Iehova?

⁸ (1) Liogi. He tokaloto e tala, fakailoa ki a Iehova e logonaaga haau ke he puhala kua ekefakakelea a koe. (Sala. 6:6-9) Tala age fakatonu. Ti ole ki a Iehova ke lagomatai a koe ke kitia e tau matapatu fakaakoaga ka takitaki a koe he lali ke fahia ke he paleko uka nei.

9. Fakamaama fēfē e koe e tala ki a Tavita mo Apisaloma?

⁹ (2) Manamanatu ke he tuaga. Manamanatu ke he tau mena ne tutupu he tala nei, ti manamanatu ke he tuaga ne lauia e Patuiki ko Tavita. Ne leva e gahua he tama taane ha Tavita ko Apisaloma ke fiafia age e tau tagata ki a ia. (2 Samu. 15:7) He logona hifo e Apisaloma kua hoko e magaaho hako, fakafano atu e ia e tau toko ki Isaraela katoa ke tauteute e tau tagata ke talia a ia ke eke mo patuiki ha lautolu. Fakaohooho foki e ia e taha kapitiga tata mo e tagata pule ha Tavita ko Aitofele ke fakalataha ke he totokoaga. Fakailoa e Apisaloma a ia ko e patuiki ti lali ke tapaki mo e tamate a Tavita, ne liga gagao lahi he magaaho ia. (Sala. 41:1-9) Iloa e Tavita e lagatau ti hola a ia i Ierusalema. Fakahiku ai, latau e tau kau ha Apisaloma mo e ha Tavita. Kaumahala e kau ne totoko ti tamate e tama ha Tavita ko Apisaloma.

10. Liga maeke e Patuiki ko Tavita ke tali atu fēfē?

¹⁰ Matutaki atu, manamanatu ke he tuaga he logonaaga ha Tavita ke he tau mena oti nei ne tupu ki a ia. Ofania e ia a Apisaloma mo e falanaki ki a Aitofele. Ka e fakamamahi he tau kapitiga tata nei a ia. Fakahukia lahi e laua a ia mo e lali foki ke tamate a ia. Maeke a Tavita ke galo e falanaki ke he falu kapitiga haana he manatu kua kau a lautolu mo Apisaloma. Liga manatu na ia ki a ia ti manako ke hola tokotaha mai he motu. Po ke lolelole lahi mahaki. Ka e nakai pihia a Tavita. Kautū a ia ke he kamatamata uka nei. Ko e ha ne maeke a ia ke taute pihia?

11. Tali atu fēfē a Tavita ke he tuaga uka?

¹¹ (3) Manamanatu fakahokulo. Ko e heigoa e tau matapatu fakaakoaga kua fakaako mai e koe he tala? Tali e hūhū, “Ko e heigoa ne taute e Tavita ke lagomatai aki a ia?” Nakai hopoate a Tavita, ti nakai taute e tau fifiliaga fakatepetepe ne nakai pulotu. Po ke manamanatu teao a ia he molea e matakutaku. Ka e liogi a ia ki a Iehova ma e lagomatai. Ole foki a ia ke he tau kapitiga haana ke lagomatai a ia. Ti mafiti a ia ke fakagahua e fifiliaga ne taute e ia. Pete kua hukia lahi mahaki a Tavita, ne nakai tuahā mo e loto kona a ia. Matutaki a ia ke falanaki ki a Iehova mo e tau kapitiga haana.

12. Ko e heigoa ne taute e Iehova ke lagomatai a Tavita?

¹² Lagomatai fēfē e Iehova a Tavita? He taute falu kumikumiaga, to fakaako e koe na foaki e Iehova ki a Tavita e malolō kua lata ke fakauka ke he kamatamata nei. (Sala. 3:1-8; mataulu) Fakamonuina e Iehova e tau fifiliaga ne taute e Tavita. Ti lalago e ia e tau kapitiga fakamooli ha Tavita he tau atu ke puipui e patuiki ha lautolu.

13. Fifitaki fēfē e koe a Tavita ka fakahukia lahi mahaki he taha tagata a koe? (Mataio 18:15-17)

¹³ (4) Fakagahua. Hūhū hifo, ‘Fifitaki fēfē e au a Tavita?’ Lata a koe ke fakamafiti ke fakamafola e lekua. Fakavē ke he tau tuaga, maeke a koe ke fakagahua e fakatonuaga ha Iesu ia Mataio veveheaga 18, he taute pihia po ke muitua ke he matapatu fakaakoaga. (Totou Mataio 18:15-17.) Ka e nakai lata a koe ke taute fakatepetepe e tau fifiliaga ka ita. Lata a koe ke liogi ki a Iehova ke foaki atu e loto totoka mo e iloilo ke iloa e mena ke taute. Fakatumau ke falanaki ke he tau kapitiga haau. Ti makai ke talia e lagomatai ha lautolu. (Fakatai 17:17) Mua atu e aoga, muitua ke he fakatonuaga ne foaki e Iehova he Kupu haana.​—Fakatai 3:5, 6.

KO E HEIGOA HAAU KA FAKAAKO MAI IA PAULO?

14. Ko e heigoa e tau tuaga ka omoomoi a koe ke onoono ke he 2 Timoteo 1:12-16; 4:6-11, 17-22?

¹⁴ Fehagai kia a koe mo e totokoaga mai he tau tagata he magafaoa haau? Po ke nofo a koe he motu ne fakakaupā lahi po ke pā malu e gahua he tau tagata ha Iehova? Ka pihia, liga mafanatia a koe he totou e 2 Timoteo 1:12-16 mo e 4:6-11, 17-22.c Tohi e Paulo e tau kupu nei he nofo a ia he fale puipui.

15. Ko e heigoa ka ole a koe ki a Iehova?

¹⁵ (1) Liogi. Ato totou e koe e tau kupu tohi ia, tala age ki a Iehova e lekua mo e logonaaga haau. Tala age fakatonu. Ti ole ki a Iehova ke lagomatai a koe ke mailoga e tau matapatu fakaakoaga he tala ke he tau kamatamata ha Paulo ka lagomatai a koe ke iloa e puhala ke tali atu ke he paleko kua fehagai mo koe.

16. Fakamaama fēfē e koe e tuaga ha Paulo?

¹⁶ (2) Manamanatu ke he tuaga. Manamanatu ko koe he tuaga ha Paulo. Kua līlī a ia ke he tau toua lapatoa he fale puipui i Roma. Na tuku a ia he fale puipui he mogo fakamua ka ko e mogonei kua iloa tonu e ia to kelipopo a ia. Tiaki he falu kapitiga haana a ia mo e lolelole lahi e tino haana.​—2 Timo. 1:15.

17. Liga maeke a Paulo ke tali atu fēfē?

¹⁷ Maeke a Paulo ke hagaaki ke he moui haana kua mole, he manatu ane taute e ia e tau fifiliaga kua kehe to liga nakai tuku a ia he fale puipui. Maeke a ia ke loto kona ke he tau tagata taane i Asia ne tiaki a ia, ti liga tuahā a ia ke he falu kapitiga haana. Ka e nakai taute e Paulo e tau mena ia. Ko e ha kua maeke a ia ke tumau e mauokafua mo e amaamanaki?

18. Tali atu fēfē a Paulo ke he kamatamata ne fehagai mo ia?

¹⁸ (3) Manamanatu fakahokulo. Tali e hūhū, “Ko e heigoa ne taute e Paulo ke lagomatai aki a ia?” Pete he iloa e Paulo to mate a ia, nakai nimo e ia kua uho lahi ke fakaheke a Iehova. Ti matutaki a ia ke manamanatu ke he puhala ka fakamafana e ia e falu. Falanaki a ia ki a Iehova he liogi tumau. (2 Timo. 1:3) He nakai manamanatu lahi ki a lautolu ne tiaki a ia ka e fakakite e ia e loto fakaaue lahi mahaki ma e lalagoaga fakaalofa he tau kapitiga haana ne lagomatai fakamooli a ia. Lafi ki ai, matutaki a Paulo ke fakaako e Kupu he Atua. (2 Timo. 3:16, 17; 4:13) Mua atu e aoga, mauokafua katoatoa a ia kua fakaalofa a Iehova mo Iesu ki a ia. Nakai tiaki e laua a ia, mo e to palepale e laua a ia ma e fekafekauaga fakamooli haana.

19. Lagomatai fēfē e Iehova a Paulo?

¹⁹ Hataki e Iehova a Paulo to lata a ia ke fakauka ke he favale ha kua eke mo Kerisiano. (Gahua 21:11-13) Lagomatai fēfē e Iehova a Paulo? Tali e Ia e tau liogi ha Paulo, ti foaki mogoia e malolō ki a ia. (2 Timo. 4:17) Tala age foki ki a Paulo to moua e ia e palepale ne gahua malolō ke moua. Ti fakalagalaga e Iehova e tau kapitiga fakamooli ha Paulo ke lagomatai a ia.

20. He tokaloto e Roma 8:38, 39, fifitaki fēfē e koe a Paulo?

²⁰ (4) Fakagahua. Hūhū hifo, ‘Fifitaki fēfē e au a Paulo?’ Tuga a Paulo, lata ke amanaki to favale mai ha ko e tua ha tautolu. (Mare. 10:29, 30) Ke fakatumau e fakamooli ha tautolu ka kamatamata, lata ke falanaki ki a Iehova he liogi mo e fakatumau e fakaholoaga fakaako mitaki. Ti lata ke manatu tumau ko e taha he tau mena ne mua e aoga ka taute e tautolu ko e fakaheke a Iehova. Maeke a tautolu ke mauokafua to nakai tiaki e Iehova a tautolu, ti nakai fai tagata ke fakamavehe e fakaalofa haana ma tautolu.​—Totou Roma 8:38, 39; Hepe. 13:5, 6.

FAKAAKO MAI HE FALU TAGATA HE TOHI TAPU

21. Ko e heigoa ne lagomatai a Aya mo Hector ke kautū ke he tau paleko ha laua?

²¹ Pete ne tau tuaga, maeke a tautolu ke moua e malolō mai he tau fakafifitakiaga he Tohi Tapu. Tuga anei, ko Aya ko e paionia i Sapanī ne pehē ko e tala ha Iona ne lagomatai a ia ke kautū ke he matakutaku haana ke fakamatala ke he toloaga tagata. Ko Hector, ko e fuata i Indonesia ne nakai fekafekau e tau matua ki a Iehova, ne omoomoi he fakafifitakiaga ha Ruta ke fakaako hagaao ki a Iehova mo e fekafekau ki a ia.

22. Aoga fēfē ki a koe e tau taute tala he Tohi Tapu po ke tau fufuta “Fifitaki e Tua ha Lautolu”?

²² Moua e koe i fe e tau fakafifitakiaga he Tohi Tapu ke fakamalolō a koe? Ko e ha tautolu a tau vitiō mo e taute tala mo e tau fufuta “Fifitaki e Tua ha Lautolu” ka lagomatai ke maama e tau tala Tohi Tapu.d Ato kitekite, fanogonogo, po ke totou e koe e tau tala nei kua kumikumi fakamitaki, ole ki a Iehova ke lagomatai a koe ke moua e tau matapatu manatu pauaki ka fakagahua e koe. Manamanatu ko koe he tuaga he tagata ia. Manamanatu fakahokulo ke he tau mena ne taute he tau fekafekau fakahele nei ha Iehova mo e puhala ne lagomatai e Ia a lautolu ke kautū ke he tau mena uka. Ti fakagahua e tau fakaakoaga nei ke he tuaga haau. Fakaaue ki a Iehova ma e lagomatai kua foaki atu e ia ki a koe. Fakakite e fakaaue haau ke he lagomatai he kumi puhala ke fakamafana mo e lalago e falu.

23. Ia Isaia 41:10, 13, ko e heigoa kua mavehe e Iehova ke taute ma tautolu?

²³ Uka e moui he lalolagi nei ne pule e Satani ti nakai iloa e mena ke taute he falu magaaho. (2 Timo. 3:1) Ka e nakai lata a tautolu ke tupetupe po ke matakutaku. Iloa e Iehova e tau lekua ha tautolu. Ka veveli a tautolu, mavehe a ia to taofi e ia a tautolu ke he haana lima matau ne malolō. (Totou Isaia 41:10, 13.) He mauokafua katoatoa ke he lalago haana, maeke a tautolu ke moua e malolō mai he Tohi Tapu mo e kautū ke he ha paleko.