Veveheaga 60

Kitia Tuai e Lilifu ha Keriso ke he Kautu

NE FANO a Iesu ke he tau fahi i Kaisaria Filipi, mo e fakaako e ia e moto tagata fakalataha mo e hana a tau aposetolo. Ne talahau e ia e fakailoaaga ofoofogia nei ki a lautolu: “Ko e moli, ke tala atu e au kia mutolu, Ha ne tutu mai hinai e falu nakai hoko kia lautolu e mate, ato kitia e lautolu e Tama he tagata kua hau ke he hana kautu.”

‘Ko e heigoa la e kakano ha Iesu?’ he manamanatu he tau tutaki. Liga ko e taha e fahi tapu he mole, ne uta e Iesu a Peteru, Iakopo, mo Ioane mo ia, mo e toli hake he mouga tokoluga. Liga ni ko e po, ha kua fia momohe e tau tutaki. Hane fa e liogi a Iesu, ne faliu a ia i mua ha lautolu. Kua kikila hana fofoga tuga e la, kua hina vake foki hana tau tapulu tuga ne maama.

Ne tokoua e tagata ne kitia ai tuga ko “Mose mo Elia,” ne tutu mai mo e kamata ke tutala ki a Iesu hagaao ia ke he hana ‘fano kehe ka fakahoko ki Ierusalema.’ Ko e hagaao e fano kehe nei ke he matulei ha Iesu mo e liu tu mai he magaaho fakamui. Ko e mena ia ne fakamoli he fakatutalaaga nei e hana a mate fakateaga, ko e mena nakai ke kalo mai ai, tuga mo e manako ha Peteru.

Ne aala a lautolu mogonei, mo e kitekite e tau tutaki mo e fanogonogo mo e ofoofogia. Pete ni ko e fakakiteaga a nei, ne tuga ni ko e mena molioli ati fakalataha foki a Peteru ke he fakakiteaga mo e pehe: “Ko e Iki na e, mitaki he nonofo a tautolu i hinai; ka loto a koe ki ai, ti ta e mautolu i hinai tolu e fale api; māu taha, ma Mose foki taha, ma Elia foki taha.”

Ha ne vagahau a Peteru, ti uufi he aolu kikila a lautolu, mo e leo mai loto he aolu ne pehe mai: “Ko e haku a Tama fakahele hanā, kua fiafia au kia ia; kia fanogonogo a mutolu kia ia.” Ha kua logona e leo, ne veveli fakafohifo e tau tutaki. Ka e pehe ni a Iesu: “Kia mamatike a a mutolu, ua matakutaku foki a mutolu.” Ne mamatike a lautolu, ka e nakai kitia taha ka ko Iesu ni hokoia.

Ko e magaaho ne o hifo mai a lautolu he mouga he aho hake, ne hataki e Iesu: “Aua neke tala age e mutolu kia taha e mena ne kitia, ato tu mai e Tama he tagata ia lautolu kua mamate.” Ne tupu mai e huhu ke he tau manamanatuaga he tau tutaki he kitia a Elia ke he fakakiteaga. “Ko e heigoa,” he huhu e lautolu, “e mena ne talahau mai ai e tau tohikupu to hau fakamua mai a Elia ke lata ai?”

“Kua hau tigahau a Elia,” he tala age e Iesu, “ka e nakai iloa e lautolu a ia.” Ko e tala a Iesu hagaao ia ki a Ioane ko e Papatiso, ne fakamoli e kotofaaga tuga ha Elia. Ne tauteute e Ioane e puhala ma Keriso, tuga ne taute e Elia ma Elisaio.

Ko e fakamalolo ha a ia he fakakiteaga nei, pihia ua ki a Iesu mo e hana a tau tutaki! Ko e fakakiteaga, kua fakakite tuai e lilifu ha Keriso ke he Kautu. Tuga moli he kitia he tau tutaki e “Tama he tagata kua hau ke he hana kautu,” tuga ni he mavehe e Iesu he fahi tapu fakamua. Mole e mate a Iesu, ne tohi e Peteru ha lautolu a ‘eke mo tau tagata ne ono mata ke he lilifu lahi ha Keriso he fakalataha a lautolu mo ia he mouga tapu.’

Ne ole e tau Farasaio ki a Iesu ke he taha fakamailoga ke fakamoli aki ko ia ne mavehe mai he tau Tohiaga Tapu e Patuiki ne fifili he Atua. Ne nakai foaki ha fakamailoga ki a lautolu. Ka ko e taha fahi, ko e tau tutaki ne fakafetui tata mo Iesu, ne fakaata ke kitia e faliuaga ha Iesu ke fakamoli aki e tau perofetaaga he Kautu. Ko e mena haia, ne tohi e Peteru he magaaho fakamui: “Ha ia tautolu foki e kupu he perofetaaga kua mua hana mauoka.” Mataio 16:​13, Mat 16:28–​17:13; Mareko 9:1-13; Luka 9:​27-37; 2 Peteru 1:​16-19.

▪ Ato mamate, kitia fefe he falu a Keriso ne hau ke he hana Kautu?

▪ Ke he fakakiteaga, ko e heigoa ha Mose mo Elia ne tutala mo Iesu?

▪ Ko e ha e fakakiteaga nei ne eke mo lagomataiaga fakamalolo lahi ke he tau tutaki?