Veveheaga 14

Ha Hai e Pule Malolo kua Lata ia Koe ke Mailoga?

1, 2. Kua kelea oti ka e tau faga pule malolo? Fakamaama.

“PULE MALOLO” ko e kupu ai mitaki lahi a ia ke he tokologa he tau tagata. Kua maama e mena nei, ha ko e pule malolo kua nakai fa fakaaoga fakamitaki​—ke he gahuaaga, i loto he magafaoa, mo e he tau fakatufono. Kua talahau fakamoli mai he Tohi Tapu: “Kua pule ai e taha tagata ke he taha, ke kelea ai e ia ni.” (Fakamatalaaga 8:9) E, tokologa kua fia pule atu ke he falu he taute e mahani favale mo e manamanatu ni ki a ia ni.

² Ka e nakai kelea oti e tau pule malolo. Ke fakatai ki ai, kua tuga ai ke pehe kua fakagahuahua he ha tautolu a tino e pule malolo ki a tautolu. Kua “poaki” mai ki a tautolu ke fafagu, kai, inu, mo e mohe. Ko e ekefakakelea ka ia? Nakai. Ko e fakatatai atu ke he tau poakiaga nei ko e mitaki ni ma ha tautolu. Pete ni ko e omaoma ke he tau manako he ha tautolu a tino ko e mena taute pauaki, kua ha ha i ai foki e falu pule malolo ne kua lata mo e ha tautolu a fakamakaiaga ke fakalilifu. Ki a manamanatu atu ke he falu he tau fakafifitakiaga.

KO E PULE MALOLO MUA UE ATU

3. Ko e ha kua tonu ai ke fakahigoa a Iehova ko e “Iki Pule Katoatoa”?

³ Kua fakahigoa a Iehova ko e “Iki Pule Katoatoa,” i loto he Tohi Tapu ke molea e laga 300. (NW) Ko e pule katoatoa ko ia a ia ne toka ai e pule malolo mua ue atu. Ko e heigoa ne tuku ki a Iehova e tuaga mua atu nei? Kua tali mai ia Fakakiteaga 4:11: “Ko e Iki na e, kua lata ni a koe ke tuku atu ki ai e fakahekeaga, mo e lilifu, mo e malolo; ha kua eke e koe e tau mena oti, ha ko e hau a finagalo foki ne ha ha i ai a lautolu, mo e eke ai a lautolu.”

4. Kua fifili fefe e Iehova ke fakagahuahua e pule malolo hana?

⁴ Ha ko e ha tautolu a Tufuga, kua ha ha ia Iehova e tonu ke fakagahuahua e pule malolo hana ke he hana fifiliaga. Tuga ke matakutaku ke he mena nei, mua atu ke he magaaho ne manamanatu atu kua ha ha he Atua e “malolo lahi.” Kua fakahigoa a ia ko e “Atua mana”​—ko e kupu faka-​Heperu ne moua mai e manatu he malolo ne lahi mahaki. (Isaia 40:26; Kenese 17:1) Ka e, fakakite e Iehova e malolo hana ke he puhala mitaki, ha ko e hana a mahani ne mua e tokoluga ko e fakaalofa.​—1 Ioane 4:16.

5. Ko e ha kua nakai uka ke omaoma ke he pule malolo ha Iehova?

⁵ Pete ni he hataki e Iehova to tamai e ia e fakahala ki a lautolu kua taute mena hepehepe ne nakai tokihala, kua iloa fakamua e Mose a ia “ko e Atua kua fakamoli, kua taofi e ia e maveheaga katoa mo e fakaalofa mo lautolu kua fakaalofa atu kia ia mo e omaoma ke he hana tau poaki.” (Teutaronome 7:9) Kia manamanatu la! Ko e Pule Malolo Mua Ue Atu he lalolagi mo e lagi katoatoa kua nakai uhu e ia a tautolu ke fekafekau atu ki a ia. Ka e, kua futiaki a tautolu ki a ia ha ko e hana a fakaalofa. (Roma 2:4; 5:8) Ke omaoma ke he pule malolo ha Iehova ko e mena fiafia foki a ia, ha kua gahua tumau e tau matafakatufono hana ma e ha tautolu a aoga.​—Salamo 19:7, 8.

6. Kua tupu mai fefe e matakupu ke he pule malolo he kaina ko Etena, mo e ko e heigoa e fua?

⁶ Kua tiaki he ha tautolu a tau mamatua fakamua e pule katoatoa he Atua. Kua manako a laua ke fifili ni e laua e mena mitaki mo e kelea. (Kenese 3:4-6) Ti ko e fua, kua tolo a laua ki fafo he kaina Parataiso. Kua fakaata ai e Iehova e tau tagata he magaaho fakamui ke taute e tau fakatokaaga he pule malolo ke maeke ia lautolu ke nonofo ke he kaufakalatahaaga maopoopo, ka e nakai mitaki katoatoa. Ko e heigoa e falu pule malolo nei, mo e amaamanaki e Atua ke hoko ki fe e omaoma ha tautolu ki a lautolu?

“TAU PULE MALOLO NE MUA”

7. Ko hai e “tau pule malolo ne mua,” mo e matutaki fefe e tuaga ha lautolu ke he pule malolo he Atua?

⁷ Kua tohi he aposetolo ko Paulo: “Kia omaoma e tau tagata oti kana ke he [“tau pule malolo ne mua,” NW], ha kua nakai fai pule kua nakai mai he Atua.” Ko hai e “tau pule malolo ne mua”? Ko e tau kupu ha Paulo he tau kupu Tohi Tapu i mua kua fakakite mai ko lautolu ko e tau pule malolo ne mua he fakatufono he tagata. (Roma 13:​1-7; Tito 3:1) Kua nakai kamata e Iehova e pule malolo he fakatufono he tagata, ka e kua fakaata e ia a lautolu ke ha ha i ai. Ti kua maeke ai a Paulo ke tohia: “Ka ko lautolu ha ha i ai e pule ainei, kua kotofa he Atua a lautolu.” Ko e heigoa ne fakakite mai he mena nei hagaao ke he pule malolo fakalalolagi pihia? Kua haia i lalo, po ke tokolalo hifo, he pule malolo he Atua. (Ioane 19:​10, 11) Ti, ka ha ha i ai e feoka he vahaloto he matafakatufono he tagata mo e matafakatufono he Atua, kua lata e tau Kerisiano ke takitaki ai he ha lautolu a loto manamanatuaga kua fakaako ke he Tohi Tapu. Kua “lata ni ke mua e omaoma ke he Atua ke he omaoma ke he tau tagata.”​—Gahua 5:29.

8. Maeke fefe a koe ke aoga mai he tau pule malolo ne mua, mo e fakakite fefe e koe e fakalilifu hau ki a lautolu?

⁸ Ka e, ke he tau magaaho loga, ko e tau pule malolo ne mua he fakatufono kua gahua ma e ‘fekafekau he Atua kia tautolu, kia mitaki ai.’ (Roma 13:4) Ke he tau puhala fe? Moli, manamanatu atu ke he tau matagahua kehekehe ne foaki mai he tau pule malolo ne mua, tuga e tufa he tau meli, puipuiaga he leoleo mo e mai he afi, fakameaaga, mo e fakaakoaga. “Ko e mena foki ia, kua ta atu ai e mutolu e poa [tukuhau],” he tohi e Paulo, “ha ko e tau fekafekau he Atua a lautolu, kua fakamakamaka ke he mena ia ni.” (Roma 13:6, fakatatai NW.) Mo e hagaao atu ke he tau tukuhau po ke falu a kotofaaga mai he fakatufono, kua lata ia tautolu ke “mahani mitaki ke he tau mena oti kana.”​—Heperu 13:18.

9, 10. (a) Hao fefe e tau pule malolo ne mua ki loto he fakatokatokaaga he Atua? (e) Ko e ha kua hepe ai ke totoko ke he tau pule malolo ne mua?

⁹ Ke he tau magaaho, kua fakaaoga kelea he tau pule malolo ne mua e malolo ha lautolu. Kua tokanoa mai ka he mena nei a tautolu mai he ha tautolu a matagahua ke tumau ke fakalilifu ki a lautolu? Nakai, kua nakai pihia. Kua kitia e Iehova e hepehepe he tau pule malolo nei. (Tau Fakatai 15:3) Ko e fakauka hana ke he pule he tagata kua nakai kakano ko e lami noa atu a ia ke he hana a nakai mahani fakamoli; nakai kua amanaki a ia ke taute pihia foki e tautolu. Kua moli ai, to nakai leva to “tuki malipilipi mo e fakaotioti e tau kautu oti ia,” mo e hukui a lautolu aki e hana a pule he fakatufono tututonu. (Tanielu 2:44) Ka e fakamua to hoko mai e mena nei, kua taute he tau pule malolo ne mua e finagalo aoga.

¹⁰ Kua fakamaama mai e Paulo: “Ko ia kua totoko atu ke he pule kua totoko atu a ia ke he kotofaaga he Atua.” (Roma 13:2) Ko e tau pule malolo ne mua ko e “kotofaaga” he Atua ha kua taute e lautolu e taha vala ke maopoopo mitaki, ka nakai ha i ai to pule ai e maveheveheaga mo e nakai maopoopo. Ke totoko atu ki a lautolu ko e nakai ko e mena faka-Tohiaga Tapu a ia mo e ko e mena goagoa. Ke fakatai: Manamanatu la kua iihi tuai a koe mo e kua tuitui e matamotu aki e tau kavekave. Pete ni ko e nakai ko e vala he tino e tau kavekave, kua ­taute ai e mena kua lata ke he magaaho ku. Ke uta kehe ai ka e nakai la mafu ko e mena fakahagahaga kelea a ia. Kua tuga a ia, ko e tau pule malolo he fakatufono he tagata kua nakai ko e vala he finagalo he Atua he kamataaga. Ato pule katoatoa ai e Kautu hana ke he lalolagi, kua taute ai he tau fakatufono he tagata e kaufakalatahaaga ke fakaauloa, he taute e gahua kua lata mo e finagalo he Atua he magaaho nei. Ti kua lata ai ia tautolu ke fakatumau ke fakalilifu ke he tau pule malolo ne mua, ka e he magaaho taha ia kua tuku fakamua e matafakatufono mo e pule malolo he Atua.

PULE MALOLO I LOTO HE MAGAFAOA

11. Maeke fefe ia koe ke fakamaama e matapatu fakaakoaga he ulu-pule?

¹¹ Ko e magafaoa ko e matapatu vala a ia he kaufakalatahaaga he tagata. I loto kua moua he tane mo e hoana e palepale he fehoaaki, mo e kua puipui ai e fanau mo e fakaako ai ke lata mo e vaha ka lalahi ai. (Tau Fakatai 5:​15-21; Efeso 6:​1-4) Ko e fakatokaaga mitaki pihia kua lata ke fakatokatoka ke he puhala ne kua maeke e falu he magafaoa ke nonofo mafola mo e ke kaufakalataha. Ko e puhala ha Iehova ke fakakatoatoa e mena nei kua puhala mai he matapatu fakaakoaga he ulu-pule, kua fakakatoatoa mai he tau kupu nei, ne moua ia 1 Korinito 11:3: “Ko e ulu he tau tane oti ko Keriso haia, ko e ulu he hoana ko e tane haia, ka ko e ulu a Keriso ko e Atua haia.”

12, 13. Ko hai e ulu he magafaoa, mo e heigoa ka ako mai he puhala ne fakagahuahua e Iesu e ulu-pule?

¹² Ko e tane ko e ulu haia he magafaoa. Ka e, kua ha ha i ai e ulu i luga ia ia​—ko Iesu Keriso. He tohi e Paulo: “Ko mutolu, ko e tau tane, kia fakaalofa a mutolu ke he tau hoana ha mutolu, tuga e fakaalofa a Keriso ke he ekalesia, mo e foaki mai e ia a ia ke eke mo hukui māna.” (Efeso 5:25) Kua fakaata he tane e fakalilifu hana ki a Keriso ka taute e ia e hoana hana ke he puhala ne taute tumau atu a Iesu ke he fakapotopotoaga. (1 Ioane 2:6) Kua foaki age ki a Iesu e pule malolo kua mua ue atu, ka e kua fakagahuahua ai e ia mo e totonu kua mua atu, fakaalofa, mo e mahani fakalatalata. (Mataio 20:​25-28) Ko e tagata, kua nakai fakaaoga hehe e Iesu hana tuaga he pule malolo. Kua “totonu mo e loto holoilalo” a ia, mo e ui e ia e tau tutaki hana “ko e tau kapitiga” nakai ko e “tau fekafekau.” “Ko au foki to okioki a mutolu,” he mavehe e ia ki a lautolu, ti ko e mena ia ni ne taute e ia.​—Mataio 11:​28, 29; Ioane 15:15.

¹³ Kua fakaako he fakafifitakiaga ha Iesu e tau tane, ko e ulu-pule Kerisiano ko e nakai ko e tuaga vale mo e fia pule. Ka e, ko e tuaga fakalilifu mo e fakaalofa he poa ne koe a koe. Kua maaliali kua nakai fakaata he mena nei ke fakakelea e hoa ke he fahi tino po ke tau kupu. (Efeso 4:29, 31, 32; 5:28, 29; Kolose 3:19) Kaeke ke taute fakakelea he tane Kerisiano e hoana hana, ko e falu gahua mitaki hana to nakai aoga, mo e to fakalavelave ai e tau liogi hana.​—1 Korinito 13:1-3; 1 Peteru 3:7.

14, 15. Maeke fefe he iloilo ke he Atua ke lagomatai e hoana ke omaoma ke he hana a tane?

¹⁴ Kaeke ke fifitaki he tane e fakafifitakiaga ha Keriso, kua mukamuka ai e hana hoana ke fakatatai atu ke he tau kupu ia Efeso 5:22, 23: “Ko e tau fifine kia takitokotaha mo e omaoma a mutolu ko e taha kia taha mo e matakutaku ke he Atua. Ha ko e tane, ko e ulu he hoana haia, tuga a Keriso, ko e ulu he ekalesia haia.” Tuga ni e tane kua lata ke omaoma ki a Keriso, kua lata e hoana ke omaoma ke he hana a tane. Kua talahau fakamaaliali mai foki he Tohi Tapu kua moua he tau hoana mahani mitaki e lilifu mo e fakaheke ma e ha lautolu a pulotu mahani Atua mo e tau gahua fakamalolo.​—Tau Fakatai 31:10-31.

¹⁵ Ko e omaoma he hoana Kerisiano ke he hana tane ko e mena fakalatalata ni. Ko e kakano he mena nei ha ko e Atua nakai ko e tagata kua lata ke omaoma ki ai kaeke ke fakalilifu ke he taha mena pauaki ka fua mai e moumouaga he matafakatufono faka-Atua. Pete ni a ia, ko e mauokafua he tuaga he hoana kua lata ke lafi mo e “loto mahani molu mo e mafola.” Kua lata ke kitia moli ai ko e iloilo he Atua kua taute a ia mo hoana kua mua atu e mitaki. (1 Peteru 3:​1-4) Kua pihia foki ni ke he tagata tane Kerisiano ne kua nakai talitonu e hoana. Ko e hana a fakalautatai atu mo e tau matapatu fakaakoaga he Tohi Tapu kua lata ke taute a ia mo tane kua mua atu e mitaki.

16. Maeke fefe he fanau ke fifitaki e fakafifitakiaga ne fakatoka e Iesu he magaaho ne tote a ia?

¹⁶ Kua fakatoka mai ia Efeso 6:1 e matagahua he fanau, he talahau: “Ko mutolu na, ko e tau fanau, kia omaoma ke he tau matua ha mutolu ke he Iki, ha ko e mena tonu ni haia.” Kua mumuitua e fanau Kerisiano ke he fakafifitakiaga ha Iesu, ne fakatumau ke fakalilifu ke he hana a tau mamatua he lahi hake a ia. Ha ko e tama tane omaoma, kua “tupu e pulotu mo e tino a Iesu, kua ofania a ia he Atua katoa mo e tau tagata.”​—Luka 2:​51, 52.

17. Liga lauia fefe e fanau ke he puhala ne fakagahuahua he tau mamatua ha laua a pule malolo?

¹⁷ Ko e puhala ne taute ai he tau mamatua e tau matagahua ha lautolu kua liga kitia mai he fanau ha laua ko e fakalilifu nakai ke he pule malolo po ke totoko atu ki ai. (Tau Fakatai 22:6) Ti kua lata e tau mamatua ke huhu hifo ki a lautolu ni, ‘Fakagahuahua nakai e au e pule malolo haku ke he puhala fakaalofa po ke favale? Kua fakauka nakai au?’ Kua amaamanaki ke he tau mamatua mahani Atua ke mahani fakaalofa mo e fai manamanatuaga, ka e malolo ke fakapiki atu ke he tau matapatu fakaako he mahani Atua. Kua lata ai, ne tohi e Paulo: “Ko mutolu foki, ko e tau matua tane, aua neke fakahogohogomanava ke he fanau ha mutolu [ke he moliaga, ‘fakaohooho a lautolu ke vale’], ka kia leveki ai ke he tau kupu akonaki mo e tau kupu fakamafana he Iki.”​—Efeso 6:4; Kolose 3:21.

18. Kua lata ke fakahoko fefe e akonakiaga fakamatua?

¹⁸ Kua lata he tau mamatua ke kumikumi atu ke he tau puhala fakaako ha laua, mua atu ka manako a laua ke omaoma e fanau ha laua mo e ke tamai ki a laua e olioli. (Tau Fakatai 23:​24, 25) I loto he Tohi Tapu, ko e akonakiaga ko e taha faga fakatonutonuaga ne mua. (Tau Fakatai 4:1; 8:33) Kua matutaki ki ai e fakaalofa mo e mahani molu, nakai mo e ita mo e ekefaka-kelea. Ha ko e mena nei, kua lata e tau mamatua Kerisiano ke gahua mo e pulotu ke tumau ke fakamanounou hifo he magaaho ka akonaki e fanau ha laua.​—Tau Fakatai 1:7.

PULE MALOLO I LOTO HE FAKAPOTOPOTOAGA

19. Kua foaki fefe he Atua ma e maopoopoaga mitaki i loto he fakapotopotoaga Kerisiano?

¹⁹ Ha ko Iehova ko e Atua maopoopo, ko e mena mitaki naia ke foaki mai e ia e takitakiaga pule malolo mo e fakatokatoka fakamitaki ma e hana tau tagata. He hagaao atu ki ai, kua kotofa e ia a Iesu ke eke mo Ulu he fakapotopotoaga Kerisiano. (1 Korinito 14:​33, 40; Efeso 1:​20-23) I lalo he takitakiaga nakai kitia mata ha Keriso, kua foaki he Atua e fakatokatokaaga ke leveki he tau motua kotofa he tau fakapotopotoaga takitaha e fuifui mamoe mo e fakamakutu, fakamakai, mo e fakaalofa. (1 Peteru 5:​2, 3) Kua lagomatai he tau fekafekau lagomatai a lautolu ke taute e tau gahua uho i loto he fakapotopotoaga.​—Filipi 1:1.

20. Ko e ha kua lata ia tautolu ke omaoma ke he tau motua Kerisiano kua kotofa, mo e ko e ha kua aoga ai e mena nei?

²⁰ He hagaao atu ke he tau motua Kerisiano, ne tohi e Paulo: “Kia omaoma a mutolu ke he tau takitaki ha mutolu, mo e fifitaki a mutolu ki ai; nukua leoleo a lautolu ke he tau agaga ha mutolu, to tala atu foki e lautolu e tala ki ai, kia eke ai e lautolu mo e fiafia, ka e aua neke eke mo e fakaatukehe; ha ko e mena nakai aoga ia kia mutolu.” (Heperu 13:17) Mo e pulotu, kua foaki age he Atua ke he tau leveki Kerisiano e matagahua ke leveki e tau manako fakaagaga ha lautolu he fakapotopotoaga. Kua nakai fakatu he tau motua nei e vahega akoako. Ko e tau fekafekau mo e tau tupa he Atua a lautolu, kua fakamatala atu ke he tau manako he ha lautolu a tau faoa tapuaki, ke tuga ne taute he ha tautolu a Iki, ko Iesu Keriso. (Ioane 10:​14, 15) Ha kua iloa kua fiafia mai e tau tagata tane kotofa faka-Tohiaga Tapu ke he ha tautolu a holo atu ki mua mo e tupu hake fakaagaga kua fakamalolo a tautolu ke gahua auloa mo e omaoma.​—1 Korinito 16:16.

21. Maeke fefe e tau motua kotofa ke lali ke lagomatai fakaagaga e tau faoa Kerisiano?

²¹ Ke he tau magaaho, kua liga hehe ai e tau mamoe po ke eke ke hagahaga kelea ai he tau mena kelea fakalalolagi. I lalo he takitakiaga he Iki Leveki Mamoe, ko e tau motua ko e tau leveki mamoe i lalo kua mataala ai ke he tau manako ha lautolu ne ha ha he levekiaga ha lautolu mo e fakamakutu ke foaki ki a lautolu e levekiaga fakatagata. (1 Peteru 5:4) Kua ahiahi atu a lautolu ke he tau faoa he fakapotopotoaga mo e foaki ki a lautolu e tau kupu fakamalolo. Ha kua iloa ai kua lali e Tiapolo ke moumou e mafola he tau tagata he Atua, kua fakagahuahua he tau motua e pulotu mai i luga he fakafehagai mo e ha lekua. (Iakopo 3:​17, 18) Kua gahua fakamakamaka a lautolu ke taofi e fakalataha mo e taha he tua, ko e falu mena ne liogi a Iesu ni ki ai.​—Ioane 17:​20-22; 1 Korinito 1:10.

22. Ko e heigoa e lagomatai ka foaki he tau motua he magaaho ka taute ai e tau mena hepehepe?

²² Ka e kua ka matematekelea e Kerisiano ha ko e falu mena kelea po ke eke ke fakalolelole ha kua taute e agahala? Ko e tau fakatonutonuaga mitaki he Tohi Tapu mo e tau liogi fakamakamaka he tau motua ke lata mo ia ka maeke ke lagomatai ke liu aki mai a ia ke he malolo tino fakaagaga. (Iakopo 5:​13-15) Ko e tau tagata tane nei, ne kotofa he agaga tapu, kua moua foki e pule malolo ke fakahoko e akonakiaga mo e ke fakatonutonu ha tagata ne tutuli e puhala taute mena hepehepe po ke kua fakahagahaga kelea e mahani fakaagaga mo e mea he fakapotopotoaga. (Gahua 20:28; Tito 1:9; 2:15) Ke tumau ai ke mea e fakapotopotoaga, kua liga lata he tau tagata takitokotaha ke hokotaki e tau taute mena hepehepe lalahi. (Levitika 5:1) Kaeke kua talia he Kerisiano ne taute e agahala muitui e akonaki mo e fakatonuaga faka-Tohiaga Tapu mo e fakakite moli e tokihala, to lagomatai atu ki a ia. Ka e kua moli ai, ko lautolu ne moumou e matafakatufono he Atua ti fakatumau ki ai mo e nakai tokihala, kua tuku ki tua.​—1 Korinito 5:​9-13.

23. Ko e heigoa ke foaki he tau Kerisiano leveki ma e mitaki he fakapotopotoaga?

²³ Kua talahau tuai mai he Tohi Tapu ko e i lalo ia Iesu Keriso ko e Patuiki, ka kotofa ai e tau tagata tane motua fakaagaga ke foaki e fakamafanaaga, puipuiaga, mo e okiokiaga ma e tau tagata he Atua. (Isaia 32:​1, 2) To takitaki ai a lautolu ko e tau evagelia, tau leveki mamoe, mo e tau faiaoga ke omoi aki e tupu fakaagaga. (Efeso 4:​11, 12, 16) Pete ni kua fakatonutonu, hataki, mo e tomatoma atu e tau leveki Kerisiano he falu a magaaho ke he faoa talitonu, ko e fakagahuahuaaga he tau motua ke he fakaakoaga tonu ne fakave ke he Kupu he Atua, ka lagomatai a lautolu oti ke tumau ke he puhala he moui.​—Tau Fakatai 3:​11, 12; 6:23; Tito 2:1.

TALIA E ONOONOAGA HA IEHOVA KE HE PULE MALOLO

24. Kua kamatamata a tautolu ke he matakupu fe ke he tau aho takitaha?

²⁴ Kua kamatamata ai e tagata tane mo e fifine fakamua ke he matakupu he fakalilifu ke he pule malolo. Kua nakai ofo ai, ha ko e kamatamata pihia ni kua fehagai mo tautolu he tau aho takitaha. Kua omoi he Tiapolo ko Satani e agaga fakafualoto ke he tau tagata. (Efeso 2:2) Ko e puhala he tu tokotaha kua ­taute ai ke tuga kua mua mai he fakalilifu.

25. Ko e heigoa e tau aoga he tiaki e agaga fakafualoto mo e he omaoma ke he pule malolo ne kua fakagahuahua po ke fakaata he Atua?

²⁵ Kua lata ai ia tautolu, ke tiaki e agaga fakafualoto he lalolagi. Ka taute pihia, to kitia e tautolu ko e tamai he fakalilifu mahani Atua e tau palepale uho. Ke tuga a ia, to kalo mai a tautolu he tau fakaatukehe mo e tau fakagoagoa ulu ne kua fa mahani ki a lautolu ne taute lekua mo e tau pule malolo fakalalolagi. To fakato hifo ai e tautolu e tau totokoaga ne kua ha ha i ai he tau magafaoa loga. Mo e to olioli a tautolu ke he aoga he fakalatahaaga fakaalofa mo e fakamafanaaga mo e ha tautolu a faoa Kerisiano talitonu. Ka ke mua atu, to fua mai e fakalilifu mahani Atua he mitaki e fakafetuiaga mo Iehova, ko e Pule Malolo Mua Ue Atu.

KAMATAMATA E ILOILO HAU

Fakagahuahua fefe e Iehova e pule malolo hana?

Ko hai e “tau pule malolo ne mua,” mo e maeke fefe a tautolu ke tumau ke fakalilifu ki a lautolu?

Ko e heigoa e matagahua ne tuku he matapatu fakaakoaga he ulu-pule ki luga ia lautolu takitokotaha he magafaoa?

Maeke fefe a tautolu ke fakakite e omaoma i loto he fakapotpotoaga Kerisiano?

[Puha he lau 134]

OMAOMA, NAKAI FAKALAVELAVE

Puhala mai he ha lautolu a gahua fakamatala ke he tau tagata, kua tuhi atu e Tau Fakamoli a Iehova ke he Kautu he Atua mo amaamanakiaga ni hokoia ma e mafola moli mo e nakai haofia. Ka e kua nakai fakalavelave e tau tagata fakapuloa fakamakutu nei he Kautu he Atua ke he tau fakatufono ne nonofo a lautolu i lalo. Ka e ke he taha fahi, ko e Tau Fakamoli kua ha ha he tau tagata ne mua atu e fakalilifu mo e omaoma ke he tau fakatufono he tau motu. “Kaeke kua eke oti e tau fakatokaaga lotu ke tuga e tau fakamoli a Iehova,” he talahau he taha tagata tokoluga he taha motu a Aferika, “to nakai ha ha ia tautolu e tau kelipopo, tau kaiha fale, tau matahavala, tau pagota mo e tau pomu etomo. To nakai loka ai e tau gutuhala he tau aho oti.”

He mailoga ai e mena nei, kua fakaata he falu tagata tokoluga he tau motu loga e gahua fakamatala he Tau Fakamoli ke holo ki mua mo e nakai fai fakalavelave. Ke he falu a motu, ko e tau pa mo e tau fakakaupaaga kua uta kehe ai he magaaho ne mailoga ai he tau pule malolo ko e Tau Fakamoli a Iehova ko e fakaohoohoaga ma e mitaki. Kua tuga ai e mena ne tohi he aposetolo ko Paulo hagaao ke he omaoma ke he tau pule malolo ne mua: “Kia mahani mitaki a koe, ti talahaua mitaki ai a koe e ia.”​—Roma 13:​1, 3.