Veveheaga Fitu
Tau Mena ne Ako e Tautolu Mai he Fakaata he Atua e Mahani Kelea
1, 2. (a) Ane mai tamate e Iehova mogoia ni e tau tagata totoko i Etena, to lauia fefe a tautolu he mena ia? (e) Ko e heigoa e tau fakatokaaga fakaalofa ne foaki mai e Iehova ma tautolu?
“KUA gahoa to kelea e tau tau he haku a moui,” ne talahau he tupuna ko Iakopo. (Kenese 47:9) Tatai ai, ne talahau e Iopu ke he tagata “kua gahoa hana tau aho, ti puke ai ke he fakaatukehe.” (Iopu 14:1) Tuga a lautolu, laulahi ia tautolu kua logona e tau mena uka, tau nakai fakafili tonu, pihia mo e tau matematekelea. Ka e, ko e fanau maiaga ha tautolu kua nakai ko e nakai fakafili tonu he Atua. Moli, kua nakai ha ha ia tautolu e mitaki katoatoa he loto mo e tino mo e kaina Parataiso tuga ne nonofo fakamua e Atamu mo Eva. Ka e kua ane mai tamate e Iehova a laua he mogoia ni ne totoko ai? Kaeke kua nakai fai gagao, fakatutuku, po ke mate, to nakai fai lanu tagata foki. Liga nakai fanau mai a tautolu. He fakaalofa noa, ne fai magaaho ne fakaata he Atua ma Atamu mo Eva ke fanau e tau tama, pete kua moua e lautolu nei e tufaaga he nakai mitaki katoatoa. Ti puhala ia Keriso, ne fakatoka e Iehova ke liuaki mai ma tautolu e mena ne fakagalo e Atamu—ko e moui tukulagi he lalolagi parataiso.—Ioane 10:10; Roma 5:12.
2 Ko e mafanatia ha ia ma tautolu he maeke ke amaamanaki ke momoui tukulagi he lalolagi fou he tau takatakaiaga Parataiso, ka ha ha e ataina mai he gagao, momoko, mamahi, mo e mate, pihia foki mai he tau mahani kelea! (Tau Fakatai 2:21, 22; Fakakiteaga 21:4, 5) Ka e mai he fakamauaga he Tohi Tapu, kua ako e tautolu e uho lahi he fakamouiaga fakatagata ki a tautolu mo e ki a Iehova, ka e fai mena foki ne mua atu e aoga kua putoia ai.
Ma e Higoa Mua Ue Atu Hana
3. Ko e heigoa kua putoia ke he fakamoliaga he finagalo ha Iehova ma e lalolagi mo e tau tagata?
3 Ko e higoa he Atua kua putoia ke he fakamoliaga he hana finagalo hagaao ke he lalolagi mo e tau tagata. Ko e higoa ia, ko Iehova, “Ko Ia ne Taute ke Tupu Moli.” Ti ko e higoa hana kua fakatino hana aga ko e Pule Katoatoa he Lagi mo e Lalolagi, ko e Finagalo, mo e Atua he kupu moli. Ha ko e tuaga ha Iehova, ko e mafola mo e hagahaga mitaki he lagi mo e lalolagi katoatoa kua lata ke moua he higoa hana mo e mena ne putoia ki ai e fakalilifu katoatoa kua lata mo e ke omaoma oti ki a ia.
4. Ko e heigoa ne putoia ke he finagalo he Atua ma e lalolagi?
4 Mole e tufugatia ia Atamu mo Eva, ne age e Iehova e kotofaaga ke taute. Ne fakamahino e ia ko e finagalo hana ne nakai ni ke kautu ke he lalolagi katoa—mo e fakalaulahi atu e tau kalakala he Parataiso—ka kia fakapuke aki e tau hologa ha laua. (Kenese 1:28) To kaumahala kia e finagalo nei ha kua agahala a laua? Ko e ekefakakelea ha ia ke he higoa he malolo mua ue atu ko Iehova kaeke nakai maeke ia ia ke fakamoli hana finagalo ke he lalolagi nei mo e ke he tau tagata!
5. (a) Kaeke kai he tau tagata uluaki e fua he akau ke iloa e mitaki mo e kelea, magaaho fe ne mamate a laua? (e) Fakamoli fefe e Iehova e kupu hana ia Kenese 2:17 ka e fakalilifu agaia e finagalo hana ke he lalolagi?
5 Ne hataki e Iehova a Atamu mo Eva kaeke nakai omaoma a laua mo e kai e fua he akau ke iloa e mitaki mo e kelea, to mamate a laua he “aho” ka kai ai e laua. (Kenese 2:17) He fakamoli ke he kupu hana, ne tuku e Iehova e fakalagoaga ki a laua he aho tonu ia ne agahala a laua mo e talahau e fakahala ko e mate. Mai he tuaga he Atua, ne mamate a Atamu mo Eva he aho ia ni. Ke taute e finagalo hana hagaao ke he lalolagi, ne fakaata mogoia e Iehova a laua ke fai magafaoa ato mamate moli a laua ke he tino. Moha ia, ne maeke e Atua ke kitia ko e 1,000 tau ko e taha e aho ia, magaaho ne mate a Atamu he 930 e tau, ko e “aho” taha agaia. (2 Peteru 3:8; Kenese 5:3-5) Ti ko e fakamoliaga ha Iehova kua fakatokoluga ai he magaaho ne kamata e fakahala, ti kua nakai kaumahala hana finagalo ma e lalolagi ha kua mamate a laua. Ka e fai magaaho, ko e tau tagata nakai mitaki katoatoa, putoia a lautolu ne mahani kelea, ne kua fakaata ke momoui.
6, 7. (a) Hagaao ke he Esoto 9:15, 16, ko e ha ne fai magaaho ne fakaata e Iehova e mahani kelea? (e) He mena ne tupu ki a Farao, ne fakakite fefe e malolo ha Iehova, mo e talahaua fefe Hana higoa? (i) Ko e heigoa e fua ka fakaoti e fakatokaaga he lalolagi nei?
6 Ko e mena ne talahau e Iehova ke he pule ha Aikupito he vaha ha Mose kua fakakite e lahi atu he kakano ne fakaata he Atua e mahani kelea ke matutaki. Magaaho ne nakai fakaata e Farao e fanau Isaraela ke o kehe mai i Aikupito, ne nakai ta e Iehova a ia he mogoia ni. Ne lauia e motu he Tau Malaia Hogofulu, kua fakatata e malolo ha Iehova ke he tau puhala ofogia. Magaaho ne hataki ke he malaia ke fituaki, ne tala age a Iehova ki a Farao na mukamuka ia Ia ke tatafi kehe a Farao mo e hana tau tagata mai he fuga kelekele. “Ko e moli,” ne pehe a Iehova, “ko e mena ia ni kua fakatu ai e au a koe, kia fakakite e au haku [“malolo,” NW] kia koe, kia talahaua ai foki haku a higoa ke he lalolagi oti.”—Esoto 9:15, 16.
7 Magaaho ne fakahao e Iehova e tau Isaraela, ne talahaua moli e higoa hana. (Iosua 2:1, 9-11) He vaha nei, molea e 3,500 tau fakamui, ko e mena ne taute e ia he magaaho fakamua ia ne nakaila nimo ia. Nakai ko e fakapuloa ni he higoa moli ko Iehova ka e pihia foki e kupu moli ki a Ia ne hahamo e higoa ia. Ne fakave he mena nei e talahauaga mitaki a Iehova ko e Atua ne fakamoli hana tau maveheaga mo e fakagahuahua ke he tau fekafekau hana. (Iosua 23:14) Ne fakatata he mena ia e malolo mua ue atu hana, kua nakai fai mena ke taofi hana finagalo. (Isaia 14:24, 27) Ko e mena ia kia mauokafua a tautolu to nakai leva ti gahua a ia ma e tau fekafekau tua fakamoli hana ke moumou e fakatokaaga kelea katoatoa ha Satani. Ko e fakatata ia he malolo mua ue atu mo e lilifu ne tamai ke he higoa ha Iehova to nakai nimo. Ko e tau fua mitaki to nakai fai fakaotiaga.—Esekielu 38:23; Fakakiteaga 19:1, 2.
‘Oi, Oi! ko e Hokulo he Pulotu he Atua!’
8. Ko e heigoa e tau mena ne fakamalolo e Paulo a tautolu ke manamanatu ki ai?
8 He tohi hana ke he tau Roma, ne fakalaga mai he aposetolo ko Paulo e huhu: “Ha ha he Atua e mahani hepehepe kia?” Ne tali fakamalolo e ia: “Aua ia.” Ti peehi e ia e fakaalofa noa he Atua mo e hagaao ke he talahauaga ha Iehova ke fakatu leva ai a Farao. Fakakite foki e Paulo ko tautolu e tau tagata kua tuga e kelekele ke he tau lima he tagata laku kelekele. Ti pehe ai a ia: “Po ke fefe kia kaeke kua fakauka e Atua, mo e fakamanavalahi ke he tau kapiniu he ita kua fakalata ke malaia ai he finagalo a ia ke fakakite mai ai hana ita, mo e fakailoa ai hana [“malolo,” NW], ke fakailoa mai foki e lahi ue atu he hana lilifu ke he tau kapiniu he fakaalofa, ne taute tuai e ia ke hoko ke he monuina? Ko tautolu foki ia kua ui mai ai a ia, nakai kuenaia ko e tau tagata Iutaia, ka e katoa foki mo e tau motu kehe [ko e heigoa e mena ia?].”—Roma 9:14-24.
9. (a) Ko hai e “tau kapiniu he ita kua lata ke malaia”? (e) Ko e ha kua fakakite e Iehova e fakamanavalahi mahaki he fehagai mo e hana tau tagata totoko, mo e to mitaki fefe e fakaotiaga ma lautolu ne fakaalofa ki a ia?
9 Tali mai he totokoaga i Etena, ko e ha tagata ne totoko ki a Iehova mo e hana tau fakatufono kua eke ai mo “tau kapiniu he ita kua fakalata ke malaia.” He tau magaaho oti tali mai he magaaho ia, nukua fakamanavalahi a Iehova. Kua va he tau tagata mahani kelea hana tau puhala, favale ke he hana tau fekafekau, hokotia ke tamate e Tama hana. He fakakite e fakamanava lahi, kua lahi e magaaho ne fakaata e Iehova ke kitia katoatoa he tau tufugatiaaga oti e tau fua matematekelea he totokoaga ke he Atua mo e pule tu tokotaha he tagata mai ia ia. He magaaho taha, ko e mate ha Iesu ne fakatoka mai e puhala ke fakahao aki e tau tagata mahani omaoma mo e ke ‘moumou e ia e tau gahua he Tiapolo.’—1 Ioane 3:8; Heperu 2:14, 15.
10. Ko e ha ne toka ai e Iehova e mahani kelea he 1,900 e tau tau kua mole?
10 He magahala kua molea e 1,900 e tau tali mai he liu tu mai a Iesu, ne toka agaia e Iehova e “tau kapiniu he ita,” nakaila moumou a lautolu. Ko e ha? Taha mena, ha kua hane tauteute a ia ia lautolu ke fakalataha mo Iesu Keriso ke he hana Kautu he lagi. Toko 144,000 a lautolu nei he katoa, ti ko lautolu e ‘tau kapiniu he fakaalofa noa’ ne tutala e aposetolo ko Paulo ki ai. Fakamua, ne uiina ki a lautolu takitokotaha mai he tau Iutaia ke eke mo vala he vahega nei he lagi. Fakamui, ne uiina he Atua e tau tagata mai he tau Motu Kehe. Ne nakai peehi e Iehova taha ia lautolu nei ke fekafekau ki a ia. Ka e mai ia lautolu ne kua talia fiafia ke he tau fakatokaaga fakaalofa hana, ne age e ia e kotofaaga ke he falu ke pule fakalataha mo e Tama hana he Kautu he lagi. Ko e tauteuteaga he vahega ia he lagi kua teitei katoa he magaaho nei.—Luka 22:29; Fakakiteaga 14:1-4.
11. (a) Ko e heigoa e matakau mogonei hane aoga mai he fakamanavalahi ha Iehova? (e) To aoga fefe a lautolu kua mamate?
11 Ka e kua e tau tagata ka nonofo he lalolagi? Ko e fakamanavalahi foki ha Iehova ati maeke ai ke fakapotopoto e “moto tagata tokologa” mai he tau motu oti kana. Kua totou miliona a lautolu mogonei. Ne mavehe mai e Iehova ko e vahega nei he lalolagi to hao mai he fakaotiaga he fakatokaaga nei mo e moua e amaamanakiaga ke moui tukulagi ke he lalolagi parataiso. (Fakakiteaga 7:9, 10; Salamo 37:29; Ioane 10:16) Ke he magaaho ni he Atua, to tokologa a lautolu ne mamate ka liu tutu mai mo e age e magaaho ke eke mo tau tagata i lalo hifo he Kautu he lagi. Kua talahau tuai he Kupu he Atua ia Gahua 24:15: ‘Ko lautolu ne tututonu to tutu mai katoa mo lautolu ne mahani kelea.’—Ioane 5:28, 29.
12. (a) Ko e heigoa ne ako e tautolu mai ia Iehova he toka e ia e mahani kelea? (e) Fefe hau a logonaaga hagaao ke he puhala ne fehagai a Iehova mo e tau mena nei?
12 Kua nakai fakafili tonu kia e tau mena oti nei? Nakai, kakano he fakatuai hana moumouaga ke he mahani kelea, po ke “tau kapiniu he ita,” kua fakakite he Atua e fakaalofa hofihofi noa ke he falu, fakatatau ke he hana finagalo. Fakakite he mena nei e fakaalofa noa mo e mahani fakaalofa hana. Pihia foki, he fai magaaho ke kitia e fakakite mai he hana finagalo, kua lahi e mena ne ako e tautolu hagaao ki a Iehova. Kua nava a tautolu ke he tau vala kehekehe he hana peresona ne kua fakakite—hana fakafili tonu, hana fakaalofa noa, hana fakamanavalahi, hana pulotu kehekehe loga. Ko e puhala pulotu ne fakafehagai a Iehova mo e matakupu he pule katoatoa ke he lalolagi mo e lagi katoatoa—ko e hana tonuhia ke pule—to tumau tukulagi mo fakamoliaga kua mitaki lahi e hana puhala pule. Fakalataha mo e aposetolo ko Paulo, kua pehe a tautolu: “Oi, oi! ko e hokulo he tanakiaga he [“pulotu,” NW] mo e fioiaaga he Atua! Kua nakai maeke ni ia taha ke kumi hana tau fakafiliaga; kua nakai maeke foki ke iloa hana tau haeleaga.”—Roma 11:33.
Magaaho ke Fakakite e Fakamoli ha Tautolu
13. Ka logona e tautolu e matematekelea fakatagata, ko e heigoa e tau magaaho ia kua tuku mai ki a tautolu, mo e heigoa ka lagomatai a tautolu ke tali fakapulotu?
13 Tokologa he tau fekafekau he Atua kua ha ha he tau tutuaga matematekelea fakatagata. Kua matutaki agaia e matematekelea ha lautolu ha kua nakaila moumou he Atua e tau mahani kelea mo e tamai e fakafouaga ke he tagata ne talahau tuai. Kua lata kia ke konakona a tautolu he mena nei? Po kua maeke nakai ia tautolu ke kitia e tau tutuaga pihia ko e tau magaaho ke kauauloa ke fakamoli ko e Tiapolo ko e pikopiko? Maeke ia tautolu ke fakamalolo ke taute pihia kaeke tokaloto e tautolu e ole: “Haku tama na e, kia iloilo ai a koe, kia fiafia ai haku loto; kia fai kupu au ke tali age kia ia kua fakafiu mai kia au.” (Tau Fakatai 27:11) Ko Satani, ko ia ne fakafiufiu a Iehova, ne hokotaki kaeke matematekelea e tau tagata he galo e tau koloa fakatino po kua mamahi fakatino, to tuku aki e lautolu e Atua, to hokotia foki ke kaiaalu a ia. (Iopu 1:9-11; 2:4, 5) Tamai e tautolu e olioli ke he loto ha Iehova he magaaho, he mahani fakamoli a tautolu ki a ia he fehagai mo e tau tutuaga uka, to fakakite e tautolu kua nakai moli e mena nei ke he tuaga ha tautolu.
14. Kaeke falanaki a tautolu ki a Iehova ka kamatamata, ko e heigoa e tau mena aoga ka moua e tautolu?
14 Kaeke falanaki a tautolu ki a Iehova he tau magaaho kamatamata, maeke ia tautolu ke feaki e tau aga kua uho. Ma e fakatai, ko e fua he tau mena ne mamahi ai a Iesu, ne “ako ai e ia e omaoma” ke he puhala ne nakaila iloa ai e ia fakamua. Maeke foki ia tautolu ke ako mai he tau kamatamata ha tautolu ti maeke ke feaki e fakamanavalahi, fakauka, mo e hokulo e loto fakaaue ke he tau puhala tututonu ha Iehova.—Heperu 5:8, 9; 12:11; Iakopo 1:2-4.
15. He fakauka fakatekiteki a tautolu ke he tau tutuaga uka, liga aoga fefe ke he falu?
15 To kitekite falu ke he tau gahua ha tautolu. Ha ko e tau mena ne fehagai mo tautolu he ofania e tautolu e tututonu, fai magaaho ai to liga fai ia lautolu ka loto fakaaue ke he tau Kerisiano moli he vaha nei. Ti he kaufakalataha mo tautolu he tapuakiaga, maeke ia lautolu ke moua e tau monuina he moui tukulagi. (Mataio 25:34-36, 40, 46) Manako a Iehova mo e Tama hana ke moua he tau tagata e magaaho ia.
16. Tutaki fefe e onoonoaga ha tautolu ke he tau tutuaga uka fakatagata mo e kaufakalataha?
16 Kua mitaki ha ka kitia foki e tautolu e tau tutuaga uka ko e magaaho ke fakakite e fakamoli ki a Iehova pihia foki ke fakalataha ke he fakakatoatoaaga he hana finagalo! He taute pihia e tautolu to fakamoli kua hane haga atu moli a tautolu ke kaufakalataha mo e Atua mo Keriso. Ne liogi a Iesu ki a Iehova ma e tau Kerisiano moli oti, pehe: “Nakai fakaigati haku a liogi ma lautolu nai [hana tau tutaki tata], ka ko lautolu foki ka tua kia au, ha ko e ha lautolu a kupu. Kia taha a lautolu oti ke tuga a koe, ma Matua na e, ha i loto ia au, ko au foki ha i loto ia koe, kia taha a lautolu ki loto ia taua.”—Ioane 17:20, 21.
17. Ko e heigoa e mauokafua ka moua e tautolu ka mahani fakamoli a tautolu ki a Iehova?
17 Ka mahani fakamoli a tautolu ki a Iehova, to taui fakamokoi e ia a tautolu. Pehe e Kupu hana: “Kia tumau a mutolu mo e nakai fagahuatia, kia fakamakai nakai noa ke he gahua he Iki, he iloa e mutolu nakai noa mo e fua ha mutolu a fakafita ke he gahua he Iki.” (1 Korinito 15:58) Talahau pehe foki: “Ko e mena nakai hepehepe e Atua ke fakanimonimo ai e ia ha mutolu a tau gahua, mo e gahua fakamalolo he fakaalofa kua fakakite mai e mutolu ke he hana higoa.” (Heperu 6:10) Fakakite he Iakopo 5:11: ‘Kitiala, kua talahau e tautolu kua monuina a lautolu kua fakauka; kua fanogonogo a mutolu ke he fakauka a Iopu, kua iloa foki e mutolu e fakahikuaga ha he Iki, kua fakaalofa fakalahi mai e Iki mo e fakaalofa noa.’ Ko e heigoa ne moua e Iopu fakamui? “Ne mua foki he fakamonuina e Iehova a Iopu ke he hana a fakahikuaga ke he hana a kamataaga.” (Iopu 42:10-16) E, ko Iehova kua “taui mai a lautolu kua kumi fakamakutu kia ia.” (Heperu 11:6) Ti ko e taui ha a ia ka amaamanaki a tautolu ki ai—ko e moui tukulagi ke he lalolagi parataiso!
18. Ko e heigoa ka tupu he magaaho fakamui ke he tau manatu mamahi ne liga ha ha ia tautolu?
18 Ko e pule he Kautu he Atua to liu talaga oti e tau mena ne fakamalona aki e magafaoa tagata he tau afe he tau tau kua mole. Ko e tau olioli he magaaho ia to maluia e ha matematekelea kua logona e tautolu mogonei. To nakai tupetupe a tautolu he liu manatu e ha matematekelea kua mole. Ko e tau manatu atihake mo e tau gahua ka fakapuke aki e tau momoui he tau tagata he tau aho takitaha he lalolagi fou ka utakehe fakahaga e tau manatu mamahi. Kua fakapuloa e Iehova: “Kua eke e au e lagi fou [ko e fakatufono fou he Kautu he lagi ki luga he tau tagata] mo e lalolagi fou [ko e kaufakalatahaaga tututonu he tau tagata]; nakai tuai manatu ke he tau mena fakamua, ti nakai hake ai ke he loto e tau mena ia. Ka e olioli ā mutolu mo e fiafia tukulagi ā mutolu ke he mena kua eke e au.” E, he lalolagi fou ha Iehova, to maeke a lautolu ne tututonu ke pehe: “Kua okioki e lalolagi oti, kua nonofo fakatekiteki ni; kua kalaga a lautolu mo e fiafia.”—Isaia 14:7; 65:17, 18.
Fakatutala Fakamanatu
• He fakaata e mahani kelea, fakakite fakamitaki fefe e Iehova e fakalilifu lahi ma e higoa hana ni?
• Toka fefe he Atua e “tau kapiniu he ita” ke maeke e fakaalofa noa hana ke hokotia mai ki a tautolu?
• Ko e heigoa kua lata ia tautolu ke eketaha ke kitia he tau tutuaga ka matematekelea fakatagata?
[Tau Fakatino he lau 67]
“Ne mua foki he fakamonuina e Iehova a Iopu ke he hana a fakahikuaga ke he hana a kamataaga”