Ko e Heigoa e Kakano he Tau Mena Oti Ia?

NE PEHE a Iesu Keriso: Ko e “fakaotiaga he lalolagi” to kitia ai ke he tau tau, tau hoge, tau tatalu, mo e tau mafuike.​—Mataio 24:1-8; Luka 21:10, 11.

Tali mai he 1914 kua matematekelea e moui ha ko e tau latau he vahaloto he tau motu mo e he tau matakau fakamotu, ne fa tupu ha ko e tau fakatauhele fakapolitika mai he tau akoako mo e he magaaho nei ha kua tupu holofa e tau fakamatakutakuina.

Pete e tau fakalaulahiaga fakasaiene, ko e hoge ko e moui kua mahani ki ai e totou teau miliona he tau tagata ke he lalolagi katoa. Kua totou miliona e tagata ne mamate he tau tau takitaha ha ko e hoge.

Ko e tau tatalu, kakano, ko e tau gagao pikitia ne kua tupu holofa ai, ko e vala foki he fakamailoga ne tuku mai e Iesu. He mole e Felakutaki I he Lalolagi, ne tupu tolomaki e matematekelea he fulu ti molea e 21,000,000 tagata ne mamate. Kua nakai tatai mo e tau gagao he vaha ia ne tupu ni ke he taha e matakavi, kua hokotia ai ke he tau motu he lalolagi katoa ti pihia foki e tau aelani mamao. Ko e AIDS he magaaho nei kua lauia e lalolagi katoa, mo e tau gagao tuga e mama pala, malaria, hihi, mo e tigiki fiva kua nofo mau agaia ke he tau motu mativa.

Ne hokotaki ai, kua totou hogofulu afe e tau mafuike ne kehekehe e tau malolo ne to he tau tau takitaha. Pete kua ha ha e tau koloa fakaaoga mo e mahomo hake e tau puhala fuafua, ko e tau matematekelea ha ko e tau mafuike he tau matakavi ne lahi e puke tagata i ai kua eke mo tau vala tala mahani mau.

Ne talahau tuai foki he Tohi Tapu: “Kia iloa e koe e mena nai, ko e tau aho fakamui to hohoko mai ai e tau aho uka; ha ko e mena ke ofaofa he tau tagata a lautolu ni, to velevele koloa, to hula noa, to fakatokoluga, to vagahau kelea, to faliuliu ke he tau matua, to nakai fakaaue, to mahani kelea, to nakai fai fakaalofa to nakai fia loto mafola, to tauamuamu, to nakai taofi e tau manako he tino, to mahani favale, nakai loto ke he mitaki, to afo tagata, to mahani fakahanoa, to fakatokoluga, to manako lahi ke he tau mena ke fiafia ki ai, ka e manako tote ke he Atua; to ha i ai ia lautolu e gati he mahani Atua, ka kua tiaki e lautolu e malolo ne toka ai; kia kalo kehe a koe mo e tau tagata pihia.”​—2 Timoteo 3:1-5.

Nakai kia talia e koe kua nonofo a tautolu he “tau aho uka”?

Kua kitia nakai e koe e tau tagata, kua laulahi mahaki, ke ofaofa ni he tagata a ia, kua velevele koloa, ti fakaohooho he fakatokoluga?

Ko hai ke fakatikai kua puke e lalolagi ke he tau tagata ne manako lahi ke moua ka e nakai fai fakaaue, nakai fia loto mafola, mo e nakai mahani fakamoli?

Kua mailoga nakai e koe e tupu lahi mahaki he faliuliu ke he tau matua mo e ofoofogia e tupu ki mua he nakai fai fakaalofa, nakai ke he falu matakavi ni ka e ke he lalolagi katoa?

Nakai fakauaua kua mailoga e koe kua nonofo a tautolu he lalolagi kua fakaniniko he manako lahi ke he tau mena ke fiafia ka e manako tote ke he mitaki. Pihia e fakamaamaaga he Tohi Tapu ke he tau mahani ka ha ha he “tau aho fakamui.”

Lata nakai ke loga atu foki e mena ka fakakite mai ke kitia aki e magaaho kua nonofo a tautolu i ai? Ne talahau tuai foki e Iesu ke he magahala taha nei, to fakamatala atu foki e tala mitaki he Kautu he Atua ke he lalolagi oti. (Mataio 24:14) Kua taute nakai e mena ia?

Ko e Kolo Toko, ko e senolo ne fakave ke he Tohi Tapu kua fakamatapatu ke he fakapuloaaga he tala mitaki he Kautu ha Iehova, kua lolomi tumau ke he loga e vagahau ka fakatatai ke he ha fufuta tohi.

He tau tau takitaha, ko e Tau Fakamoli a Iehova kua fakaaoga molea e taha e piliona tula ke fakamatala fakatagata ke he falu hagaao ke he Kautu he Atua.

Ko e tau tohi fakamaama he Tohi Tapu kua hane lolomi e lautolu mogonei ke he kavi ke 400 e vagahau, pihia ke he tau vagahau ke hokotia atu ke he tau matakavi mamao ne tote e puke tagata. Ko e Tau Fakamoli a Iehova kua hokotia ke he tau motu oti mo e tala mitaki; kua fakamatala foki a lautolu ke he loga he tau aelani mo e tau matakau ne ikiiki lalahi ke he onoonoaga fakapolitika. Ke he laulahi he tau motu, ne taute tumau e lautolu e fakaholoaga fakaako ke he Tohi Tapu.

Moli, ko e tala mitaki he Kautu he Atua kua hane fakamatala ke he lalolagi katoa, nakai ke hiki e lalolagi, ka e ke fakamatala atu. Ko e tau tagata he tau matakavi oti kua foaki age e magaaho ke fakakite e manatu ha lautolu ki a ia ne tufugatia e lagi mo e lalolagi mo e to fakakite nakai e lautolu e fakalilifu ke he hana tau fakatufono mo e fakakite e fakaalofa ke he ha lautolu a tau katofia.​—Luka 10:25-27; Fakakiteaga 4:11.

Nakai leva mogonei, to fakamea he Kautu he Atua e tau tagata kelea oti kana mai he lalolagi mo e taute ai e lalolagi katoa mo parataiso.​—Luka 23:43.

[Puha he lau 6]

Tau Aho Fakamui he Heigoa?

Nakai ko e tau aho fakamui he tau tagata. Ma lautolu ne taute e finagalo he Atua, ne fakatoka mai he Tohi Tapu e amaamanaki he moui tukulagi.​—Ioane 3:16, 36; 1 Ioane 2:17.

Nakai ko e tau aho fakamui he fua lalolagi. Kua mavehe mai he Kupu he Atua to tumau tukulagi e lalolagi ne nonofo ai e tau tagata.​—Salamo 37:29; 104:5; Isaia 45:18.

Ka e, ko e tau aho fakamui anei he fakatokaaga favale, nakai fai fakaalofa mo lautolu ne tapiki ke he hana tau puhala.​—Tau Fakatai 2:21, 22.

[Puha/​Fakatino he lau 7]

Moli Kia ko e Tohi Tapu ko e Kupu he Atua?

Lagaloga, ne tohia he tau perofeta he Tohi Tapu: “Kua vagahau mai pehe a Iehova.” (Isaia 43:14; Ieremia 2:2) Pihia foki a Iesu Keriso, ko e Tama he Atua, ne peehi e ia ‘ne nakai talahau noa e ia hoko ia.’ (Ioane 14:10) Ne talahau fakamahino ni he Tohi Tapu: “Ko e tau Tohi Tapu oti kana mai he [a]gaga he Atua ia.”​—2 Timoteo 3:16.

Nakai fai tohi ne loga lahi e tau vagahau ne kua lomi fakailoa ai​—molea e 2,200, he hokotaki mai he United Bible Societies. Nakai fai tohi ne lahi mahaki e tufa fano—​magaaho nei kua molea e fa e piliona he tau lagaki. Nakai kia ko e mena ia hau ne amanaki ke he fekau mai he Atua ma e tau tagata oti kana?

Ma e fakatutalaaga katoatoa ke he tau fakamoliaga ko e mena mai he agaga he Atua e Tohi Tapu, kikite e tohi The Bible​—God’s Word or Man’s?, ne lomi fakailoa he Tau Fakamoli a Iehova.

Kaeke totou e koe e Tohi Tapu mo e loto fakaaue ha kua moli ni ko e Kupu he Atua, to aoga lahi mahaki ki a koe.

[Puha/​Tau Fakatino he lau 8]

Ko e Heigoa e Kautu he Atua?

Ko e fakatufono he lagi ne fakakite e pule he Atua moli, ko Iehova, ko e Tufuga he lagi mo e lalolagi.​—Ieremia 10:10, 12.

Kua fakahigoa he Tohi Tapu a Iesu Keriso ko ia kua foaki age he Atua e pule katoatoa pihia ki ai. (Fakakiteaga 11:15) Magaaho ne nofo ai he lalolagi, ne fakakite e Iesu kua fita e moua e ia e pule katoatoa ofoofogia mai he Atua—pule katoatoa ne maeke ia ia ke poaki e tau matagi mo e tahi, ke fakamalolo e tau gagao kehekehe, mo e pihia ke fakatutu mai a lautolu ne mamate. (Mataio 9:2-8; Mareko 4:37-41; Ioane 11:11-44) Ne talahau tuai he perofetaaga he Tohi Tapu ne omoomoi he agaga to foaki age foki he Atua ki a ia e “pule, mo e fakahekeaga, mo e kautu, kia fekafekau kia ia e tau motu oti, mo e tau kautu, mo e tau vagahau kehekehe.” (Tanielu 7:13, 14) Ko e fakatufono ia ne fakahigoa ko e Kautu he lagi; hane fakagahuahua e Iesu Keriso e pule hana mai he lagi he mogonei.

[Tau Fakatino he lau 7]

Fakamatala e tala mitaki he lalolagi katoa