Ne Tohi e Lautolu Hagaao ki a Iesu

Kitia nakai e koe e tau tagata i loto he fakatino?— Ko lautolu ia ko Mataio, Mareko, Luka, Ioane, Peteru, Iakopo, Iuta, mo Paulo. Ne momoui e tau tagata nei he magahala ia mo Iesu, ti tohi e lautolu hagaao ki a Iesu. O mai la ke fakaako atu foki hagaao ki a lautolu.

Tokotolu ia lautoluko e tau aposetolo ne ō mo Iesu ke fakamatala. Iloa nakai e koe a lautolu tokotolu ia?— Ko Mataio, Ioane, mo Peteru. Ko e tau aposetolo ko Mataio mo Ioane ne iloa mitaki e laua a Iesu, ti igatia a laua mo e tohi ne tohia hagaao ke he moui ha Iesu. Ne tohia he aposetolo ko Ioane e tohi ne fakahigoa ko e Fakakiteaga mo e tolu e tohi ne fakahigoa ko e Fakamua a Ioane, Ua a Ioane, mo e Tolu a Ioane. Ne tohia he aposetolo ko Peteru ua e tohi i loto he Tohi Tapu. Ne fakahigoa ai ko e Fakamua a Peteru mo e Ua a Peteru. I loto he tohi haana ke uaaki, ne tohia e Peteru hagaao ke he magaaho ne vagahau mai a Iehova he lagi mo e pehē hagaao ki a Iesu: ‘Ko e haku tama hanā. Kua fakaalofa au ki a ia, ti matalahi au ha ko ia.’

Ko e tau tagata ne toe i loto he fakatino kua fakaako mai foki ki a tautolu hagaao ki a Iesu he tau tohi ne tohia e lautolu. Taha ia lautolu ia ko Mareko. Liga ko ia i ai he mogo ne tapaki he tau tagata a Iesu ti kitia e ia e tau mena oti ne tutupu. Taha foki ko Luka. Ko ia ko e ekekafo ti liga eke a ia mo Kerisiano he mole e mate ha Iesu.

Tokoua foki e tagata ne tohia e Tohi Tapu ne kitia e koe i loto he fakatino, ko e tau matakainaga ha Iesu. Iloa nakai e koe e tau higoa ha laua?— Ko e tau higoa ha laua ko Iakopo mo Iuta. He magaaho fakamua ne nakai talitonu a laua ki a Iesu. Ti manatu foki a laua kua heketia a Iesu. Ka e hoko ke he magaaho fakamui ne talitonu a laua ki a Iesu ti eke mo tau Kerisiano.

Ko e tagata fakahiku ne tohia e Tohi Tapu ne kitia e koe i loto he fakatino ko Paulo. Ato eke a ia mo Kerisiano, ko e higoa haana ko Saulo. Ne vihiatia e ia e tau Kerisiano mo e favale lahi ki a lautolu. Iloa nakai e koe e kakano ne manako a Paulo ke eke mo Kerisiano?— He taha aho ne fina atu a Paulo he puhalatū ti ofo ni he logona e leo ne vagahau ki a ia mai he lagi. Ko Iesu a ia! Ne hūhū a ia ki a Paulo: ‘Ko e ha ne favale a koe ke he tau tagata ne talitonu ki a au?’ He mole ai, ne hiki a Paulo ti eke mo Kerisiano. Ne tohia e Paulo 14 e tohi he Tohi Tapu, mai ia Roma ki a Heperu.

Totou e tautolu e Tohi Tapu he tau aho oti, pihia nakai?— He totou e Tohi Tapu, kua iloa e tautolu e tau mena loga ki a Iesu. Manako nakai a koe ke iloa atu foki hagaao ki a Iesu?—