Taute e Tau Lima Tukulagi a Iehova mo Lagomatai Hau

“Ko e Atua tukumuitea e hoku nofoaga mau, mo e i lalohifo i ai he tau lima tukulagi.”​—TEUTARONOME 33:27, American Standard Version.

1, 2. Ko e ha kua maeke ai e tau tagata a Iehova ke mauokafua e tau loto ke he hana lagomatai?

KUA leveki mo e fakaalofa a Iehova ke he hana tau tagata. Hanai, he tau vaha fakaatukehe oti kana he tau Isaraela, “kua fakaatukehe lahi ai ni ki a ia”! Ke he fakaalofa mo e loto hofihofi noa, “ne fakaholo atu a ia ke lagaki hake a lautolu mo e lapolapo a lautolu.” (Isaia 63:7-9, NW) Kaeke kua fakamoli a tautolu ke he Atua, to maeke ai a tautolu ke mauokafua e loto ke he lagomatai hana.

² Ne pehe mai e perofeta ko Mose: “Kua eke e Atua mo mena ke nofo ai a koe tali mai i tuai tigahau; ha i lalo hau foki e tau lima tukulagi.” (Teutaronome 33:27) Kua pehe mai foki e taha liliuaga: “Ko e Atua tukumuitea e hoku nofoaga mau, mo e i lalohifo i ai he tau lima tukulagi.” (American Standard Version) Ka e to lagomatai fefe he tau lima he Atua hana tau fekafekau?

Ko e Ha Kua Loga ai e Tau Mena Uka?

3. He magaaho fe ka moua katoatoa he tau tagata omaoma e olioli ‘ke he tokanoaaga ha ha he monuina he fanau he Atua’?

³ Kua nakai puipui he fekafekauaga ki a Iehova a tautolu mai he tau mena uka kua fa mahani mau e tau tagata nakai mitaki katoatoa ki ai. Ko e fekafekau he Atua ko Iopu ne pehe: “Ko e tagata ne fanau ai he fifine, kua gahoa hana tau aho, ti puke ai ke he fakaatukehe.” (Iopu 14:1) Hagaao ke he “ko e tau aho he tau tau ha mautolu,” ne pehe mai e salamo: “Ka ko e malolo ha lautolu ha i ai e mamahi mo e matematekelea.” (Salamo 90:10) To pihia ni e puhala he moui ato ‘toka noa e tau mena ne eke mai he tupaaga ke he mena popo vave kia hoko atu ai ke he tokanoaaga ha ha he monuina he fanau he Atua.’ (Roma 8:19-22) To tupu e mena ia he vaha ka Pule a Keriso he Afe Tau. I luga he matapatu he poa lukutoto ha Iesu. He mogoia to iloa moli he tau tagata ne nonofo i lalo he Kautu e laveakiaga mai he hala mo e mate kua matapatu ke he lukutoto he poa a Iesu. He fakahikuaga he Afetau ko Keriso mo e hana kau patuiki ekepoa ka lagomatai e tau tagata omaoma ke hokotia ke he mitaki katoatoa, mo e ko lautolu ne fakamoli ke he Atua he vaha ka kamatamata atu fakahiku e Satani mo e hana tau temoni to tohia mau e tau higoa ha lautolu i loto he “tohi he moui.” (Fakakiteaga 20:12-15) He magaaho ia to moua e lautolu e olioli katoatoa he tokanoa lilifu lahi he tau fanau he Atua.

4. Ke kehe mai he nakai togitogi atu ke he tau mena he tau momoui ha tautolu, ko e heigoa kua lata a tautolu ke taute?

⁴ Ka e he mogonei, ke kehe mai he fetogitogiaki ke he ha tautolu a tutuaga he moui, kia falanaki a tautolu ki a Iehova. (1 Samuela 12:22; Iuta 16) Kia taute foki a tautolu ke loto fakaaue lahi ke he ha tautolu a Ekepoa ne Mua, ko Iesu, ko e puhala kua maeke a tautolu ke fakapuhala atu ke he Atua “kia fakaalofa mai ai a ia kia tautolu, kia moua foki e fakaalofa noa ke lagomatai mai ai ke he aho kua lata ai.” (Heperu 4:14-16) Kia nakai lata a tautolu ke tuga a Atamu. Ha kua pehe, ne tokutoku hepe e ia a Iehova he age ki a ia e hoana kelea, kua pehe mai: “Ko e fifine ne ta mai e koe ke fakalataha mo au, ne ta mai e ia e fua akau kia au, ti kai ai e au.” (Kenese 3:12) Kua tamai he Atua e tau mena mitaki mo e nakai tamai e tau mena uka ki a tautolu. (Mataio 5:45; Iakopo 1:17) Ne fa mahani e tau matematekelea ke tupu mai ni he nakai loto pulotu a tautolu, po ke taute mena hehe he taha tagata kehe. Kua liga hoko mai foki a lautolu ki a tautolu ha kua agahala lahi a tautolu mo e momoui i loto he lalolagi kua ha ha i loto he malolo ha Satani. (Fakatai 19:3; 1 Ioane 5:19) Ka e, lagomatai tumau he tau lima tukulagi ha Iehova hana tau fekafekau fakamoli kua liogi mo e falanaki ki a ia mo e fakaaoga fakatagata e lautolu ni e fakatonuaga he Kupu hana.​—Salamo 37:5; 119:105.

Ne Lagomatai he Vaha Gagao

5. Ko e heigoa e tau fakamaloloaga kua liga to moua e lautolu kua gagao ia Salamo 41:1-3?

⁵ Tokologa mai ia tautolu ke fakatupu mai he gagao e tau magaaho fakaatukehe. Ka e, ne pehe a Tavita: “Fiafia e taha kua gahua mo e manamanatu atu ki a ia ne tokolalo; he aho matematekelea to foaki atu e Iehova e puhala ke hola ai a ia. Ko ia ni ko Iehova ka puipui a ia mo e leveki a ia ke moui. To talahau ko e fiafia a ia ke he lalolagi; mo e nakai maeke tuai a koe ke age a ia ke he tau solu he tau fi hana. Ko ia ni ko Iehova ka lagomatai a ia i luga he mohega gagao; ko e hana tau mohega oti kana ka hiki e koe ni he vaha gagao hana.”​—Salamo 41:1-3, NW.

6, 7. Ne lagomatai fefe he Atua a Tavita he magaaho ne ha ha ai a ia he mohega gagao, mo e maeke fefe he mena nei ke fakamalolo e tau fekafekau a Iehova he vaha nei?

⁶ Lagomatai he tagata kua manamanatu ke he falu a ia kua lata ke moua lagomatai. “He aho matematekelea” kua eke ai ko e ha magaaho he tau magaaho matematekelea po ke vaha leva kua uka lahi ne fakalolelole tagata. Kua tua a ia ke he Atua ke puipui a ia he vaha lolelole, mo e ko e falu ka ‘talahau ko e fiafia a ia ke he lalolagi’ he folafola atu e tau tala ke he tau gahua fakaalofa hofihofi noa a Iehova ki a ia. Ne lagomatai he Atua a Tavita “i luga he mohega gagao,” liga he vaha fakatupetupe lahi he magaaho ne kumi e tama tane ha Tavita ko Apisalamo ke fofo e nofoaiki a Isaraela.​—2 Samuela 15:1-6.

⁷ Ha kua fakakite e Tavita e loto manamanatu ke he falu ne tokolalo, kua logona a ia to lagomatai he Atua a ia he magaaho kua nakai maeke a ia ke lagomatai e ia a ia ni i loto he mohega gagao. (Salamo 18:24-26) Pete ni he kelea lahi e kafokia, kua mauokafua hana loto ko e to ‘hiki’ he Atua ‘hana mohega,’ nakai he uta kehe fakamana e gagao, ka e he fakamaloloaki e tau manamanatu fakamafanatia a ia. Ti kua tuga kua taute ai e Iehova e fakafaliuaga he mohega hana mai he kafokia ke he taha kua hane laukauka mai. Ke tuga e mena nei, kaeke kua matematekelea a tautolu he kafokia ha ko e tau fekafekau he Atua, to lagomatai he tau lima tukulagi ha Iehova a tautolu.

Fakamafanatiaaga ma e Loto Ne Fakaagitau

8. Ne fakakite fefe he taha Kerisiano kua gagao hana falanakiaga ke he Atua?

⁸ To liga fakatupu mai he gagao e loto manamanatu fakaagitau. Ko e taha e Kerisiano kua gagao lahi, ne nakai lahi e malolo ke totou foki he falu magaaho, talamai ne: “Kua omoi he mena nei au ke iloa e tau logonaaga loga he fakaagitau, tau logonaaga kua nakai aoga ke he taha, mo e tau hihina mata foki,” he talahau mai e ia. He iloa kua manako a Satani ke fakamalipilipi aki e fakalolelole a ia, kua tau a ia ki ai, he iloa ka fakalataha mo e lagomatai a Iehova to nakai kaumahala a ia. (Iakopo 4:7) Ko e fakamaloloaga e tagata tane nei ke he falu ne iloa kua tua lahi a ia ke he Atua. (Salamo 29:11) Kua pihia foki he magaaho ne nofo he fale gagao, ne telefoni a ia ki a lautolu kua gagao mo e falu foki ke ati hake fakaagaga a lautolu. Kua ati hake na ia he fanogonogo ke he tau tepi kasete kua tapaki e tau leo kofe he Kautu mo e tau tala takitaha i loto he mekasini nei mo e hoa mekasini hana, ko e Awake!, mo e he feoaki fakalataha mo e tau faoa Kerisiano. Kua pehe e matakainaga tane nei: “Ne tutala tumau a au ki a Iehova ke he tau liogi, kua ole atu ki a ia ke tuku mai ki a au e malolo, takitakiaga, mafanatia, mo e lagomatai mai ke fakauka.” Kaeke ko e Kerisiano kua fa mahani mo e tau lekua lahi he tino malolo a koe, kia tua tumau ki a Iehova mo e taute hana tau lima tukulagi mo hau a lagomataiaga.

9. Ko e heigoa e tau fakafifitakiaga kua fakakite mai ko e he falu magaaho ne fakamatematekelea he fakaagitau he loto manamanatu e tau tagata mahani atua?

⁹ Ko e lekua mai i tuai e fakaagitau. He magaaho he kamatamata, ne vagahua a Iopu tuga e tagata tane kua pehe e logonaaga hana ko e tiaki he Atua. (Iopu 29:2-5) He manamanatu lahi ke he tuaga a Ierusalema ne malona lahi mo e hana tau kaupa ne eke a Nehemia ke momoko lahi e mata, mo fakaagitau lahi a Peteru he fakatikai e ia e Keriso ti tagiaue a ia. (Nehemia 2:1-8; Luka 22:62) Ne fakaagitau a Epaferoti, ha kua logona he tau Kerisiano i Filipi ko e gagao a ia. (Filipi 2:25, 26) Ne fakamalaia he fakaagitau e falu Kerisiano i Tesalonia, ha kua ole fakamakamaka atu a Paulo ke he tau matakainaga i ai ke “vagahau fakamafana ke he tau solu ne loto fakaagitau.” (1 Tesalonia 5:14, NW) Kua lagomatai fefe he Atua e tau tagata takitokotaha pihia?

10. Liga ko e heigoa kua lagomatai lahi ka lali ke kautu mai he fakaagitau he loto manamanatu?

¹⁰ Kua lata ni ke taute fakatagata e fifiliaga hagaao ke he tau tuluiaga ma e fakaagitau kua kelea lahi.a (Kalatia 6:5) Kua liga to lagomatai ka fakalata e okioki mo e lago tatai e tau gahua. He nakai onoono ke he falu lekua, ke tuga, ko e taha mena vihi lahi, kua liga lagomatai lahi ke he tagata takitokotaha ne fakaagitau ke fakamitaki a lautolu ka taha ni e mena ka taute he magaaho. Kua liga aoga lahi e tau fakamafanatiaaga he tau momotua he fakapotopotoaga, mua atu foki kaeke kua fakatupu mai he lekua he manamatuaga nei e manamanatu kapeletu ke he tau mena fakaagaga. (Iakopo 5:13-15) Ka e i luga he tau mena oti kana, kua aoga lahi ke falanaki atu ki a Iehova, ‘kua tuku atu kia ia e tau mena oti kua fakaatukehe ki ai a tautolu, ha ko e mena kua manamanatu a ia ki a tautolu.’ Maeke he tau liogi mau kua hake mai he loto ke tamai ke he taha ‘e mafola he Atua kua puipui ha mutolu a tau loto mo e malolo he ha mutolu a tau loto manamanatu he kakano mai ia Keriso Iesu.’​—1 Peteru 5:6-11; Filipi 4:6, 7, NW.

Lagomatai e Iehova a Tautolu ke Fakauka ka Manu

11-13. Ko e heigoa kua maeke ke lagomatai ke fakatote hifo e momoko he mate e taha fakahelehele?

¹¹ Ko e taha foki e mena fakaatukehe ko e mate he taha fakahele. Ne tagi aue a Aperahamo he galo hana hoana, ko Sara. (Kenese 23:2) He magaaho ne mate hana tama tane ko Apisaloma, ne manu lahi mahaki a Tavita. (2 Samuela 18:33) Hanai, ne pihia foki ni e tagata tane mitaki katoatoa ko Iesu “kua tagi” he mate hana kapitiga ko Lasaro! (Ioane 11:35) Ti kua ha ha i ai e momoko lahi he magaaho ka uta he mate e taha fakahelehele. Ka ko e heigoa kua maeke ke lagomatai ke fakaoki hifo e momoko pihia?

¹² Lagomatai he Atua hana tau tagata ke fakauka mai he manu kua to lahi, he mauku. Kua pehe mai hana Kupu to ha ha ai ni e liu tu mai. Ha kua pihia, kua nakai ‘momoko a tautolu, ke tuga e falu kua nakai ha ha i ai e amaamanaki.’ (1 Tesalonia 4:13; Gahua 24:15) Kua lagomatai he agaga a Iehova a tautolu ke moua e mafola mo e tua mo e ke manamanatu fakahokulo ke he tau mena homo ue atu he vaha i mua me mavehe mai i loto he Kupu hana, ti kua nakai lofia katoatoa a tautolu ke he tau manatu momoko ha ko e taha fakahelehele ne mate. Kua fakafiafia foki ka moua mai he totou e tau kupu he Tohiaga Tapu mo e liogi ke he ‘Atua he tau fakamafanaaga oti.’​—2 Korinito 1:3, 4; Salamo 68:4-6.

¹³ Kua maeke ia tautolu ke moua mai e fakamafanatia he amaamanaki ke he liu tu mai tuga ne taute e Iopu kua mahani atua, ne hopo fakaofo mai e kupu: “Ane fufu e koe au i Seoli, mo e fakagalo ai e koe au ato mole atu hau a ita po kua mitaki; kia kotofa mai e koe e tau aho maku, mo e manatu mai e koe au. Ka mate e tagata to liu moui mai kia a ia? To tatali atu au he tau aho oti ne kotofa ke tau ai au, ato hoko mai a ia ke hukui aki au. Kia ui mai a koe, ti tali atu au kia koe; kia finagalo fakaalofa a koe ke he gahua he hau a tau lima.” (Iopu 14:13-15) Ne nakai fa mahani ke iloa e momoko lahi mahaki ka fano e taha kapitiga fakahele he taha fenoga, ha kua amaamanaki a tautolu ke liliu ke kitia foki a ia. Ko e manu hokulo lahi ha ko e galo e taha fakahele kua liga to fakatote hifo e momoko kaeke kua onoono atu pihia a tautolu ke he mate he taha Kerisiano fakamoli. Kaeke kua ha ha ia ia e amaamanaki ke he lalolagi fou, to ala mai a ia he mohe he mate ke he lalolagi nai he vaha he Afe Tau he Pule ha Keriso. (Ioane 5:28, 29; Fakakiteaga 20:11-13) Mo e kaeke kua amaamanaki a tautolu ke moumoui tukulagi i luga he lalolagi, kua liga to ha ha i hinei a tautolu ke fakafeleveia atu ke he ha tautolu a fakahelehele ne liu tu mai.

14. Kua kautu mai fefe e tau fifine takape tokoua, mai he mate he tau tane ha laua?

¹⁴ He mole mai e mate he tane hana, taha mai e matakainga fifine ne iloa kua lata a ia ke holo atu e puhala he moui hana ke fekafekau ke he Atua. Ke lafi atu ke he lavelave tumau ke he ‘fakamakai nakai noa ke he gahua he Iki,’ ne taute e ia e sivaivai kua 800 he tau valavala. (1 Korinito 15:58) “Ko e matagahua mitaki a nei,” he talahau e ia, “ha ko e tau magaaho oti ne gahua ai au kua maeke ia au ke fanogonogo ke he tau leo kofe he Kautu mo e tau tepi Tohi Tapu, ne kua fakagahuahua haku loto manamanatu.” Ne manatu e ia e ahi atu he taha motua, kua fa mahani mo e tau mena, mo e hana hoana. Mai he Tohi Tapu, ne fakakite atu he motua kua fakaalofa moli e Atua ke he tau fifine takape. (Iakopo 1:27) Ne nakai fakaloleloe e taha fifine Kerisiano foki ke he loto fakafonufonu noa he magaaho ne mate hana tane. Ne loto fakaaue a ia ke he tau lagomatai he tau kapitiga mo e fiafia lahi mahaki ke iloa e falu. Kua pehe a ia “ne fa liogi tumau au mo e ati hake e fakafetuiaga tata lahi mo Iehova.” Mo e ko e monuina lahi ha ia ke moua e lagomatai he tau lima tukulagi he Atua!

Lagomatai he Magaaho ka Hehe a Tautolu

15. Ko e heigoa e matapatu manatu he tau kupu a Tavita ia Salamo 19:7-13?

¹⁵ Pete kua fakaalofa a tautolu ke he tau matafakatufono a Iehova, kua hehe a tautolu ke he loga he tau magaaho. Kua nakai fakauaua he fakaatukehe he mena nei a tautolu, tuga kua tupu ki a Tavita, ne kua mua atu e matafakatufono he Atua, tau fakamanatu, tau poaki, mo e tau fifiliaga he fakafiliaga mai he manako hana ke he auro. Ne pehe a ia: “Ko e tau fekafekau hau ni kua fita he hataki atu e tau mena ia; ka taofi mau e tau mena ia kua ha ha i ai e taui lahi mahaki. Ko e tau hehe​—ko hai kua maeke ke iloa ai? Mai he tau agahala ne fufu kia talahau ko e nakai fakakelea au. Hanai foki ke he tau gahua ohooho noa kia taofi ki lalo hau a fekafekau; kia nakai toka e tau mena ia ke pule lahi ki a au. Ha ko e mena ia, to taute ai au ke katoatoa, mo e to taute ai au ke tumau ke nakai fakakelea he tau holifonoaga loga.” (Salamo 19:7-13, NW) Kia taute a tautolu ke kumikumi fakamitaki ke he tau kupu nei.

16. Ko e ha kua lata a tautolu ke kalo mai he mahani ohooho noa?

¹⁶ Kua lahi mahaki e kelea he mahani ohooho noa mai he tau agahala he tau mena kua taute hehe. Ne nakai talia ke toka a Saulo mo patuiki he ohooho noa ke foaki hake e poa mo e toka e patuiki Amaleka ko Akako mo e tau mena mitaki lahi he fofoaga, pete ni kua poaki atu e Atua ke tukulele oti e tau Amaleka ke he fakaotiaga. (1 Samuela 13:8-14; 15:8-19) Ne lauia e patuiki ko Usia mo e lepela he ohooho noa ke fofo e tau matagahua he ekepoa. (2 Nofoaga he Tau Patuiki 26:16-21) He magaaho ne uta e puha he maveheaga ki Ierusalema ne teitei e tau povi ne toho e peleo ke fakamalifa ai, ne tamate he Atua a Usa he nakai fakalilifu he oho atu toto e Puha ke taofi mau ki ai. (2 Samuela 6:6, 7) Ti, kaeke kua nakai iloa e tautolu e tau mena ke taute po ke nakai fakaata ke taute e taha mena, kua lata a tautolu ke fakakite e mahani maimaina mo e lata ke huhu atu ki a lautolu kua ha ha i ai e loto maama. (Fakatai 11:2; 13:10) E moli, kaeke kua fita he ohoho noa a tautolu, kua lata a tautolu ke liogi ke fakamagalo mai mo e ole ke he Atua ke lagomatai a tautolu ke puipui ke totoko atu ke he mahani ohooho noa he tau magaaho i mua.

17. Kua maeke fefe e tau agahala fufu ke lauia e tagata, ka e maeke fefe ke moua e fakamagaloaga mo e okiokiaga?

¹⁷ To fakatupu mai he tau agahala fufu e fakaatukehe. Hagaao ke he Salamo 32:1-5 (NW), ne lali a Tavita ke fufu hana agahala, ka e ne pehe mai a ia: “Ka fakanono au to ne otioti haku a huimotua, mai he oi fakatutu he aho katoa haku. Ha ko e aho mo e po kua mamafa hau a lima ki luga ia au. Ko e malu he moui haku kua fita he hiki ke tuga e vela paku he vaha mafana.” He lali ke taofi e loto manamanatu hifo hala ne fakamategugu aki a Tavita, mo e tuku hifo he tupetupe hana malolo tuga e akau kua galo e malu kua foaki e moui he vaha ne to e la po he vela paku he vaha mafana. Ne kitia ai ko e matematekelea a ia he gagao e loto manamanatu mo e fakafahi tino malolo mo e kua galo e loto olioli ha kua kaumahala ke talahau e kelea. Ko e talahauaga ni ke he Atua kua maeke ke tamai e fakamagaloaga mo e okioki. Ne pehe mai a Tavita: “Fiafia e taha ne fakamagalo mai hana mahani uka, ne ufiufi ai hana agahala. . . . Ko e haku a agahala kua hoko tuai ni ke talahau atu ki a koe, mo e haku hehe kua nakai ufiufi e au. Ne pehe au: ‘To taute e au e talahauaga ke he tau holifono haku ki a Iehova.’ Mo e ko koe ni ka fakamagalo e hehe he tau agahala haku.” Maeke he lagomatai fakaalofa mai he tau momotua Kerisiano ke omoi e liuaki maiaga fakaagaga.​—Fakatai 28:13; Iakopo 5:13-20.

18. Ko e heigoa e tau fakakiteaga moli, ko e maeke ke leva lahi e lauiaaga he agahala, ka ko e heigoa e punaaga mafanatia ke he tau tutuaga pihia?

¹⁸ Kua liga to leva lahi e lauiaaga he agahala. Ha kua pihia e mena ne tupu ki a Tavita, ne taute e ia e mahani faivao mo Patesepa, ne fakaholoholo e mate he hana tane, mo e hoana e fifine takape kua fatu. (2 Samuela 11:1-27) Pete ni he fakakite he Atua e fakaalofa hofihofi noa ha ko e maveheaga he Kautu, mo e fakatokihala ha Tavita, mo e hana levekiaga fakaalofa hofihohfi noa lahi ke he falu, ne moua lahi e Tavita e ‘kelea he fale hana ni.’ (2 Samuela 12:1-12) Ne mate e tama ne tupu mai he mahani faivao. Ne fakapilo pule noa he tama tane ha Tavita ko Amanono hana mahakitaga ka e kehekehe e tau matua fifine ko Tamara mo e ne kelipopo he poaki atu he hana e tugaane ko Apisaloma. (2 Samuela 12:15-23; 13:1-33) Ne fakama e Apisaloma a Tavita he tatakoto mo e tau hoana fakahoa ha Tavita. Ne lali a ia ke fofo e nofoaiki ka e feleveia mo e mate. (2 Samuela 15:1–​18:33) Kua fai taui agaia e agahala. Ke fakatai ki ai, kua liga tokihala e tagata taute mena hepe ne fakaoti e fakalatahaaga mo e taute ke liu talia mai ki loto he fakapotopotoaga, ka e liga loga e tau tau ka mole ato ke uta kehe e higoa fakakelea mo e tau logonaaga ofomate kua tupu mai he agahala. Ka e he magaaho taha, kua fakamafanatia ha ke moua e fakamagaloaga a Iehova mo e lagomatai mai hana tau lima tukulagi!

Fakahao Mai he Tau Fakaagitau i Luga ia Tautolu

19. Kua maeke fefe e agaga he Atua ke lagomatai mai ka fakakamatamata lahi mai ki a tautolu?

¹⁹ He magaaho ka fakakamatamata lahi mai, kua liga to nakai lahi e pulotu mo e malolo ha tautolu ke taute e fifiliaga mo e ke fakahoko atu e mena ia. Ka pihia e mena ka tupu, ko e agaga ni he Atua “kua lagomatai mai kia tautolu ke he tau mena kua lolelole ai a tautolu; ha kua nakai iloa e tautolu e tau mena kua lata ke ole atu ai e tautolu; ka ko e Agaga ni, kua ole a ia ma tautolu ke he tau oi kua nakai maeke ke fakamatala atu.” (Roma 8:26) Kaeke kua tamai e Iehova e hikiaga he tau tutuaga, kua lata a tautolu ke loto fakaaue lahi. Ka e liga to fakahao mai he lima hana a tautolu ke he taha puhala foki. Kaeke kua liogi a tautolu ma e pulotu, liga to fakakite mai he agaga a Iehova ko e heigoa kua lata a tautolu ke taute mo e foaki mai e malolo kua lata ke taute e mena ia. (Iakopo 1:5-8) Mo e hana lagomatai, kua maeke a tautolu ke fakauka ka “fakatutuku . . . ke he tau mena kamatamata kehekehe” mo e kautu mai he tau mena ia mo e tua kua kamatamata mo e kua fakamalolo.​—1 Peteru 1:6-8.

20. Ko e heigoa ka loto olioli ki ai a tautolu kaeke kua taute moli e tautolu e tau lima tukulagi a Iehova mo tau lagomatai ha tautolu?

²⁰ Kia nakai ai fahia a tautolu ke fuluhi atu ke he Atua he tau liogi. Ne pehe a Tavita: “Kua hagao mau atu haku a tau mata kia Iehova; ha ko ia ni kua āki haku tau hui mai he kupega. Kia hagao mai a koe kia au, mo e fakaalofa mai kia au; ha kua tokotaha ni au mo e matematekelea. Kua fakalahi e matematekelea he haku loto; kia uta kehe e koe au mai he tau mena ne mamahi ai. Kia kitekite mai a koe ke he haku a matematekelea mo e haku a mamahi; kia fakamagalo foki e koe haku a tau hala oti kana.” (Salamo 25:15-18) Ke tuga a Tavita, to moua e tautolu e loto olioli ke he laveakiaga fakaatua, fiafia pauaki, mo e fakamagaloaga kaeke kua taute moli e tautolu e tau lima tukulagi a Iehova ko e ha tautolu a lagomatai.

[Tau Matahui Tala]

To Taute Fefe e Koe?

◻ Kua lagomatai fefe e Iehova hana tau fekafekau ne kua gagao?

◻ Liga ko e heigoa kua lagomatai mai ka lali a tautolu ke kautu mai he fakaagitau he loto manamanatu?

◻ Ko e heigoa kua maeke ke lagomatai ke fakatote hifo e manu ke he taha fakahelehele ne mate?

◻ Kua maeke fefe ia lautolu kua fufu ha lautolu a tau agahala ke moua e okiokiaga?

◻ Ko e heigoa e lagomatai kua ha ha i ai ka kelea lahi e tau kamatamata ke he tau tagata a Iehova?

[Fakatino he lau 28, 29]

Kua maeke a tautolu ke futiaki mai e mafanatia he amaamanakiaga ke liu tu mai, tuga ne taute he tagata mahani atua ko Iopu