Loto Olioli ke he Amaamanakiaga he Kautu!

“Kia loto olioli ke he amaamanakiaga. Kia fakauka ke he matematekelea.”​—ROMA 12:12, NW.

1. Ko e ha ne moua ai e tautolu e fiafia he fakalataha mo Iehova, mo e ko e heigoa he aposetolo ko Paulo ne omoi mai ke he tau Kerisiano ke taute?

‘KO E Atua fiafia.’ (1 Timoteo 1:11, NW) Ko e mitaki lahi ha a ia he fakamaama he mena nei ki a Iehova! Ko e ha? Ha ko e hana tau gahua oti kana kua tamai e fiafia lahi mahaki ki a ia. Ha ko Iehova ni ko e Punaaga he tau mitaki mo e tau mena fakafiafia oti kana, kua maeke ke moua ai he hana tau mena momoui iloilo oti kana e fiafia he fakalataha mo ia. Ti lata tonu mo e omoi mai he aposetolo ko Paulo ke he tau Kerisiano ke nava ke he monuina olioli lahi ha lautolu he iloa e Atua ko Iehova, ke fakaaue ke he Hana a tau mena fakaalofa fulufuluola ne tufugatia, mo e olioli ke he fakaalofa totonu ne fakakite e Ia ki a lautolu. Ne tohia e Paulo: “Kia loto olioli tumau ke he Iki. To liu foki tala atu e au, Kia loto olioli!”​—Filipi 4:4, NW; Salamo 104:31.

2. Ko e heigoa e amaamanakiaga ka tamai e olioli lahi mahaki, mo e ko e heigoa he tau Kerisiano ne fakamafana ke taute hagaao ke he amaamanakiaga nei?

² Kua logona nakai he tau Kerisiano e tomatomaaga nei ne tuku mai e Paulo? Moli kua logona e lautolu! Kua loto olioli e tau matakainaga fakaagaga ha Iesu Keriso ke he amaamanakiaga lilifu ne hafagi he Atua ma lautolu. (Roma 8:19-21; Filipi 3:20, 21) E, kua iloa e lautolu to fakalataha a lautolu ke he fakamoliaga he amaamanakiaga lahi mahaki ma e tau tagata he vaha i mua, ko e tau tagata momoui ua mo e mamate, kaeke ke fekafekau fakalataha mo Keriso he hana a fakatufono he Kautu he lagi. Manamanatu la ko e lahi fefe e loto olioli ha lautolu ke he ha lautolu a tau monuina ke eke mo tau hakeaga fakalataha, mo e fekafekau ke eke mo tau patuiki mo e tau ekepoa! (Fakakiteaga 20:6) Ko e fiafia ha a ia ha lautolu ha kua lagomatai e lautolu e tau tagata fekafekau fakamoli oti ke hoko ke he mitaki katoatoa mo e lagomatai ke takitaki e liuaki maiaga he Parataiso ke he lalolagi ha tautolu! Ko e moli ni, kua moua he tau fekafekau oti he Atua e “amaamanaki he moui tukulagi, kua talahau mai he Atua kua nakai maeke ke pikopiko, ka e nakaila kamata ai e tau hau.” (Tito 1:2) Ha kua kitia e amaamanakiaga mua ue atu nei, kua fakamafana he aposetolo ko Paulo e tau Kerisiano oti: “Kia loto olioli ke he amaamanakiaga.”​—Roma 12:12, NW.a

Olioli Moli​—Ko e Fua he Loto

3, 4. (a) Ko e heigoa e kakano he kupu, “ke loto olioli,” mo e kua lata e tau Kerisiano ke laga fiha e loto olioli? (e) Ko e heigoa e olioli moli, mo e ko e heigoa hana ne falanaki ki ai?

³ “Ke loto olioli” ko e kakano ke logona mo e fakakite e olioli; nakai ko e kakano ke tu he tuaga nakai hikihiki fano he agaga olioli fakatokoluga, po ke agaga tokoluga. Ko e tau kupu ne fakakite aki e tau mena taute kua fakatatai ke he tau kupu Heperu mo e Heleni ne fakaaoga he Tohi Tapu ma e “olioli,” “hula,” mo e “loto olioli” kua fakakite ua e logonaaga i loto mo e fakakiteaga mai ki fafo he olioli. Kua fakamalolo mai ke he tau Kerisiano ke “fakatumau ke loto olioli,” “loto olioli tumau.”​—2 Korinito 13:11, NW; 1 Tesalonia 5:16, NW.

⁴ Ka e maeke fefe he taha ke loto olioli tumau? Kua lata tonu e mena nei ha ko e olioli moli ko e fua he loto, ko e fua hokulo i loto, ko e fua fakaagaga. (Teutaronome 28:47; Fakatai 15:13; 17:22) Ko e fua he agaga he Atua, ne fakamau hifo e Paulo he oti e fakaalofa. (Kalatia 5:22) Ha kua eke mo fua i loto, kua nakai falanaki ke he tau mena i fafo, nakai lata ke pihia foki ke he tau matakainaga ha tautolu. Ka e maeke ke falanaki ke he agaga tapu he Atua. Ti hau mai ni he makonaaga hokulo ia i loto he iloa kua moua e koe e kupu moli, ko e amaamanakiaga ke he Kautu, mo e kua taute e koe e tau mena ne fiafia a Iehova ki ai. Ko e mena ia, ko e olioli, nakai ko e taha mena noa he mahani fakatagata ne fanau mai mo tautolu; ka ko e taha vala he “tagata fou,” ko e tau fua maopoopo ne fakakeheaki a Iesu Keriso.​—Efeso 4:24; Kolose 3:10.

5. Ko e magaaho fe mo e maeke fefe he olioli ke fakakite mai ki fafo?

⁵ Pete ni ko e olioli ko e fua he loto, ka e taha e mena ko e fa fakakite mai agaia ni ki fafo he falu a tauteaga. Ko e heigoa e tau tauteaga nei, ke fakakite mai ki fafo e olioli? Ko e ha mena he tau mena oti ne fa kitia he fofoga ke he hopohopo moli ma e olioli. (1 Tau Patuiki 1:40; Luka 1:44; Gahua 3:8; 6:15) Ti ko e kakano pehe kia e mena nei, ko e tau tagata ne nakai fa tutala tumau po ko lautolu ne nakai fa mamali mau kua nakai moua e olioli? Nakai! Ko e olioli moli kua nakai maeke ke fakakite mai a ia he mahani gutu talatala, gutu kata, mamali, po ke fakaite. Kua fakatupu he tau mena kehekehe e olioli ke fakakite a ia he tau puhala kehekehe. Ti nakai ni ko e olioli hokoia ne fa taute a tautolu ke femafanaaki he Fale he Kautu, ka ko e, manatu hofihofi mo e fakaalofa fakamatakainaga.

6. Ko e ha ne maeke tumau ai he tau Kerisiano ke loto olioli pete he feleveia a lautolu mo e tau tutuaga nakai fiafia?

⁶ Ko e vala ke nakai hikihiki fano e olioli ko e hana tumau i loto kua eke mo matapatu he loto hofihofi he tagata fou he Kerisiano. Ko e mena hanei ne fakaataaki e mena ia ke moua e loto olioli tumau. Moli, kua tauhele mai a tautolu he falu a magaaho he falu a mena, po ke feleveia a tautolu mo e tau tutuaga nakai fiafia. Ka e moua agaia ni e tautolu e olioli he tau loto ha tautolu. Ko e falu he tau Kerisiano fakamua ko e tau tupa, ke he tau iki ne uka lahi ke fakafiafia. Maeke nakai he tau Kerisiano pihia ke loto olioli tumau? E, ha ko e ha lautolu a amaamanakiaga ke he Kautu mo e olioli he tau loto ha lautolu.​—Ioane 15:11; 16:24; 17:13.

7. (a) Ko e heigoa ha Iesu ne talahau hagaao ke he olioli ka matematekelea? (e) Ko e heigoa ne lagomatai aki a tautolu ke fakauka ka matematekelea, mo e ko hai ne fakatoka e fakafifitakiaga mua atu he mitaki ke he mena nei?

⁷ Mui mai ni he oti e pehe e aposetolo ko Paulo: “Kia loto olioli ke he amaamanakiaga,” ne lafi atu e ia: “Kia fakauka ke he matematekelea.” (Roma 12:12, NW) Ne vagahau foki a Iesu ke he olioli ka matematekelea he magaaho ne pehe a ia he Mataio 5:11, 12 (NW): “Kia fiafia a mutolu ka eke fakakelea e tau tagata ki a mutolu mo e favale ki a mutolu . . . Kia loto olioli a mutolu mo e hopohopo ke he olioli, ha kua ha ha he lagi ha mutolu a palepale kua lahi mahaki.” Ko e loto olioli mo e hopohopo he olioli nei kua nakai lata ke pehe ko e fakakiteaga fakatai i fafo; ka ko e makonaaga hokulo ne matapatu mai he loto ka moua he tagata ka fakafiafia a Iehova mo Iesu Keriso kaeke ke mauokafua e tuaga i lalo he kamatamata. (Gahua 5:41) Fa mahani ko e olioli ka lagomatai a tautolu ke fakauka kaeke kua matematekelea. (1 Tesalonia 1:6) He mena nei, ne fakatoka e Iesu e fakafifitakiaga ne mua atu he mitaki. Kua talahau mai he Tau Tohiaga Tapu ki a tautolu: “Ma e olioli ne fakatoka ki mua ia ia ne fakauka a ia ke he akau fakakikiveka.”​—Heperu 12:2, NW.

Loto Olioli ke he Amaamanakiaga Pete he Tau Mena Vihi

8. Ko e heigoa e tau mena vihi ka feleveia mo e tau Kerisiano, ka ko e ha e tau mena vihi ia ne nakai maeke ai ke uta kehe e olioli he Kerisiano?

⁸ Ke eke mo fekafekau a Iehova, kua nakai maeke ke fakahao e tagata mai he tau mena vihi. Kua ha ha i ai e tau mena vihi he magafaoa, uka he tau puhala moua tupe, lolelole e tau malolo tino, po ke mamate e tau fakahelehele. Ha ko e tau mena pihia ne fa tupu mai ai e momoko, kua nakai maeke ke utakehe ha tautolu a fakaveaga ma e loto olioli he amaamanakiaga ke he Kautu, ko e olioli i loto ne ha ha i ai he tau loto ha tautolu.​—1 Tesalonia 4:13.

9. Ko e heigoa e tau mena vihi ne moua e Aperahamo, mo e iloa fefe e tautolu kua ha ha he hana loto e olioli?

⁹ Manamanatu la ki a Aperahamo, ke fakatai aki. Kua nakai fiafia tumau e moui ki a ia. Ne ha ha ia ia e tau mena vihi he magafaoa. Ko e hana hoana fakahoa, ko Hakara, mo e hana hoana ko Sara, kua nakai kapitiga. Kua ha ha i ai e taufetoko. (Kenese 16:4, 5) Ne vaiga e Isamaeli a Isaako, he favale ki a ia. (Kenese 21:8, 9; Kalatia 4:29) Fakahiku, ti mate e hoana fakahelehele ha Aperahamo ko Sara. (Kenese 23:2) Pete ni ha ko e tau mena vihi nei, ne loto olioli agaia a ia ha ko e amaamanakiaga ke he Tega he Kautu, ko e Tega ha Aperahamo, ko ia ka fakamonuina ai e tau magafaoa oti kana he lalolagi ha lautolu ni. (Kenese 22:15-18) Ha ko e olioli he hana a loto, ne fakauka a ia he fekafekauaga ki a Iehova ke he teau he tau tau he toka ai e ia hana kaina he maga ko Uro. Ko e mena ia kua tohi ai ki a ia: “Ha kua tatali atu a ia ke he māga kua fai fakaveaga, ko ia ne eke mo e tufugatia ai ko e Atua haia.” Ha kua tua a Aperahamo ke he hoko maiaga he Kautu faka-Mesia, ko e Iki ko Iesu, he magaaho kua fita he kotofa he Atua ke eke mo Patuiki, ka pehe: “Ko Aperahamo . . . ne loto olioli lahi mahaki a ia ke kitia haku a aho, mo e kua kitia tuai e ia mo e loto olioli.”​—Heperu 11:10; Ioane 8:56, NW.

10, 11. (a) Ko e heigoa e totoko ka moua e tautolu ko e tau Kerisiano, mo e fakahao fefe a tautolu? (e) Ko e heigoa ne taute katoa aki ha tautolu a nakai iloilo ke taute e tau ke he tau tino agahala ha tautolu?

¹⁰ Ha ko e tau tagata nakai mitaki katoatoa, kua ha ha ia tautolu foki ha tautolu a tau tino agahala ke taufetului ki ai, mo e ko e fakamakamaka nei ke taute e tau mena tonu kua eke mo mena fakatupetupe lahi. Ko e ha tautolu a tau ke he ha tautolu a tau lolelole nakai ko e kakano pehe ke nakai fai amaamanakiaga a tautolu. Ne mamahi lahi a Paulo ke he taufetoko nei mo e pehe a ia: “Ko hai kia ke laveaki au mai he tino he mate nai? Kua fakaaue atu au ke he Atua, ha ko Iesu Keriso ha tautolu a Iki!” (Roma 7:24, 25) Kakano ha ko Iesu Keriso mo e lukutoto ne foaki mai e ia, kua laveaki ai a tautolu.​—Roma 5:19-21.

¹¹ Kua taute katoa he poa lukutoto ha Keriso e puhala ke totogi fakamitaki e tau ma e ha tautolu a nakai iloilo. Kua loto olioli a tautolu ke he hana a lukutoto ne taute ke maeke ke fakamea e loto manamanatu mo e fakamagaloaga he ha tautolu a tau hala. He Heperu 9:14, kua vagahau a Paulo ke he “toto a Keriso” ne ha ha i ai e malolo ke ‘fakamea ha tautolu a tau loto manamanatu mai he tau gahua ke mamate ai.’ Ko e mena ia, ko e tau manamanatuaga he tau Kerisiano kua nakai lata ke fakamamafa ke he tau manatu vihiatia mo e manatu kelea. Ko e mena nei, fakalataha mo e amaamanakiaga ne ha ha ia tautolu, kua moua ai e tautolu e omoiaga malolo ma e olioli mo e fiafia. (Salamo 103:8-14; Roma 8:1, 2, 32) Ke manamanatu fakalahi ke he amaamanakiaga ha tautolu, to fakamalolo mai a tautolu oti kana ke takitaki fakamitaki e tau ke kautu.

Leveki e Amaamanakiaga ha Tautolu Fakatata ke he Loto

12. Ko e heigoa e amaamanakiaga ke manamanatu fakalahi e tau Kerisiano fakauku ki ai?

¹² Kua aoga ua ma lautolu ne fakauku he agaga ne toe mo e tau mamoe kehe ke leveki ha lautolu a “amaamanaki . . . ke he fakamouiaga” he tau loto, mo e tui ke eke ia mo pulou puipui. (1 Tesalonia 5:8) Ko e tau Kerisiano fakauku kua maeke ke manamanatu fakalahi ke he monuina fulufuluola ke moua e moui nakai mate ke he lagi, mo e moua e fakaataaga ke he Atua ko Iehova, mo e olioli e fakalatahaaga fakatagata mo Iesu Keriso lilifu mo e hana tau aposetolo mo e falu he 144,000 ne tumau ha lautolu a mahani hakohako hifo mai he tau senetenari. Ko e monuina tokaimaka ha a ia he fakalatahaaga ia!

13. Fefe e manatu he tau tagata fakauku ne toe agaia he lalolagi hagaao ke he amaamanakiaga nei?

¹³ Fefe e manatu ha lautolu gahoa kua fakauku ne toe agaia he lalolagi hagaao ke he amaamanakiaga ha lautolu ke he Kautu? Ne fakakatoatoa e mena nei ke he tau kupu he taha tagata ne papatiso he tau 1913: “Ko e amaamanakiaga ha mautolu ko e mena moli, mo e to fakamoli katoa ke he tau tagata fakahiku oti he 144,000 he fuifui mamoe gahoa ke mua atu ke he fafatiaga ne manamanatu a mautolu ki ai. Ko mautolu kua fakauku ne toe agaia he magaaho nei mai he tau 1914, ne amaamanaki oti a mautolu ke o hake ke he lagi, kua nakai galo ia mautolu ha mautolu a manatu ke he amaamanaki uho ia. Ka kua mua atu ha mautolu a malolo ke he malolo mua ia, mo e mua atu foki ha mautolu a fakaaue ke he tau mena oti ia pete ne leva ha mautolu a fakatali atu ki ai. Ko e taha mena kua aoga lahi ke fakatali ki ai, pete ni he pehe ke miliona e tau tau. Kua fifili fakatokoluga e au ha mautolu a amaamanaki nakai pihia tali mai fakamua, mo e nakai manako au ke fakagalo haku a fakaaue ma e mena ia. Ko e amaamanakiaga he fuifui mamoe gahoa kua moua ai foki e fakamoliaga, ko e amaamanakiaga he moto tagata tokologa he tau mamoe kehe to, nakai fakaai ke kaumahala he taha mena, to fakamoli ki mua he ha tautolu a tau manamanatuaga maama lahi mahaki. Ko e kakano haia ati taofi fakamakamaka a mautolu ke hoko hifo ke he tula tonu nei, mo e to taofi fakamakamaka a mautolu ato talia moli he Atua kua moli a ia ke he hana a ‘tau mena uho mo e tau maveheaga lilifu ue atu.’”​—2 Peteru 1:4, NW; Numera 23:19; Roma 5:5.

Kia Loto Olioli he Magaaho Nei he Amaamanaki ke he Parataiso

14. Ko e heigoa e amaamanakiaga ne kua lata ke toka he manamanatuaga he moto tagata tokologa?

¹⁴ Ko e fakakiteaga pihia he hula he tua ne tuku ki loto ia lautolu he moto tagata tokologa he tau mamoe kehe e tau kakano mua ue atu ma e loto olioli. (Fakakiteaga 7:15, 16) Kua lata ia lautolu ia ke tokaloto e amaamanakiaga he fakahaoaga i Amaketo. E, ono atu ki mua ke kitia e Kautu he Atua ka fakamatalahi e pule katoatoa he lagi mo e lalolagi he Atua ko Iehova mo e fakatapu hana higoa lilifu ka ta mai e matematekelea lahi mahaki, ke fakamea e lalolagi ia lautolu e tau tagata mahani kelea ne atua ki ai e Tiapolo. Ko e olioli ha a ia ke hao mai he matematekelea lahi mahaki ia!​—Tanielu 2:44; Fakakiteaga 7:14.

15. (a) Ko e heigoa e gahua fakamalolo ne taute e Iesu he magaaho ne nofo ai a ia he lalolagi, mo e ko e ha? (e) Ko e heigoa kua lata mo e malolo tino ha lautolu ne hao mai i Amaketo, mo e ko e ha ne kehekehe ai mai ia lautolu ka liu tutu mai?

¹⁵ Hagaao ia ke he moto tagata tokologa, kua pehe e Fakakiteaga 7:17: “Ko e Punua mamoe . . . to leveki e ia a lautolu, mo e takitaki a lautolu ke he tau vaipuna he moui; to holoholo kehe foki he Atua e tau hihinamata oti mai he tau mata ha lautolu.” Ti pete ni kua fakamoli fakaagaga e perofetaaga nei he vaha nei, ka to kitia mata he tau tagata ka hao mai i Amaketo e fakamoliaga. Moli fefe? Mitaki, ko e heigoa ha Iesu ne taute he magaaho ne nofo ai a ia he lalolagi? Ne fakamalolo e ia e tau kunekune, fakao e tau kulikuli, hafagi e tau teliga he tau teliga tuli mo e tau mata he tau matapouli, ne fakamalolo e ia e tau lepela, tau paleluti, mo e “tau gagao kehekehe oti mo e tau tagata tino lolelole oti.” (Mataio 9:35; 15:30, 31, NW) Nakai kia ko e tau mena haia ne manako e Tau Kerisiano he vaha nei ki ai? To hahamo atu he moto tagata tokologa e tau matematekelea mo e tau tagata tino lolelole he lalolagi tuai ke he lalolagi fou. Ko e heigoa ha tautolu ne amaamanaki ke he Punua mamoe ke taute ke he mena ia? Ko e tau manako ha lautolu ka hao mai i Amaketo to kehekehe lahi mo e tau manako ha lautolu ka liliu tutu mai. Ko lautolu ka liliu tutu mai liga to liu tufuga katoatoa, ti mitaki, e tau malolo tino, pete ni he nakai la hokotia ke he mitaki katoatoa he tagata. Ha ko e mana he liu tutu mai, ko e moli kua nakai lata a lautolu ke liu fakafou he ha lautolu a tau matematekelea tuai mai he mana he fakamauluaga. Ke he taha mena foki, ha ko e ha lautolu a maamaaga he haoaga mai i Amaketo, ti ko e fakafou fakamana ko e mena haia he tokologa he moto tagata tokologa ka manako mo e ka moua. Ka e taha e mena, ko e matapatu nei hagaao e tau fakamaloloaga ha Iesu ki ai kua fakatino mai ma e fakamafanaaga he tau monuina loto olioli he moto tagata tokologa ha kua nakai fakahao ni a lautolu hokoia ka e to fakamalolo foki he magaaho fakamui.

16. (a) Ko e magaaho fe ka taute ai e fakamaloloaga fakamana ha lautolu ka hao mai i Amaketo, mo e ko e heigoa e fua? (e) Ko e heigoa e amaamanakiaga ke tumau e loto olioli ha mautolu he magaaho ia he Afetau?

¹⁶ Ko e fakamalolo fakamana pihia to taute fakapapahi fakahako ni ka mole a Amaketo mo e taute fakamua to kamata e liliu tutu mai. (Isaia 33:24; 35:5, 6; Fakakiteaga 21:4; fakatatai Mareko 5:25-29.) Ko e magaaho haia ka tolo kehe ai he tau tagata e tau tioata, tau tokotoko, tau akau tokotoko, tau nofoa fakataveli, tau nifo fakatutu, tau fanogonogo teliga mo e tau mena pihia. Ko e mitaki ha a ia he tupuaga he loto olioli! Ko e mitaki ha a ia he tauteuteaga tuai pihia ne taute he tau gahua a Iesu mo e kotofaaga ha lautolu ka hao mai i Amaketo ke eke mo fakaveaga he lalolagi fou! To uta kehe e tau gagao matematekelea he puhala ke maeke he tau tagata nei ka hao mai ke o ki mua mo e tau loto fiafia, mo e onoono fakamakutu ke he gahua fulufuluola he Afetau ne fakamafao mai i mua ha lautolu, nakai toho hifo aki he tau mena he lalolagi tuai ne fa fakamamahiaki a lautolu. E, ti pihia foki ka mole a Amaketo, to loto olioli fakatumau e moto tagata tokologa ke he amaamanakiaga fiafia nei ke hokotia ke he moui mitaki katoatoa he tagata ka fakaoti e afetau. Ko e tau tagata oti he Afetau, to loto olioli a lautolu ke he amaamanaki ke hoko ke he foliaga fiafia ia.

17. Ko e heigoa e tau loto olioli ka ha ha i ai he magaaho ia ka gahua ai ke liuaki mai e Parataiso?

¹⁷ Kaeke ko e amaamanakiaga hau a ia, kia manamanatu fakalahi foki ke he olioli he gahua kau fakalataha ke liuaki mai e Parataiso ke he lalolagi. (Luka 23:42, 43) To nakai fakauaua ko lautolu ka hao mai i Amaketo ka lagomatai ke fakamea e lalolagi mo e tauteute e tau matakavi fulufuluola ka liu tutu mai ki ai a lautolu ne mamate. Ko e tau mauku to hukui aki e tau fakafeleveiaaga ma lautolu ka ta hake mai he liu tutu mai, lafi ki ai ha tautolu a tau fakahelehele ne mamate. Mo e manamanatu ke he fakafetuiaga mautu fakalataha mo e tau tane mo e tau fifine tua mai he tau senetenari kua mole. Ko hai hau kua manako pauaki ke tutala ki ai? Ko Apelu kia, Enoka, Noa, Iopu, Aperahamo, Sara, Isaako, Iakopo, Iosefa, Mose, Iosua, Raava, Tapora, Samisoni, Tavita, Elia, Elisaio, Ieremia, Esekielu, Tanielu, po ko Ioane ko e Papatiso? Mitaki, ko e monuina fiafia nei ko e taha vala foki he amaamanakiaga hau. To maeke foki ia koe ke tutala mo lautolu, fakaako mai ia lautolu, mo e gahua fakalataha mo lautolu ke taute e lalolagi katoa mo parataiso.

18. Ko e heigoa foki falu loto olioli ke manamanatu fakalahi a tautolu ki ai?

¹⁸ Manamanatu foki, ke he tau mena kai katoatoa, ko e vai tavana, mo e matagi mea, mo e lalolagi ha tautolu ka liuaki mai ke he hana tuaga lago tatai mitaki katoatoa ko e puhala ne tufugatia pihia e Iehova. Ko e moui he magaaho ia to, nakai ko e olioli ni ha ko e mitaki katoatoa, ka ko e gahuahuaaga kakano lahi ke fakalataha ke he tau gahua olioli lahi. Manamanatu fakalahi la ke he tau tagata he kaufakalatahaaga he lalolagi katoa ka ataina mai he tau mahani kelea, mahani palau, mahekeheke, taufetoko​—ko e moui fakamatakainaga kua ha ha i ai e fakagahua he tau fua he agaga mo e moua mai he tau tagata oti kana. Ko e fulufuluola ha a ia!​—Kalatia 5:22, 23, NW.

Amaamanakiaga ne Taute e Moui ke Fai Aoga he Moui

19. (a) Ko e magaaho fe kua lata ke maama ai e loto olioli ne talahau he Roma 12:12? (e) Ko e ha kua lata ni ia tautolu ke eketaha ke ua fakaata e tau kavega he moui ke poka kehe ha tautolu a amaamanakiaga?

¹⁹ Ko e fakatalitali kua fita he moua kua nakai tuai ko e amaamanakiaga, ti ko e loto olioli ne fakamalolo mai e Paulo he Roma 12:12 (NW) kua lata ni ke maama he magaaho nei. (Roma 8:24) Manamanatu la ke he tau monuina he vaha i mua ka tamai he Kautu he Atua ko e fakatupuaga haia ma tautolu ke loto olioli ke he amaamanakiaga ia he magaaho nei. Ti eketaha ke ua fakaata e tau kavega he moui he lalolagi popo nei ke poka ke he fahi hau a amaamanakiaga lilifu. Aua neke fiu mo e tiaki noa, ke matapouli ke he amaamanakiaga ha i mua. (Heperu 12:3) Ko e tiaki e fakaakoaga Kerisiano kua nakai maeke ke tului aki hau a tau mena vihi. Manatu, kaeke ke tiaki he ha tagata e fekafekau ke he Atua ha ko e tau kavega oti he moui he magaaho nei, ko e apitia agaia ni a ia he tau kavega ia, ka to galo kehe ia ia e amaamanakiaga mo e galo kehe foki e maeke ke loto olioli ke he tau monuina fulufuluola ha i mua.

20. Ko e heigoa e lauiaaga ki a lautolu ne talia fiafia e amaamanakiaga ke he Kautu, mo e ko e ha?

²⁰ Kua ha ha i ai he tau tagata a Iehova e tau kakano oti ke fiafia e tau momoui. Ko e ha lautolu a amaamanakiaga lahi, mo e maama kua taute e moui ke fai aoga he moui. Ne nakai toka e lautolu e amaamanakiaga loto olioli nei ki a lautolu ni. Nakai, kua fakamakutu a lautolu ke tufa atu ke he falu. (2 Korinito 3:12) Ti ko e mena haia, ko lautolu ne talia fiafia e amaamanakiaga ke he Kautu ko e tau tagata loto malolo, mo e kumi a lautolu ke fakamalolo atu ke he falu ke tala age ki a lautolu e tala mitaki mai he Atua. Kua fakapuke he mena nei e tau momoui ha lautolu ne talia e fekau mo e amaamanakiaga fulufuluola lahi mahaki ne nakai la tuku age fakalaulahi pihia ke he tau tagata​—ko e amaamanakiaga ke he Kautu ka liuaki mai e Parataiso ke he lalolagi. Ka nakai talia he tau tagata e mena ia, ko e fakatumau agaia ni a tautolu ke loto olioli ha kua ha ha ia tautolu e amaamanakiaga. Ko e tau tagata ne fuluhi mai e teliga tuli ko e tau tagata kua kaumahala a lautolu; nakai pihia a tautolu.​—2 Korinito 4:3, 4.

21. Ko e heigoa kua tata lahi mai, mo e liu kitekite fefe e tautolu ha tautolu a amaamanakiaga?

²¹ Ko e maveheaga he Atua ko e: “Kitiala, kua fakafou tuai e au e tau mena oti.” (Fakakiteaga 21:5) Ko e lalolagi fou mo e hana tau pahala oti mo e tau monuina ne nakai fai fakaotiaga kua tata lahi mai. Ko e ha tautolu a amaamanakiaga​—ma e moui ke he lagi po ke ke he parataiso he lalolagi​—kua uho ni; kia gega ke mau ki ai. He tau aho kelea fakahiku nei ne nakai pihia tali mai, kia ono atu ki ai, “tuga ne taula he solu, kua moli ua, mo e mauokafua.” Fakalataha mo e ha tautolu a amaamanakiaga ne taula ki a Iehova, “ko e maka tumau tukulagi​—ko e Maka he tau tau,” kua moua ai e tautolu e malolo mo e kakano ke fakafiafiaaki he magaaho tonu nei ke “loto olioli ke he amaamanakiaga.” Kua fakatoka mai i mua ha tautolu.​—Heperu 6:19, NW; Isaia 26:4, The Amplified Bible.

[Tau Matahui Tala]

Tau Huhu ke Liu Fakamanatu

◻ Ko e heigoa e amaamanakiaga lahi mahaki he tagata?

◻ Ko e heigoa e olioli moli?

◻ Ko e magaaho fe ka liga fakahoko ai e fakamalolo fakamana he tau tagata ka hao mai i Amaketo?

◻ Ko e ha ne nakai maeke ai ia tautolu ke fakaata e tau kavega he moui ke poka kehe ha tautolu a amaamanakiaga ke he fahi?

◻ Ko e heigoa e tau olioli ka onoono atu a koe ki mua he lalolagi fou?

[Fakatino he lau 11]

Nakai kia ne fakapuke e loto hau aki e olioli ke he tau vahega fakamalolo ne fakakite e Iesu?

[Fakatino he lau 12]

Ko lautolu ne loto olioli ke he Kautu kua fakamalolo ke he falu ke kau fakalataha ke he ha lautolu a amaamanakiaga