Kia Fiafia ki a Iehova!

“Kia fiafia a mutolu ke he Iki, aua neke noa; to liu foki tala atu e au, kia fiafia a mutolu.”​—FILIPI 4:4.

1. Liga to fakaogotau he ha a tautolu ko e heigoa e kakano a Paulo he magaaho ne pehe a ia kua lata e tau Kerisiano ke fiafia tumau?

HE VAHA nei, ko e kakano ke fiafia ai kua liga tuga kua gahoa mo e fa lavea lahi. Kua eke e tau tagata he efuefu, ti pihia foki ni e tau Kerisano moli, ke feleveia mo e tau tutuaga ne tupu mai ai e momoko​—nakai fai gahua, gagao, mamate e tau fakahele, tau mena fekehekeheaki fakatagata, po ke totoko mai e faoa nakai tua he magafaoa po ke tau kapitiga he magaaho fakamua. Ti kua lata ai tuai a tautolu ke maama fefe e tomatomaaga a Paulo, ‘Kia fiafia aua neke noa’? Ha kua kitia e tau mena nakai mitaki mo e tau tutuaga uka ne kua fakamanavalahi a tautolu oti ki ai, to maeke foki nakai e mena nei? Ko e fakatutalaaga ke he tala ne lagaki mai e tau kupu nei ka lagomatai ai ke maama lahi e mena ia.

Fiafia​—Ko e Ha mo e Fefe?

2, 3. Ko e ha kua mua atu e aoga he fiafia, tuga ne kua fakakite mai he mena ne tupu ki a Iesu mo e tau Isaraela i tuai?

² “Kia fiafia a mutolu ke he Iki, aua neke noa; to liu foki tala atu e au, kia fiafia a mutolu.” Kua liga to fakamanatu mai he mena nei ki a tautolu e tau kupu ne tala age ke he tau Isaraela he magahala he 24 e tau senetenari he vaha ia: “Ha ko e fiafia kia Iehova ko e malolo ha mutolu haia,” po ke hagaao ke he liliuaga a Moffatt: “Ko e olioli ke he Tukumalagi ko e haia ni hau a malolo.” (Nehemia 8:10) Kua foaki he fiafia e malolo mo e kua tuga e taue kua maeke a taha ke hola ki ai ma e fakamafanatia mo e puipuiaga. Ko e kanavaakau e fiafia ne kua lagomatai foki e tagata tane mitaki katoatoa ko Iesu ke fakauka. “Ko ia ne fakauka ke he satauro, mo e fakateaga a ia ke he ma, ha ko e fiafia kua toka ki mua hana, kua nofo foki a ia ke he fahi matau he nofoaiki he Atua.” (Heperu 12:2) Kua maaliali tuai, ka fiafia ka fehagai mo e tau mena uka kua eke naia ke mua ue atu e aoga ke he fakamouiaga.

³ Fakamua to huhu atu ke he Motu he Maveheaga, ne poaki ke he tau Isaraela: “Ti fiafia ai a koe ke he tau mena mitaki oti ni kua foaki mai e Iehova hau a Atua kia koe mo e hau a magafaoa, ko koe, mo e tau tagata Levi, mo e tagata kehe ia koe.” Ko e tau taui he kaumahala ke fekafekau ki a Iehova mo e fiafia kua kelea lahi ni. “To moua ai a koe he tau malaia oti na, to tutuli e lautolu a koe, mo e hoko atu ni kia koe, ato mahaikava ai a koe . . . Nukua nakai fekafekau ai a koe kia Iehova hau a Atua mo e fiafia, mo e olioli he loto, ha ko e loga he tau mena oti.”​—Teutaronome 26:11; 28:45-47.

4. Liga ko e kaumahala he ha a tautolu ke fiafia?

⁴ Kua mua ue atu mogoia ke fakatepetepe lahi a lautolu ne fakauku ne toe agaia he vaha nei mo e ha lautolu a tau hoa ko e ‘falu mamoe’ ke fiafia! (Ioane 10:16) He liu fatiaki mai e Paulo hana fakatonuaga, “to liu foki tala atu e au,” kua eke ai ke pehi e aoga he fiafia ma e tau mena mitaki oti ne taute e Iehova ma tautolu. Taute pihia nakai e tautolu? Po kua eke na tautolu ke putoia lahi he tau mena he moui ti kua nimo e tautolu he falu a magaaho e tau kakano loga ha tautolu ke fiafia? Kua eke kia e tau mena vihi ke puke namo lahi kua fakalavelave e lautolu ha tautolu a onoonoaga ke he Kautu mo e hana tau fakamonuinaaga? Kua fakaata kia e tautolu e falu mena​—nakai omaoma ke he tau matafakatufono he Atua, he fakagalogalo e tau matapatu fakaakoaga faka-Atua, po ke taute fakateaga e tau matafekau Kerisiano​—ke uta kehe mai ia tautolu ha tautolu a fiafia?

5. Ko e ha kua uka e tagata nakai loto mitaki ke moua e fiafia?

⁵ “Kia iloa ha mutolu a [“loto mitaki,” NW] he tau tagata oti kana; kua tata mai tuai e Iki.” (Filipi 4:5) Ko e tagata ne nakai loto mitaki kua nakai lagotatai a ia. Liga to kaumahala a ia ke leveki fakamitaki hana malolo tino, kua fakahanoa lahi he toka hana tino ke lauia he tau mena fakapehia po ke fakaatukehe. Po kua liga nakai la ako a ia ke talia hana tau kaupaaga mo e feutaaki e moui mo e mena ia. Liga ne fakatoka e ia e tau foliaga kua tokoluga lahi mo e lali mogoia ke hokotia ki a lautolu pete ni ko e heigoa e taui. Po ke liga fakaaoga e ia hana tau kaupaaga ke piu ki ai ke fakatuai po ke fakatevateva. He nakai lagotatai mo e ha kua nakai loto mitaki, kua uka lahi a ia ke fiafia.

6. (a) Ko e heigoa kua lata ke kitia he faoa Kerisiano ia tautolu, mo e magaaho fe ni hokoia ka pihia ai e mena nei? (e) Lagomatai fefe he tau kupu a Paulo ia 2 Korinito 1:24 mo e Roma 14:4 a tautolu ke loto mitaki?

⁶ Pete ni foki kaeke kua onoono mai e tau tagata totoko ki a tautolu ko e tau tagata taute mena to muatua, ka kua lata tumau ni ke kitia he tau Kerisiano ha tautolu a loto mitaki. Mo e to pihia a lautolu kaeke kua lagotatai a tautolu mo e nakai amaamanaki ke mitaki katoatoa a tautolu ni po ke falu. Ka e mua atu he tau mena oti, kua lata a tautolu ke aua tuku e tau kavega mamafa ki luga he falu ne kua to muatua mai he tau poakiaga he Kupu he Atua. Ne pehe e aposetolo ko Paulo: “Nakai ko e mena fia pule a mautolu ke he ha mutolu a tua, ka ko e tau lagomatai a mautolu ke he ha mutolu a fiafia.” (2 Korinito 1:24) Ha ko e Farasaio he magaaho fakamua, ne iloa lahi e Paulo ko e tau poakiaga maokikiha ne fakatoka mo e omoi e lautolu ne fai pule malolo ka tamate e fiafia, ka ko e tau talahauaga lagomatai lahi ne foaki he kaugahua ka fakatupu tolomaki ai. Kua moli “kua tata mai tuai e Iki” ti kua lata ai ke fakamanatu ke he tagata loto mitaki kua nakai lata a tautolu ke ‘fakafili atu ke he fekafekau he taha tagata. Kua tumau a ia po ke veli ke he hana ni a iki.’​—Roma 14:4.

7, 8. Kua lata he ha e tau Kerisiano ke amaamanaki ke fai mena vihi, ka e to maeke fefe a lautolu ke fiafia tumau?

⁷ “Aua neke fakaatukehe a mutolu ke he taha mena taha; ka kia fakailoa atu ke he Atua e tau manako ha mutolu ke he tau mena oti kana ke he liogi, mo e ole, katoa mo e fakaaue.” (Filipi 4:6) Kua fa mahani lahi a tautolu he vaha nei mo e “tau aho uka” ne tohi mai e Paulo. (2 Timoteo 3:1-5) Ti lata e tau Kerisiano ke amaamanaki ke fehagai mo e tau mena vihi. Ko e tau kupu a Paulo ke ‘fiafia aua neke noa’ kua nakai uta kehe e tau magaaho ka eke ai e Kerisiano mahani fakamoli ke ate tote po ke loto lolelole lahi. Ke he mena ne tupu ki a Paulo ni, ne talahau fakamoli a ia: “Kua matematekelea a mautolu ke he tau mena oti, ka e nakai fakaatukehe; kua fakahakuhaku a mautolu ka e nakai mahalohalo noa; Kua favale mai kia mautolu, ka e nakai tiaki a mautolu; kua palu hifo a mautolu, ka e nakai mahaikava.” (2 Korinito 4:8, 9) Ko e fiafia he Kerisiano, mogoia, ka fakamolu hifo ati uta kehe ai e tau magaaho fakaatukehe mo e momoko fakaku. Kua tuku age e malolo ne kua lata lahi ke ukufeke ki mua, kua nakai galo mai he mata e tau kakano loga ke fiafia.

⁸ Ka tutu mai e tau mena vihi, pete ni ko e heigoa mo e heigoa a lautolu, kua olelalo fakatokolalo e Kerisiano loto fiafia lahi ma e lagomatai a Iehova kakano he liogi. Ne nakai maofi hifo a ia ke he fakaatukehe lahi mahaki. He mole he taute e ia e tau mena kua maeke a ia ke taute ke fakamitaki aki e lekua, kua toka e ia ke he tau lima a Iehova ko e heigoa e fua ka moua ke felauaki mo e uiina: “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe.” He magaaho taha, kua fakatumau e Kerisiano ke fakaaue ki a Iehova ma e Hana tau mahani mitaki oti kana.​—Salamo 55:22; kikite foki Mataio 6:­25-34.

9. Foaki mai fefe he iloilo ke he kupu moli e loto mafola, mo e lauia mitaki fefe e Kerisiano he mena nei?

⁹ “Ko e monuina foki mai he Atua kua mua ue atu ke he tau mena oti kua manamanatu ki ai, to leveki ai e tau loto ha mutolu, katoa mo e tau manatu ha mutolu kia Keriso Iesu.” (Filipi 4:7) Kua fakaataina he iloilo he kupu moli he Tohi Tapu e loto he Kerisiano mai he fakavaia mo e lagomatai a ia ke fakatupu mai e tau puhala manamanatu mitaki. (2 Timoteo 1:13) Ti kua lagomatai ai a ia ke kalo kehe mai he mahani hepe po ke nakai pulotu ne kua maeke ke fakahagahagakelea e fakafetuiaga mafola mo e falu. Ka e nakai hauhaua ha ko e fakafiliaga nakai tonu mo e mahani kelea, kua tuku e ia hana falanakiaga ki a Iehova ke fakamitaki e tau mena vihi he tau tagata he puhala mai he Kautu. Ko e loto mafola pihia kua puipui hana loto, kua ta­ofi­mau e tau omoiaga he loto hana ke mea, mo e takitaki hana manamanatuaga ke he puhala tututonu. Kua eke ai e tau omoiaga he loto ke mea mo e manamanatuaga hako, ti kua foaki mai mogoia e tau kakano loga ke fiafia, pete kua ha ha ai e tau mena vihi mo e fakapehiaaga kua tamai he lalolagi fakaagihoa.

10. Kua maeke ni ke iloa e fiafia moli he vagahau po ke manamanatu ke he heigoa?

¹⁰ “Ko e tau matakainaga na e, ko e kupu hanai kua toe; ko e tau mena oti kua moli, ko e tau mena oti kua gali, ko e tau mena oti kua tonu, ko e tau mena oti kua mea, ko e tau mena oti kua fulufuluola, ko e tau mena oti kua talahaua mitaki, ko e tau mahani mitaki oti ne toka ai mo e tau mahani ke nava ki ai, kia manamanatu a mutolu ke he tau mena ia.” (Filipi 4:8) Kua nakai fiafia e Kerisiano ke vagahau po ke manamanatu ke he tau mena kelea. Kua eke agataha ai e tau fakafiafia tino loga ne foaki mai he lalolagi ke nakai lata. Kua nakai maeke a taha ke fakatumau e fiafia Kerisiano kaeke kua fakapuke e ia hana loto manamanatu mo e loto ke he tau pikopiko, tau fefeua kelea, mo e tau mena kua nakai tututonu, mahani kelea, kua noa mo e mahani mitaki-tonu, vihiatia lahi, mo e fakateteki. Ke talahau fakalapalapa ai, kua nakai maeke ia taha ke moua e fiafia moli he fakapuke hana loto manamanatu mo e loto ke he tau mena kiva. He lalolagi kelea a Satani, kua feati hake lahi ha he iloa kua loga e tau mena mitaki kua ha ha he tau Kerisiano ke manamanatu mo e tutala ki ai!

Loga Lahi e Tau Kakano ke Fiafia

11. (a) Ko e heigoa kua nakai lata ke taute fakatote, mo e ko e ha? (e) Kua lauia fefe e taha tagata mo e hoana hana ne fenoga ke he fono he lalolagi katoa?

¹¹ Ka vagahau ke he tau kakano ke fiafia ai, kia nakai nimo e tautolu ha tautolu a tau matakainaga he lalolagi katoa. (1 Peteru 2:17) He magaaho ne fakakite he tau motu mo e tau matakau fakamotu kehekehe he lalolagi e fe­vihi­a­tiaaki, kua fetataaki lahi e tau tagata he Atua he fefakaalofaaki. Kua mua atu ke kitia moli e fefakalatahaaki ha lautolu he tau fonoaga he lalolagi katoa. Ke he taha ne taute he tau 1993 i Kiev, Ukaraine, ne tohi he tagata ne fenoga ki ai mai he Tau Fahi Kaufakalataha: “Ko e tau hihina mata fiafia lahi, ko e tau mata kalopalopa, ko e fegegaaki fakamagafaoa tumau, mo e tau fakaalofa atu ne fakafano mai he taha fahi he male ke he taha he tau matakau ne aloalo e tau piu lanu kehekehe mo e tau holoholo ne kua talahau maaliali lahi e fefakalatahaaki he teokaratiki. Kua puapua e tau loto fakahakehake ha mautolu ha ko e tau mena ne fakakatoatoa mana e Iehova ke he lalolagi katoa fakamatakainaga. Kua amotia he mena nei e hoana haku mo au ti hokulo lahi mo e lafi mai foki e tau kakano fou ke he tua ha maua.”

12. Fakamoli tonu fefe a Isaia 60:22 i mua he tau mata ha tautolu?

¹² Kua fakamalolo ha e tua he tau Kerisiano he vaha nei he kitia e tau perofetaaga he Tohi Tapu kua fakamoli i mua he tau mata ha lautolu ni! Kia manamanatu la, ke fakatai ki ai, ko e tau kupu ia Isaia 60:22: “Ko e tokogahoa to eke ia mo tokoafe, mo e maga fakateaga to eke ia mo motu malolo; ko au ko Iehova to fakaave au ke eke ke he hana ni a aho.” He fanau mai he Kautu he tau 1914, ne 5,100 ni hokoia​—ko e tokogahoa​—ne gahua fakamatala. Ka e he vaha he lima e tau kua mole, kua tupu ki mua e lahi he tau matakainaga he lalolagi katoa ti fakaevalesi ke 5,628 e Tau Fakamoli ne papatiso fou he tau fahi tapu takitaha! He tau 1993, kua hokotia ke tapunu he 4,709,889 e tau fekafekau gahuahua. Kia manamanatu la! Ko e kakano he mena nei ko e “tokogahoa” he tau 1914 kua tata moli lahi ke eke ke “tokoafe”!

13. (a) Ko e heigoa ne fa e tutupu tali mai he tau 1914? (e) Fefe e onoonoaga he Tau Fakamoli a Iehova ke he matapatu fakaakoaga he tau kupu a Paulo ia 2 Korinito 9:7?

¹³ Tali mai he tau 1914 kua hoko mai e Patuiki Mesia ti pule he vahaloto he tau fi hana. Ko e hana a pule ne lagomatai he tau tutaki ko e tau tagata ne manako ke foaki magaaho, malolo, mo e tupe ke taute e gahua fakamatala ke he lalolagi katoa mo e fakaholoaga talaga fale foki he lalolagi katoa. (Salamo 110:2, 3) Kua fiafia e Tau Fakamoli a Iehova ha kua fakaaoga e tau tupe ko e tau mena fakaalofa ke kitia tonu ko e fakakatoatoa e tau gahua nei, pete ni kua lavea ke tutala ke he tau tupe he tau magaaho feleveiaaga ha lautolu.a (Fakatatai 1 Nofoaga he Tau Patuiki 29:9.) Kua nakai eke e tau Kerisiano moli ke fakaohooho ke foaki mena; ha ko e monuina a ia ke he manamanatuaga ha lautolu ke lagomatai ha lautolu a Patuiki ke he tau mena kua maeke ai ha lautolu a tau tutuaga, ti kua takitaha na lautolu ‘tuga e fifili ke he hana loto; ne kua nakai foaki mo e momoko, po ke foaki ke he ole fakafi.’​—2 Korinito 9:7.

14. Fefe e tutuaga he vahaloto he tau tagata he Atua ne kua kitia maali mai he tau 1919, ti ko e heigoa mogoia e kakano ma lautolu ke fiafia?

¹⁴ Ko e talahauaga tuai ke he liuaki maiaga he tapuaki moli ke ha ha he vahaloto he tau tagata he Atua ne kua fakatupu mai ai e parataiso fakaagaga. Tali mai he tau 1919 kua fakalaulahi fakahaga hana tau katofia. (Salamo 14:7; Isaia 52:9, 10) Ko e fua? Kua fa mahani lahi e tau Kerisiano moli ke “moua e lautolu e olioli mo e fiafia.” (Isaia 51:11) Ko e taui mitaki ne fua mai ko e fakamoliaga haia ke he mena kua maeke e agaga tapu he Atua ke fakakatoatoa he puhala mai he tau tagata nakai mitaki katoatoa. Kua o oti e tau talahauaga mitaki mo e lilifu ki a Iehova, ka ko e heigoa foki kua mua atu e monuina mai he eke mo kaugahua mo e Atua? (1 Korinito 3:9) Kua malolo lahi foki a Iehova ti maeke ke taute e tau patuo, kaeke kua lata, ke tau ui mai e fekau he kupu moli. Ka e pete ni ia, kua fifili a ia ke nakai taute e puhala nei ka e, kua kehe, he omoi e tau mena momoui ne taute mai he efuefu ke taute hana finagalo.​—Luka 19:40.

15. (a) Ko e heigoa e tau mena tutupu he vaha fou nei ne kua kitekite lahi a tautolu ki ai? (e) Ko e heigoa e mena ka tupu ne kua fakatalitali lahi a tautolu ki ai fakalataha mo e fiafia?

¹⁵ He pukeina mo e matakutakuina, kua kitekite e tau fekafekau a Iehova he magaaho nei ke he tau mena tutupu he lalolagi he fakakite mai he tau mena nei e tau perofetaaga muatua he Tohi Tapu. Kua lali fakalahi e tau motu​—ka e taute teao​—ke moua e mafola ne mauokafua. Kua omoi he tau mena tutupu a lautolu ke tauui ke he fakatokatokaaga he Tau Motu Kaufakalataha ke taute taha lagomatai he tau matakavi fai lekua he lalolagi. (Fakakiteaga 13:15-17) He magaaho nei, kua fita e tau tagata he Atua he onoono ki mua kua fakatalitali lahi mahaki ke he taha mai he tau mena tutupu fiafia lahi ka kuelaia ke hohoko, ne kua tata lahi mai he tau aho oti. “Kia fiafia a tautolu mo e kolikoli mo e tuku atu e fakahekeaga kia ia; ha kua hoko mai e taonaga he Punua mamoe, ko e hana hoana foki kua taute tuai e ia a ia.”​—Fakakiteaga 19:7.

Fakamatala​—Ko e Kavega Mamafa po ke Fiafia?

16. Talahau la e fakataiaga ko e to galomoki fefe e fiafia he Kerisiano ka kaumahala ke taute mau e mena ne ako a ia ki ai?

¹⁶ “Ko e tau mena foki kua ako ai a mutolu, mo e talia e mutolu, ne fanogonogo foki mo e kitia mai e mutolu kia au, kia eke e mutolu e tau mena ia; to ha ia mutolu e Atua hana a monuina.” (Filipi 4:9) He taute mau e tau mena ne ako e lautolu, kua maeke e tau Kerisiano ke amaamanaki ke moua e fakamonuinaaga he Atua. Taha mai he tau mena kua mua atu e aoga ne ako e lautolu ko e aoga he fakamatalaaga he tala mitaki ke he falu. Kua moli, ko hai foki kua maeke ke fakatotoka e loto po ke fiafia lahi kaeke kua toka ne ia ki a ia e tau fakailoaaga ti nakai tala age ke he tau tagata loto fakamoli e mena kua falanaki ha lautolu a tau momoui ki ai ke logona e mena ia?​—Esekielu 3:17-21; 1 Korinito 9:16; 1 Timoteo 4:16.

17. Ko e ha kua lata ha tautolu a gahua fakamatala ke eke mo punaaga tumau he fiafia?

¹⁷ Ko e fiafia lahi ha ka moua e tau tagata ne tuga e tau mamoe kua manako ke fakaako ki a Iehova! Kua moli, ko lautolu kua fekafekau mo e hako e omoiaga he loto ka moua tumau ko e punaaga he fiafia e fekafekau he Kautu. Kua pihia e mena nei kakano ha ko e matapatu kakano a ia he eke mo Fakamoli a Iehova ke fakaheke Hana higoa mo e lagaki hake tumau Hana a tutuaga ko e Pule Katoatoa. (1 Nofoaga he Tau Patuiki 16:31) Ko e tagata ne mailoga e mena moli nei to fiafia foki ni he magaaho ka nakai pulotu e tau tagata ke nakai talia e tala mitaki ne tamai e ia. Ne iloa e ia to hoko ke he taha aho to oti e fakamatalaaga ke he tau tagata nakai talitonu; ka e to fakaheke tukumalagi e higoa a Iehova.

18. Omoi he heigoa e Kerisiano ke taute e finagalo ha Iehova?

¹⁸ Kua omoi he lotu moli a lautolu ne fa mahani mau ke taute e tau mena ne loto a Iehova ki ai, nakai kuenaia kua lata a tautolu ke taute, ka e kakano ha kua manako a lautolu. (Salamo 40:8; Ioane 4:34) Kua tokologa e tau tagata ne kua uka lahi ke maama e mena nei. Ne tala age he fifine he taha magaaho ke he taha Fakamoli ne ahi atu ki a ia: “Iloa nakai e koe, kua eke ni au ke nava ki a koe. Ko au moli to nakai fano ke he taha fale mo e ke he taha fale ke fakamatala haku lotu tuga ne taute e koe.” Ti fakalataha mo e mamali ne tali e Fakamoli: “Kua maeke ia au ke maama hau a logonatiaaga. Fakamua ato eke au mo taha he Tau Fakamoli a Iehova, kua nakai maeke a koe ke taute au ke fano ke he falu tagata ke tala fakalotu. Ka e he magaaho nei kua manako ni au.” Kua manamanatu fakaku e fifine mo e ti pehe hana manatu fakahiku: “Kua moli kua fai mena hau a lotu ke foaki ne kua nakai ha ha he haku. Liga kua lata au ke kumikumi ki ai.”

19. Ko e ha ko e magaaho a nei ke fiafia tuga kua nakaila pihia fakamua?

¹⁹ Ko e lauga he tau 1994, ne fakatata lahi mai he ha tautolu a tau Fale he Kautu, ne kua fakamanatu tumau mai ki a tautolu: “Kia tua a koe kia Iehova mo e hāu a loto katoa.” (Fakatai 3:5) Kua fai kakano lahi mahaki foki nakai ke fiafia ne kua mua mai he ha tautolu a falanakiaga ki a Iehova, ko e ha tautolu a taue ne huhu ai a tautolu? Kua fakamaama mai ia Salamo 64:10: “To fiafia e tagata tututonu kia Iehova, mo e tua kia ia.” Nakai ko e magaaho a nei ke mahalohalo po ke manava tote. He mole e tau mahina takitaha kua eke ke tata a tautolu ke he mena moli ne kua fia loto e tau fekafekau a Iehova ke kitia tali mai he tau aho a Apelu. Ko e magaaho a nei ke falanaki ki a Iehova mo e ha tautolu a loto katoa, he iloa kua nakai tuai tuga he magaaho fakamua ha kua loga lahi e tau kakano ia tautolu ke fiafia!

[Tau Matahui Tala]

◻ Ko e ha, hagaao ki a Nehemia 8:10, kua lata ia tautolu ke fiafia?

◻ Fakakite mai fefe ia Teutaronome 26:11 mo e Teu 28:45-47 kua mua atu e aoga he fiafia?

◻ Maeke fefe ia Filipi 4:4-9 ke lagomatai tumau a tautolu ke fiafia?

◻ Ko e heigoa e kakano ne foaki mai he lauga he tau 1994 ki a tautolu ke fiafia?

[Tau Hūhū he Fakaakoaga]

[Fakatino he lau 26]

Fiafia e Tau Fakamoli Rusia mo e Sihamani he eke mo vala he tau matakainaga he lalolagi katoa

[Fakatino he lau 27]

He tufatufa e kupu ke he falu ko e mena ke fiafia ai