Kia Fiafia Fakalataha a Tautolu!

KO E fiafia mo e olioli kua uka lahi ke moua. Ma e tokologa, kua liga teitei nakai maeke ke fakakite e tau logonaaga atihake ke he falu. Ko e moui he vahā nei, mua atu ke he tau taone lalahi, ne fakatupu e tau tagata ke vevehe kehe a lautolu ti nonofo kehe.

“Ko e matimati ko e mena fa mahani lahi,” talahau he Porofesa he Psychobiology ko Alberto Oliverio, ti “nakai fakauaua ai ko e moui he tau matakavi lalahi kua talaga ke fakaohooho aki e vevehe kehe. He tau tuaga loga, kua taute a tautolu ke fakaheu e moui he tagata gahua auloa he ofisa, tuutakaina, po ke tagata totogi he tau mena fakatau ne gahua he fale koloa lahi he matakavi.” Ko e vevehe kehe pihia ne fa takitaki ke he fakaagitau.

Ka kua kehe e tuaga he tau matakainaga Kerisiano, ti pihia mo e aga ha lautolu. Ne tohi he aposetolo ko Paulo: “Kia hagaaki fiafia mau.” (1 Tesa. 5:16) Loga e kakano ma tautolu ke olioli mo e fiafia auloa. Kua tapuaki a tautolu ke he Atua Mua Ue Atu, ko Iehova; maama e tautolu e fekau mooli he Tohi Tapu; ha ha ia tautolu e amaamanakiaga he fakamouiaga mo e moui tukulagi; ti maeke foki ia tautolu ke lagomatai falu ke moua e tau monuina taha ia.​—Sala. 106:4, 5; Iere. 15:16; Roma 12:12.

Ko e fiafia mo e fakalataha ke he olioli he falu ko e tau mahani he tau Kerisiano mooli. Ti nakai ofo he tohi a Paulo ke he tau Filipi: “To fiafia ai au, to fiafia foki au fakalataha mo mutolu oti kana. Ko e mena foki ia kia fiafia ai a mutolu, kia fiafia foki a mutolu fakalataha mo au.” (Filipi 2:17, 18) He tau kupu gahoa nei, ne lagaua e vagahau a Paulo ke he fiafia fakalataha mo e falu.

Mooli, ko e tau Kerisiano kua lata ke mataala ke kalo kehe he tau manatu ke vevehe kehe a lautolu ni. Nakai fai tagata ne fakamavete kehe ne ia a ia ka fiafia auloa mo e tau matakainaga fakaagaaga. Ti maeke fēfē ia tautolu ke muitua ke he tomatomaaga a Paulo ‘kia fiafia ke he Iki’ mo e tau matakainaga ha tautolu?​—Filipi 3:1.

Fiafia Fakalataha mo e Tau Matakainaga Fakaagaaga

He mogo ne tohia e Paulo e tohi haana ke he tau Filipi, liga ko e pagotā a ia i Roma ha ko e fua he tau gahua fakamatala haana. (Filipi 1:7; 4:22) Ka kua nakai fakalolelole e makutu haana he tuku he fale puipui ma e fekafekauaga. Ke he taha faahi, ne fiafia a ia ke fekafekau ke he puhala katoatoa mo e ke ‘fakamaligi tuga e poa.’ (Filipi 2:17) Fakakite he aga ha Paulo ko e fiafia kua nakai falanaki ke he tau tutūaga he tagata. Pete he tuku he fale puipui, ne pehē a ia: “Ko e moli to fiafia ai ni au.”​—Filipi 1:18.

Ne fakatū e Paulo e fakapotopotoaga i Filipi ti logona pauaki e fakaalofa hofihofi ma e tau matakainaga haana i ai. Iloa e ia ka fakalataha ke he fiafia ne moua e ia he fekafekau ki a Iehova to fakamalolō foki a lautolu. Ati tohi e ia: “Ko e tau matakainaga na e, kua manako au kia iloa e mutolu, ko e tau mena ne hohoko kia au, kua tupu lahi ai e vagahau mitaki. Ko e mena ia kua fakakite ai ia Keriso haku a tau liliaga ke he fale oti he kau leoleo, katoa foki mo e tau faoa oti.” (Filipi 1:12, 13) He talahau e Paulo e mena fakamalolō nei ne tupu ko e taha puhala ne fiafia fakalataha ai a ia mo e tau matakainaga haana. Ko e tau Filipi, mogoia, kua liga fiafia fakalataha mo Paulo. Ka ko e taute pihia e lautolu, kua nakai lata ia lautolu ke fakalolelole ha ko e mena ne tupu ki a Paulo. Ka kua lata ia lautolu ke muitua e fifitakiaga haana. (Filipi 1:14; 3:17) Mua atu, kua maeke he tau Filipi ke fakatumau ke totoku a Paulo he tau liogi ha lautolu mo e foaki ki a ia e lagomatai mo e lalagoaga kua maeke ia lautolu.​—Filipi 1:19; 4:14-16.

Fakakite nakai e tautolu e aga fiafia pihia tuga ha Paulo? Eketaha nakai a tautolu ke kitia e tau puhala mitaki he tau tutūaga ha tautolu he moui mo e fekafekauaga faka-Kerisiano ha tautolu? Ka feoaki a tautolu mo e tau matakainaga ha tautolu, kua mitaki ke fiafia hagaao ke he gahua fakamatala. Kia nakai fakatali a tautolu ke he tau mena tutupu ofoofogia ke taute e mena nei. Liga maeke ia tautolu ke fakalagalaga e fiafia he fekau he Kautu aki e fakafeleveiaaga lauia mitaki pauaki po ke fakamaamaaga. Liga mitaki e fakatutalaaga ha tautolu mo e tagata he fale hagaao ke he kupu he Tohi Tapu ne kua fifili. Po ke liga kua mailoga a tautolu he fonua ko e Tau Fakamoli a Iehova, ati eke e mena nei mo fakamatala mitaki. He fakalataha ke he tau mena tutupu pihia ko e puhala he fiafia auloa.

Tokologa e tagata ha Iehova ne kua taute mo e hane taute agaia e tau fakatokaaga ke fakakatoatoa aki e gahua fakamatala. Ko e tau paionia, tau leveki faifano, tau tagata he Peteli, tau misionare, mo e tau fekafekau he lalolagi katoa kua foaki fakalahi e lautolu a lautolu ke he fekafekauaga mau mo e fiafia he taute pihia e lautolu. Logona nakai e tautolu e fiafia fakalataha mo lautolu? Kia fakakite mogoia e tautolu e loto fakaaue ha tautolu ma lautolu nei ko e tau fakahelehele ‘kua gahua fakalataha ke he kautu he Atua.’ (Kolo. 4:11) Ka fakalataha auloa a tautolu he tau feleveiaaga he fakapotopotoaga po ke tau toloaga faka-Kerisiano lalahi, maeke ia tautolu ke fakamalolō mafanatia ki a lautolu. Maeke foki ia tautolu ke muitua e fifitakiaga makutu ha lautolu. Ti lata ia tautolu ke fakatoka ke “maeke” ke fanogonogo ke he tau mena tutupu ha lautolu mo e tau kupu atihake he fakakite ki a lautolu e fakamokoi, liga he kai auloa mo lautolu.​—Filipi 4:10.

Fiafia mo Lautolu kua Fehagai he Tau Kamatamata

He fakauka ke he favale mo e kautū ke he tau kamatamata ne fakamalolō e fifiliaga ha Paulo ke fakamooli tumau ki a Iehova. (Kolo. 1:24; Iako. 1:2, 3) He iloa ko e tau matakainaga i Filipi to liga fehagai ke he tau kamatamata pihia mo e to fakamalolō he fakamanavalahi haana ne foaki ki a ia e kakano ke fiafia fakalataha mo lautolu. Ati tohi e ia: “Ko e mena kua foaki mai kia mutolu, ha ko Keriso, nakai ko e tua kia ia hokoia, ka kia mamahi foki a mutolu ha ko ia. Ha ha ia mutolu foki e tau ia, tuga he kitekite a mutolu ha ia au, kua fanogonogo nei foki ha ha ia au.”​—Filipi 1:29, 30.

He vahā nei foki, kua matematekelea e tau Kerisiano ke he totoko ke he ha lautolu a fakamatala. Falu mogo kua vale lahi e totokoaga nei, ka kua fa halahū lahi. Liga hau he puhala he tau tukupau fakavai he tau tagata tiaki taofiaga, favale mai he tau tagata he magafaoa, vaiga mai he tau tagata gahua po ke tau kapitiga aoga. Hataki e Iesu ko e tau kamatamata nei kua nakai lata ke fakaofo a tautolu po ke fakalolelole a tautolu. Ka ko e tau kakano haia ma e fiafia. Ne pehē a ia: “Uhoaki [fiafia] a mutolu ka faikupu kelea a lautolu, mo e favale kia mutolu, mo e tukumale pikopiko a lautolu kia mutolu ke he tau mena kelea oti ha ko au. Kia kolikoli a mutolu mo e fiafia ni; ha ko e ha ha he lagi ha mutolu a palepale kua lahi.”​—Mata. 5:11, 12.

Kua nakai lata ia tautolu ke hopoate po ke matakutaku ka logona e tautolu kua fehagai e tau matakainaga ha tautolu mo e favaleaga mamahi lahi he falu motu. Ke he taha faahi, lata ia tautolu ke fiafia ke he fakamanavalahi ha lautolu. Maeke ia tautolu ke liogi ma lautolu, he ole ki a Iehova ke fakamalolō ha lautolu a tua mo e fakauka. (Filipi 1:3, 4) He liga temotemoai e mena kua maeke ia tautolu ke taute ma e tau matakainaga fakahele ia, maeke ia tautolu ke lagomatai a lautolu he fakapotopotoaga ni ha tautolu hane lauia he tau kamatamata. Maeke ia tautolu ke matakite ki a lautolu mo e lalago a lautolu. Maeke ia tautolu ke fakatoka ke maeke ke fiafia fakalataha mo lautolu he uiina a lautolu he falu mogo ke matutaki mo tautolu he ha tautolu a Tapuakiaga Magafaoa he afiafi, gahua fakamatala mo lautolu, mo e fai magaaho auloa he fakafiafiaaga.

Ha ha ia tautolu e tau kakano loga ke fiafia auloa! Kia totoko e tautolu e mahani vevehe kehe he lalolagi nei mo e matutaki a tautolu ke fiafia fakalataha mo e tau matakainaga ha tautolu. He taute pihia, to nakai ni fakalataha a tautolu ke he fakaalofa mo e kaufakalataha he fakapotopotoaga ka e to olioli katoatoa e tautolu e tau matakainaga Kerisiano he fakapotopotoaga. (Filipi 2:1, 2) E, ‘kia fiafia ke he Iki,’ he hataki e Paulo a tautolu: “To liu foki tala atu e au, kia fiafia a mutolu.”​—Filipi 4:4.

[Picture Credit Line he lau 6]

Globe: Courtesy of Replogle Globes