Fakaeneene he Tau Perofeta Fakavai!
KUA o e tokoua Parasila ke momohe he po ti logona e laua e tau tagata kaiha ne o ki loto he fale ha laua. Kua maeke he tokoua matakutakuina nei ke fehola he pu fakamaama he poko mohe mo e hea ai ke he leoleo. Ka ko e magaaho fakamui kua tupetupe lahi e hoana he mena ne tupu ti nakai maeke ke mohe he fale mo e fano ke he kaina he hana matua fifine.
Ko e ha tagata ne kua hopo pule noa hana kaina po ke ne kaiha ke he falu puhala to fakaalofa ki a ia. Ko e mena tupu pihia ko e mena fakalolelole, mo e, momoko lahi, kua loga mo e loga e tau tagata kua mamahi he puhala nei. Pete ni, kua ha ha i ai, e vahega kaiha ne kua mua ue atu e kelea.
Ko e heigoa e vahega kaiha kelea lahi nei, mo e ko hai e tau tagata kaiha? Mai e Iesu Keriso falu vala tala ki a tautolu hagaao ke he mena nei, he vagahau hagaao ke he tau aho ha tautolu, ne pehe a ia: “To tutu mai e tau perofeta pikopiko tokologa, ti fakahehe e lautolu e tau tagata tokologa.” (Mataio 24:11) Tau tagata kaiha e tau perofeta fakavai. Ke he puhala fe? Ko e heigoa ha lautolu ne kaiha? Ko e ha lautolu a kaihaaga kua pipi ia mo e ha lautolu a perofetaaga. Ti ke moua e maamaaga katoatoa moli ke he mena ia, kua lata fakamua a tautolu ke iloa ko e heigoa e perofetaaga ne fakamaama mai he Tohi Tapu.
Ko e Heigoa e Kakano ke Perofeta
He magaaho ka manamanatu a koe ke he perofetaaga, liga ko e mena fakamua ka hau ke he manamanatuaga hau ko e talahau tuai ke he vaha mai i mua. Ko e mena moli lahi a nei he gahua he tau perofeta he Atua i tuai, ka e nakai ko e matapatu gahua ha lautolu a ia. Ma e fakatai, he magaaho he fakakiteaga ko e perofeta ko Esekielu kua talahau ke “perofeta ke he matagi,” kua lata ni a ia ke talahau e poaki mai he Atua. (Esekielu 37:9, 10, NW) He magaaho ne kamatamata a Iesu ki mua he tau akoako, kua tauanu mo e ta pati, mo e vaiga he hana tau tagata favale pehe: “Perofeta ki a mautolu a koe ko e Keriso. Ko hai a ia ne ta a koe?” Ne nakai ole a lautolu ki a Iesu ke talahau tuai e vaha mai i mua. Ne paleko a lautolu ki a ia ke fakakite mai he malolo he Atua a lautolu ne fahi a ia.—Mataio 26:67, 68, NW.
Kua moli ni, ko e uho manatu ne fakakite mai he vagahau fakamua he Tohi Tapu e tau kupu ne fakaliliu “perofetaaga” po ke “perofeta” kua matapatu ni ke tukuogo e manatu he Atua ke he mena ne tupu po ke, tuga ne tuku mai he tohi a Gahua, ke tukuogo e “tau mena mahomo ue atu he Atua.” (Gahua 2:11, NW) Ke he kakano nei ne ha ha i ai tokologa e tau tagata kua kaiha he tau perofeta fakavai.
Ti, ko hai mogoia e tau perofeta fakavai, ti ko e heigoa ha lautolu ne kaiha? Ke tali e huhu nei, o mai la a tautolu ke hahaga atu ke he fakamauaga tuai he motu a Isaraela he magaaho a Ieremia.