“Kia Ui Atu . . . ke he Tau Patu”

“Kua gagao kia taha ia mutolu? Kia ui atu a ia ke he tau patu he ekalesia.”​—IAKOPO 5:14.

1, 2. (a) Ko e heigoa e tuaga hagahaga kelea ne kua ha ha i ai e tau fekafekau a Iehova, mo e liga fefe ha lautolu a tau logonaaga? (e) Ko e heigoa e tau huhu he mogonei kua lata ke fai tali?

“KO E tau aho fakamui to hohoko mai ai e tau aho uka” ti kua fita ni e ha ha hinai. Ha ha he tau tagata e tau mahani lotokai, loto lahi ke he tau koloa, fakatokoluga, mo e fa mahani ke fakalagalaga e mahani miha ke he “tau aho fakamui” nei. (2 Timoteo 3:1-5) Ha kua momoui ke he lalolagi kelea nei e tau Kerisiano, kua fakalavelave a tautolu he tolu e tau mena hagahaga kelea lahi: ko Satani ko e Tiapolo, ko e lalolagi he tau tagata nakai mahani atua, mo e ha tautolu a tau hagahaga agahala ne fanau mai mo tautolu.​—Roma 5:12; 1 Peteru 5:8; 1 Ioane 5:19.

² Fakamatakutaku he tau mena hagahaga kelea nei, ti tanumia a tautolu ke he falu magaaho. I fe mogoia, ke maeke a tautolu ke moua mai taha lagomatai ke maeke ia tautolu ke fakauka fakamoli? Ko hai ke haga a tautolu ki ai ke fai hatakiaga ka feleveia mo e tau fifiliaga hagaao ke he ha tautolu a tau gahua Kerisiano mo e ha tautolu a tapuakiaga?

Lagomatai ne Tata Lahi Mai

3. Moua mai e tautolu ia hai e fakamafanaaga, mo e moua fefe?

³ Moua e tautolu e mafanatia moli he iloa ko Iehova e Punaaga he ha tautolu a malolo. (2 Korinito 1:3, 4; Filipi 4:13) Ko ia ne tohi e tau salamo ko Tavita, ne logona e ia e lagomatai mai he atua ti talahau mai: “Kia tuku atu hāu a puhala kia Iehova, kia tua foki a koe kia ia, ti eke ai e ia.” “Kia tuku atu kia Iehova e tau mena ne fakaatukehe ai a koe; ko ia ni ke fakamalolo a koe; nakai tuku e ia tukulagi e tau tagata tututonu ke fagahuatia.” (Salamo 37:5; 55:22) Lahi ha e fakaaue ha tautolu ke he tau lagomatai ia!

4. Foaki mai fefe e Peteru mo Paulo e tau fakamafanaaga?

⁴ Mafanatia foki a tautolu he iloa nakai ni ko tautolu hokoia ne feleveia mo e tau kamatamata mo e tau mena hagahaga kelea. Ko e aposetolo ko Peteru ne fakamalolo e tau matakainaga Kerisiano: “Kia totoko atu a mutolu kia ia [Satani ko e Tiapolo], mo e mauokafua a mutolu ke he tua, he iloa e mutolu ha ne fakakatoatoa e tau mena mamahi ia ni ke he tau matakainaga ha mutolu ha he lalolagi.” (1 Peteru 5:9) Ko e moli, manako e tau Kerisiano oti ke mauokafua ke he tua. Ko e moli, fa mahani a tautolu ke logona e ‘matematekelea ke he tau mena oti,’ tuga e aposetolo ko Paulo. Ka e taha e mena, ne nakai “fakaatukehe” a ia. Ke tuga a ia, to fakaatukehe a tautolu “ka e nakai mahalohalo noa.” Pete ne favale mai ki a tautolu, ka e ‘nakai tiaki a tautolu.’ Kaeke ke “palu hifo,” ka e “nakai mahaikava” a tautolu. Ko e mena ia, ‘nakai fakalolelole a tautolu.’ Ne fakamakamaka a tautolu ke ‘nakai manamanatu ke he tau mena kua kitia, ka ko e tau mena nakai kitia.’ (2 Korinito 4:8, 9, 16, 18) Maeke fefe ia tautolu ke taute e mena nei?

5. Ko e heigoa e tau lagomatai fatua tolu ne foaki mai e Iehova?

⁵ Ko Iehova, ko e “fanogonogo liogi,” ne foaki mai e tau lagomatai ne fatua tolu. (Salamo 65:2; 1 Ioane 5:14) Fakamua, ne foaki mai e ia e puhala ha ko e hana a Kupu mai he agaga, ko e Tohi Tapu. (Salamo 119:105; 2 Timoteo 3:16) Ke ua aki, ko e hana a agaga tapu ne fakamalolo a tautolu ke taute hana a finagalo. (Fakatatai Gahua 4:29-31.) Mena ke tolu aki, ko e fakapotopotoaga a Iehova he lalolagi ne mautali ke lagomatai a tautolu. Ko e heigoa ha tautolu ke taute ke moua e lagomatai?

‘Tau Mena Fakaalofa ko e Tau Tagata’

6. Ko e heigoa e lagomatai ne foaki e Iehova i Tapara, mo e foaki fefe?

⁶ Ko e mena ne tupu ke he vaha he perofeta ko Mose kua lagomatai aki a tautolu ke fakaaue ke he fakaalofa a Iehova ha kua foaki mai e tau lagomatai ma e Hana a tau fekafekau. Ne tupu e mena nei i Tapara, kakano ko e “vela; afi lahi mahaki; afi puhopuho.” Ko e matakavi nei he tutakale i Sinai, ne tugi he Atua e afi ke he fanau Isaraela ne gugu. Ko e “tau tagata kehe tokologa” ne o fakalataha mo e tau tagata Isaraela mai i Aikupito ne kau fakalataha mo lautolu ke talahau e nakai makona ke he kai ne foaki mai fakaatua. Ne mailoga ai e ita he Atua mo e tanumia ke he kavega mamafa ke he tau tagata mo e ha lautolu a tau manako, ati tagi ai a Mose: “Nakai fahia au ke hahamo tokotaha e kavega he motu oti nai, ha kua mamafa ue atu ia kia au. Kaeke foki ke eke pihia e koe kia au, kua olelalo atu ni e au kaeke kua ofania au e koe, kia kelipopo ni e koe au, ka e aua neke kitia e au haku a matematekelea.” (Numera 11:1-15) Fefe e tali a Iehova? Ne kotofa e ia “tokofitugofulu he tau patu a Isaraela” mo e tuku e ia hana a agaga ia lautolu ke maeke ia lautolu ke lagomatai e tau gahua fakatokatoka mo Mose. (Numera 11:16, 17, 24, 25) Ko e tau tagata kua lata ia ne fifili, ti mukamuka e tau lagomatai ke moua he tau Isaraela mo e “tau tagata kehe tokologa.”​—Esoto 12:38.

7, 8. (a) Foaki fefe e Iehova e “tau mena fakaalofa [ko e] tau tagata” i Isaraela i tuai? (e) Ko e heigoa e fakaaogaaga he senetenari fakamua he Salamo 68:18 ne taute e Paulo?

⁷ Mole e loga e tau tau he nonofo e fanau Isaraela he Motu he Maveheaga, ne hake ko e mena fakatai a Iehova he mouga i Siona ti taute a Ierusalema mo maaga lahi he vahega fakakautu mo Tavita ko e hana a patuiki. Ke he fakahekeaga ke he Atua, ko e “malolo oti kana,” ne lagaki hake e leo ha Tavita ke lologo: “Ne haele hake a koe ke he mena tokoluga, ne takitaki e koe e tau tagata ne fofo ke he fakapaeaaga; ne moua e koe e tau mena fakaalofa [ko e] tau tagata.” (Salamo 68:14, 18) Ko e moli, ko e tau tagata ne fofo mai he kautu he Motu he Maveheaga ne moua ke lagomatai e tau Levi mo e ha lautolu a tau gahua.​—Esera 8:20.

⁸ Ke he senetenari fakamua V.N., ko e aposetolo Kerisiano ko Paulo ne liu fatiaki e fakamoliaga fakaperofeta e tau kupu he salamo. Ne tohi e Paulo: “Ka kua ta mai kia tautolu takitokotaha e fakaalofa noa fakalata mo e mena foaki noa mai e Keriso. Ko e mena ia ne pehe mai ai a ia, Ne haele hake a ia ki luga, ne takitaki e ia e tau tagata ne fofo he tau ke he fakapaeāga; ne foaki noa mai foki e ia e tau mena fakaalofa [ko e] tau tagata. (Hanai, Ne haele hake a ia, ko e heigoa e kakano he kupu ia, kaeke ke nakai pehe, Ne haele hifo fakamua a ia ke he mena tokolalo he lalolagi? Ko ia ne haele hifo, ko ia haia foki kua haele hake ki luga he tau lagi oti, kia fakapuke ai e ia e tau mena oti kana).” (Efeso 4:7-10) Ko hai a “ia” nei? Nakai fai foki ka ko e hukui ha Iehova, ko e Tavita mua ue atu mo e ko e Patuiki faka-Mesia, ko Iesu Keriso. Ko ia haia ne fakaliu tu mai he Atua mo e fakatokoluga ke he “tuaga tokoluga.”​—Filipi 2:5-11, NW.

9. (a) Ko hai e tau mena fakaalofa ko e tau tagata he senetenari fakamua? (e) Ko hai e tau mena fakaalofa ko e tau tagata he vaha nei?

⁹ Ko hai a lautolu nei ko e “tau mena fakaalofa [ko e] tau tagata” (“po ke fakalataha ai e tau tagata”)? Ne fakamaama mai e Paulo ko e Hukui Mua ue atu he Atua ne foaki “falu ke eke mo tau aposetolo, ko e falu foki ke eke mo tau perofeta, ko e falu foki ke fakamatala e vagahau mitaki, ko e falu foki ke eke mo tau leoleo katoa mo e tau akoako. Kia fakakatoatoa ai e mitaki he tau tagata tapu, ke eke ai e lautolu e tau gahua he tau fekafekau, kia ati hake ai e tino a Keriso.” (Efeso 4:11, 12) Ko e tau tutaki oti ha Keriso ne fekafekau ko e tau aposetolo, tau perofeta, tau tagata evagelia, tau leveki mamoe, mo e tau faiaoga ne gahua ki lalo hifo he takitakiaga he pule fakaatua. (Luka 6:12-16; Gahua 8:12; 11:27, 28; 15:22; 1 Peteru 5:1-3) Ke he vaha nei ha tautolu, ko e tau matakainaga momotua kua lata fakaagaga ne fifili he agaga tapu ke fekafekau ko e tau leveki ke he tau fakapotopotoaga 70,000 he Tau Fakamoli a Iehova he lalolagi oti. Ko lautolu haia ko e ha tautolu a tau mena fakaalofa ko e tau tagata. (Gahua 20:28) Ke he fakalaulahiaga he gahua fakamatala he Kautu ke he lalolagi ne matutaki ke tupu, ne tokologa e tau matakainaga tane ne ‘foli atu ki mua’ mo e fua e tau kavega ne lago ia ke he “feua he epikopo.” (1 Timoteo 3:1) Ke he magaaho ka kotofa ai, kua eke a lautolu foki mo tau mena fakaalofa ko e tau tagata.

10. Lata fefe e fakamaamaaga ha Isaia ke he “tau iki” mo e tau gahua he tau motua Kerisiano he vaha nei?

¹⁰ Ko e tau motua Kerisiano nei, po ke tau mena fakaalofa ko e tau tagata, ne lata tonu mo e fakamaamaaga he perofeta ko Isaia ne talahau ke he gahua he tau “iki,” ko e tau pule ki lalo hifo he pule he Kautu. Igatia a lautolu ko e tau “fakamumuliaga mai he matagi, mo e mena ke malu ai ka to e afa, ke tuga ne tau vailele ke he motu paku lā, ke tuga ne malu foki he kau maka lahi ke he motu nakai fai vai.” (Isaia 32:1, 2) Ne fakakite he mena nei e lagomatai he tau levekiaga fakaalofa he tau tagata fifili nei. Maeke fefe e tau mena nei ke aoga katoatoa lahi ki a koe?

Kia Fakamakai

11. Kaeke ke lolelole fakaagaga, maeke fefe a tautolu ke moua e tau lagomatai?

¹¹ Ko e tagata tomo ne mafiti ke tagi ke moua e lagomatai. Ne nakai fai fakauaua e mena nei. Ka hagahaga kelea e moui, ne nakai fai tagata ke fakaohooho ke kumi lagomatai. Nakai kia ui lagomatai tumau a Tavita ke moua mai ia Iehova? (Salamo 3:4; 4:1; 5:1-3; 17:1, 6; 34:6, 17-19; 39:12) Ka lolelole fakaagaga, liga ko e tomo ke he fakaatukehe, ko e hagaao na tautolu ki a Iehova ke he tau liogi mo e ole ki a ia ke takitaki he hana a agaga tapu a tautolu. (Salamo 55:22; Filipi 4:6, 7) Ne kumi e tautolu e mafanatia mai he tau Tohiaga Tapu. (Roma 15:4) Ne kumi a tautolu ke he tau tohi Kerisiano he Kaufakalatahaaga he Kolo Toko ke he tau fakatonuaga kua gahuahua. Na fa mahani e mena nei ke maeke ia tautolu ke taute ha tautolu a tau mena vihi. Kaeke ke tuga kua tanumia a tautolu ke he tau mena uka, ti maeke foki a tautolu ke kumi e tau fakatonuaga he tau motua kua fifili he fakapotopotoaga. Ko e moli, to ha ha i ai e falu magaaho ne kua lata lahi ia tautolu ke “ui atu . . . ke he tau patu.” Ko e ha ne ui ai ke he tau motua Kerisiano? Maeke fefe a lautolu ke lagomatai a lautolu ia ne kumi lagomatai fakaagaga?

12-14. (a) Ko e heigoa e puhala tonu ke o ai kaeke ke gagao e taha? (e) Ke lata mo e Iakopo 5:14, ko e heigoa kua fakatonu mai ke taute he tau Kerisiano “gagao”? (i) Ko e vahega gagao fefe ne hagaao ki ai e Iakopo 5:14, mo e ko e ha ne tali ai a koe?

¹² Kaeke ke gagao a tautolu, ti okioki a tautolu ke fai magaaho e tino ke gahuahua e malolo fakamaulu. Ka e kaeke ke tumau e gagao ha tautolu, ti iloilo a tautolu ke kumi lagomatai ke he tau tagata fakamalolo tino kua lata. Nakai kia kua lata foki a tautolu ke taute pihia kaeke kua lolelole fakaagaga a tautolu?

¹³ Mailoga la e fakatonu mai he tutaki ko Iakopo kia tautolu hagaao ia ke he mena nei. Ne pehe a ia: “Kua gagao kia taha ia mutolu? Kia ui atu a ia ke he tau patu he ekalesia, kia liogi a lautolu mo ia, mo e fakatākai a ia ke he magalolo ke he higoa [ha Iehova].” (Iakopo 5:14) Ko e vahega gagao fefe a nei ne hagaao a Iakopo ki ai? Ko e pehe e falu a tohi tala ke he Tohi Tapu ko e hagaao ke he gagao he tino, kakano ha ko e fakatākai aki e lolo ko e vai fa mahani ai ke he vaha ia. (Luka 10:34) Ne taofi foki e lautolu ko e manatu a Iakopo ke he fakamaloloaga fakamana puhala mai he mena fakaalofa ko e fakamaulu. Ka e fefe he fakakite mai he veveheaga katoa?

¹⁴ Ne kehe mai e “matematekelea” mo e ‘agaga fiafia.’ Ko e kakano he mena nei ko e tutala a Iakopo ke he gagao fakaagaga. (Iakopo 5:13) Ko e tau “patu [tau motua, King James Version] he ekalesia,” nakai ko e tau toketa po ko lautolu ne ha ha i ai e malolo ke fakamaulu, ka ui ki ai. Mo e ko e heigoa ha lautolu ke taute? Ne pehe a Iakopo: “Kia liogi a lautolu mo ia. . . . To fakamoui e tagata gagao ke he liogi kua eke mo e tua.” (Iakopo 5:14, 15; fakatatai Salamo 119:9-16.) Ka fakamoli ko e hagaao a Iakopo ke he gagao fakaagaga ha ko e moli ko e mena fakamalolo e ia ke fakakite e tau hala ke lata mo e amaamanakiaga ke fakamaulu. Ne tohi e ia: “Kia fefakakiteaki ha mutolu a tau holifono, mo e liogi ko e taha ma taha, kia fakamalolo ai a mutolu.” Kaeke ko e hala kelea lahi ati tupu ai e gagao fakaagaga, ko e maeke ne tagata gagao ke malolo kaeke ke talia e tau fakatonuaga ne fakave ke he Kupu he Atua, tokihala, mo e fuluhi kehe mai he hana a puhala agahala.​—Iakopo 5:16; Gahua 3:19.

15. Ko e vahega gahua fefe ne talahau mai he Iakopo 5:13, 14?

¹⁵ Ha ha i ai foki taha mena ke mailoga ke he fakatonuaga ne foaki mai e Iakopo. Kaeke ke matematekelea he mamahi, kua lata he Kerisiano ke fakatumau e “liogi.” Kaeke ke ha ha ia ia e agaga fiafia, ‘kia lologo e ia e tau salamo.’ He tau tuaga takitaha​—ko e matematekelea po ke ha ha i ai e agaga fiafia​—kua lata ni ke fai gahua ke taute. Kua lata ke liogi, tau leo fiafia ke he taha fahi. Ti ko e heigoa e amaamanakiaga ha tautolu ke he huhu ha Iakopo: “Kua gagao kia taha ia mutolu?” Ne liu talahau mai e ia ke gahua mitaki, e, kia fakamakai. “Kia ui atu a ia ke he tau patu he ekalesia.”​—Salamo 50:15; Efeso 5:19; Kolose 3:16.

Lagomatai Fefe he “Tau Patu”

16, 17. Maeke fefe he tau patu ke lagomatai a tautolu ke fakagahua e tau fakatufono Tohi Tapu?

¹⁶ Ne uka ia tautolu ke he falu a magaaho ke iloa ko e fakaaoga fefe e tau fakatonuaga he Tohi Tapu ke he ha tautolu a tau tutuaga. Ko e mena ha nei ke lagomatai he tau motua Kerisiano. Tuga a nei, ko lautolu ke liogi a ia ne gagao fakaagaga mo e ‘fakatakai a ia aki e lolo ke he higoa a Iehova’ ha ko e fakaaogaaga iloilo he tau fakaakoaga mai he Kupu he Atua. Maeke he tau motua ke lahi e lagomatai ke fakamaulu a tautolu fakaagaga. (Salamo 141:5) Na fa mahani ko e mena ni ha tautolu ke moua ko e fakamoliaga kua hako ha tautolu a tau fakakakano. Ka fakatutala e tau mena mo e motua Kerisiano kua iloa mena ke maeke ke fakamalolo ha tautolu a fakamakamaka ke taute e mena hako.​—Fakatai 27:17.

¹⁷ Ka fina atu ke ahiahi, ko e tau motua Kerisiano ka “fakamafana a lautolu kua manava tote, kia lagomatai kia lautolu kua lolelole, kia fakauka ke he tau tagata oti kana.” (1 Tesalonia 5:14) Ko e fakafetuiaga tata lahi mo e maama pihia he vahaloto he “tau patu” mo lautolu ne “lolelole” ke fakamukamuka e puhala ke maulu fakaagaga.

Ko e Matagahua he Tagata mo e Liogi

18, 19. Ko e heigoa e gahua he tau motua Kerisiano ke lata mo e Kalatia 6:2, 5?

¹⁸ Ko e tau motua Kerisiano kua lata ke hahamo ha lautolu a matagahua ke he fuifui mamoe he Atua. Kua lata a lautolu ke lagomatai. Tuga a nei, ne pehe a Paulo: “Ko e tau matakainaga na e, kaeke ke moua he tagata he taha holifono ko mutolu kua mahani fakalata ke he Agaga, kia liuaki mai e mutolu a ia kua pihia mo e loto he mahani molu, kia fakaeneene a koe neke kamatamata foki a koe. Kia fetogiaki a mutolu ke he ha mutolu a tau kavega ke fua, mo e fakamoli pihia e fakatufono a Keriso.” Ne tohi mai foki he aposetolo: “Ha ko e mena to igatia e tagata mo e fua hana ni a kavega.”​—Kalatia 6:1, 2, 5.

¹⁹ Maeke fefe a tautolu ke fua e tau kavega mamafa he taha ti fua foki ha tautolu ni a kavega? Ko e kehekehe he kakano he tau kupu Heleni ne fakaliliu ko e ‘tau kavega mamafa’ mo e “kavega” ke moua aki e tali. Kaeke ke to e Kerisiano ke he mena vihi fakaagaga ne kua fakakavega lahi ki a ia, to lagomatai he tau motua mo e falu matakainaga he tua a ia, ke fua hana a ‘tau kavega mamafa.’ Ka e taha e mena, ko ia ko e tagata kua lata ke fua ne ia hana a “kavega” he tau gahua he Atua.a Ne fiafia e tau motua ke fua e ‘tau kavega’ he ha lautolu a tau matakainaga ha ko e tau fakamaloloaga, fakatonuaga mai he tau Tohiaga Tapu, mo e liogi. Ka e taha e mena, ko e tau motua ne nakai utakehe ha tautolu a tau “kavega” ke he tau gahua fakaagaga.​—Roma 15:1.

20. Ko e ha e liogi ne nakai lata ke tiaki?

²⁰ Kua aoga lahi e liogi ti nakai lata ke tiaki. Ka e tokologa e tau Kerisiano gagao fakaagaga ne uka lahi ke liogi. Ke he tau magaaho ka taute he tau motua e tau liogi he tua ma e tau tagata gagao fakaagaga, ko e heigoa e amaamanakiaga? “To fakatu foki he Iki a ia,” mai he fakaatukehe, mo e to fakamalolo a ia ke tutuli e puhala he kupu moli mo e tututonu. Ko e Kerisiano gagao fakaagaga ne liga hepe e tau manamanatuaga ka e liga nakai taute ha hala kelea lahi he pehe a Iakopo: “Kaeke foki kua hala a ia, to fakamagalo ai.” Ko e fakatonuaga mai he Tohiaga Tapu fakalataha mo e liogi fakamakamaka he tau motua he falu a magaaho ne fakalagalaga e tagata lolelole fakaagaga ke fakakite e tau hala lalahi ne liga kua taute e ia mo e fakakite e agaga tokihala. Ko e mena nei foki, ka foaki mai he Atua e fakamagaloaga.​—Iakopo 5:15, 16.

21. (a) Ko e ha ne uka ai e falu Kerisiano ke ui atu ke he tau patu? (e) Ko e heigoa ka hagaao ki ai e vala tala ne toe?

²¹ Feleveia mo e uka he leveki e tokologa ne o mai fou ke he fakapotopotoaga Kerisiano, ko e tau patu ne gahua fakamakutu ne lahi e tau mena ne taute ke foaki e tau levekiaga kua lata. Ko e moli, ko e tau mena fakaalofa ko e tau tagata ko e tau mena foaki mai e Iehova ke lagomatai aki a tautolu ke fakauka ke he vaha uka nei. Ka e taha e mena, ko e falu a Kerisiano ne tolomuli ki tua ke kumi lagomatai atu ki a lautolu, mo e tau manamanatuaga kua lavelave lahi e tau matakainaga nei po ke lahi e tau mena fakakavega mamafa he tau mena vihi. Ko e vala tala ne toe ka lagomatai a tautolu ke fakaaue ke he tau tagata nei ne fiafia ke lagomatai, ha kua talia fiafia a lautolu ke fekafekau ko e tau leveki mamoe ke he fakapotopotoaga Kerisiano.

[Tau Matahui Tala]

To Tali Fefe e Koe?

◻ Ke he magaaho ka manako lagomatai a koe, ko e heigoa e tau lagomatai fatua tolu ne foaki mai e Iehova?

◻ Ko hai e tau mena fakaalofa ko e tau tagata he vaha nei?

◻ Ko e magaaho fe ka kumi e tautolu e tau patu?

◻ Ko e heigoa e tau lagomatai ne amaamanaki a tautolu ke moua mai he tau motua Kerisiano?

[Fakatino he lau 11]

Olioli nakai a koe ke he tau fakamonuinaaga fakaagaga he liogi, aoga Tohi Tapu, mo e lagomatai mai he tau motua Kerisiano?